Akts 9

Faŋ Sɔɔl nə kwìinə fwi yi

(Akts 22.6-16; 26.12-18)

1Maa yighee yɔ́, Sɔɔl kɨ tɨtoꞌ shoꞌ ghuu vɨɨ tɨta Yeso, kɔꞌnə vəŋ, 2zwilə vəŋ, ndɔ̀ gə̀ yè wuu kwalə məfeꞌ Nwi, buꞌ ghɔ tɨ́ ŋwə laa ŋwə nyɔꞌ vəŋwaꞌlə, kɔ̀ tɨ́ yi, yi gə nə mbə, kɔ̀ tɨ́ vəməshəŋtə və vɨɨ Jus, faŋ vəŋ nəə shi ntɨꞌ Damaskɔs, laa ŋwə kɨ luu ye vɨɨ, vəndɔŋ nə vəki, faŋ vəŋ toꞌ fɨ maa jɨɨ Kristo shɔ, yi jiatə vəŋ, ka, jwì nə vəŋ Jerusalem. 3Ŋwə gə nɨniŋ, gə kɨ kəə ziꞌ ntɨꞌ Damaskɔs, məley Nwi gwəkə sìꞌ fɨ taa yizɔ, kia ŋwə. 4Ŋwə gu nsi, zɔ gɨ wə faŋ nyə gì tɨ́ ŋwə laa, «Sɔɔl, Sɔɔl, a sii shoꞌ ghuu kaŋ buꞌ kə?» 5Ŋwə bitə laa, «Tɨta, a lùu ndə?» Wuu laa, «Mə lùu Yeso faŋ a shòꞌ ghuu ghi nə. 6Ndɔ yizɔ, ŋìi taa ntɨꞌ nyə̀, buu vɨ taa naysə nu ŋkɨə faŋ a taa yɨsə tɨ́ ghɔ.» 7Vɨɨ mbɨə faŋ ghɔ vɨ Sɔɔl nəə toꞌ mɔ́ꞌ, tɨŋnə, kee gì nu me. Vəŋ nə zɔ sheꞌ gɨ yɔ́, kee yè wə me. 8Sɔɔl ndɔ fɨ nsi, ŋàꞌsə sɨ ghi, luu nə, sɨ ghi fɨ, ŋwə kee baa yè fa me. Vɨ jia ŋwə fɨ maa kwiŋ wi, ndì ŋwə, gə̀ nə ŋwə Damaskɔs. 9Vəshi shɔɔ vətia ŋwə kee yè vədɨꞌ me, kee zɨ̀ fa me, kee nù fa me.

10Wuu məbiŋ Yeso mɔ́ꞌ nə luu shɔ ntɨꞌ Damaskɔs, yizii yi luu Ananias. Njyəə shi ŋwə. Tɨta Yeso gi tɨ́ ŋwə taa njyəə yɔ́ laa, «Ananias!» Ŋwə biŋ laa, «Ye mə nə, tɨta.» 11Tɨta Yeso gi tɨ́ ŋwə laa, «Ndɔ fɨ nsi, gə̀ fɨ maa jɨɨ njyə faŋ vɨ tii nə jɨɨ yineꞌtə nə, gə̀ taa ŋii Judas, bìtə wə mɔ́ꞌ shɔ, faŋ yizii yi lùu Sɔɔl, wuu Tarsɔs. Sɔɔl ghɔ́ lùu taa ŋii yɔ́, shɔꞌtə Nwi, 12yè nu taa njyəə, yè faŋ wə mɔ́ꞌ faŋ yizii yi luu Ananias ŋii taa ŋii ŋwə, mɔ̀ꞌ ghɔ ghi tɔ ŋwə laa ŋwə baa kɨ yenə.» 13Ananias bəŋsə laa, «Tɨta, mə nə zɔ̀ fɨ ghɔ vɨɨ vəyaŋ laa wə ghɔ́ nəə yɨsə vənu vəbwəvə dɨdɨꞌ maa vɨɨ ley Nwi fɨ ntɨꞌ Jerusalem. 14Mə baa zɔ̀ laa vɨɨ kwalə məfeꞌ Nwi kɔ̀ wutə tɨ́ ŋwə laa ŋwə jia vɨɨ vənshə feenə, faŋ vəŋ tii yizii yə, fə̀ŋ vəŋ.» 15Tɨta Yeso baa gì tɨ́ ŋwə laa, «Gə shɔ, buꞌ laa mə shòꞌ wə ghɔ́, laa ŋwə luu wuu faꞌ ŋwaa, fɨꞌtə nu yizii kaŋ tɨ́ vɨɨ tətɔŋ fu, nə tɨ́ vəfwàŋ nə tɨ́ vɨɨ Isirayl. 16Mə taa də ŋɨꞌ tɨ́ ŋwə yiyaŋ, faŋ ŋwə taa ye buꞌ yizii nyaa.» 17Ananias ndɔ gə̀ taa ŋii yɔ́, mɔ̀ꞌ ghɔ ghi maa Sɔɔl, gì tɨ́ ŋwə laa, «Weenshu ŋwaa Sɔɔl, tɨta Yeso, faŋ viŋ ŋwə yaa faynə jɨɨ njyə faŋ a nəə jwi fɨ fuŋ nə, tɔ̀ŋ mə laa a baa kɨ yenə vədɨꞌ, baa nə laa Zwitə Ley Nwi lwaŋ taa fwi ghɔ.» 18Sheꞌ yighee yɔ́ fa kəmɔ́ꞌ yaa vəŋaꞌ fiŋ fɨ sɨ ŋwə, ŋwə ye vədɨꞌ, kɨ nii yindɔ, fì muu mə Nwi, 19baa kɨ nii zɨ̀ fa, ŋwaa wi weꞌtə.

