Akts 15

Faŋ ntay nə fùu buꞌ nu məsɨɨtə vɨɨ Kristo mbɨə faŋ vəŋ nə kee lùu vɨɨ Jus me

1Maa yighee yɔ́, vɨɨ mɔ́ꞌ siꞌ jwì fɨ shɨ Judia, kɨ tɨsə vɨɨ məbiŋ nu Kristo laa, vɨ kɨ luu kee sɨ̀ɨtə vəŋ faŋ nuŋsə Mose naysə me, buu kaꞌ vəŋ kee ndɔ zɨ məbwey vəlwaŋ me. 2Nɨniŋ, vəŋ buulə nshəŋtə vɨɨ məbiŋ nu Kristo. Pɔɔl ghɔ Barnabas tay ŋkee jəə ghɔ vɨ vəŋ maa nu kɔ́. Nɨniŋ, vɨ gi laa Pɔɔl ghɔ Barnabas nə vɨɨ mɔ́ꞌ fɨ ntɨꞌ Antiɔk gə Jerusalem, gə̀ yè vɨɨ ntɔŋ Kristo nə vɨɨ taa fɨ taa məshəŋtə vɨɨ Kristo maa nu ntay kɔ́. 3Vɨɨ Kristo fɨ ntɨꞌ Antiɔk gə twey vəŋ jɨɨ, vəŋ shɔɔ fɨ shɨ Fənishia nə fɨ shɨ Samaria, toꞌ naysə tɨ́ vɨɨ Kristo fɨ maa vəshəŋ vənshə, faŋ vɨɨ tətɔŋ fu kwiinə fwisə vəŋ, bìŋ nu Kristo. Vɨɨ Kristo vənshə ŋaytə maa nu kɔ́. 4Nɨniŋ, vəŋ gə ziꞌ Jerusalem. Məshəŋtə vɨɨ Kristo fɨ ntɨꞌ Jerusalem ndi vəŋ nə məŋaytə. Vɨɨ ntɔŋ Kristo nə vɨɨ taa fɨ taa məshəŋtə ghɔ́ jia vəŋ jəə. Vəŋ naysə vənu vənshə faŋ Nwi nə gàŋtə vəŋ, vəŋ yɨsə. 5Vɨɨ mɔ́ꞌ faŋ vəŋ nə ndɔ̀ fɨ taa nwaa vɨɨ Farisii, biŋ nu Kristo, ndɔ fɨ nsi, gì laa bàw laa vɨ sɨɨtə vɨɨ məbiŋ nu Kristo faŋ vəŋ kee lùu vɨɨ Jus me, tɨsə vəŋ nə ntɨsə Nwi, tɨ́ kaꞌ vəŋ jia nùŋsə vɨɨ Jus.

