Akts 13

Mfɔŋ ghuu yitoꞌ Pɔɔl

Faŋ vɨ nə shòꞌ Barnabas ghɔ Sɔɔl maa faꞌ Nwi

1Nshiisə-ŋii sɔghɔ nə vɨɨ mədeesə nu Nwi nə luu shɔ taa məshəŋtə vɨɨ Kristo ntɨꞌ Antiɔk. Nə luu Barnabas nə Saymon faŋ vɨ nə shù yizii yi nə Wuu-fəŋ, nə Lusiɔs fɨ Kirene, nə Manaen faŋ ŋwə nə tà ghɔ fwàŋ Herod, baa nə Sɔɔl. 2Shi mɔ́ꞌ faŋ vəŋ nəə bəŋsə Nwi, baa baŋ fazɨ, Zwitə Ley Nwi gi tɨ́ vəŋ laa, «Viŋ shoꞌ Barnabas nə Sɔɔl, kɔ̀ tɨ́ mə, nùŋ vəŋ maa faꞌ ŋgwə faŋ mə yaa tii vəŋ shɔ nə.» 3Vəŋ baa kɨ baŋ fazɨ, shɔ̀ꞌtə Nwi, mɔ̀ꞌ ghɔ vəŋ tɔ vəŋ, twey vəŋ, vəŋ gə.

Barnabas ghɔ Pɔɔl fɨꞌtə nu Nwi shɨ Sayprɔs

4Faŋ Zwitə Ley Nwi nə tɔ̀ŋ vəŋ nɨniŋ nə, vəŋ siꞌ gə ntɨꞌ Selusia, ŋìi taa bay kwalə, tɔ̀ŋ mamuu taa bay, tɔŋ gə̀ shɨ Sayprɔs. 5Faŋ vəŋ nə gə ziꞌ ntɨꞌ Salamis fɨ shɨ Sayprɔs, gə̀ fɨ̀ꞌtə yigisə Nwi taa ndɔꞌ Nwi vɨɨ Jus. Jɔn Mark nə luu taa ŋwaa vəŋ maa məgaŋtə vəŋ. 6Vəŋ kɨ nii baa ndɔ̀ fɨ yifi, shɔ̀ɔ shɨ kɔ́ kənshə, gə̀ zìꞌ ntɨꞌ yikwalə yimɔ́ꞌ. Yizii ntɨꞌ yɔ́ luu Pafɔs. Vəŋ ziꞌ yifi, yè wuu Jus mɔ́ꞌ, faŋ lùu wuu ŋay baa lùu wuu məsɨɨ təba maa nu Nwi, yizii yi luu Bar-Jiisəs. 7Ŋwə nə luu wuumba goməna Sergiɔs Pɔɔl, faŋ nə luu wuu tɔ ley. Goməna ghɔ́ tii Barnabas ghɔ Sɔɔl, kɨ kəə zɔ nu Nwi fɨ ghɔ vəŋ, vəŋ jwi. 8Bar-Jiisəs, wuu ŋay ghɔ́, faŋ yizii yi maa ghaŋ Griik nə luu Elimas, twey yigisə vəŋ, kɨ kəə kwiinə fwi goməna laa ŋwə kee bìŋ nu Kristo me. 9Sɔɔl faŋ vɨ nəə tii ŋwə nə Pɔɔl, faŋ Zwitə Ley Nwi lwàŋ taa fwi ŋwə, ndeynə wuu ŋay ghɔ́ nə wutə, gì tɨ́ ŋwə laa, 10«A lùu wee zwitə bwə, faŋ təba nə mənay lwàŋ taa ŋwaa ghɔ. A lùu wuu mbeenə nu loomə. Nə kɨ kaꞌ a kee mèꞌtə kee kɨ bùulə jɨɨ tɨta Nwi faŋ nyə lùu yineꞌtə nə yimu? 11Wutə Mɔꞌmbi taa jia ghɔ ndee, sɨ ghə fɨ. Maa kuŋtə yighee, a kee baa yè shɨshwi me.» Sheꞌ yighee yɔ́ mfiŋsə gu sɨ ŋwə, ŋwə toꞌ kə̀ə vɨɨ yuu vɨ jia kwiŋ wi, də̀ jɨɨ tɨ́ ŋwə. 12Goməna ghɔ́ ye nu ŋkɨə faŋ ŋkə nə gày, shuu wi yɔŋ maa wutə mədeesə vəŋ buꞌ tɨta Yeso. Ŋwə kɨ nii bìŋ nu Nwi.

