Kod 29

Yakuba be se Laban ka soo

1O kɔ, Yakuba ye sira minɛ tugu ka taga kɔrɔn fɛ mɔgɔw ka jamana na. 2O yɔrɔ la, a ye kɔlɔn dɔ ye kongo kɔnɔ. A ye sagakulu saba lanin ye o daa la, bari u tun be jii bɔ o kɔlɔn nin kɔnɔ k'a di sagaw ma. Kɔlɔn nin datugunin tun be ni kabakuru belebeleba dɔ ye. 3Ni sagaw bɛɛ tun lajɛnna yen tuma min na, u dɛndɛbagaw tun be kabakuru nin kɔlɔnkolon k'a bɔ kɔlɔnda la ka jii bɔ k'a di u ma, ka kɔsegi k'a tugu yen.

4Yakuba ye sagadɛndɛbagaw ɲininga ko: «Ne balimaw, aw bɔra min?» U y'a jaabi ko: «An bɔra Aran.» 5A y'a fɔ u ye ko: «Aw be Nawɔri mamaden Laban lɔn wa?» U ko: «An b'a lɔn.» 6A y'u ɲininga ko a ka kɛnɛ wa. U ko a ka kɛnɛ, ko a denmuso Arasɛli natɔ filɛ n'a ka sagaw ye. 7Yakuba ko: «Tile ma ban fɔlɔ. Begɛn lajɛntuma ma se. Aw ka jii di sagaw ma ka segi n'u ye u ka ɲiminikɛyɔrɔ la.» 8U y'a jaabi ko: «An te se k'o kɛ fɔɔ sagakuluw bɛɛ ka lajɛn, u ka sɔrɔ ka kabakuru kɔlɔnkolon k'a bɔ kɔlɔnda la. O tuma na, an bena jii di sagaw ma.»

9Ka Yakuba to kuma na n'u ye, Arasɛli sera n'a facɛ ka sagaw ye, bari a tun ye sagadɛndɛbaga ye. 10Yakuba y'a belencɛ Laban denmuso Arasɛli ye, ka Laban ka sagaw ye dɔrɔn, a gwɛrɛla ka kabakuru nin kɔlɔnkolon k'a bɔ kɔlɔnda la ka jii di a belencɛ ka sagaw ma. 11O kɔ, a ye Arasɛli fo, k'a daminɛ ka kasi kosɔbɛ. 12A tun y'a fɔ Arasɛli ye ko ale ye a faa ka somɔgɔ dɔ ye, ko a ye Erebɛka dencɛ ye. Arasɛli bolila ka taga o fɔ a facɛ ye. 13Laban y'a dɔgɔmuso dencɛ Yakuba kibaru mɛn minkɛ, a bolila ka ta'a kunbɛn k'a bolo meleke a la k'a fo kosɔbɛ ka taga n'a ye a ka soo. Yakuba ye koo nunu bɛɛ lakali Laban ye. 14Laban y'a fɔ a ye ko: «Siga t'a la, i ye ne ka somɔgɔ yɛrɛ yɛrɛ ye.» Yakuba ye kalo kelen kuturu kɛ Laban fɛ.

Yakuba be Leya ni Arasɛli furu

15Loon dɔ, Laban y'a fɔ Yakuba ye ko: «An ye balimaw ye, o ye tiɲɛ ye, nga o t'a yira ko i ka kan ka baara kɛ ne ye gwansan dɛ! I ka sara bena kɛ min ye, o fɔ ne ye.» 16O y'a sɔrɔ denmuso fila tun be Laban fɛ. Fɔlɔ tɔgɔ ko Leya, filanan tɔgɔ ko Arasɛli. 17Leya ɲada tun cɛ ma ɲi, nga Arasɛli tun cɛ ka ɲi, a ɲada tun filɛ ka di. 18Arasɛli koo tun ka di Yakuba ye kosɔbɛ. A y'a fɔ Laban ye ko: «Ne bena saan wolonwula baara kɛ i ye, n'i be sɔn, i k'i denmuso fitini Arasɛli di ne ma.» 19Laban ko: «K'a d'i ma, o ka fisa ne ma k'a di cɛɛ wɛrɛ ma. To ne fɛ yan.»

