Akts 16

Faŋ Pɔɔl nə baa tòꞌ fɨ taa ntɨꞌsə Derbi nə Listra nə Ikoniɔn, shɔ̀ɔ gə̀ zìꞌ Troas

1Nɨniŋ, Pɔɔl ghɔ Silas gə ziꞌ Derbi nə Listra. Wuu məzwetə nu Kristo mɔ́ꞌ nə luu shɔ, yizii yi lùu Timoti. Nshu wi nə luu wuu Jus faŋ ŋwə nə nùŋ fwi yi maa Yeso. Tii wi nə luu wuu Griik. 2Vɨɨ məbiŋ nu Kristo fɨ Listra nə fɨ Ikoniɔn nə bìŋ Timoti ghɔ́, laa lùu wuu yinsəŋ. 3Pɔɔl nə kəə laa ghɔ Timoti kɨ toꞌ mɔ́ꞌ. Nɨniŋ, ŋwə ndi Timoti, sɨ̀ɨtə ŋwə, buꞌ vɨɨ Jus faŋ vəŋ nə luu maa kwiŋ ghɔ́, faŋ vəŋ nəə kɔꞌ kɨɨ laa tɨɨ Timoti nə luu wə fɨ shɨ Griis. 4Vəŋ baa kii shɔɔ fɨ taa məshɨ, toꞌ nàysə vənu mbɨə faŋ vɨɨ ntɔŋ Kristo nə vɨɨ taa fɨ taa məshəŋtə vɨɨ Kristo fɨ ntɨꞌ Jerusalem nə nuŋsə nə, laa vəŋ kɨ zɔnə, yɨ vənu vɔ́. 5Nɨniŋ, vəməshəŋtə və vɨɨ Kristo weꞌ maa nu Nwi, nwaa vəŋ baa kùꞌsə shi shi.

6Vɨ Pɔɔl kɨ nii shɔ̀ɔ fɨ taa məshɨ mə Frigia nə Galatia, buꞌ laa Zwitə Ley Nwi nə fəŋ vəŋ maa məfɨꞌtə nu Nwi shɨ Asia. 7Vəŋ kɨ ziꞌ kwiŋ Misia, fɨꞌnə maa məshɔɔ gə̀ shɨ Bitinia, Zwitə Yeso twey. 8Nɨniŋ, vəŋ shɔɔ fɨ mbɨɨ Misia, siꞌ gə̀ ziꞌ Troas. 9Faŋ vəŋ nə luu yifi, njyəə shi Pɔɔl vətuꞌ. Ŋwə ye wuu Makedonia jwi maa ŋwə taa njyəə, tɨŋ kɨ buꞌ ghɔ tɨ́ ŋwə, gì laa, «Tɔŋ jwì njɨɨ Makedonia, jwì gàŋtə yia!» 10Faŋ njyəə yɔ́ nə shì Pɔɔl nɨniŋ nə, vəŋ kəə bay maa mətɔŋ gə̀ njɨɨ Makedonia, buꞌ laa vəŋ nə kɨɨ laa tii Nwi tii vəŋ, laa vəŋ tɔŋ gə̀ fɨ̀ꞌtə ntɔŋ yijəə Nwi tɨ́ vɨɨ Makedonia.

Faŋ Pɔɔl nə fɨ̀ꞌtə nu Nwi ntɨꞌ Filipi

11Nɨniŋ, vəŋ ŋii bay kwalə mɔ́ꞌ, ndɔ̀ fɨ Troas, tɔ̀ŋ mamuu, gə sheꞌ neꞌtə, gə̀ zìꞌ Samotris. Fu lee vəŋ ziꞌ Neapolis, 12baa ndɔ̀ fɨ fuŋ, toꞌ gə̀ zìꞌ Filipi, faŋ luu ŋkee ntɨꞌ vɨsɨ fɨ shɨ Makedonia. Shəŋ kɔ́ nə baa luu ntɨꞌ vəndɔ tɨ́ vɨɨ Rom. Vəŋ kɨ nii shì yifi maa vaŋ-mbusə vəshi. 13Kɨ luu maa shi zwisə Nwi vɨɨ Jus, vəŋ fuu, gə̀ mbɨɨ muu faŋ vəŋ nəə bɨꞌtə laa shəŋ məshɔꞌtə Nwi lùu shɔ. Vəŋ duꞌnə nsi, gì tɨ́ vəki mbɨə faŋ vəŋ nə bàytə yifi. 14Taa ŋwaa vɨɨ vɔ́ faŋ vəŋ nə bàytə yifi, zɔ̀ nu ŋkɨə faŋ Pɔɔl nəə gisə nə, wəzwi mɔ́ꞌ nə luu shɔ, yizii yi luu Lidia. Ŋwə nə ndɔ̀ fɨ shɨ Tiateyra. Ŋwə nə luu wuu məbeꞌlə njwisə baysə, ndɔ̀ lùu wuu məbəŋsə Nwi. Ŋwə zɔ yigisə Pɔɔl, Nwi ŋaꞌsə fwi yi laa ŋwə zɔ yigisə Pɔɔl nə fwi yiley. 15Yighee njyə faŋ wəzwi ghɔ́ nə vɨɨ ŋiinə vi nə fì muu mə Nwi, ŋwə kɨ nii tìi Pɔɔl ghɔ vɨ vɨɨ vi, laa vəŋ jwi shì taa ŋii ŋwə, faŋ vəŋ bìŋ yinsəŋ laa yi lùu wuu məbiŋ Nwi nə. Wəzwi ghɔ́ dɔɔ vəŋ, vəŋ biŋ.

