Akts 8

1Sɔɔl ghɔ́ nə biŋ laa vɨ zwì Stefen.

Faŋ vɨ nə tey kɨ shoꞌ ghuu vɨɨ məbiŋ Kristo

Shù fɨ maa shi kɔ́, vɨ tey kɨ yɨnə vɨɨ məbiŋ Kristo ntɨꞌ Jerusalem ŋkee dɨdɨꞌ. Vəŋ vənshə saykə taa shɨ Judia nə taa shɨ Samaria, kɨ nii gòꞌ sheꞌ vɨɨ ntɔŋ Kristo ntɨꞌ Jerusalem. 2Vɨɨ mɔ́ꞌ faŋ vəŋ nəə bəŋsə Nwi, gə təə Stefen, gwìa yiku yi ŋkee dɨdɨꞌ. 3Sɔɔl bɨsə nwaa vɨɨ Kristo dɨdɨꞌ, toꞌ ŋii taa ndɔꞌ vɨɨ nə wutə, fuusə vəndɔŋ ghɔ vəki, kwaŋ vəŋ taa ŋii mfiŋ.

Faŋ vɨɨ Samaria nə bìŋ nu Kristo

4Vɨɨ mbɨə faŋ vəŋ nə sàykə nɨniŋ nə, toꞌ fɨ vəshəŋ vəshəŋ, toꞌ fɨꞌtə ntɔŋ yijəə Nwi tɨ́ vɨɨ. 5Wə muꞌ fɨ taa ŋwaa vəŋ nə luu Filip. Ŋwə ndɔ fɨ nsi, siꞌ gə̀ shɨ Samaria, fɨ̀ꞌtə nu Kristo yifi, laa lùu wuu məbweysə mbi. 6Vɨɨ vənshə taŋ tuulə vəŋ, zɔ̀ nu ŋkɨə faŋ Filip gisə, baa yè vənu və shuu yɔŋvə faŋ ŋwə yɨsə. Vəŋ kaw yigisə yi yɔ́, 7buꞌ laa ŋwə nəə fuusə vəzwitə vəbwəvə fɨ maa vɨɨ vəyaŋ, faŋ vəŋ nə kìi vəzwitə vəbwəvə taa ŋwaa vəŋ. Vəzwitə vəbwəvə vɔ́ yumə ŋkee nəŋay buu fùu. Ŋwə baa shùꞌ vɨɨ faŋ way ŋwaa vəŋ nə ku muꞌ, nə vəndwey, vəŋ bwaŋnə. 8Vɨɨ fɨ shɨ Samaria duꞌ nə məŋaytə yaŋ.

9Wə mɔ́ꞌ nə luu shɔ taa ntɨꞌ yɔ́, yizii yi luu Saymon. Ŋwə nə luu wuu yifiŋtə, nu ki ghɔꞌ vɨɨ vənshə fɨ shɨ Samaria. Nshɨ-tɔ wə ghɔ́ nə gì laa yi shɔ̀ɔ mbi. 10Vɨɨ vənshə, wuu taa nə weembwa, nuŋ tɔ sheꞌ maa nu wə ghɔ́, gisə laa wə ghɔ́ luu ŋkee wutə Nwi ŋkɨə faŋ ŋkə shɔ̀ɔ mbi. 11Vəŋ nuŋ tɔ sheꞌ maa ŋwə buꞌ laa ŋwə nəə yɨsə vənu və yifiŋtə nə ŋay yi shù fɨshi. 12Luu nə, yighee njyə faŋ Filip nə jwì, vəŋ biŋ Filip faŋ ŋwə nə nàysə ntɔŋ yijəə kɔ̀ŋ nu yifwàŋ Nwi, baa kɔ̀ŋ yizii Yeso Kristo tɨ́ vəŋ. Vəŋ fi muu mə Nwi, vəndɔŋ ghɔ vəki. 13Nshɨ-tɔ Saymon nə bìŋ nu Kristo nɨzi, baa luu fì muu mə Nwi, kɨ nii bèꞌsə Filip, yè vənu və shuu yɔŋvə faŋ Filip fɨꞌsə nə, shuu wi yɔŋ ghee nshə.

