Yoane 12

Yesu yamupongolwela amafuta ku Betaniya

1Kwasile sile manda mutanda kufika ku kuzevya Cimulo ca Ucilo, nga Yesu aiiza ku Betaniya kuno Lazalo wikalanga wino wazyukwike kwi zwi lyakwe. 2Kuku akuno yateinye ku mwimula. Mata wayazwilizye kutumikila pa Cimulo cii, lino Lazalo wene wali pali yao atenzi na Yesu pa cipango ala yakulya. 3#Luk 7:37 Alino Maliya atoola amafuta ya nadi kulingana na citika wakwe lita, amafuta acinunu nupya amutengo ukome cuze. Alino ayapongolwela pa ngazo zyakwe Yesu, nga amukumbula ingazo ni nyele zyakwe. Lyene ing'anda izulamo kununkila kusuma kwa mafuta. 4Lyene Yuda Iskalyoti, wenga uwamu alondezi yakwe, wino uwali nu kumukoopa, avwanga ati, 5“Uzye pacani amafuta yaa yatakaziwe pa mpiya myanda itatu, nga ni mpiya zipelwe ku apina?” 6Wavwanzile cii, asi pamulandu wa kusakamala apina, lelo pano wali umwivi. Wene wali akasunga wa cipao, lelo wiyangamo.

7Lelo Yesu avwanga ati, “Mulekini! Wene watasunga amafuta yaa acinunu cisuma kukuteyanyizizya wanda wa kuzikwa kwane. 8#Malg 15:11 Apina mukaya nao pe, lelo nemo mutalaya nani pe.”

Yapangana kukoma Lazalo

9Lino iumba likulu lyuvwa ukuti Yesu ali ku Betaniya, liya kweneko, asi kukulola sile Yesu, lelo kukulola na Lazalo kwene, wino wazyukwike kwi zwi lyakwe Yesu. 10Lyene yasimapepo akalamba yapangana kukoma na Lazalo kwene, 11pano Ayuda aingi pamulandu wakwe Lazalo yakananga yasimapepo nu kutaila Yesu.

Yesu wingila nu ucindami mu Yelusalemu

(Mat 21:1-11; Mk 11:1-11; Luk 19:28-40)

12Uca katondo iumba likulu lino lizile ku Cimulo ca Ucilo, lyuvwa ukuti Yesu akwiza ku Yelusalemu. 13#Mas 118:25 Caleka yatoola makambalala ya mikoma, yazuka yakumukomanya yasanzika mazwi yati, “Mucinzi upelwe kuli Leza! Walongo awiyo akwiza mwi zina lya Mwene! Walongo a Kateeka wa Izlaeli!”

14Lyene lino Yesu wazana mwana punda, nga akwelapo ndi vino calembwa mu malembelo cati,

15 # Zak 9:9 “Mutoopa,

mwe antu amu musumba wa Zioni!

Lolini, Mwene winu akwiza,

watakwela pali mwana punda.”

16Pa kasita kaka alondezi yakwe yatilwike vintu vii. Lelo lino Yesu watumpwilwe nu kupelwa lulumbi, yene iusya vino malembelo yalanda cii pali aliwe, nga na vino yamucitile vintu vii.

17Caleka iumba lino lyali nawe lino wamile Lazalo kuti afume mwi lindi, nga nawe azyukuka, lyaile lipela umboni pali vino vyacitike. 18Pamulandu kwene uu, iumba lyaile limukomanya, pano lyuvwile vino wacisile cilangililo cii. 19Caleka Afaliseo yavwanzyanya yati, “Lolini, tukuicuzya sile! Mwalola, antu yonsi yakumulondela.”

Agiliki yamwi yalonda kulola Yesu

20Pali yao aile ku Yelusalemu ku kupepa Leza pa nsita ya kuzevya Cimulo ca Ucilo, pali Agiliki yamwi. 21Yaile kuli Filipo (wino uwali uwaku Betisaida ku Galile,) yamunena yati, “Mukwai tukulonda kuti tulole Yesu.”

