Marcos 6

Jesús jëtáɨwa reta wɨrowia’ä jese

(Mateo 13.53-58)

1Jayawe joko wi Jesús oo jëtara reta kotɨ, tëta wasu Nazaret jee wae pe. Jare jemimboe reta wi yuraa jae ndiwe. 2Jare mbutuu ara pe Jesús umbɨpɨ oporomboe tupao pe. Jare jeta uyapɨsaka jese wae reta ipɨakañɨ jare jei reta iyupe: “¿Kiape ra kua kuimbae uyemboe kua mbaembae reta re? ¿Mbae nunga arakuaa ra uñemee chupe? Mase kërái jae mbaembae uyapo kiawe ipuere’ä uyapo wae. ¿Kërái ra jokua?” jei reta. 3“¿Jae’ä yerá kua kuimbae carpintero jare María imembɨrae? ¿Jae’ä yerá Jacobo, José, Judas, jare Simón tɨkeɨ? Jare jindɨ reta wi yureko yandepɨte rupi. Kua pochɨ ñaneïru tëi ko,” jei reta. Jáeramo jae reta uyembɨarasɨ jare wɨrɨ̈ro reta Jesús.

4Jayawe Jesús jei chupe reta: “Pëti kuimbae Tumpa iñee umɨmbeu wae ikotɨ̈a oï yawe, jeta wae reta umae kawi jese jare uyapɨsaka reta jese,” jei. “Erëi jëta pe oï yawe jëtáɨwa reta jare jëtara reta ipɨte pe, uyapɨsaka’ä reta jese,” jei chupe reta. 5Jayawe wɨrowia’ä reta Jesús re jeko pewa, Jesús ipuere’ä uyapo joko pe jeta mbaembae Tumpa imbaepuere pe. Jaeño oñono ipo imbaerasɨ wae reta re mbowɨño umɨnguera waerä. 6Jare Jesús ipɨakañɨ jae reta wɨrowia’ä jese ramo. Jayawe oë ye oo joko wi oporomboe waerä ïru tëta wasu raɨ reta rupi.

Jesús omondo jokua doce jemimboe reta

(Mateo 10.1,9-14; Lucas 9.1-6)

7Pëti ara Jesús umbatɨka jokua doce jemimboe tenondewaete reta, jare omondo mokui mokui rupi oporomboe waerä. Jare umee chupe reta mbaepuere omoë waerä aña uyembɨiya jese wae reta wi. 8Jare ndei yuraa reta mbowe, Jesús jei chupe reta: “Peo yawe, awɨye peraa mbae awe. Awɨye peraa peurupuku, perembiurä, jare korepoti. Jaeño peraa pepopoka, 9pepɨpasa, jare peremimonde pemonde peï wae,” jei chupe reta.

10Jare jei wi chupe reta: “Peo ma pewäe yawe pëti tëta wasu pe, jare ime yawe kía uparea pewe pepɨta waerä jëta pe, pepɨta joko peño jokua tëta wasu wi peo ye rewa,” jei. 11“Erëi ime yawe pëti tëta wasu uipota’ä pepɨta waerä joko pe jare uipota’ä uyapɨsaka peré wae, jayawe peasa joko wi,” jei. “Jare peë jokua tëta wasu wi yawe, pemɨtɨmo pepɨpasa ɨwɨkuí usururu waerä chuwi. Jukuärái pikuaakata chupe reta jae reta etei ko teko onoi Tumpa uiporaraka chupe reta waerä,” jei. “Che tae pewe añetete wae, jokua ara ɨwɨ pewa reta uyemboɨ yawe Tumpa jowai Tumpa jei waerä jae reta jeko rewa, jokua tëta wasu pewa reta uiporarata tätaete ye jokua tëta wasu Sodoma jare Gomorra pewa reta wi.” Jukuärái jei Jesús jemimboe reta pe.