Faŋ vɨ nə kwàŋ Pɔɔl ghɔ Silas taa ŋii mfiŋ

16Shi mɔ́ꞌ faŋ vəŋ nə gə̀ maa shəŋ məshɔꞌtə Nwi, vəŋ faynə jɨɨ ghɔ vɨ wee-wəzwi mɔ́ꞌ faŋ nə luu buꞌ. Ŋwə nə kìi zwitə kəmɔ́ꞌ faŋ ŋkə nəə yɨsə ŋwə fəə mfisə tɨ́ vɨɨ, naysə vənu faŋ mbə taa buu gày. Nɨniŋ, ŋwə nəə baytə ka ŋkee yaŋ tɨ́ vɨɨ mbɨə faŋ vəŋ nə kii ŋwə. 17Wəzwi ghɔ́ beꞌsə Pɔɔl ghɔ vɨ vɨɨ vi, toꞌ yumə laa, «Vɨɨ və̀ lùu vɨɨ faꞌ Nwi kwalə fɨ yizɔ, vəŋ dəsə jɨɨ, tɨ́ kaꞌ viŋ shɔ̀ɔ fuŋ, ndɔ̀ bwèy.» 18Ŋwə nə yɨsə nɨniŋ vəshi vəyaŋ, ŋkə za Pɔɔl, ŋwə kiasə ŋwaa wi, gì tɨ́ zwitə bwə kɔ́ fɨ taa ŋwaa wəzwi ghɔ́ laa, «Mə gì tɨ́ ghɔ maa yizii Yeso Kristo laa a fuu fɨ taa ŋwaa wəzwi ŋwə̀.» Sheꞌ yighee yɔ́ zwitə bwə kɔ́ fuu. 19Yighee njyə faŋ vɨɨ vɔ́ faŋ vəŋ nə kìi wəzwi ghɔ́, nə ye laa jɨɨ ŋkəə vəŋ kee baa lùu shɔ me, vəŋ jia Pɔɔl ghɔ Silas, gə̀ nə vəŋ vɨsɨ vɨɨ kwalə taa yiwiŋ, 20kɔ vəŋ tɨ́ vɨɨ məshia nsɔꞌsə, gì laa, «Vɨɨ və̀ lùu vɨɨ Jus, vəŋ buulə shɨ kaŋ-nsiŋ, 21deesə ntɨsə səmɔ́ꞌ faŋ kaꞌ nsiŋ kee biŋ me, tɨꞌnə me yɨ̀ me, buꞌ laa nsiŋ lùu vɨɨ Rom. 22Vɨɨ taa shɨ kɨ nii kwàŋ yighaw shɔ, vɨɨ məshia nsɔꞌsə setə njwisə Pɔɔl ghɔ Silas fɨ maa vəŋ, gì laa vɨ saŋ vəŋ. 23Faŋ vɨ nə saŋ vəŋ ŋkee jəə, vɨɨ məshia nsɔꞌsə gi vɨ kwaŋ vəŋ taa ŋii mfiŋ, gì tɨ́ wə ntɨə faŋ ŋwə nə ndeynə vɨɨ ŋii mfiŋ, laa ŋwə kwaŋ vəŋ ŋkee taa shəŋ weꞌ fɨ taa ŋii mfiŋ. 24Wuu məndeynə vɨɨ ŋii mfiŋ zɔ nɨniŋ, kwaŋ vəŋ ŋkee taa shəŋ weꞌ fɨ taa ŋii mfiŋ, ndɔ̀ kɔ̀ŋ fəŋkɔꞌ fəŋ vəŋ.

