Mataio 18
18
Iniuꞌe Ḡihiꞌa Hune
(Mareko 9:33-37, 42-48, Luka 9:46-48; 15:3-7; 17:1-2)
1Eꞌe madaḡano Iesu tahiꞌatahiꞌaꞌa Iesu vaḡe onaadu ḡadiniro, raenaꞌa, “Badiꞌaꞌa ibitoziniꞌeteꞌe zamaḡano iniuꞌe ḡihiꞌa hune?” 2Iesuꞌa tahiꞌa komeꞌa ꞌahoga hune onaadu zeḡe boꞌaḡano mae ohoniro, 3ebu raenaꞌa, “E hube hune ziꞌohe, zaꞌa ḡihuradu tahiꞌa komeꞌa ꞌahi mene teigine, Badiꞌaꞌa za mene ibitoziniꞌuma. 4Iniuꞌa, tahiꞌa komeꞌa teige, aneꞌa bare mae ovoine, Badiꞌaꞌa ibitoziniꞌeteꞌe zamaḡano aniꞌe ḡihiꞌa hune rae raꞌohe. 5Ebu eḡe mazao fieꞌeteꞌe uꞌano tahiꞌa komeꞌa ꞌahiguḡa mae ḡihinine, aniꞌe eḡe mae ḡihiheꞌohe. 6Iniuꞌa, tahiꞌa komeꞌa ꞌahiguḡa eḡe mazao fieꞌetaꞌaꞌe boꞌaḡano, tahiꞌa ꞌahogaꞌe haḡai sauꞌano tutune veꞌonine, aniꞌe hadi boro bagaḡa ꞌunuḡano autadu davara guniḡano mae feunineꞌe ufeta manoḡa.
7Raha ꞌadi azaḡa, fase vetuḡaḡa, aduga hidiuma, mazaḡa vaze ibi veꞌoḡano tutuzeꞌeteꞌeꞌe ḡauḡa uꞌano, sauꞌa haḡaeꞌohe. Deꞌeguḡaꞌe fureruꞌohe rehano, vaze haḡai sauꞌano tutuzeꞌeteꞌe azaḡaꞌe, fase vetuḡaḡa, aduga hidiꞌuma. 8ꞌEvoreḡo ga odaḡoꞌa tutuꞌe veꞌoꞌoꞌidene, variꞌe modoꞌi. ꞌEvore tibaḡota ga odaḡo tibaḡota daꞌo ḡabone tuḡutuḡu hidogaꞌe ufeta manoḡa. U ꞌevoreḡo ꞌaheu ga odaḡo ꞌaheuḡota ire roga mene hauḡeꞌeteꞌe zamaḡano mae feuꞌine ufeta aduga. 9Ubumaḡoꞌa tutuꞌe veꞌoꞌoꞌidene, gude modoꞌi. Ubumaḡo naeḡaḡota daꞌo ḡabone tuḡutuḡu hidogaꞌe ufeta manoḡa. U ubumaḡo ꞌaheuḡota ire roga mene hauḡeꞌeteꞌe zamaḡano mae feuꞌine ufeta aduga.
Mamoe Dauḡiroteꞌe Hari Idaidaḡa
(Luka 15:3-7)
10Tahiꞌa komeꞌa ꞌahiguḡa tiba zuni gubanoꞌi. Mazaḡa, e ziꞌohe, zeḡe taufeꞌeteꞌe tuḡure vigaꞌe eḡe Mama adureo teite iḡaiḡa radiuꞌohe.#18.10 Fare mirihiroteꞌe nuꞌe v. 11 raenaꞌa, “Eḡe, Vaze Ubugaꞌe dauḡiroteꞌe azaḡa ḡabozoga veize onairo.”
12Zaꞌe nouge zamareꞌohe? Vaze ꞌahoga mazao mamoeḡa 100, rehano tibaniꞌa dauḡine, ani nougiꞌuma? Aniꞌe mamoeḡa 99 maḡa habaꞌano modadu dauḡoga mamoeḡa vaḡe ragaviꞌuma. 13E hube hune ziꞌohe, aniꞌa mamoe tiba eꞌe vaḡe meine, mamoe 99 mene dauḡoḡa ḡauḡaꞌe vitize matuꞌe rudaꞌuma. 14Eꞌe teige, zae Moze adureo tahiꞌa komeꞌa ꞌahiguḡa tiba zu dauḡogaꞌe mene urateꞌohe.
Nabuḡo Sauꞌa Mae Duduneꞌeteꞌe Ibiḡa
(Luka 17:3)
15Ekalesia nabuḡoꞌa ḡae mazao sauꞌa haḡaoꞌidene ane vaḡe onamadu ḡanine daꞌo boꞌaḡano sauꞌaḡa ihonoꞌi. Aniꞌa egoḡanadu sauꞌaonoꞌo ḡihurine, ḡa ꞌai nabudiḡota bare tiburaneha. 16U aniꞌa mene egoḡanoꞌidene, vaze tiba ga ꞌaheu zamazadu bare onamoꞌi, mazaḡa ḡanine nagini raꞌeteꞌe vaze ꞌaheu ga uḡidu zu ederiꞌuma. 17Aniꞌa ze zu mene egozinine, ekalesia zamaḡano rae furenoꞌi. Aniꞌa ekalesia zuni mene egozenoꞌidene, aniꞌe Badiꞌa aḡuꞌa vazeḡa ga takesi vazeḡa sauꞌa teigeꞌohe rae zamaroꞌi.