Faŋ Pɔɔl ghɔ Barnabas fɨꞌtə nu Nwi ntɨꞌ Antiɔk fɨ shɨ Pisidia

13Pɔɔl ghɔ vəliŋ vi kɨ nii ndɔ̀ fɨ ntɨꞌ Pafɔs, baa tɔŋ mamuu, shɔɔ gə̀ ziꞌ ntɨꞌ Perga fɨ shɨ Pamfilia. Jɔn Mark meꞌtə vəŋ yifi, bə̀ŋ gə ntɨꞌ Jerusalem. 14Vəŋ baa kii shɔɔ, ndɔ̀ fɨ Perga, koꞌ gə̀ ziꞌ ntɨꞌ Antiɔk fɨ shɨ Pisidia. Kɨ luu maa shi zwisə Nwi, vəŋ gə taa ŋii Nwi, dùꞌnə nsi. 15Vɨ tii vənu fɨ taa ŋwaꞌlə ntɨsə Nwi, nə fɨ taa ŋwaꞌlə nshiisə-ŋii sɔghɔ, mètə, vɨɨ kwalə fɨ taa ŋii məshɔꞌtə Nwi tɔŋ ntɔŋ maa Pɔɔl ghɔ Barnabas, gì tɨ́ vəŋ laa yigi yimɔ́ꞌ lùu shɔ ghɔ vəŋ maa mətɨsə vɨɨ, bàw vəŋ gi. 16Pɔɔl ndɔ yizɔ, mɔ̀ꞌ ghɔ ghi, gì laa, «Vɨɨ Isirayl, nə viŋ vɨɨ faŋ viŋ fee Nwi, viŋ zɔ! 17Nwi vɨɨ Isirayl nə shòꞌ vətɨɨ vaŋ-nsiŋ, kòꞌsə ndaw vəŋ yighee njyə faŋ vəŋ nə luu vəndɔ shɨ Ijip. Nwi nə shàꞌsə ghɔ ki, fùusə vəŋ fɨ fuŋ, 18kɨ̀ꞌ vəŋ taa tɔɔ waꞌsə maa ŋuꞌ muu-yinshwe, 19kɨ nii ndìsə məshɨ kwatia fɨ nsi Kanahan, kɔ nsi vəŋ tɨ́ vətɨɨ vaŋ-nsiŋ laa luu nsi vəŋ. 20Yiŋkii kɨ shɔɔ, ŋwə kɔ vɨɨ məsɔꞌ nsɔꞌsə tɨ́ vəŋ maa ŋuꞌ yiwa yishwe nə muu-ntee, gə kɔ tɨ́ nshiiŋii-sɔghɔ Samuel. 21Vəŋ kɨ nii kəə laa sɔꞌ fwàŋ sɔꞌ vəŋ. Nɨniŋ, Nwi kɔ Sɔɔl, wee Kish tɨ́ vəŋ, laa luu fwàŋ vəŋ. Sɔɔl nə luu wə fɨ ŋiꞌ ŋii Benyamin. Ŋwə nə sɔ̀ꞌ vəŋ maa ŋuꞌ muu-yinshwe. 22Nwi kɨ nii sùꞌsə ŋwə fɨ maa fwàŋ, kòꞌsə Deyvid laa luu fwàŋ vəŋ. Maa yighee yɔ́ Nwi nə gi kɔ̀ŋ fwàŋ Deyvid laa, «Mə ye Deyvid, wee Jesse, laa lùu wə faŋ ŋwə kùꞌnə taa fwi mə, ŋwə taa kɨ yɨsə vənu vənshə faŋ mə gì.» #1 Samuel 13.14. 23Nɨniŋ, Nwi yɨsə wə fuu fɨ ŋiꞌ ŋii fwàŋ Deyvid. Wə ghɔ́ luu Yeso. Nwi kɔ ŋwə tɨ́ vɨɨ Isirayl laa lùu wuu məbweysə vəŋ, faŋ Nwi nə kɔ̀ꞌnə tɨ́ vəŋ fɨshi. 24Yighee njyə faŋ Yeso ghɔ́ nəə kəə tey faꞌ wi, Jɔŋ shɔɔ vɨsɨ, kɨ toꞌ gisə tɨ́ vɨɨ Isirayl vənshə, laa vəŋ kwiinə fwisə vəŋ, bìŋ Nwi, buu ŋwə kɔ muu mə Nwi tɨ́ vəŋ. 25Jɔn nəə kəə metə faꞌ wi, gì laa, «Kɨ mə kee lùu wə ntɨə faŋ viŋ bɨꞌtə me. Wə mɔ́ꞌ taa jwi fɨ yiba mə, faŋ mə kee bee yikuꞌnə tɨ́ kaꞌ mə keꞌtə kuu gɔsə wi me.»