20O la, Yakuba ye baara kɛ saan wolonwula Arasɛli kosɔn, nga Arasɛli koo tun ka d'a ye cogo min na, o waati tun kɛra a ɲana i n'a fɔ tile damani dɔrɔn. 21O kɔ, Yakuba y'a fɔ Laban ye ko: «Ne ka muso di ne ma. Ne ka waati latigɛnin dafara, ne b'a fɛ k'a furu.» 22Laban y'o yɔrɔ mɔgɔw bɛɛ lajɛn ka ɲanagwɛ kɛ. 23Nga suu kora tuma min na, a y'a denmuso Leya minɛ ka ta'a di Yakuba ma. Yakuba lara n'a ye. 24Laban y'a ka jɔnmuso Zilipa di a denmuso Leya ma a ka kɛ a ka jɔnmuso ye.

25Dugu gwɛra tuma min na, a y'a ye ko Leya lo! Yakuba y'a fɔ Laban ye ko: «I ye mun le kɛ ne la ten? Ne ma baara kɛ i ye Arasɛli lo kama wa? Mun na i ye ne namara?» 26Laban ko: «Ka kɛɲɛ n'an ka landa ye, dɔgɔmuso te se ka furu kɔrɔmuso ɲa. 27I ka kɔɲɔya lɔgɔkun tɔɔ kɛ n'a ye, o kɔ, an ben'a dɔgɔmuso fana d'i ma, i ka sɔrɔ ka saan wolonwula wɛrɛ baara kɛ ne ye ale kosɔn.»

28Yakuba y'a kɛ ten. A ye lɔgɔkun tɔɔ kɛ ni Leya ye. O kɔ, Laban y'a denmuso Arasɛli d'a ma a k'a furu. 29Laban y'a ka jɔnmuso Bila di a denmuso Arasɛli ma k'a kɛ a ka jɔnmuso ye. 30Yakuba lara ni Arasɛli fana ye. Arasɛli koo tun ka d'a ye ka tɛmɛ Leya kan. A ye baara kɛ Laban ye saan wolonwula wɛrɛ kɔnɔ.

Yakuba deenw ka koo

31Masaba y'a ye ko Leya koo tun man di a cɛɛ ye tuma min na, a ye wolo nɔgɔya a ye, nga Arasɛli tun ma se ka deen sɔrɔ. 32Leya ye kɔnɔ ta ka dencɛ wolo. A y'a tɔgɔ la ko Urubɛn,#29.32 Urubɛn kɔrɔ ko: «Dencɛ filɛ.» bari a ko: «Masaba ye ne ka dusukasi ye. Sisan kɔni, ne koo bena diya n cɛɛ ye.» 33A ye kɔnɔ ta tugu ka dencɛ wolo. A ko: «Masaba y'a mɛn ko ne koo man di n cɛɛ ye minkɛ, a ye nin fana di ne ma.» O la, a y'a tɔgɔ la ko Simeyɔn.#29.33 Simeyɔn kɔrɔ ko: «Ka koo mɛn.» 34A ye kɔnɔ ta tugu ka dencɛ wolo. A ko: «Aa! Sisan kɔni, ne cɛɛ bena nɔrɔ ne la, bari ne ye dencɛ saba wolo a ye.» O la, a y'a tɔgɔ la ko Levi.#29.34 Levi kɔrɔ ko nɔrɔnin. 35A ye kɔnɔ ta tugu ka dencɛ wolo. A ko: «Sisan ne bena Masaba tanu.» O la, a y'a tɔgɔ la ko Zuda.#29.35 Zuda kɔrɔ ko tanuli. O kɔ, a ka wolo lɔra.

Currently Selected:

Kod 29: AKKDC08

Highlight

Copy