Akts 4

Faŋ vɨ nə jìa Pita ghɔ Jɔn

1Faŋ vəŋ nəə gisə tɨ́ vɨɨ nɨniŋ, vɨɨ məfeꞌ Nwi nə tɨɨ məshii ŋii Nwi nə vɨɨ Sadusii jwi maa vəŋ. 2Fwisə vəŋ nə shə̀ buꞌ laa Pita ghɔ Jɔn nəə deesə vɨɨ, gi kɔ̀ŋ nu məywey fɨ shɨ yiku, laa Yeso ywèy fɨ shɨ yiku. 3Vəŋ jia Pita ghɔ Jɔn, fə̀ŋ vəŋ taa ŋii mfiŋ, laa vəŋ taa shi fu lee, buꞌ laa yighee nə duꞌtə nyə shɔɔ. 4Vɨɨ vəyaŋ faŋ vəŋ nə zɔ̀ yigisə Pita yɔ́, biŋ, nùŋ fwisə vəŋ maa Kristo. Nwaa vɨɨ Kristo ziꞌ yaa ŋkaŋsə tee.

5Fu kɨ lee vəshɨꞌ nə vɨɨ taanə nə vɨɨ mədeesə ŋwaꞌlə Nwi baytə ntɨꞌ Jerusalem. 6Anas, wuu kwalə məfeꞌ Nwi, nə Kayafas, baa nə Jɔn nə Alesanda, baa nə vɨɨ vənshə fɨ ŋiꞌ ŋii vɨɨ kwalə məfeꞌ Nwi nə luu taa ŋwaa vəŋ. 7Vɨ kɨ nii tə̀ Pita ghɔ Jɔn nɨntəŋ, bìtə tɨ́ vəŋ laa, «Viŋ sii yɨ̀ nu kɔ́ kɨkə? Wutə kiŋ maa məyɨ nu kɔ́ ndɔ̀ fɨ fə? Viŋ yɨsə maa yizii ndə?» 8Pita faŋ Zwitə Ley Nwi nə lwàŋ taa fwi ŋwə, kɔ bəŋsə tɨ́ vəŋ, gì laa lee, «Vəshɨꞌ nə vɨɨ taa, 9viŋ bìtə tɨ́ yia ndee buꞌ nu jəə faŋ yia yɨ̀ maa ndwey, laa ŋwə bwey buꞌ ndə nə. 10Bàw viŋ vənshə, nə ŋgwisə ŋiꞌ ŋii Isirayl kənshə kɨɨ laa, wə ŋwə̀ faŋ ŋwə tɨŋ vɨsɨ viŋ, tɨ́ ŋwə bwaŋnə nə, bwaŋnə buꞌ yizii Yeso Kristo, wuu Nazaret, faŋ viŋ nə bèy ŋwə fuu fəŋkɔꞌ fə ŋkɨꞌsə. Nwi yweysə ŋwə fɨ shɨ yiku. 11Yeso lùu ŋoꞌ njyə faŋ viŋ, vɨɨ məbɔŋ ndɔꞌ, nə mèꞌ, nyə kiasə gù ŋoꞌ mfay ŋii, sheꞌ faŋ vɨ nə nyɔ̀ꞌ taa ŋwaꞌlə Nwi. #Sam 118.22. 12Kaꞌ wə kee kìi məbwey fɨ ghɔ wə dɨday me. Nwi kɔ sheꞌ Yeso tɨ́ nsiŋ laa nsiŋ ndɔ kii məbwey vəlwaŋ, faŋ nsiŋ bìŋ yizii Yeso yɔ́.» 