Yoane 5

1Pacisila cakwe cii, Yesu aya ku Yelusalemu ku cimulo ca Ayuda. 2Mu Yelusalemu, pipi ni mpongolo yamwangwa Mpongolo ya Mfwele, mwali ciziya cino mu cilimi ca Ciyuda camwangwa Betisaida, cino cazingulwikwe ni nkungu zisano. 3Mu nkungu mwalalanga alwale aingi, ni mpafu, yakasinta, ni vilema vya misango na misango, nga ni vite. [Yene yalolelanga kuvundolwa kwa manzi, 4Pano mu tusita tumwi tumwi mungeli wa Mwene wikilanga mu ciziya ku kuvundola manzi. Lyene umulwale wino wakolela kwingilamo lino manzi yavundolwa, wene apoziwa ku ndwala yonsi ino wali nayo.] 5Lyene pakasi kao pali umuntu wino walwile pa myaka makumi yatatu na cinani. 6Yesu nawe amulola alambalile papa, nupya wamanyile vino umuntu wii walwile pa nsita ntali. Caleka amunena ati, “Uzye ungatemwa kuti upole?”

7Mulwale nawe aasuka ati, “Mwene, ntakweti umuntu wakunjingizya mu ciziya lino manzi yavundolwa. Lino nkwezya kwingilamo, muze ankolelela.”

8Yesu nawe amunena ati, “Katuka nyemula citala cako nu kupita.” 9Lyene lilyo kwene umuntu apoziwa, anyemula, citala cakwe, nga atandika nu kupita.

Cii, cacitike pa wanda wi Sabata. 10#Nee 13:19; Yel 17:21 Caleka intunguluzi zya Ciyuda zimunena ziti, “Ilelo uwanda wi Sabata, nupya citaine na Masunde itu kuti wemo usende citala cako.”

11Lelo nawe ayanena ati, “Uwatampozya aliwe watanena kunyemula citala cane nu kutandika kupita.”

12Yamuuzya yati, “Uzye umuntu wiyo aweni, uwali wakunena kunyemula citala cako nu kupita?”

13Lelo umuntu uwapoziwe wene atamanyile wino uwamupozizye, pano Yesu ongolwike kufuma mwi umba ilyali penepo.

14Pacisila cakwe cii, Yesu amuzana mu Ng'anda ikulu yakwe Leza, nga amunena ati, “Lola, lyene watupoziwa. Caleka ute ukwifya pakuti cimwi cipisye kuluta cii citakakuponele.”

15Lyene umuntu apita, aya anena intunguluzi zya Ciyuda vino Yesu uwamupozizye. 16Caleka Ayuda yatandika kuzunya Yesu, pano wapozizye umulwale pa wanda wi Sabata. 17Lelo Yesu nawe ayanena ati, “Tata lyonsi akacita vintu wakwe cii, acino nani kwene ndinzile kucita wakwe cii.”

18Muvwango uu walenzile intunguluzi zya Ciyuda kupangila kumukoma, pasi pamulandu wa kuntayela isunde li Sabata sile, lelo na pamulandu wa kulanda ukuti Leza wene ali Isi wakwe nga nu kuilinganya na Leza.

Leza wapela maka ku mwana

19Caleka Yesu nawe anena intunguluzi zya Ciyuda ati, “Cumi, namunena vino, Mwana atangacita cimwi pa lwakwe. Wene akacita sile cino walola Isi akucita. Vino Isi akacita, avino nu Mwana kwene akacita. 20Pano Tata wantemwa ne Mwana nu kundanga vyonsi vino wene akacita. Wene alandanga navyuze kwene ivya kucita nupya ivya kuzunguka vilusile pali cii, nga namwe mulazunguka cuze. 21Pano vino Tata akatutulula afwe nu kuyapela umi, avino nu Mwana kwene akapeela wino akasi umi. 22Pano Tata asyapingula umuntu ali wensi. Lelo wapela Mwana insambu yonsi yakupingula, 23pakuti yonsi yacindike Mwana vino yacindika Isi. Wino asyakucindika Mwana, ala asyakucindika ni Isi wino wamutumile.