6Vɨɨ ntɔŋ Kristo nə vɨɨ taa fɨ taa nshəŋtə yɔ́ baytə, duꞌnə kɨ kwaꞌtə tɔ vəŋ maa nu kɔ́. 7Faŋ ntay nə yaŋ, Pita ndɔ yizɔ, gì tɨ́ vəŋ laa, «Vaŋ-nshwi vaŋ, viŋ kɔꞌ kɨɨ laa Nwi nə shòꞌ mə fɨ taa ŋwaa viŋ fɨshi, laa vɨɨ tətɔŋ fu zɔ ntɔŋ yijəə fɨ shuu mə, nùŋ fwisə vəŋ maa Kristo. 8Nwi, faŋ ŋwə kɨɨ nə ŋiꞌ fwi vɨɨ, biŋ vəŋ, kɔ̀ Zwitə Ley ki tɨ́ vəŋ, sheꞌ faŋ ŋwə nə kɔ̀ tɨ́ nsiŋ nə. 9Nwi nə kee seesə nsiŋ vɨ vəŋ me, sɔ̀ fwisə vəŋ, nsə ley, faŋ vəŋ nə nùŋ fwisə vəŋ maa Kristo nə. 10Nɨniŋ, sii yɨ kə buu viŋ kəə kɨ mɔŋ Nwi, faŋ viŋ kəə koꞌsə biꞌ mbəꞌ vɨɨ məbiŋ Kristo, faŋ ŋkee vətɨɨ vaŋ-nsiŋ, tɨꞌnə me nsiŋ, nə kee kìi wutə maa məbiꞌ me? 11Maa nsiŋ nùŋ fwi saŋ-nsiŋ maa tɨta Yeso, laa nsiŋ ndɔ kii məbwey vəlwaŋ buꞌ gəŋ si. Maa vɨɨ vɔ́ yɨ sheꞌ nɨniŋ.» 12Ŋwə gi nɨniŋ, vɨɨ vənshə shia, kɨ zɔ sheꞌ fɨ ghɔ Barnabas ghɔ Pɔɔl, faŋ vəŋ naysə vənu və shuu yɔŋvə, baa nə vənu və yifiŋtə, faŋ Nwi yɨ̀sə tɨ́ vɨɨ tətɔŋ fu, buꞌ faŋ Barnabas ghɔ Pɔɔl nə fɨꞌtə ntɔŋ yijəə Nwi tɨ́ vəŋ nə. 13Faŋ Barnabas ghɔ Pɔɔl metə yigisə vəŋ yɔ́, Jeyms gi laa, «Vaŋ-nshwi vaŋ, viŋ zɔ nu ŋkɨə faŋ mə gisə! 14Saymon nii duꞌtə ŋwə naysə faŋ Nwi nə ndeynə vɨɨ faŋ nə kee lùu vɨɨ Jus me, shòꞌ vɨɨ fɨ taa ŋwaa vəŋ, vəŋ luu vɨɨ vi, bìŋ yizii yi. 15Ŋkə faynə maa nu faŋ nshiisə-ŋii sɔghɔ nə nàysə, fɔnə ŋkə lùu taa ŋwaꞌlə Nwi laa,

16«Nwi ndɔ bəŋ jwi fɨ yiba,

baa fianə ŋiinə fwàŋ Deyvid,

faŋ nyə nə gù nsi, nyweꞌtə nə.

Nwi taa baa fianə, bɨ̀ŋsə yizɔ.

17Nɨniŋ laa bətə vɨɨ faŋ vəŋ gòꞌ, kɨ kəə Mɔꞌmbi,

baa nə laa vɨɨ tətɔŋ fu taa kɨ kəə Nwi nɨzi,

faŋ vɨ naysə yizii yi tɨ́ vəŋ.

Nshɨ-tɔ Nwi faŋ ŋwə yɨ nu kɔ́, nə gì nɨniŋ.

18Nu kɔ́ nə luu taa ŋkɨɨ Nwi

shù fɨ maa vənzi və mbi.» #Amɔs 9.11-12.

19Nɨniŋ, mə bɨꞌtə ŋkaŋ laa, kɨ vɨ baa kɨ kɔ ŋɨꞌ tɨ́ vɨɨ tətɔŋ fu me. Vəŋ lùu vɨɨ faŋ vəŋ nə bɨ kee kɨ̀ɨ nə Nwi me, kwìinə fwisə vəŋ ndwə, biŋ nu Nwi. 20Bàw nsiŋ nyɔꞌ ŋwaꞌlə tɨ́ vəŋ, nàysə tɨ́ vəŋ sheꞌ laa vəŋ shiinə yiŋwaa vəŋ, kee kɨ zɨ fa faŋ ŋkə kee lùu kəley tɨ́ Nwi me, buꞌ faŋ ŋkə ndɔ̀ fɨ yɨ vənwi vədayday me. Baa nə laa kɨ vəŋ kɨ beꞌsə nu vəki me, kee kwə̀ mbasə nyaa faŋ vɨ tɨtwiŋ me wi, buu zwi me, kee zɨ fazɨ faŋ mənshi lùu taa tey yi me. 21Bàw nsiŋ yɨ nɨniŋ, buꞌ laa vɨ tii ntɨsə Mose taa ndɔꞌ məshəŋtə Nwi maa vəshəŋ vənshə, shù ŋkee fɨshi maa vəshi və zwisə vənshə.»

