Akts 3

Faŋ Pita nə shuꞌ ndwey, fɨꞌtə nu Nwi tɨ́ vɨɨ

1Shi mɔ́ꞌ Pita ghɔ Jɔn koꞌ gə taa ŋii Nwi yikwalə maa vəshɨshwi vətia, faŋ nə luu yighee məshɔꞌtə Nwi. 2Vəŋ kɨ ziꞌ taa ŋii Nwi, wə mɔ́ꞌ luu shɔ faŋ nə luu ndwey shù fɨ nə faŋ vɨ nə bi ŋwə. Vɨ nə shaꞌ ŋwə shi shi jwi, nùŋ shuu ŋii Nwi yikwalə faŋ vɨ tii laa shuu ŋkɔꞌ jəənə, tɨ́ kɨ kaꞌ ŋwə kɨ ndwaŋ vətɔ fɨ ghɔ vɨɨ faŋ vəŋ jwi ŋii shɔꞌtə Nwi. Maa shi kɔ́ vɨ nə nuŋ ndwey ghɔ́ shɔ sheꞌ maa yighee njyə faŋ Pita ghɔ Jɔn nəə shɔɔ fɨ yifi. 3Faŋ ŋwə nə yè Pita ghɔ Jɔn, faŋ vəŋ nəə kəə ŋii taa ŋii Nwi, ŋwə ndwaŋ vəŋ laa vəŋ kɔ yi nə ka. 4Pita ghɔ Jɔn ndeynə ŋwə, tə̀ sɨ vəŋ maa ŋwə, gì laa, «Ndeynə yia!» 5Wə ghɔ́ tə sɨ ghi maa vəŋ, kɨ kɨꞌ maa məfi fa fɨ ghɔ vəŋ. 6Pita gi tɨ́ ŋwə laa, «Mə kee kìi ka me. Luu nə, fa ŋkɨə faŋ mə kìi, mə taa kɔ tɨ́ ghɔ. Maa yizii Yeso Kristo, wuu Nazaret, mə gi laa a ndɔ fɨ nsi, kɨ toꞌ.» 7Pita gi nɨniŋ, jìa wə ghɔ́ fɨ maa kwiŋ maꞌnə wi, shàꞌsə ŋwə yizɔ. Sheꞌ yighee yɔ́ fəŋ ghi nə ghuu ghi weꞌ. 8Ŋwə bisə sàwnə, shəŋ tɨ̀ŋ yizɔ, ndɔ toꞌ kia, ghɔ vɨ vəŋ ŋii taa ŋii Nwi. Ŋwə toꞌ sàwnə shəŋ ŋaytə, bə̀ŋsə Nwi. 9Vɨɨ vənshə ye ŋwə faŋ ŋwə toꞌ bəŋsə Nwi. 10Vɨɨ kɨɨ nə ŋwə laa lùu wə ntɨə faŋ ŋwə yaa kɨ duꞌ shuu ŋkɔꞌ yijəə, ndwaŋ vətɔ nə. Shuu vəŋ yɔŋ maa nu ŋkɨə faŋ ŋkə gày maa wə ghɔ́.