Faŋ Sɔɔl nə fɨ̀ꞌtə nu Nwi ntɨꞌ Damaskɔs, vɨɨ Jus nə kəə zwi ŋwə

Sɔɔl kɨ nii dùꞌ ghɔ vɨ vɨɨ məbiŋ nu Yeso maa vəshi vəmɔ́ꞌ ntɨꞌ Damaskɔs, 20tey kɨ fɨꞌtə nu Yeso yighee muꞌ taa ŋii məshɔꞌtə yikwalə, gì laa Yeso luu ŋkee Wee Nwi. 21Shuu vɨɨ vənshə yɔŋ faŋ vəŋ nə zɔ̀ yigisə yi. Vəŋ gi laa, «Kee lùu wə ntɨə faŋ ŋwə nəə kəə ndisə vɨɨ mbɨə faŋ vəŋ nəə tii yizii nyə̀ ntɨꞌ Jerusalem nə yimu? Maa ŋwə nə jwì feenə maa məjiatə kəŋ vɨɨ vɔ́, bə̀ŋ gə̀ nə vəŋ tɨ́ vɨɨ kwalə məfeꞌ Nwi.» 22Sɔɔl baa kɨ wɨweꞌ maa mətwelə laa Yeso luu ŋkee Kristo, wuu məbweysə vɨɨ. Tɔ vɨɨ Jus faŋ vəŋ nəə shi ntɨꞌ Damaskɔs shii. 23Vəshi vəmɔ́ꞌ baa kɨ shɔɔ, vɨɨ Jus nə kɔꞌnə maa məzwi Sɔɔl. 24Luu nə, ŋwə zɔ ŋkɔꞌnə vəŋ yɔ́. Vɨɨ Jus shiasə ŋwə, gə̀ dùꞌ təshuu tə ŋkɔꞌ, shii vətuꞌ nə shɨshwi maa məzwi ŋwə. 25Vɨɨ məbiŋ Yeso ndi ŋwə, kwàŋ taa ŋkɔɔ, shùŋ kuu shɔ, kòꞌsə ŋwə, sùꞌsə ŋwə fu, ŋwə nyɨŋ.

Faŋ Sɔɔl nə gə ye vɨɨ ntɔŋ Yeso ntɨꞌ Jerusalem

26Sɔɔl gə ziꞌ ntɨꞌ Jerusalem, kɨ kəə gə faynə ghɔ vɨ vɨɨ məbiŋ nu Yeso. Vəŋ fee ŋkee dɨdɨꞌ, buꞌ laa vəŋ nə kee yibiŋ laa ŋwə lùu wuu məbiŋ nu Yeso me. 27Barnabas ndi ŋwə, gə̀ nə ŋwə vɨsɨ vɨɨ ntɔŋ Yeso, nàysə tɨ́ vəŋ faŋ Sɔɔl yaa faynə jɨɨ ghɔ Yeso, Yeso gi tɨ́ ŋwə nə, baa nə faŋ ŋwə nə fɨ̀ꞌtə nu Nwi ntɨꞌ Damaskɔs buꞌ yizii Yeso ntee. 28Sɔɔl kɨ nii gòꞌ Jerusalem, ghɔ vɨ vɨɨ məbiŋ nu Yeso nə toꞌ fɨꞌtə nu Yeso, kee fèe nu me. 29Ŋwə nə gì tɨ́ vɨɨ faŋ vəŋ gisə ghaŋ Griik nɨzi. Vɨɨ vɔ́ kəə jɨɨ maa məzwi ŋwə. 30Vɨɨ məbiŋ nu Yeso zɔ, ndì ŋwə, gə̀ nə ŋwə ntɨꞌ Sisaria, tɔŋ ŋwə ntɨꞌ Tarsɔs (fɨ shɨ Saylisia).

