Mataio 4

Diavoloꞌa Iesu Tuhune Nuriro

(Mareko 1:12-13, Luka 4:1-13)

1Eꞌe ḡarugano, Diaboloꞌa Iesu tuhune nuroga veize, Vine Zaḡoḡaniꞌa Iesu haba bohaꞌa tutune onamiro. 2Iesuꞌe eꞌea mada 40 zamaḡano ohere zu madai niduꞌa ogomu mene aro. Eꞌanoꞌo aniꞌe vinine runiro. 3Ebu Diavoloꞌa tuhunoga radu ani vaḡe onairo, ninaꞌa, “Ḡaꞌe Badiꞌa Ubuga roꞌidene, hadi ꞌadi ninaꞌa, 'Beredio ḡihunoꞌi,' rae noꞌi.”

4Rehano Iesuꞌa naenaeniro, raenaꞌa, “Mene! Buka Zaḡoḡano ꞌahige mirihiro, raenaꞌa,

'Vaze'e beredio da'o mene ḡabode radi'uma,

rehano Badiꞌa hebeꞌonoꞌo buauꞌeteꞌe ḡoeꞌa niduꞌao ḡabode radiꞌuma.'”#4:4 DEU 8:3

5Ebu Diaboloꞌa Iesu Ierusalema neḡa boro zaḡoḡa tutune onamadu kuru neḡa hitaga huneno ohoniro. 6Ebu aniꞌa niro, raenaꞌa, “Ḡaꞌe Badiꞌa Ubuga roꞌidene, rafatoꞌi! Mazaḡa Buka Zaḡoḡano ꞌahige mirihiro, raenaꞌa,

'Badi'aꞌa dana'oga veize ane tuḡure viga ḡae vaḡe tuḡuziꞌuma.

Ze'a ꞌevoreze hina mae ḡihi'i'uma ꞌahine, ḡae odaꞌe hadio mene tutuhaꞌuma.'”#4:6 Salamo 91:11-12

7Iesu'a naenaeninaꞌa, “Mene! Buka Zaḡoḡano ꞌahige mirihiro, raenaꞌa,

'Zuhiꞌa Boro ḡae Badi'a ago tuhuno'i.'” #4:7 DEU 6:16

8Ebu Diaboloꞌa Iesu maḡa hitaga hune tutune itadu kini'a ibitohauꞌeteꞌe haba'a boroboro niduꞌa zu zeḡe ḡau manomano niduꞌa ihoniro. 9Ebu ninaꞌa, “Ḡaeꞌa eḡe zamao ḡuḡuradu kuraune, deꞌe niduꞌa ḡae ḡaniꞌuma.”

10Iesuꞌa ninaꞌa, “Mene! Eḡe mazaonoꞌo vaḡinoꞌi! Buka Zaḡoḡano ꞌahige mirihiro, raenaꞌa,

'Zuhiꞌa Boro ḡae Badi'a mazao da'o kuranohano'i, zu ane veize daꞌo gauoꞌi.'” #4:10 DE 6:13

11ꞌOugadu Diaboloꞌa Iesu mazaonoꞌo vaḡine onamiro. Ebu tuḡure viganiꞌa onaadu dananiro.

Galilea Habaꞌano Gadahe Haramiro

(Mareko 1:14-15, Luka 4:14-15)

12Iesuꞌa Ioane Babatiso ḡuꞌa neḡano ohoniroteꞌe egadu Iudea habaꞌaonoꞌo Galilea habaꞌa bare onamiro. 13Galilea habaꞌano ani Nazareta neḡano radiro. Ebu neḡa eꞌe modadu Kaperanauma neḡa boro onamirotene eꞌea radiunu. Kaperanauma neḡa boroꞌe Zebuloni zu Nafatali habaꞌano ebu Galilea duꞌura genaḡano. 14Ibite peroveta vazeḡa Isaiaꞌa Badiꞌa ḡoere reiroteꞌeꞌa hudaro, raenaꞌa,

15“Zebuloni zu Nafatali habaꞌaꞌe

Galilea duꞌura genaḡano zu Ioridana vuḡa moneafao.

Aꞌe Galilea habaꞌa raꞌohe,

ebu eꞌe habaꞌano Iuda mene azaḡaniꞌa zuni radiuꞌohe.

16Uzabo zamaḡano radiuꞌeteꞌe azaḡaniꞌa agaḡa boro horoneha.

Rune zauhaḡa habaꞌano radiuꞌeteꞌe azaḡa rana agaḡaniꞌa agazeha.” #4:16 Isaia 9:1-2

17Eꞌe madaḡanonoꞌo Iesuꞌa haramoḡa ḡadaheniro, raenaꞌa, “Sauꞌanonoꞌo ḡihuroꞌi, mazaḡa Badiꞌaꞌa ibitohauꞌeteꞌe madaḡa ꞌai haniteha.”

Ane Tahiꞌatahiꞌa Zamaziro

(Mareko 1:16-20, Luka 5:1-11)

18Mada ꞌahogano Iesuꞌa Galilea duꞌuraḡa genaḡano onameꞌenogano, vaze ꞌaheu horoziro. Zeꞌe ḡozone mauꞌeteꞌe azaḡa. Vaze tibaꞌe Simona, niḡa ꞌahogaꞌe Petero, ebu negoḡa Anderea. Ze duꞌurao reꞌeva feune radiunu. 19Ebu Iesuꞌa ziro, raenaꞌa, “Eḡe ḡaruna hegotoꞌi. Vaze reꞌevaziꞌeteꞌe vazeḡa rouga veize ihoziꞌuma.” 20ꞌOugirotene zeꞌe zogone reꞌeva modadu ane hegote onamiro.

21Iesuꞌa Galilea duꞌura genaḡano bare onamiro ebu vaze ꞌaheu negoḡeta horoziro. Anianineꞌe Zebedeo ubuga, Iakobo zu Ioane. Zeꞌe moze teite ḡasi zamaḡano reꞌeva zigoga faine radiunu. Ebu Iesuꞌa zeḡe ꞌaheu huziro. “Eḡe hegotoꞌi.” 22ꞌOugirotene zeꞌe zogone ḡasize zu moze modadu ane hegote onamiro.

Ugi Azaḡa Faiziro

(Luka 6:17-19)

23Iesuꞌa Galilea habaꞌa niduꞌa zamaḡano ragaveꞌenaꞌa, Iuda azaḡa zeḡe nuꞌonuꞌo neḡano ihoziro zu Badiꞌaꞌa ibitoziniꞌeteꞌe moneo hari manoḡa haramiro. Ebu ugi nunu niduꞌa faiziro. 24Ebu Iesu hariḡaniꞌa bororanadu Siria habaꞌa niduꞌa igiro. Zeꞌa ugi azaḡa niduꞌa tutuze ani vaḡe ariro. Ugi nunu uꞌano ahirizeꞌa gigize ruzeꞌeteꞌe azaḡa, vine sauꞌaniꞌa ragano reiroteꞌe azaḡa, ketoketeꞌeteꞌe azaḡa zu ahirize haganoga mene idaḡa azaḡa tutuze onairotene, Iesuꞌa ze faiziro. 25Galilea habaꞌa, Dekapolisi#4:25 Hugaꞌe 'Neḡa boro gaubanana' neḡa boro, Iudea habaꞌa, Ierusalema zu Ioridana vuḡa moneafa habaꞌanonoꞌo vaze ḡuḡuvaḡaniꞌa onaadu Iesu hegotiro.

Currently Selected:

Mataio 4: KSJ

Highlight

Copy