18E hube hune ziꞌohe, zaꞌa nagini rahao gararine, Badiꞌa adureo zuni garariꞌuma, ebu zaꞌa nagini rahao ahetine, Badiꞌa adureo zuni ahetiꞌuma. 19E bare hube hune ziꞌohe, rahao ꞌada ḡanine zamaze tiba hina nagini umidine, eḡe Mama adureo zae veize haḡaoziniꞌuma. 20Mazaḡa eḡe niḡano ꞌaheu ga uḡiduꞌa nuꞌoraune, eꞌe zeḡe boꞌaḡano radiuꞌohe.
Mene Rae Modeꞌeteꞌe Tuḡure Vazeḡa Hari Idaidaḡa
21Ebu Peteroꞌa Iesu vaḡe aradu ḡadiniro, raenaꞌa, “Zuhia Boro, eḡe nabudiꞌa eḡe mazao sauꞌa haḡaine, ḡae nuḡu e ani sauꞌa rae modiꞌuma? Ḡae fuꞌo ꞌaheu fare ga?” 22Iesuꞌa naenaeniro, raenaꞌa, “E ḡaꞌohe, mene ḡae fuꞌo ꞌaheu fare, rehano barebare rae modoꞌi!#18.22 Girikio, Ḡae 490
23Eꞌanoꞌo Badiꞌaꞌa ibitoziniꞌetaꞌaꞌe hari idaidaḡa ꞌahi heuḡa. Kini ꞌahoganiꞌa ane mazaonoꞌo moni meiroteꞌe tuḡure azaḡa huzadu ani moni bare meihi rae reiro. 24Aniꞌa ꞌouge haḡairotene, moni borofe#18.24 Girikio, 10,000 Taleniti, aꞌe muri 16 gau naeḡa heuḡa meiroteꞌe vazeḡa ꞌahoga ani vaḡe tutune ariro. 25Aniꞌe moni baronoga mene idaḡa ꞌahine, kiniꞌa riḡa ḡoreniro, raenaꞌa, 'Ḡae inuḡo, ubuḡo zu ḡae mazao ḡau niduꞌa seronadu eḡe moni baronoꞌi!' 26ꞌOugadu tuḡure vazeḡaniꞌa ani zamao obena hina tuḡiro, ebu raenaꞌa, 'Geno mada enoꞌi, ebu e moni niduꞌa baroniꞌuma.' 27ꞌOuge reirotene, zuhiꞌaḡaniꞌa vetuḡaniro ebu moniḡa ahiḡa radu ani tuḡuniro.
28Eꞌe ḡarugano tuḡure vazeḡaniꞌa ani mazaonoꞌo moni nu#18.28 Girikio, 100 Denari, aꞌe mada 100 gau naeḡa heuḡa meiroteꞌe tuḡure vazeḡa ꞌahoga, ani teite tiburu gauꞌeteꞌe, vaḡe onamiro. Aniꞌa ani matanadu oḡorabiḡa harinoharo. Ebu raenaꞌa, 'Eḡe moni baronoꞌi!' 29ꞌOugadu ane vaze tuḡure vazeḡaꞌe obena hina tuḡaro, ebu umininaꞌa, 'Geno mada enoꞌi, ebu ḡae moni baroniꞌuma!' 30Rehano ani hezahiro ebu onamadu ane vazeḡa ꞌai ḡuꞌa neḡano mae ohoniro, onamo ani moni eꞌe baroniꞌuma.
31Tuḡure azaḡa nunuꞌa naginiꞌa fureraroteꞌe horonirotene, ze maḡune rudanadu zeḡe zuhiꞌa vaḡe onamiro. Ebu hariḡa niduꞌa ani mazao ihoniro. 32ꞌOugadu zuhiꞌaḡaniꞌa tuḡure vazeḡa ibiꞌa ibite hunadu niro, raenaꞌa, 'Ḡaꞌe tuḡure vazeḡa sauꞌa! Ḡaꞌa umihadu ḡa eḡe mazaonoꞌo meiroteꞌe moniḡa niduꞌa ahiḡa reiro. 33Eḡeꞌa ḡae vetuḡaḡadateꞌe teige, ḡaeꞌa zuni ḡae vaze tuḡure vazeḡa vetuꞌaḡanifo!' 34Zama ḡugiꞌano zuhiꞌaḡaniꞌa ani aduga hanoga veize ḡuꞌano ohoniro, onamo ane moni niduꞌa barone hauḡiꞌuma.
35Eꞌe teige, zaꞌa zae nego nabudi zamaze niduꞌa hina zeḡe sauꞌa mene rae modine, eḡe Mama adureo zuni zae mazao ꞌouge haḡaiꞌuma.”
Currently Selected:
Mataio 18: KSJ
Highlight
Share
Copy
Want to have your highlights saved across all your devices? Sign up or sign in
Wycliffe Bible Translators, INC.