31Nɨniŋ ghɔ́, vɨɨ məbiŋ Kristo fɨ taa məshɨ mə Judia nə Galilii nə Samaria mənshə nə dùꞌ bwaŋnə, baa toꞌ maa ghuu yitoꞌ tɨta Yeso, fee Mɔꞌmbi. Zwitə Ley Nwi yɨsə vɨɨ vəmɔ́ꞌvə baa kùꞌsə nwaa vəŋ.

Faŋ Pita nə shùꞌ wə faŋ way ŋwaa wi nə ku muꞌ

32Nə luu maa yighee yɔ́, Pita toꞌ vəshəŋ vənshə. Shi mɔ́ꞌ ŋwə gə ziꞌ ntɨꞌ Lida maa məye vɨɨ məbiŋ nu Yeso mbɨə faŋ vəŋ luu yifi. 33Wə mɔ́ꞌ nə luu shɔ, yizii yi luu Anias, faŋ ŋwə nə duꞌtə ŋwə nɔŋ fuu fwaŋ ŋuꞌ yifɔŋ, buꞌ laa ŋwaa wi yaa ku. Pita ye wə ghɔ́, gì tɨ́ ŋwə laa, 34«Anias, Yeso Kristo shùꞌ ghɔ. Ndɔ yizɔ, nàysə fwaŋ kə!» Sheꞌ yighee muꞌ ŋwə ndɔ. 35Vɨɨ vənshə fɨ ntɨꞌ Lida nə fɨ nsi Sherɔn yinshə ye wə ghɔ́, kɨ nii kwìinə gə̀ maa məbiŋ nu tɨta Yeso.

36Sheꞌ maa yighee yɔ́ wəzwi mɔ́ꞌ nə luu shɔ ntɨꞌ Jɔpa, yizii yi luu Tabita, ŋiꞌ yizii yi yɔ́ lùu laa fəshwi. Ŋwə nə luu wuu məbiŋ nu Yeso, ndì yighee yinshə maa məyɨ vənu vəjəəvə maa vɨɨ. 37Maa vəshi vɔ́, wəzwi ghɔ́ gu za, za ku. Vɨ sɔ ŋwə, ndì ŋwə, koꞌ nùŋ taa ŋii yizɔ. 38Ntɨꞌ Lida yɔ́ nə luu nshənə fɨ ntɨꞌ Jɔpa. Nɨniŋ, vɨɨ məbiŋ nu Yeso zɔ laa Pita luu ntɨꞌ Lida, vəŋ tɔŋ vɨɨ vəbɔɔ maa Pita, laa vəŋ gə bùꞌ ghɔ tɨ́ ŋwə, laa ŋwə yasə jwì ye vəŋ. 39Pita ndɔ fɨ nsi, ghɔ vɨ vəŋ gə, kɨ ziꞌ yifi, vəŋ ndi ŋwə, kòꞌ nə ŋwə taa ŋii yizɔ. Vəki ŋkusə vənshə baytə kɨ gwia, dəsə njwisə faŋ wəzwi ghɔ́ nə naysə̀, kɔ̀ tɨ́ vəŋ, faŋ ghɔ vɨ vəŋ nə luu. 40Pita fuusə vəŋ vənshə fu, tùŋ vətɔ vəyəə vi nsi, shɔꞌtə Nwi, kɨ nii kìasə ŋwaa wi maa ŋku wə kɔ́, gì laa, «Tabita, ndɔ yizɔ!» Wəzwi ghɔ́ ŋaꞌsə sɨ ghi, yè Pita, ndɔ dùꞌnə. 41Pita nesə ghɔ ki, shàꞌsə ŋwə yizɔ, kɨ nii tìi vɨɨ məbiŋ nu Yeso nə vəki ŋkusə, kɔ ŋwə tɨ́ vəŋ, bwey. 42Vɨ zɔnə nu kɔ́ taa ntɨꞌ Jɔpa yinshə, vɨɨ vəyaŋ nuŋ fwisə vəŋ maa nu tɨta Yeso. 43Pita shi ntɨꞌ Jɔpa vəshi vəyaŋ, shi taa ŋii wə mɔ́ꞌ faŋ yizii yi lùu Saymon. Ŋwə nə luu wuu məbaysə gɔsə.

Currently Selected:

Akts 9: bav

Highlight

Copy