14Vɨɨ ntɔŋ Kristo mbɨə faŋ vəŋ nə luu ntɨꞌ Jerusalem nə, zɔ laa vɨɨ Samaria bìŋ yigisə Nwi. Vəŋ tɔŋ Pita ghɔ Jɔn tɨ́ vɨɨ Samaria. 15Pita ghɔ Jɔn siꞌ gə zìꞌ shɔ, bùꞌ ghɔ tɨ́ Nwi tɔ vɨɨ Samaria, laa Nwi kɔ vəŋ nə Zwitə Ley Nwi. 16Vəŋ nə shɔ̀ꞌtə Nwi nɨniŋ, buꞌ laa Zwitə Ley Nwi nə kee ta ŋìi taa fwisə vəŋ me, vəŋ nə fi sheꞌ muu mə Nwi maa yizii tɨta Yeso. 17Nɨniŋ, Pita ghɔ Jɔn mɔꞌ ghɔ tɔ vəŋ, Zwitə Ley Nwi ŋii taa fwisə vəŋ.

18Saymon ye laa vɨɨ ntɔŋ Yeso nə kɔ̀ Zwitə Ley Nwi tɨ́ vɨɨ, faŋ vəŋ nə mɔ̀ꞌ ghɔ tɔ vɨɨ nə. Ŋwə jwi kɔ̀ ka tɨ́ Pita ghɔ Jɔn, 19gì laa, «Viŋ kɔ wutə kə̀ shee nɨzi, tɨ́ kaꞌ wə tɨ̀ me wə faŋ mə mɔ̀ꞌ ghɔ kaŋ tɔ ŋwə, ŋwə fì Zwitə Ley Nwi.» 20Pita gi tɨ́ ŋwə laa, «Viŋ ka wə ndi, buꞌ faŋ a bɨꞌtə laa kaꞌ a ndì ka, ywàŋ fa ŋkɨə faŋ Nwi key vɨɨ shɔ nə. 21A kee kìi nu, tɨꞌnə me, wee-fa maa faꞌ wia me, buꞌ laa fwi yə kee lùu yiloomə maa Nwi me. 22Bàw a biŋ nu bwə ŋkɨə faŋ a bɨ̀ꞌtə nə, kwiinə fwi yə, kɨ shɔꞌtə Nwi, ndwaŋ Nwi maa nu ŋkɨə faŋ a nii kwaꞌtə taa fwi ghɔ, tɨ́ kaꞌ yighee mɔ́ꞌ Nwi ndenə nu bwə kə kɔ́. 23Ŋkee nu bwə ŋìi taa fwi ghɔ, a gù wuu faꞌ tɨ́ zwitə bwə.» 24Saymon gi tɨ́ Pita ghɔ Jɔn laa vəŋ shɔꞌtə Nwi tɔ ŋwə, tɨ́ kɨ kaꞌ vənu vɔ́ vənshə faŋ vəŋ gi nə, kee gày maa ŋwə me.

25Pita ghɔ Jɔn metə maa məfɨꞌtə yigisə Nwi maa ntɨꞌ yɔ́, ndɔ̀ kɨ bəŋ gə Jerusalem, toꞌ fɨꞌtə ntɔŋ yijəə Nwi maa vəshəŋ vəyaŋ fɨ shɨ Samaria.