12Jayawe joko wi Jesús jemimboe reta yuraa. Jare kerupi yuraa wae rupi umɨmbeu chupe reta ueya waerä ipɨayemɨngeta jupi mbae wae jare wɨrowia reta waerä Tumpa jei wae re. 13Jare jae reta omoë jeta aña uyembɨiya jese wae reta wi. Jare jeta imbaerasɨ wae reta re uipichɨ aceite pɨpe umɨnguera reta waerä.

Juan upurumbɨsakambu wae imano rewa

(Mateo 14.1-12; Lucas 9.7-9)

14Jayawe mburuwicha wasu Herodes pe jeräkua Jesús rewa, echa’ä opaete wae reta uyemɨngeta yureko jesewa. Amokue wae jei tëi: “Jae ko aipo Juan upurumbɨsakambuse wae aramoi ikowe ye ma ou umanokue wae reta ipɨte wi. Jáeramo ko uyapo oï kua mbaembae kiawe ipuere’ä uyapo wae,” jei reta tëi. 15Jare ïru wae reta jei tëi: “Jae ko Elías.”#6.15 Elías ko jae pëti kuimbae Tumpa iñee arakae umɨmbeu wae. Jae umano’ä, echa’ä Tumpa wɨraa ara pe jekowe rewe. Tumpa iñee pe jei Elías uyekuaa yeta iko ndei Upuruepɨ wae uyekuaa mbowe (Malaquías 4.5). Emɨngeta wi Mateo 11.14 pe jare 17.10-13 pe. Jare ïru wae reta jei tëi: “Jae ko pëti Tumpa iñee umɨmbeu wae, arakae wae rami,” jei reta.

16Erëi Herodes kua uyandu yawe, jei: “Jae ko Juan ayayuasɨaka kɨsepuku pe wae. Ikowe ye ma aipo umanokue wae reta ipɨte wi,” jei.

17-19Echa’ä Herodes etei ko uyukaka Juan. Kua uyeyapo kuärái: Tenonde yawe Herodes umenda tɨwɨ Felipe jembireko Herodías jee wae ndiwe. Jare Juan umbɨeta Herodes pe jare jei chupe: “Kua nemenda nderɨwɨ jembireko ndiwe wae, ikawi’ä etei ko Tumpa jowai,” jei chupe. Jáeramo Herodías pochɨ Juan pe. Jayawe Herodes uipɨsɨka Juan, uñapɨ̈tika, jare oñonoka peresorɨru pe umbɨyerowia waerä jembireko Herodías. Jare Herodías uipota tëi uyukaka, erëi ipuere’ä. 20Echa’ä Herodes uikuaa Juan jae ko kuimbae jupi wae jare Tumpa pe uyeyokui wae. Jáeramo uipɨu chuwi, jare umaeño’ä kía re awe uyapo waerä chupe mbae ikawi mbae wae. Jare yepe tëi Herodes tuicha uyembɨpɨa’ä Juan jei chupe wae re, jesewe jekuaeño uipota uyapɨsaka jese.

21Erëi pëti ara jëwa Herodías pe uyapo waerä mbae ikawi mbae wae Juan pe. Echa’ä jokua ara uwäe iko Herodes iara. Jáeramo uparea ïru mburuwicha reta pe, jare sɨndaro juwicha reta pe, jare ikokatu wae Galilea pewa reta pe ukaru reta waerä jae ndiwe. 22Jayawe Herodías imembɨ kuña uike upɨrae chupe reta. Jare Herodes jare opaete jae ndiwe ukaru ñonoï wae reta uyerowia umae jese. Jáeramo Herodes jei kuñatái pe: “Eka chewe ipotawe mbae ndipota wae, jare che ameeta ndewe,” jei chupe. 23Jare jei chupe ïru wae reta jowake: “Che tae ndewe Tumpa jowake, ameeta ndewe ipotawe mbae ndeka chewe wae. Ɨwɨ anoi mbaepuere jese wae yepe ameeta ndewe mbɨte rupi ndipota yawe,” jei chupe.

24Jayawe kuñatái oë oo upɨrandu ichɨ pe: “¿Mbae pa aekata chupe?” jei.

Jare Herodías jei imembɨ kuña pe: “Eka chupe Juan upurumbɨsakambu wae iñäka,” jei chupe.