22Ŋwə nə gì nɨniŋ, vɨɨ ntɔŋ Kristo nə vɨɨ taa fɨ taa məshəŋtə vɨɨ Kristo ghɔ vɨ vɨɨ Kristo vənshə biŋ, shìa laa vɨ shoꞌ vɨɨ mɔ́ꞌ, tɔŋ vəŋ Antiɔk ghɔ Pɔɔl nə Barnabas. Vəŋ shoꞌ Judas faŋ vɨ nəə tii ŋwə nə Barsabas, baa nə Silas. Vɨɨ vɔ́ vəbɔɔ nə luu vɨɨ faŋ vɨ nə kɔ̀ feenə tɨ́ vəŋ dɨdɨꞌ taa ŋwaa vɨɨ məbiŋ nu Kristo. 23Vɨ kɨ nii nyɔ̀ꞌ ŋwaꞌlə, kɔ̀ tɨ́ vəŋ, vəŋ gə nə ŋwə. Taa ŋwaꞌlə ghɔ́, vɨ nə ŋwàꞌlə laa, «Nyɔꞌ vɨɨ ntɔŋ Yeso ghɔ vɨ vɨɨ taa fɨ taa məshəŋtə vɨɨ Kristo nyɔ̀ꞌ ŋwaꞌlə ŋwə̀ tɨ́ vɨɨ tətɔŋ fu faŋ viŋ biŋ nu Kristo, faŋ viŋ shi taa məshɨ mə Antiɔk nə Siria nə Saylisia. Yia nyɔ̀ꞌ tɨ́ viŋ yaa vaŋ-nshwi viŋ, shɔꞌtə viŋ jəə jəə. 24Yia nə zɔ laa vɨɨ mɔ́ꞌ fɨ taa nwaa yia yaa ghaysə viŋ nə yigi, bùulə fwi siŋ, nsə nə lɔꞌ, faŋ kee tɔ̀ŋ yia tɔ̀ŋ vəŋ me. 25Nɨniŋ, yia faynə yigisə yia, shìa laa yia shoꞌ vɨɨ, tɔ̀ŋ tɨ́ viŋ, ghɔ vɨ Barnabas nə Pɔɔl faŋ yia kaw vəŋ ŋkee dɨdɨꞌ. 26Vəŋ lùu vɨɨ faŋ vəŋ bìŋ yiku maa yizii tɨta ŋwaa-nsiŋ Yeso Kristo. 27Nɨniŋ, yia tɔ̀ŋ Silas ghɔ Judas, vəŋ taa naysə ŋkee nu ŋkɨə faŋ yia nyɔ̀ꞌ taa ŋwaꞌlə ŋwə̀ tɨ́ viŋ, nə shuu vəŋ nɨzi. 28Zwitə Ley Nwi nə tə, yia baa luu tə, laa kɨ vɨ kwaŋ nu faŋ kaꞌ ŋkə ghɔꞌ viŋ me, tɨ̀ lɨꞌ sheꞌ nu kəmuꞌ faŋ kaꞌ vɨ kee mèꞌtə me. 29Ŋkə lùu laa, kɨ viŋ zɨ fazɨ faŋ vɨ kɔ̀ tɨ́ vənwi vədayday, fèꞌ vənwi vədayday shɔ me. Kɨ viŋ zɨ fazɨ faŋ mənshi lùu taa tey yi me. Kɨ viŋ kwə mbasə nyaa faŋ vɨ tɨtwiŋ me nyaa, nyə ku me. Baa nə laa viŋ baꞌsə fwi siŋ fɨ maa nu vəki. Viŋ kwasə yiŋwaa yiŋ fɨ maa vənu vɔ́, buu viŋ taa dùꞌ jəə. Viŋ duꞌ jəə!»