Faŋ wuu məndeynə vɨɨ ŋii mfiŋ nə kwìinə fwi yi

25Kɨ luu nɨndɨɨ mbi, Pɔɔl ghɔ Silas shɔꞌtə Nwi taa ŋii mfiŋ, ndɔ zwaa nyaysə. Vɨɨ ŋii mfiŋ nə ywiitə, zɔ fɨ ghɔ vəŋ. 26Faŋ vəŋ nə shɔꞌtə Nwi, zwaa nyaysə nə, nsi gwəkə nə̀ꞌnə, shɨŋii ŋii mfiŋ nəꞌnə. Sheꞌ yighee yɔ́ təshuu təfwə tə ŋii mfiŋ ŋaꞌnə, məŋkɔꞌ keꞌkə fɨ fəŋ wə tɨ̀ mə wə. 27Wuu məndeynə ŋii mfiŋ yenə, ye laa təshuu təŋii mfiŋ ŋaꞌnə, ŋwə shoꞌ baꞌ yighaw ki, kɨ kəə zwì ŋwaa wi, buꞌ laa ŋwə nəə bɨꞌtə laa vɨɨ ŋii mfiŋ nyɨ̀ŋkə. 28Pɔɔl yumə ŋkee nəŋay, gì laa kɨ ŋwə ndɨəsə ŋwaa wi me, «Yia shɔ vənshə!» 29Wuu məndeynə ŋii mfiŋ, bitə kiꞌ, nyɨŋ ŋìi taa ŋii mfiŋ, ŋwaa wi nə laꞌ, ŋwə shɔɔ gə̀ gù vɨsɨ Pɔɔl ghɔ Silas, 30kɨ nii fùusə vəŋ fu, bìtə laa, «Vətɨɨ vaŋ, sii kɨ kaꞌ mə yɨ̀ kə, buu bwèy?» 31Vəŋ bəŋsə tɨ́ ŋwə laa, «Nuŋ fwi yə maa Yeso Kristo, buu a ndɔ kii məbwey vəlwaŋ, viŋ vɨ ŋii yə.» 32Nɨniŋ, vəŋ fɨꞌtə nu Nwi tɨ́ ŋwə nə tɨ́ vɨɨ vənshə fɨ taa ŋii ŋwə. 33Sheꞌ yighee yɔ́ vətuꞌ, wuu məndeynə vɨɨ ŋii mfiŋ ndi vəŋ, gə̀ sɔ̀ vədɨꞌ fɨ maa vəŋ, ghɔ vɨ vɨɨ vi vənshə kɨ nii fì muu mə Nwi. 34Ŋwə baa ndi Pɔɔl ghɔ Silas, gə̀ nə vəŋ taa ŋii ŋwə, kɔ̀ fazɨ tɨ́ vəŋ, ghɔ vɨ ŋii yi yinshə ŋaytə, buꞌ faŋ vəŋ nə nùŋ fwisə vəŋ maa Yeso Kristo.

35Fu kɨ lee vɨɨ məshia nsɔꞌsə tɔŋ vɨɨ faꞌ vəŋ laa vəŋ gə nàysə tɨ́ wuu məndeynə ŋii mfiŋ, laa ŋwə meꞌtə Pɔɔl ghɔ Silas, vəŋ gə nə ŋwaa vəŋ. 36Nɨniŋ, wuu məndeynə ŋii mfiŋ naysə tɨ́ Pɔɔl laa, «Vɨɨ məshia nsɔꞌsə tɔŋ ntɔŋ laa viŋ gə. Nɨniŋ, viŋ fuu fu, gə̀ nə mənɔŋ-bwaŋnə.» 37Pɔɔl zɔ ntɔŋ yɔ́, gì tɨ́ vəŋ laa, «Vɨ nə kee kəə nu kia, ye laa yia gu nu me, sàŋ yia taa yiwiŋ, faŋ yia lùu vɨɨ Rom, baa kwàŋ yia taa ŋii mfiŋ. Luu ndwə, vəŋ kəə nyɨnyɔꞌtə fùusə yia buꞌ kə? Ŋkə kee lùu nɨniŋ me! Bàw vəŋ taa jwi feenə maa nshɨ-tɔ vəŋ, jwì fùusə yia.» 38Vɨɨ faꞌ vɔ́ bəŋ gə̀ naysə tɨ́ vɨɨ məshia nsɔꞌsə. Faŋ vɨɨ məshia nsɔꞌsə nə zɔ laa Pɔɔl ghɔ Silas lùu vɨɨ Rom, vəŋ fee ŋkee dɨdɨꞌ. 39Nɨniŋ, vəŋ gə bùꞌ ghɔ tɨ́ vəŋ, fùusə vəŋ fɨ taa ŋii mfiŋ, gì tɨ́ vəŋ laa bàw vəŋ fuu fɨ taa shɨ yɔ́. 40Pɔɔl ghɔ Silas fùu fɨ taa ŋii mfiŋ yɔ́, gə̀ taa ŋii Lidia, yè vɨɨ məbiŋ nu Kristo, zwìsə fwisə vəŋ, kɨ nii yigə nə ŋwaa vəŋ.

Currently Selected:

Akts 16: bav

Highlight

Copy