Faŋ Filip nə fɨ̀ꞌtə nu Nwi tɨ́ wuu Itiopia kwalə

26Yiŋkii kɨ shɔ̀ɔ, nshiiŋii Nwi gi tɨ́ Filip laa, «Ka ŋwaa wə, gə̀ fɨ kwiŋ yikwii-təŋ fɨ maa jɨɨ njyə faŋ nyə shɔɔ fɨ Jerusalem, gə Gaza nə.» Jɨɨ yɔ́ nə shɔ̀ɔ fɨ taa shəŋ nɔŋ-nɔŋ. 27Filip ndɔ fɨ nsi, gə. Faŋ ŋwə nə ziꞌ yifi, yè wuu Itiopia mɔ́ꞌ faŋ nə luu ndifwaŋ taa mbuꞌ tɨ́ Kandaki, fwàŋ Itiopia faŋ nə luu wəzwi. Ndifwaŋ ghɔ́ nəə nuŋsə ka fwàŋ nshə. Ŋwə nə jwi Jerusalem maa məshɔꞌtə Nwi, 28kii bəŋ, ŋii dùꞌ taa kaalə ki, toꞌ tii ŋwaꞌlə nshiiŋii-sɔghɔ Aysaya. 29Zwitə Ley Nwi gi tɨ́ Filip laa ŋwə shəŋtə gə kɨ toꞌ fɨ yɨ kaalə kɔ́. 30Filip nyɨŋ koꞌ gə yɨ ŋwə, zɔ̀ faŋ ŋwə nəə tii fɨ taa ŋwaꞌlə Aysaya. Filip bitə tɨ́ ŋwə laa, «A zɔ ŋiꞌ nu ŋkɨə faŋ a tii mu?» 31Ndifwaŋ ghɔ́ gi laa, «Sii kaꞌ mə kɨɨ kɨkə? Wə kee lùu shɔ, twelə tɨ́ mə me.» Ŋwə kɨ nii gì tɨ́ Filip laa ŋwə koꞌ jwì, ghɔ ŋwə duꞌ. 32Shəŋ ŋwaꞌlə kɔ́ faŋ ŋwə nəə tii nə, luu ŋkɨə faŋ ŋkə lùu laa lee,

«Ŋwə nə luu yaa bi-njɨɨ faŋ vɨ ndì, kɨ gə sɨɨ.

Ŋwə nə kee ŋaꞌsə shuu wi me, kee gì tuu nu me,

sheꞌ yaa wee-bi-njɨɨ faŋ nyə kee yaa kɨ gwia

faŋ vɨ ki wiŋ ghi me.

33Faŋ ŋwə nə bwàsə ŋwaa wi nsi nə,

Nwi ŋaꞌsə nsɔꞌ tɔ ŋwə.

Kɨ kaꞌ sày ndə sày ŋiꞌ ŋii ki,

buꞌ laa vɨ bàꞌsə məbwey wi fɨ shɨ nsi?» #Aysaya 53.7-8.

34Ndifwaŋ ghɔ́ gi tɨ́ Filip laa ŋwə naysə wə ntɨə faŋ nshiiŋii-sɔghɔ gisə kɔ̀ŋ ŋwə nə? «Ŋwə gisə kɔ̀ŋ nshɨ-tɔ wi mu, mu buꞌ wə dɨday?» 35Filip tey kɨ gisə sheꞌ buꞌ shəŋ ŋwaꞌlə kɔ́, nàysə ntɔŋ yijəə Nwi tɨ́ ŋwə kɔ̀ŋ Yeso. 36Vəŋ nəə toꞌ fɨ jɨɨ, ziꞌ yɨ muu mɔ́ꞌ, ndifwaŋ ghɔ́ gi laa, «Ye muu mbə̀, taa lay kə lay mə laa mə kee fì muu me?» [ 37Filip gi tɨ́ ŋwə laa, «A nùŋ fwi yə maa Kristo, kee bɨbɨꞌtə me, buu kaꞌ a fi.» Ŋwə gi laa, «Mə biŋ laa Yeso Kristo lùu Wee Nwi.»] 38Ndifwaŋ ghɔ́ yɨsə kaalə kɔ́ tɨŋnə, ghɔ Filip siꞌ gə̀ ŋìi taa muu. Ndifwaŋ ghɔ́ fi muu mə Nwi fɨ ghɔ Filip. 39Faŋ vəŋ kòꞌ fɨ taa muu, Zwitə Ley Nwi ndi Filip, ndifwaŋ ghɔ́ kee baa ye ŋwə me, shɔɔ gə̀, kɨ ŋaytə. 40Gə fɨ maa Filip, ŋwə ye ŋwaa wi ntɨꞌ Atsotɔs, baa shɔɔ fɨ taa ntɨꞌsə səmɔ́ꞌ, fɨꞌtə ntɔŋ yijəə Nwi, buu gə ziꞌ ntɨꞌ Sisaria.

Currently Selected:

Akts 8: bav

Highlight

Copy