Yoane 7

Ina yakwe Yesu yatamutaile

1Pacisila ca vintu vii, Yesu wapitanga mu Galile, atakasi kupitana mu Yudeya pano Ayuda yalondanga kumukoma. 2#Levi 23:34; Malg 16:13 Lelo lino wanda wakuzezya Cimulo ca Nsakwe ca Ayuda wapalama, 3aina yakwe Yesu yamunena yati, “Fuma ku cifulo cii uye ku Yudeya, kuti alondezi yako yakalole milimo ino ukacita. 4Pasi umuntu akafisa milimo yakwe nda kulonda kuti amanyikwe na antu. Pano ndu kucita vintu vii leka antu yonsi yamanye.” 5Na ina yakwe kwene yatamutaile. 6Lelo Yesu ayanena ati, “Kasita kane katali kize. Mwemo kasita kinu apano kali. 7Mwemo amu nsi yatangayamupate, lelo nemo yampata pano nkayanena vino vicitwa vyao iviipe. 8Mwemo yangini ku kuzevya cimulo. Nemo ntakuya ku kuzezya cimulo cii ndakai, pano kasita kane katali kafike.” 9Lino wayanena vintu vii, wene asyala atenzi mu Galile.

Yesu ku kuzevya kwa Cimulo ca Nsakwe

10Pacisila lino aina yakwe yapita ku kuzevya cimulo cici, Yesu nawe aya. Ataile paswe, lelo waile asokelela sile. 11Ayuda yamulonda pa kuzevya kwa cimulo, yuzya yati, “Uzye alikwi?”

12Mwi umba mwali ukutotozana cuze pamulandu na aliwe. Yamwi yati, “Wene umuntu musuma”, nga yauze nao yati, “Awe! Pano akupuulola antu.” 13Lelo patali wakuti alande paswe pano yoopanga Ayuda.

14Lino manda ya kuzevya cimulo yafika pakasi, Yesu aingila mu Ng'anda ikulu yakwe Leza atandika kusambilizya. 15Ayuda yazunguka cuze, yavwanga yati, “Uzye umuntu wii wamanya uli malembelo, vino atasambilila?”

16Yesu ayanena ati, “Vino nkasambilizya visi vyakwane, lelo vikafuma kuli Tata wino uwantuma. 17Wino wensi akasi kucita kulonda kwakwe Leza wene angamanya ndi cakuti vino nkusambilizya vyafuma kuli Leza nanti nkuvwanga sile vyakwane. 18Wino akuvwanga vyakwakwe, ala akuilondela mucinzi. Lelo wino akulonda mucinzi wakwe wino uwamutuma wene uwa cumi, nu usomvi usi munoli. 19Uzye Mose atamupiile Masunde yakwe Leza? Lelo muli mwemwe musi nanti wenga akayela Masunde. Uzye pacani mukulonda kunkoma?”

20Iumba limunena liti, “Wemo uli nu mupasi wankota! Uzye aweni akulonda kukukoma?”

21Yesu ati, “Nacisile cilangililo conga, namwe mwensi muzunguka. 22#Uta 17:10; Levi 12:3 Mose wamupile ilamulo lya kusilamula ana aonsi (nanti angala asi Mose uwatandike, lelo ivikolwe vinu), nga namwe mukasilamula mwana pa Sabata kwene. 23#Yoa 5:9 Ndi cakuti mwana umonsi angasilamulwa pa Sabata pamulandu wakulondela Masunde yakwe Mose, uzye pacani mwansokela pano napozizye mulwale pa Sabata? 24Mutapingula mu milolekele ya vintu, lelo pingulini kulingana ni cumi.”

Uzye Yesu ali Katuula Uwalavilwe?

25Antu yamwi amu Yelusalemu yavwanga yati, “Uzye wii asi umuntu wino intunguluzi zya Ciyuda zikulonda kukoma? 26Lolini, wene akuvwanga paswe, nga kusi nanti wakumucilima! Uzye ale intunguluzi zyamanya ningo ukuti wene ali Katuula uwalavilwe? 27Lelo lino Katuula uwalavilwe aliza, pasi umuntu alamanya kuno wafuma. Lelo swemo twamanya kuno umuntu wii wafuma.”

28Lino Yesu wasambilizyanga mu Ng'anda ikulu yakwe Leza, asanzika izwi ati, “Uzye nemo mwamanya mu cumi, nga na kuno nafuma? Nemo ntaizila pa lwane. Lelo Tata wino uwantuma uwa cumi. Mwemo mutamumanya. 29Nemo namumanya, pano nafuma kunoli, nupya aliwe uwantuma.”