13Shuu vəŋ yɔŋ maa Pita ghɔ Jɔn buꞌ faŋ vəŋ nəə gisə nə wutə, kee fee wə me. Shuu vəŋ yɔŋ buꞌ laa vəŋ nə kɨɨ laa Pita ghɔ Jɔn nə kee lùu vɨɨ məkɨɨ nə ŋwaꞌlə yaŋ me. Vəŋ nə luu sheꞌ vɨɨ dayday. Luu nə, vəŋ kɨɨ nɨzi laa vəŋ nəə toꞌ ghɔ vɨ Yeso mɔ́ꞌ. 14Vəŋ baa yè wə ntɨə faŋ Pita nə Jɔn nə bwèysə ŋwə nə, faŋ ŋwə tɨ̀ŋnə yɨ vəŋ, kee baa kìi nu gì, yuu shia vəŋ me. 15Vəŋ gi Pita ghɔ Jɔn fuu fɨ taa ŋii nsɔꞌ, goꞌ sheꞌ vəŋ vəŋ, kɨ gisə. 16Vəŋ gi laa vəŋ sii taa yɨ kə nə vɨɨ vɔ́ vəbɔɔ, faŋ vəŋ nə yɨ ŋkee nu shuu yɔŋ nə. Vɨɨ vənshə fɨ ntɨꞌ Jerusalem kɔꞌ kɨɨ nə nu kɔ́, kaꞌ vəŋ kee twey me. 17Luu nə, vəŋ kee kàw laa nu kɔ́ baa kɨ saynə ntɨꞌ Jerusalem me, gì laa bàw vɨ twey tɨ́ Pita ghɔ Jɔn laa kɨ vəŋ baa gi nu tɨ́ wə kɔ̀ŋ yizii Yeso me. 18Nɨniŋ, vəŋ baa tìi vəŋ, gì tɨ́ vəŋ laa, «Yia shɨ viŋ laa, kɨ kɨɨ kɨ viŋ baa deesə nu, tii yizii Yeso me!» 19Pita ghɔ Jɔn kɔ bəŋsə tɨ́ vəŋ, gì laa, «Bàw viŋ sɔꞌ nu ŋkɨə faŋ ŋkə lùu kəloomə vɨsɨ Nwi, məzɔnə viŋ shɔ̀ɔ məzɔnə Nwi mu? 20Kɨ kɨ kaꞌ yia kee meꞌtə maa məkɨ gisə kɔ̀ŋ nu ŋkɨə faŋ yia nə ye baa zɔ me.» 21Nshəŋtə yikwalə yɔ́ baa kɨ twey tɨ́ vəŋ ŋkee nəŋay maa mətii yizii Yeso, kɨ nii shòꞌtə fɨ maa vəŋ. Vəŋ nə kee kìi nu mɔ́ꞌ, tɨ́ kaꞌ vɨ kwaŋ nsɔꞌ maa vəŋ me, buꞌ laa vɨɨ vənshə nəə bəŋsə Nwi maa nu ŋkɨə faŋ ŋkə nə gày nə. 22Wə ntɨə faŋ vɨ nə yɨ̀sə nu shuu yɔŋ kɔ́ maa ŋwə nə, duꞌtə ŋwə ta shɔ̀ɔ ŋuꞌ muu-yinshwe.

Məshɔꞌtə vɨɨ Kristo

23Sheꞌ yighee yɔ́ faŋ vɨ nə mèꞌtə Pita ghɔ Jɔn nə, vəŋ bəŋ gə yɨ vɨɨ vəŋ, nàysə nu ŋkɨə faŋ vɨɨ kwalə məfeꞌ Nwi nə vɨɨ taanə gì nə. 24Vɨɨ Kristo vɔ́ zɔ nɨniŋ, faynə yiŋwaa maa məshɔꞌtə Nwi, kɨ shɔꞌtə Nwi nə fwi yimuꞌ laa, «Tɨta, nə bɔ̀ŋ ghɔ bɔ̀ŋ yizɔ nə nsi nə mamuu nə vətɔ vənshə faŋ mbə lùu shɔ. 25A nə yɨ̀sə tii wia Deyvid, wuu faꞌ wə, gi tɨ́ vətɨɨ via fɨ taa Zwitə Ley Nwi laa,

«Sii yɨ kə vɨɨ tətɔŋ fu shə shɔ̀ɔ ki.

