Yoane 16

1“Nati munena vintu vii kuti mutanenuka mu utailo winu. 2Yalamuzinga mu mang'anda ya mapepo, endi, na kasita kakwiza lino wino wensi wamukoma alelenganya vino pa kucita cii, akutumikila Leza. 3Antu yalacita vintu vii kunomuli pano yatamanya Tata, nanti anene. 4Lelo nati munena cii, kuti lino insita iliza yakuti antu yacite vintu vii, muliusya vino namunenyile.

Umulimo wakwe Mupasi wa Muzilo

“Ntamunenyile vintu vii kufuma lino natandike kuomba. 5Lelo ndakai nkuya kuli wino uwantumile, nga lelo kusi umwi uwa munomuli wakuti anguzye kuno nkuya. 6Lyene ndakai pano namunena vintu vii myenzo inu ili nu ulanda. 7Lelo nkumunena cumi vino camuzipila kuti mpite, pano ndi ntapisile kaazwa ataliza kunomuli. Lelo ndi napita lyene ndamutuma kunomuli. 8Nawe Mupasi alala wiza alasinila antu amu nsi vino yene aponge pamulandu wa maifyo na pa kuntamanya vya wololoke nga nu upinguzi wakwe Leza. 9Yene aponge pamulandu wa maifyo pano yatantaila. 10Yene aponge pamulandu wa kuntamanya vya wololoke, pano nemo nkuya kuli Tata nga mutalandola nupya. 11Yene aponge pamulandu wa kuntamanya upinguzi wakwe Leza pano Ciwa, kateeka wa nsi ii watavunukwa mpiti.

12“Nkweti vintu vyuze vingi vyakumunena, lelo ndakai mutangavyuvwa. 13Lelo lino Mupasi wa cumi aliza, wene alamutungulula ku cumi cakwe Leza consi. Pano atalaivwangila. Lelo vintu vyonsi vino alauvwa avino alavwanga, nga alamumanyisya ni vintu ivili nu kwiza. 14Alampeela lulumbi, pano alatola mazwi yane nga amunene. 15Vintu vyonsi vino Tata wakwata ivyakwane. Acino nati mvwanga vino wene alatola mazwi yane, amunene.

Ulanda ulasenuka uye nsansa

16“Pa kasita kanono mutalandola nupya, nga nupya pa kasita kanono mulandola.”

17Caleka alondezi yakwe yamwi yauzyanya yati, “Uzye cii cikusenula cani? Wene watunena vino pa kasita kanono tutalamulola, nga nupya pa kasita kanono tulamulola. Alino nupya ayanena ati, ‘Pano nkuya kuli Tata.’ 18Uzye vino akuvwanga ukuti pa kasita kanono cikusenula cani? Tutamanyile cino akuvwanga!”

19Yesu amanya vino yakasi kumuuzya, caleka ayanena ati, “Uzye mukuuzyanya pali cino nali namunena nati, ‘Pa kasita kanono mutalandola, nga pa kasita kanono mulandola nupya.’” 20Cumi nkumunena vino mulalila nu kulosya, lelo amu nsi yalasansamuka. Mulaya nu ulanda lelo ulanda winu ulasenuka uye insansa. 21Lino umwanaci ali pipi nu kuvyala, akaya nu ulanda pano kasita kakwe ka ucuzi ala kati kiiza. Lelo lino mwana wavyalwa, umwanaci asyaiusya kucula kwakwe, pano ali ni nsansa pamulandu wa kuvyalwa kwa mwana mu nsi. 22Vii avino cili kunomuli. Ndakai muli nu ulanda, lelo ndiza mulole nupya, nga ni myenzo inu ilazulamo ni nsansa zino pasi umuntu nanti umwi angazisisya kufuma kunomuli.

23“Pa wanda ulya, mutalanguzya pamulandu wa cintu cili consi. Nkumunena cumi vino Tata alamupeela consi cino mulamulenga mwi zina lyane. 24Kufika na ndakai mutali mulenge cimwi mwi zina lyane. Lengini nga mulapelwa, kuti muzange cuze.

Yesu wacimvya insi

25“Vintu vii nkamunenela mu milumbe. Lelo kasita kakwiza lino ntalamunenela mu milumbe, lelo ndamunena paswe vya pamulandu na Tata. 26Pa wanda ulya, mulalenga Tata mwi zina lyane. Nsyakuti nemo ndamulengela kuli Tata, 27pano Tata umwisikulu wamutemwa. Wene wamutemwa pano mwemo mwantemwa nga nu kutaila vino nafumile kunoli. 28Nafumile kuli Tata, nga niza mu nsi. Nupya ndakai namasya insi nu kuya kuli Tata.”

29Lyene alondezi yakwe yamunena yati, “Lola lyene wavwanga paswe, utavwanzile mu milumbe. 30Lyene twamanya vino wemo wamanya vintu vyonsi nga usyalonda kuti umuntu umwi akuuzye. Cikwene catulenga kutaila vino wafuma kuli Leza.”

31Yesu ayanena ati, “Uzye ndakai mwataila? 32Lolini kasita kakwiza, endi, kati kiza lino mulasalangana, cila muntu alapita ukwakwe nga munsye nenga. Lelo mu cumi nsi nenga, pano Tata ali nani. 33Nati munena vintu vii pakuti muzane mutende munondi. Lino mucili mu nsi mulacula. Lelo posyini! Nemo nati ncimvya maka amu nsi ii.”

Currently Selected:

Yoane 16: MamL13

Highlight

Copy