30Lyene yalonda kuti yamuleme, lelo patali umuntu uwakuti amuleme, pano kasita kakwe kalanga katali kafike. 31Lelo amwi umba aingi yamutaila yati, “Lino Katuula uwalavilwe aliza, uzye alacita vilangililo kuluta vii vino umuntu wii akucita?”

Yatuma asilika kuya lema Yesu

32Lino Afaliseo yuvwa vino iumba likutotozana vya pali Yesu, yene pamwi na yasimapepo akalamba yatuma yakalinda amu Ng'anda ikulu yakwe Leza kuti yakamuleme. 33Yesu avwanga ati, “Kwasyala kasita kanono nde ndi namwe, lyene nga mpite kuli Tata wino uwantumile. 34Mulandonda, lelo mutalanzana, pano mwemo mutangaya kuno ndikala.”

35Alino intunguluzi zya Ciyuda izyuzyanya ziti, “Uzye umuntu wii alaya kwi, kuno tutalamuzana? Uzye alaya ku misumba yaku Akulukuwa kuno antu itu yamwi yakaikala, kuti akasambilizye Akulukuwa? 36Uzye walozya mwi vino wati mulandonda lelo mutalanzana, pano mwemo mutangaya kuno ndikala?”

Inguzi izikapela manzi ya umi

37 # Levi 23:36 Pa wanda wa kumalila kuzevya kwa cimulo nupya uli wanda ukulu, Yesu aimilila, asanzika izwi ati, “Wino wensi ali nu lusala alinzile kwiza kunondi kuti amwe manzi! 38#Eze 47:1; Zak 14:8 Ndi vino malembelo yakati, ‘Wino wensi akuntaila mu mwenzo wakwe mulafuma inguzi zya manzi yano akapeela umi.’” 39Lino Yesu wavwanzile cii, wavwanzile pamulandu na Mupasi Wamuzilo wino yano amutaila yalapokelela. Pa nsita ilya walanga Mupasi Wamuzilo atali kuti apelwe, pano ala Yesu atali atumpulwe nu kupelwa ululumbi.

Antu Yapalukana

40Caleka yamwi mwi umba lino yuvwa mazwi yaa, yati, “Umuntu wii akasema mu cumi!”

41Yauze nao yavwanga yati, “Ali Katuula uwalavilwe!”

Lelo yamwi yati, “Uzye Katuula uwalavilwe wino tukalolela alafuma mu Galile? 42#2Sam 7:12; Mik 5:2 Uzye malembelo yatati Katuula alafuma mu mupanda wakwe Davidi, mu Betelemu, musumba muno Davidi wikalanga?” 43Acino kuya kupalukana mwi umba pamulandu wakwe. 44Na yamwi yalonda kuti yamuleme, lelo patali umuntu waisile makasa panoli.

Intunguluzi zya Ciyuda zyakana Kutaila

45Lino yakalinda yawela iiza kuli yasimapepo akalamba na Afaliseo. Nao yayauzya yati, “Uzye pacani cino mutamulemile mumulete?”

46Yakalinda yavwanga yati, “Kutatala kwaya umuntu akavwanga vyeo ndi vino umuntu wii akuvwanga.”

47Afaliseo nao yayauzya yati, Uzye namwe kwene mwapuululwa nawe? 48Uzye mumanyile umwi uwamu ntunguluzi zya Ciyuda nanti uwamu Afaliseo wino wamutaila? 49Lelo antu yaa atamanyile Masunde yakwe Leza, yene yali mu citipu.

50 # Yoa 3:1 Wenga uwamu Afaliseo yaa a Nikodemo wino uwaile kuli Yesu inkolelo, ayanena ati, 51“Kulingana na Masunde itu, uzye tulinzile kupingula umuntu lino tutali tuvwe kunoli nu kumanya vino watacita?”

52Nao yamunena yati, “Endi, uzye nawe kwene wewe uwamu Galile? Ulonde mu malembelo ndi umazana pano calembwa vino ku Galile kulafuma kasema.” [Umu mpapulo izyalemvilwe ku katalili kumwi ni mpapulo zyuze izya umboni zino tungasintililamo mutaya Yoane 7:53-8:11.] 53Lyene cila muntu aswilila ukwakwe.

Currently Selected:

Yoane 7: MamL13

Highlight

Copy