30Vəŋ kɔ ŋwaꞌlə ghɔ́ tɨ́ vɨɨ ntɔŋsə vɔ́, kɔ̀ bwey-jəə tɨ́ vəŋ. Vəŋ ndɔ fɨ nsi, siꞌ gə̀ ntɨꞌ Antiɔk (fɨ shɨ Siria), bàytə vɨɨ məbiŋ nu Kristo, kɔ̀ ŋwaꞌlə ntɔŋ ghɔ́ tɨ́ vəŋ. 31Vəŋ tii ŋwaꞌlə ghɔ́, ŋàytə buꞌ laa ŋwə nə zwìsə fwisə vəŋ. 32Judas ghɔ Silas faŋ nə luu nshiisə-ŋii sɔghɔ nɨzi, baa gì vənu vəyaŋ tɨ́ nshəŋtə vɨɨ Kristo yɔ́, yɨ̀sə vəŋ weꞌ maa nu Nwi. 33Vəŋ nə shi Antiɔk vəshi vəmɔ́ꞌ. Vɨɨ məbiŋ nu Kristo kɨ nii mèꞌtə vəŋ, tù mənɔŋ-bwaŋnə tɔ vəŋ, biŋ laa vəŋ bəŋ gə̀ yè vɨɨ mbɨə faŋ vəŋ yaa tɔŋ vəŋ nə. [ 34Luu nə, Silas nə kàw maa məgoꞌ Antiɔk.] 35Pɔɔl ghɔ Barnabas goꞌ Antiɔk nɨzi, kɨ deesə, ndɔ fɨꞌtə nu Nwi ghɔ vɨ vɨɨ mɔ́ꞌ vəyaŋ.

Ghuu yitoꞌ Pɔɔl beꞌsə ghee bɔɔ

Faŋ Pɔɔl ghɔ Barnabas nə gàasə nwaa vəŋ

36Shi mɔ́ꞌ Pɔɔl gi tɨ́ Barnabas laa, «Bàw nsoo baa ndɔ, tòꞌ fɨ taa məshɨ mbɨə faŋ nsoo nə duꞌtə nsoo gə fɨ̀ꞌtə nu Nwi shɔ nə. Bàw sɨ gə yè vaŋ-nshwi vaŋ-nsoo, ye faŋ vəŋ dùꞌ.» 37Barnabas biŋ, kɨ kəə laa ghɔ Jɔn, faŋ vɨ nəə tii ŋwə nə Mark, gə mɔ́ꞌ. 38Luu nə, Pɔɔl kee kàw me, buꞌ laa Jɔn Mark nə mèꞌtə vəŋ shɨ Pamfilia, bə̀ŋ gə̀ Jerusalem, kee baa tòꞌ ghɔ vəŋ, gàŋtə maa faꞌ Nwi me. 39Nɨniŋ, vəŋ nə kii ntay taa ŋwaa vəŋ, tày dɨdɨꞌ, buu gàasə. Barnabas kɨ nii ndì Jɔn Mark, ghɔ ŋwə ŋii taa bay kwalə, tɔŋ gə̀ shɨ Sayprɔs. 40Pɔɔl shoꞌ Silas. Nshəŋtə vɨɨ Kristo shɔꞌtə Nwi tɔ Pɔɔl ghɔ Silas laa Nwi gaŋtə vəŋ. Vəŋ ndɔ, tòꞌ fɨ nsi, 41shɔ̀ɔ fɨ taa məshɨ mə Siria nə Saylisia, tòꞌ wèꞌsə vɨɨ məbiŋ Kristo maa nu Nwi maa vəshəŋ vənshə.

Currently Selected:

Akts 15: bav

Highlight

Copy