26Vaŋ-nshwi vaŋ, faŋ viŋ lùu vaŋ ŋiꞌ ŋii Abraham, tɨꞌnə me vɨɨ vəmɔ́ꞌ faŋ vəŋ fee Nwi nɨzi, viŋ kɔꞌ kɨɨ laa Nwi tɔ̀ŋ nu ŋkɨə faŋ ŋkə bweysə vɨɨ tɨ́ nsiŋ. 27Viŋ zɔ! Vɨɨ mbɨə faŋ vəŋ luu Jerusalem ghɔ vɨ vɨɨ mbɨə faŋ vəŋ sɔꞌ vəŋ nə, nə kee kɨ̀ɨ nə Yeso me, kee bee zɔ kɨ̀ɨ nə nu ŋkɨə faŋ nshiisə-ŋii sɔghɔ nə gi kɔ̀ŋ ŋwə nə me, tɨ́ vɨ tii yigisə vəŋ maa vəshi və zwisə vənshə. Luu nə, vəŋ yɨ laa yigisə nshiisə-ŋii sɔghɔ gu yinsəŋ, faŋ vəŋ nə zwì Yeso. 28Vəŋ nə dɔ̀ɔ laa goməna Pilate shia nsɔꞌ yi, laa vɨ zwi ŋwə, faŋ vəŋ nə kee bee yè nu bwə maa ŋwə, tɨ́ kɨ kaꞌ vəŋ zwi ŋwə shɔ me. 29Nɨniŋ, vəŋ yɨ vənu vənshə faŋ vɨ nə ŋwàꞌlə buꞌ ŋwə taa ŋwaꞌlə Nwi. Vɨ kɨ nii sùꞌsə ŋwə fɨ mbɨɨ tɨ ŋkɨꞌsə, nùŋ ŋwə taa swi. 30Luu nə, Nwi yweysə ŋwə fɨ shɨ yiku. 31Ŋwə fuu yikəꞌ vɨɨ mbɨə faŋ ghɔ vɨ vəŋ yaa ndɔ fɨ shɨ Galilii, koꞌ gə̀ Jerusalem nə. Ŋwə nə fùu yikəꞌ vəŋ maa vəshi vəyaŋ. Vəŋ kɨ nii lùu vɨɨ faŋ vəŋ nə yè ŋwə nə sɨ, ndɔ fɨꞌtə nu ki tɨ́ vɨɨ Isirayl ndwə.

32Gə fɨ maa yia, yia baa luu jwi nə ntɔŋ yijəə yɔ́ tɨ́ viŋ, naysə tɨ́ viŋ laa Nwi yɨ̀ nu ŋkɨə faŋ ŋwə nə kɔ̀ꞌnə tɨ́ vətɨɨ vaŋ-nsiŋ nə. 33Nwi yɨ̀sə ŋkə fuu ntee vɨsɨ nsiŋ, vaŋ vəŋ, faŋ ŋwə nə ywèysə Yeso fɨ shɨ yiku, faŋ vɨ nə nyɔ̀ꞌ taa ŋwaꞌlə Sam, vəwaytə vəbɔɔ. Vɨ nyɔꞌ shɔ laa Nwi gi laa,

«A lùu ŋwiŋ ŋwaa, bì mə bì ghɔ ndee.» #Sam 2.7.

34Nwi nə ywèysə Yeso fɨ shɨ yiku laa, kɨ ŋwaa wi ndɔ shuu me, yuu Nwi nə baa gì laa,

«Mə ndɔ yɨsə vənu vəjəəvə maa viŋ,

faŋ mə nə kɔ̀ꞌnə tɨ́ fwàŋ Deyvid.» #Aysaya 55.3.

35Nɨniŋ, ŋkə lùu maa shəŋ ŋwaꞌlə Nwi kəmɔ́ꞌ laa,

«Kaꞌ Nwi kee ndɔ biŋ wuu ley wi shuu ndì me.»

# Sam 16.10.

36Ŋkə nə kee lùu yigi kɔ̀ŋ fwàŋ Deyvid me. Fwàŋ Deyvid nə fàꞌ tɨ́ Nwi maa njiinə yighee, baa kɨ nii yiku, vɨ təə ŋwə yɨ vətɨɨ vi, ŋwə shuu ndì. 37Gə fɨ maa wə ntɨə faŋ Nwi nə ywèysə ŋwə fɨ shɨ yiku nə, ŋwə kee yishuu me. 38Nɨniŋ, vaŋ-nshwi vaŋ, bàw viŋ kɨɨ laa Nwi kəə mèꞌ nu bwə kiŋ buꞌ wə ghɔ́, faŋ lùu Yeso nə. Viŋ kɨ luu shɔ̀ɔ fɨ yiba ntɨsə Mose, kaꞌ nsə kee yɨ̀sə laa Nwi ndenə vənu vəbwəvə viŋ vənshə me. 39Luu nə, wə nùŋ fwi yi maa Yeso, buu Nwi taa ndenə vənu vəbwəvə vi vənshə, nu ki baa lòomə. 40Nɨniŋ, viŋ kɨ tɔfə ŋkee jəə, laa nu faŋ nshiiŋii-sɔghɔ nə nyɔ̀ꞌ, kɨ ŋkə ndɔ gay maa viŋ me. Nu kɔ́ lùu laa,

41«Vɨɨ məshiasə nu kaŋ, viŋ ye,

shuu wiŋ yɔŋ, viŋ ndɔ ndi.