24“Cumi namunena vino, wensi wino akuuvwa mazwi yane, nu kutaila wino uwantumile, wene akweti umi wape, wene atalapingulwa, lelo wene watafuma ku mfwa aya ku umi. 25Cumi namunena vino, kasita kakwiza, nupya kati kafika, lino afwe yaluvwa izwi lya Mwana wakwe Leza. Lyene yano aluvwa izwi lyakwe yalaya nu umi. 26Vino Tata ali ntulo ya umi, avino walenga nu Mwana kwene kuti aye intulo ya umi. 27Isi wamupeela insambu yakupingula milandu pano wene Mwana wa Muntu. 28Mutazunguka pali cii pano kasita kakwiza, kano antu yonsi ali mu malindi yaluvwa izwi lyakwe, nu kufumamo. 29#Dan 12:2 Yano acitanga visuma yalazyukuka yaye nu umi. Na yano acitanga viipe yalazyukuka nu kuvunukwa.

Yakambone yakwe Yesu

30“Nemo ntangacita cimwi mu nsambu yane. Tata wanena vino ningapingula, nu upinguzi wane usi walufyengo pano nsyacita kulonda kwane, suka kulonda kwakwe Tata wino uwantuma.

31“Ndi nkuicitila umboni ale umboni wane usi uwa cumi. 32Lelo pali muze wino akapeela umboni pamulandu wane, nga namanya vino umboni uno akapeela uwa cumi. 33#Yoa 1:19; 3:27 Mwemo mwatumile nkombe kuli Yoane, nga vino wavwanzile ivya cumi. 34Asi kuti nemo nkalonda umboni wa muntu, lelo nkulanda sile vii pakuti mungatuulwa. 35Yoane wakoline wa kuyengesa kwi lampi lino likwaka, nga namwe mutemwa kuzangila mu luswepo lwakwe pa nsita inono sile. 36Umboni uno nkweti ulusile umboni wakwe Yoane. Pano milimo ino Tata wampeela kuti malile iili milimo ino nkacita. Milimo kwene ii, ikapela nu umboni wakuti Tata uwantuma. 37#Mat 3:17; Mk 1:11; Luk 3:22 Na Tata, wino uwantuma, nawe kwene akapeela umboni pali nene. Mwemo mutatala muvwa izwi lyakwe, nanti kumulola. 38Mazwi yakwe yasyaikala mu myenzo inu, pano mutataila Tata wino uwantuma. 39Mwemo mukalondelezya nu kusambilila mu malembelo, pano mukaelenganya vino mulazanamo umi wape. Malembelo kwene yaa yakapela umboni pamulandu wane. 40Lelo nalyo kwene mwemo mutakasi kwiza kunondi kuti muye nu umi wape.

41“Nemo nsikulonda kulumbanyiwa na antu. 42Lelo namanya vino mwaya. Namanya vino mu myenzo inu mutaya kutemwa Leza. 43Nemo nizila mwi zina lyakwe Tata, namwe musikunzengela. Muze ndi angiza mwi zina lyakwe na lwakwe, wene mulamuzengela. 44Uzye mungantaila uli, mwe muno mukacindikana mweisikulu, lelo mucinzi uno wafuma kuli Leza wenga, musyakuulonda? 45Mutaelenganya vino ndamulongwela kuli Tata. Apanoli wenga wino alamulongwela, a Mose kwene wino mwapaalilamo. 46Pano ndi mwataile Mose mucumi, nga mwataila nani kwene, pano walemvile ivya pali nene. 47Lelo ndi mutataila malembelo yakwe, uzye mungataila mazwi yane uli?”

Currently Selected:

Yoane 5: MamL13

Highlight

Copy