25Jayawe ɨmambaeño kuñatái uike yewɨ mburuwicha wasu oï wae pe jare jei chupe: “Emee chewe añawe woi Juan upurumbɨsakambu wae iñäka pëti karúa pe,” jei chupe.

26Jayawe mburuwicha wasu tuicha rupi ipɨatɨtɨ tëi. Erëi Tumpa jowake jei chupe ramo, jare ïru wae reta uyandu ramo, uipota’ä orowa jei chupe wae. 27Jáeramo jupiwoiño omondo pëti sɨndaro peresorɨru pe Juan iñäkakue ueru waerä. 28Jayawe oo sɨndaro peresorɨru pe jare uyayuasɨa Juan kɨsepuku pe. Joko wi ueru iñäkakue pëti karúa pe jare umee kuñatái pe. Jare kuñatái wɨraa umee yuapɨ ye ichɨ pe.

29Jayawe Juan jemimboe reta kua uikuaa yawe, yuweru jare wɨraa Juan jetekue oñono reta pëti teöwerenda pe. Jukuärái Herodes uyukaka Juan upurumbɨsakambu wae.

Jesús umɨngaru jeta wae reta Tumpa imbaepuere rupi

(Mateo 14.13-21; Lucas 9.10-17; Juan 6.5-13)

30Jayawe jokua kuimbae reta Jesús omondo wae uñatima ye oporomboe reta wae wi Jesús oï wae pe. Jare umbeu reta chupe opaete jae reta uyapo wae re jare oporomboe reta wae re. 31Jayawe Jesús jei chupe reta: “Pe retaño peyu ya kïi ngatu wae pe peputuu waerä michi pewa.” Jukuärái jei chupe reta, echa’ä jeta wae reta jekuaekuae yuweru yureko opou waerä jae reta ipɨ. Jare umaeño’äwe ukaru kawi reta waerä Jesús jare jemimboe reta. 32Jayawe jae retaño chalana pe yuraa kïi ngatu wae pe.

33Erëi jeta wae reta uecha yuraa ñonoï jare uikuaa woi reta kía ko jae wae. Jayawe jae reta yuraa ɨwɨ rupi etei tëta wasu raɨ reta wi kiape Jesús oo oï wae pe. Jare yuraa uwäe reta ndei Jesús oo uwäe mbowe, jare uäro reta joko pe.

34Jayawe Jesús oo uwäe yawe joko pe, uecha jeta wae reta ime ma yepe joko pe ñonoï. Jare tuicha rupi uiparareko umae jese reta, echa’ä jae reta owecha mbaetɨ iyandarekoa onoi wae reta rami ko. Jáeramo Jesús umbɨpɨ omboe reta jeta mbaembae re.

35Jayawe kaaruete ma oo yawe, Jesús jemimboe reta yuweru jei chupe: “Mbaetɨ tëta kua rupi jare kaaru ma oï,” jei reta. 36“Emondo kua reta tëta wasu raɨ reta kotɨ jare kiape ime tëta wae rupi owa reta waerä jembiurä. Echa’ä mbaetɨ mbae jou reta waerä kua pe,” jei reta.

37Jayawe Jesús jei chupe reta: “Pe reta etei ko pemeeta chupe mbae jou reta waerä,” jei chupe reta.

Erëi Jesús jemimboe reta jei chupe: “¡Ndowa chupe reta mbɨyape yawe, jepɨta orewe mokui chiëto ara mbarawɨkɨ pewa! ¿Ndipota pa nduyapo waerä jukuärái?” jei reta.

38Jayawe Jesús upɨrandu chupe reta: “¿Mbowɨ pa mbɨyape ime penoi? Peka yaecha,” jei chupe reta.

Jayawe jae reta umbɨpɨ ueka, jare uikuaa ma yawe, jei reta Jesús pe: “Ime nonoi pandepo mbɨyape jare mokui pira chariki mii,” jei reta.