11Ŋwə kii toꞌ ghɔ vɨ Pita nə Jɔn, toꞌ mɔꞌ ghɔ ghi maa vəŋ, vɨɨ vənshə baytə ghɔ vɨ vəŋ taa ndii kəmɔ́ꞌ faŋ vɨ nəə tii nə taa ndii Solomon, tɨ́ shuu vɨɨ vənshə yɔŋ. 12Faŋ Pita nə ye vɨɨ vɔ́, gì tɨ́ vəŋ laa, «Vɨɨ Isirayl, sii yɨ̀ kə laa shuu wiŋ yɔŋ maa nu kə̀? Yɨ̀ kə viŋ ndeynə yia? Viŋ bɨꞌtə laa luu ŋkia wutə laa yia yɨ wə ŋwə̀ toꞌ mu? Viŋ bɨꞌtə laa yɨ̀ yia buꞌ faŋ yia bəŋsə Nwi dɨdɨꞌ mu? 13Viŋ zɔ! Nwi vətɨɨ via Abraham nə Isak baa nə Jeykob, nəə bəŋsə wuu faꞌ wi Yeso. Luu ŋwə faŋ viŋ nə kɔ̀ tɨ́ goməna Pilate, baa twey ŋwə sɨ Pilate, faŋ ŋwə nə kəə meꞌtə ŋwə, ŋwə gə. 14Viŋ nə twèy wuu ley ghɔ́ faŋ nə luu wuu yinsəŋ, kɨ kəə laa vɨ fuusə wuu məzwi wə fɨ taa ŋii mfiŋ, kɔ̀ tɨ́ viŋ, 15baa nə laa vɨ zwi wə ntɨə faŋ ŋwə lùu tɨɨ məbwey. Luu nə, Nwi yweysə ŋwə fɨ shɨ yiku, yia ye ŋwə nə sɨ. 16Viŋ zɔ! Wə ŋwə̀ faŋ viŋ yè ŋwə, kɨ̀ɨ nə ŋwə nə, nii nùŋ fwi yi maa yizii Yeso, buu yizii Yeso yɔ́ kɔ wutə tɨ́ ŋwə. Nii yɨ̀ Yeso laa wə ghɔ́ nuŋsə fwi yi maa Yeso, buu ŋwaa wi nshə weꞌ, viŋ vənshə ye. 17Vaŋ-nshwi vaŋ, mə kɔꞌ kɨɨ laa viŋ nə vəshɨꞌ viŋ nə yɨ̀ nu kə̀ mbuꞌ. 18Nɨniŋ, Nwi nə yɨ̀ nɨniŋ, laa nu ŋkɨə faŋ nshiisə-ŋii sɔghɔ vənshə nə fɨ̀ꞌtə, faynə, fɔnə faŋ vəŋ nə nàysə laa Kristo, wuu məbweysə ŋwaa-nsiŋ, ndɔ ye ŋɨꞌ. 19Nɨniŋ, viŋ kwiinə fwi siŋ ndwə, kwiinə nshinə yiŋ, laa Nwi ndenə yibɨsə yiŋ faŋ viŋ nə yɨ̀. 20Viŋ kwiinə fwi siŋ, tɨ́ kɨ kaꞌ tɨta Nwi yɨ̀ laa yighee məduꞌ bwaŋnə fuu taa ŋwaa viŋ, baa nə laa Nwi ndɔ tɔŋ Yeso, wuu məbweysə wiŋ, tɨ́ viŋ. 21Ŋwə lùu taa yizɔ ndwə, ziꞌ tɨ́ yighee njyə faŋ vənu vənshə ndɔ fuu ntee, faŋ Nwi nə kwàŋ taa shuu nshiisə-ŋii sɔghɔ shù fɨshi. 22Fɨshi Mose nə gì laa,

«Tɨta Nwi ndɔ tɔŋ nshiiŋii-sɔghɔ tɨ́ viŋ,

sheꞌ faŋ ŋwə nə tɔ̀ŋ mə nə.

Nshiiŋii-sɔghɔ yɔ́ ndɔ luu wə fɨ maa vɨɨ viŋ.

Viŋ taa zɔnə ŋwə maa vənu vənshə

faŋ ŋwə ndɔ naysə tɨ́ viŋ.

23Wə tɨ̀ me wə faŋ ŋwə taa kee zɔ nu

ŋkɨə faŋ nshiiŋii-sɔghɔ gì me,

buu vɨ taa ndisə ŋwə fɨ taa ŋwaa vɨɨ Nwi.»

# Diteronimi 18.15-19.

24Nshiisə-ŋii sɔghɔ vənshə nə gì nu buꞌ ŋuꞌsə mbi sə̀ nɨzi, zì fɨ maa Samuel, kɔ tɨ́ nshiisə-ŋii sɔghɔ vənshə faŋ vəŋ nə bèꞌsə ŋwə nə. 25Viŋ lùu vaŋ nshiisə-ŋii sɔghɔ sɔ́, nə vaŋ məkee mbɨə faŋ Nwi nə gwìa ghɔ vətɨɨ viŋ. Nwi nə gì tɨ́ Abraham laa, ŋgwisə vɨɨ fɨ mbi yinshə ndɔ kɨ ye mənɔŋ-bwaŋnə buꞌ wee wee ŋwiŋ wi. #Jenesis 22.18. 26Viŋ lùu vɨɨ vɨsɨ faŋ Nwi nə ywèysə wuu faꞌ wi, tɔ̀ŋ ŋwə tɨ́ viŋ laa ŋwə tu mənɔŋ-bwaŋnə tɔ viŋ, faŋ viŋ kìasə fwi siŋ, wə nə muꞌ nə muꞌ, meꞌtə vənu vəbwəvə viŋ.»

Currently Selected:

Akts 3: bav

Highlight

Copy