22Filipo aya anena Andeleya, nga yaa oili yaya yanena Yesu. 23Yesu avwanga ati, “Kasita kati kafika kuti Mwana wa Muntu apelwe lulumbi lukulu cuze. 24Cumi namunena vino lupece lwa ngano luno lwaponela mu musili lutanga sanduluka, suka ndi lwatala lwafwa. Lelo ndi lwafwa, lyene lumaleta mpece zyuze zingi lino lwaseeka. 25#Mat 10:39; 16:25; Mk 8:35; Luk 9:24; 17:33 Wino wensi uwatemwa umi wakwe alauponzya, na wino wensi uwapata umi wakwe mu nsi ii, wene alapeelwa umi wape. 26Wino wensi akulonda kuntumikila alinzile kundondela, kuti kuno naya, nu muomvi wane kwene aye nani. Tata alacindamika wensi akantumikila

Yesu wasowela pa mfwa yakwe

27“Ndakai nuvwa ulanda cuze mu mwenzo. Uzye namavwanga cani? Uzye namavwanga inti, ‘Tata, untuule mu kasita kaa ka macuzi?’ Lelo uli mulandu uno nizile, kuti mpite mu kasita kaa ka ucuzi. 28Tata, langa antu yonsi lulumbi lwi zina lyako!” Alino izwi lifuma mwiyulu liti, “Nati ndangizya antu lulumbi lwane nga ndacita cii nupya kwene.”

29Alino iumba ilimilile penepo lyuvwa izwi, nga yamwi mwi umba yalanda ukuti ukupangalansya kwa nkuwa, nga nayauze nao yati, “Mungeli uwatavwanga nawe!”

30Lelo Yesu avwanga ati, “Asi pamulandu wane pano izwi lii lyali lyavwangwa, lelo apamulandu wa kwazwa mwemwe. 31Ndakai, akasita ka kupingula antu amu nsi ii. Ndakai Ciwa kateeka wa nsi ii akucimviwa. 32Lelo lino nemo ndasamikwa ku cimuti, ndaongwela antu yonsi kunondi.” (33Wavwanzile vii kuti alange musango wa mfwa ino alafwa.)

34 # Mas 110:4; Eza 9:7; Eze 37:25; Dan 7:14 Caleka iumba limunena liti, “Tuvwile mu Masunde itu vino Katuula uwalavilwe alaya nu umi manda pe. Uzye lyene wemo ungavwanga uli uti, Mwana wa Muntu alinzile kusamikwa pa cimuti? Uzye Mwana wa Muntu wii aweni?”

35Yesu avwanga ati, “Mumaya nu luswepo pa kasita kanono. Mwapita lino muli nu luswepo, pakuti mfinzi itangaya panomuli. Pano wino akupita mu mfinzi asimanya na kuno akuya. 36Lino muli nu luswepo, tailini luswepo kuti muye antu akaikala mu luswepo.” Pacisila lino Yesu wavwanga vii, aya aikala kufisame.

Ayuda yakana kutaila Yesu

37Nanti angala Yesu wacisile vilangililo vii vyonsi pa manso ya Ayuda, yene yatamutaile. 38#Eza 53:1 Pakuti vifikiliziwe vino kasema Ezaya wavwanzile ati,

“Mwene, uzye aweni wataile

Ilandwe lino twavwanzile?

Uzye akuli weni kuno Leza

wasokolwile maka yakwe?”

39Caleka yaposiwe kutaila, pano Ezaya nupya wavwanzile ati,

40 # Eza 6:10 “Leza watapafuzya manso yao,

nu kukomya myenzo yao,

pakuti manso yao yatalola

nanti yakampingu yao iiluke,

pano limwi yangiza kunondi ne Leza,

nga nane njapozye.”

41Ezaya wavwanzile vii, pano waweni lulumbi lwakwe Yesu nga avwanga pamulandu na aliwe

42Nanti angala cali vii, aingi mu ntunguluzi zya Ciyuda yataile muli Yesu. Lelo pamulandu wa Afaliseo, yene yatalandanga cii paswe kuti yatazingwa mu ng'anda ya mapepo. 43Yene yatemilwe kulumbanyiwa na antu kuluta kutasiwa na Leza.

Amazwi yakwe Yesu alapingula antu

44Yesu asanzika izwi ati, “Wino wantaila, ala atataile nene nenga, lelo wataila na wino uwantuma. 45Na wino wensi wandola, ala walola na wino uwantuma. 46Nemo niza wa luswepo lwamu nsi, kuti wino wensi wantaila atakikale mu mfinzi. 47Muntu umwi nda akuuvwa mazwi yane lelo asikuyela, nemo ntalamupingula. Pano ntiza ku kupingula amu nsi, lelo niza ku kuyatuula. 48Na wino wensi uwankana, wasula mazwi yane, akunoli alamupingula. Mazwi kwene yano nkalanda alamupingula pa wanda wampelelekezyo. 49Pano ntakuivwangila, lelo Tata uwantuma wene wampeela ilamulo muno ningavwangila na muno ningakosolela. 50Nani namanya vino ilamulo lyakwe likatungulula ku umi wa pe! Caleka vino nkukosola avino Tata wanenyile, avino nkavwanga.”

Currently Selected:

Yoane 12: MamL13

Highlight

Copy