Vəŋ sii shoꞌ ghuu vɨɨ Nwi tɨ́ kə?

26Vəfwàŋ fɨ mbi lòotə yiŋwaa vəŋ,

fàynə ghɔ vɨ vɨɨ mbɨə faŋ vəŋ sɔꞌ məshɨ,

maa məmɔŋ maa məka yighaw

tɔ Nwi, tɨta ŋwaa-nsiŋ,

nə tɔ wə ntɨə faŋ Nwi shòꞌ.» #Sam 2.1-2.

27Yinsəŋ, fwàŋ Herod nə goməna Pɔntiɔs Pilate faynə ntɨꞌ nyə̀ ghɔ vɨ vɨɨ tətɔŋ fu, nə vɨɨ Isirayl maa məka yighaw tɔ Yeso, wuu faꞌ ley wə, faŋ a shòꞌ. 28Vəŋ yɨ̀sə vənu vənshə faŋ a nə nùŋsə maa wutə kə nə ŋkɨɨ yə laa ŋkə ndɔ gay. 29Nɨniŋ, faŋ ŋkə lùu ndwə, bàw a ndeynə nu ŋkɨə faŋ vəŋ kɔꞌnə yia shɔ nə mɔɔ, Tɨta. Kɔ wutə tɨ́ yia, faŋ yia luu vɨɨ və nə, laa yia kɨ gisə nu kə nə fwi yiweꞌ. 30Nesə ghɔ kə nɨzi, shùꞌ vəza fɨ maa vɨɨ, yɨ laa vəshwenə nə vənu və shuu yɔŋvə fuu maa yizii wuu faꞌ wə Yeso, faŋ ŋwə bàw shɨlə nə.» 31Faŋ vəŋ nə bùꞌ ghɔ tɨ́ Nwi nɨniŋ nə, shəŋ ŋkɨə faŋ vəŋ nə faynə shɔ nə, nəꞌnə, Zwitə Ley Nwi ŋii taa fwisə vəŋ vənshə. Vəŋ fɨꞌtə nu Nwi nə fwi yiweꞌ.

Nshinə mfɔŋsə vɨɨ Kristo

32Nwaa vɨɨ mbɨə faŋ vəŋ nə fìŋ tɔ vəŋ tɨ́ Kristo nə, fwi vəŋ luu yimuꞌ, yigisə vəŋ luu yimuꞌ nɨzi. Tuu wə kee tìi fa nə ŋkii me, vətɔ vəvəŋ vənshə luu fa kəmuꞌ. 33Vɨɨ ntɔŋ tɨta Yeso fɨꞌtə nu Yeso ŋkee nə wutə Nwi, gisə ntee laa Yeso nə ywèy fɨ shɨ yiku. Vɨɨ nə kaw vəŋ vənshə dɨdɨꞌ. 34Bəə nə kee lùu taa ŋwaa vəŋ me, buꞌ laa vɨɨ mbɨə faŋ vəŋ nə kìi ndɔꞌ nə təndɨɨ, gə fiŋ vətɔ vəvəŋ, jwì nə ka ghɔ́, 35jwi kɔ tɨ́ vɨɨ ntɔŋ Yeso. Vɨɨ ntɔŋ Yeso gaasə ka ghɔ́ tɨ́ vɨɨ, wə kii faŋ ŋwə kùꞌnə. 36Nɨniŋ, wə mɔ́ꞌ nə luu shɔ, yizii yi luu Josef. Vɨɨ ntɔŋ Yeso shù yizii yi nə Barnabas, faŋ lùu laa wuu məkɔ wutə. Ŋwə nə luu wuu Levi. Vɨ nə bi ŋwə shɨ Sayprɔs. 37Josef ghɔ́ nə kìi nsi yi, fìŋ, ndì ka ghɔ́, jwì nə ŋwə tɨ́ vɨɨ ntɔŋ Yeso, nùŋsə nsi ghuu vəŋ.

Currently Selected:

Akts 4: bav

Highlight

Copy