39Jayawe Jesús jei jemimboe reta pe: “Tuyembatɨ tuwapɨ tee tee opaete wae reta kapiichape re,” jei. 40Jayawe uwapɨ reta cien rupi jare cincuenta rupi. 41Jayawe Jesús uipɨsɨ jokua pandepo mbɨyape jare mokui pira. Jare umae ara kotɨ jare umee yasurupái Tumpa pe jese. Joko wi upɨsäa mbɨyape, jare umee jemimboe reta pe jae reta umee yuapɨ ye waerä opaete wae pe. Jae nunga wi Jesús uipɨsɨ jokua mokui pira, jare umee jemimboe reta pe. Jare jemimboe reta opa umeemee yuapɨ ye opaete wae pe.

42Jayawe opaete wae reta ukaru ipunga rewa. 43Joko wi Jesús jemimboe reta umbatɨ jokua jembɨrekue doce kanasta rupi. 44Opaete ukaru wae reta kuimbae retaño uyepapa pandepo miri rupi.

Jesús uwata ɨ iáramo rupi

(Mateo 14.22-27; Juan 6.15-21)

45Jayawe jawoi pewaño Jesús jei jemimboe reta pe uyupi waerä chalana pe jare yuraa waerä tenonde ɨpa wasu jowaicho kotɨ tëta wasu Betsaida jee wae pe. Jare jae upɨtaño joko pe omondo ye waerä uyembatɨ wae reta. 46Jare opa ma omondo reta ye yawe, Jesús uyupi pëti ɨwɨtu re oo uyerure waerä Tumpa pe.

47Jare pɨ̈tu ma yawe, jemimboe reta yuraa yureko chalana pe ɨpa wasu mbɨte rupi, erëi Jesús upɨta jaeño pe etei jokua ɨwɨtu re. 48Jare jae uecha jemimboe reta täta uparawɨkɨ uruwata waerä chalana. Echa’ä täta ɨwɨtu ou ikotɨ.

Jare köeta ma yawe, Jesús uwata oo ikotɨ reta ɨ iáramo rupi jare uasata tëi chuwi reta. 49-50Jare jemimboe reta uecha yawe, jäse reta. Echa’ä ukɨye reta. Jae reta wɨrowia tëi uecha ñonoï kía umanokue wae iä. Erëi jupiwoiño Jesús omondo chupe reta iñee: “Piyembɨpɨakatu. Awɨye pekɨye. Che ko,” jei chupe reta. 51Jayawe ou uyupi chalana pe, jare jupiwoiño ɨwɨtu upɨta. Jare jemimboe reta ipɨakañɨete upɨta. 52Echa’ä yepe tëi jae reta uecha Jesús umbɨjeta mbɨyape jare pira umɨngaru waerä jeta wae reta, erëi jesewe ndeiño uikuaa kawi reta Jesús imbaepuere rewa. Echa’ä uipota’ä umaeño iyé reta wɨrowia waerä Jesús re.

Jesús umɨnguera Genesaret pewa imbaerasɨ wae reta

(Mateo 14.34-36)

53Jayawe yuraa uwäe reta ɨpa wasu jowaicho pe ɨwɨ Genesaret jee wae pe. 54Jare uweyɨ reta yawe chalana wi ɨpa wasu jembeɨ pe, jupiwoiño joko pewa reta uikuaa Jesús ko. 55Jayawe jawoi pewaño yuraa ueru waerä imbaerasɨ wae reta jupa rewe kerupi rupi jeräkua chupe reta Jesús uasata iko wae rupi. 56Jayawe Jesús oo tëta wasu reta rupi, jare tëta wasu raɨ reta rupi, jare tëta raɨ ikatu rupiwa reta rupi. Jare kerupi rupi uasa wae rupi, joko pewa reta ueru oñono imbaerasɨ wae reta tape jembeɨ rupi. Jare umɨñera reta Jesús umaeño waerä imbaerasɨ wae reta re uñatai waerä Jesús jemimonde jembeɨ mii yepe. Jare opaete uñatai Jesús jemimonde wae, opa ukuera reta Jesús imbaepuere pe.

Currently Selected:

Marcos 6: gnwPB

Highlight

Copy