Mə ndɔ yɨsə nu sɨ viŋ, ŋkee nu,

faŋ kaꞌ wə gì tɨ́ viŋ, viŋ kee biŋ me.» #Habakuk 1.5.

42Pɔɔl metə yigi yi yɔ́. Vɨɨ fuu fɨ taa ŋii Nwi, buꞌ ghɔ tɨ́ Pɔɔl nə Barnabas laa shi zwisə taa baa kuꞌ, vəŋ baa jwì nàysə kɔ̀ŋ nu kɔ́ tɨ́ vəŋ. 43Məshəŋtə ghɔ́ kɨ waꞌ, vɨɨ vəyaŋ fɨ taa ŋwaa vɨɨ Jus nə vɨɨ vəmɔ́ꞌ faŋ vəŋ nəə bəŋsə Nwi nɨzi, beꞌsə Pɔɔl ghɔ Barnabas. Pɔɔl ghɔ Barnabas gi tɨ́ vəŋ, tɨ̀sə vəŋ laa, vəŋ nùŋ fwisə vəŋ sheꞌ maa nu gəŋsə Nwi kɔ́. 44Shi zwisə Nwi baa kɨ kuꞌ, vɨɨ fɨ shɨ yɔ́ baytə ŋkee vəyaŋ maa məzɔ yigisə Nwi. 45Faŋ vɨɨ Jus nə yè faŋ vɨɨ vɔ́ baytə ŋkee vəyaŋ nee nə, kɨ kəə zɔ yigisə Nwi, fəsə ŋii taa fwisə vəŋ, vəŋ twey nu ŋkɨə faŋ Pɔɔl nə gì ntee, ndasə ŋwə nə nu Nwi. 46Pɔɔl ghɔ Barnabas ka fwi, gì tɨ́ vəŋ laa, «Ŋkə nə bàw laa vɨ bɨ fɨꞌtə nu Nwi tɨ́ vɨɨ Jus. Luu nə, viŋ twey, kee kɨ ndi ŋwaa wiŋ laa viŋ kìi məbwey vəlwaŋ me. Nɨniŋ, yia taa meꞌtə viŋ ndwə, gə̀ maa vɨɨ məshɨ məday. 47Yia yɨ̀ nɨniŋ buꞌ laa tɨta Nwi nə gì laa,

«Mə nùŋ ghɔ yaa kiꞌ tɨ́ vɨɨ tətɔŋ fu,

laa a taa də jɨɨ məbwey vəlwaŋ tɨ́ vəŋ,

gə kɔ maa vəndwə və mbi.» #Aysaya 49.6.

48Vɨɨ mbɨə faŋ vəŋ nə kee lùu vɨɨ Jus me, zɔ nu kɔ́, ŋàytə, bə̀ŋsə nu Nwi. Vɨɨ vənshə faŋ Nwi nə shoꞌ laa vəŋ ndɔ zɨ məbwey vəlwaŋ, kɨ nii kìasə gù vɨɨ məbiŋ nu Kristo. 49Nu Kristo kɨ nii sàynə maa kwiŋ ghɔ́ nshə.

50Vɨɨ Jus duꞌ kɨ gisə tɨ́ vəki və vəshɨꞌ faŋ vəŋ nəə jwi taa ŋii Nwi vɨɨ Jus, ndɔ gə̀ yè vəshɨꞌ nɨzi, gì nu bwə tɔ Pɔɔl ghɔ Barnabas, yɨ laa vɨ tey kɨ kəə ŋiꞌ Pɔɔl ghɔ Barnabas, kɨ nii jɔ̀ŋ vəŋ fɨ maa shɨ kɔ́. 51Pɔɔl ghɔ Barnabas kwətə butə fɨ ghuu vəŋ, faŋ lùu shwenə ŋgaasə tɨ́ vɨɨ vɔ́, ndɔ gə Ikoniɔn fɨ shɨ Laykonia. 52Gə fɨ maa vɨɨ mbɨə faŋ vəŋ nə bìŋ nu Kristo (ntɨꞌ Antiɔk), Zwitə Ley Nwi nə məŋaytə lwaŋ taa fwisə vəŋ.

Currently Selected:

Akts 13: bav

Highlight

Copy