Marcos 16

Jesús ikowe ye ou umanokue wae reta ipɨte wi

(Mateo 28.1-10; Lucas 24.1-12; Juan 20.1-10)

1Jayawe mbutuu ara uasa ma yawe, María Magdalena, Jacobo ichɨ María jee wae, jare Salomé owa reta mbaembae utimbo kawi wae ipuere waerä uipichɨ reta tëi pɨpe Jesús jetekue. 2Jare domingo ndimboweasɨ warasɨ oë ma yawe, jokua mbapɨ kuña reta yuraa teöwerenda kotɨ. 3Jare yuraa yureko reta rambuewe, jei reta iyupe: “¿Kía ra umbɨsɨrɨta yandewe jokua ita tuicha wae yandepuere waerä yaike teöwerenda japɨpe?” jei reta.

4Erëi joko pe yuraa ma uwäe reta yawe, uecha reta jokua ita tuicha wae uyembɨsɨrɨ ma oï joko wi. 5Jayawe uike yuraa reta teöwerenda japɨpe, jare uecha reta pëti kunumi#16.5 Kua ko jae pëti araɨwa Tumpa ombou wae uyekuaa oï chupe reta kunumi echa. Emɨngeta Mateo 28.2 jare Lucas 24.4 pe. uwapɨ oï iyakata kotɨ. Jae jemimonde puku jare tïi. Jayawe kuña reta opa ukɨye.

6Jayawe kunumi jei chupe reta: “Awɨye pekɨye,” jei. “Aikuaa pe reta peka peï Jesús Nazaret pewa umano kurusu re wae. Jae ikowe ye ma ou umanokue wae reta ipɨte wi. Mbaetɨ ma kua pe oï. Mase, pemae jendakue re,” jei chupe reta. 7“Añawe pekua pere jemimboe reta pe jare Pedro pe kuärái: ‘Jesús oota oï tenonde pewi ɨwɨ Galilea pe. Joko pe peowäitita peï kuri kërái jae jei pewe wae rami.’ Jukuärái pere chupe reta,” jei kunumi kuña reta pe.

8Jayawe urɨrɨ rewe jare ipɨakañɨ rewe kuña reta opa oë osi yuraa ye teöwerenda wi. Erëi umɨmbeu’ä kía pe awe ukɨye reta ramo.

María Magdalena uecha Jesús

(Juan 20.11-18)

9Jesús ikowe ye ou umanokue wae reta ipɨte wi domingo ndimboweasɨ. Jare uyechaka tenondete María Magdalena pe. Tenonde yawe Jesús omoë chiu aña reta kua kuña wi. 10Jayawe María uecha ma yawe Jesús, oo umɨmbeu tëi Jesús jemimboe reta pe. Jae reta ipɨatɨtɨ jare uyao yureko Jesús umano ramo. 11Jare María jei tëi chupe reta: “¡Jesús ikowe ye ma oï! Aecha ma,” jei tëi chupe reta. Erëi jae reta wɨrowia’ä María jei wae re.

Mokui jemimboe reta uecha Jesús

(Lucas 24.13-35)

12Kua jaɨkue rupi Jesús uyembɨambɨe uyechaka waerä mokui jemimboe reta pe, jae reta yuraa yureko rambuewe tëta mbae kotɨ. 13Jare Jesús oo ye ma chuwi reta yawe, jokua mokui wae yuraa ye reta tëta wasu kotɨ umɨmbeu waerä tëi ïru reta pe. Erëi jae reta jei wae re awe wɨrowia’ä reta.

Jesús uyechaka once jemimboe reta pe

(Mateo 28.16-20; Lucas 24.36-49; Juan 20.19-23)

14Kua jaɨkue rupi Jesús uyechaka once jemimboe tenondewaete reta pe etei jae reta ukaru yureko rambuewe. Jare umbɨeta chupe reta, echa’ä jae reta ipɨatäta ramo. Echa’ä ïru wae reta uecha Jesús ikowe ye ou umanokue wae reta ipɨte wi, jare umɨmbeu tëi jemimboe reta pe. Erëi jesewe jae reta uipota’ä wɨrowia.

15Joko wi Jesús jei chupe reta: “Pekua opaete ɨwɨ rupi jare pemɨmbeu opaete wae pe ñee ikawi wae che rewa,” jei chupe reta. 16“Jare ipotawe kía wɨrowia jare uyembɨsakambuka ɨ pe#16.16 Jokua año reta rupi opaete Cristo re wɨrowia wae reta uyembɨsakambuka woi jaeramo wɨrowia reta yawe. wae onoita tekowe opa mbae wae. Erëi jokua wɨrowia’ä wae reta, Tumpa umbɨjekota oï reta jare omombota oï reta Tatawasurenda pe jaeño mái pewa,” jei chupe reta.

17“Jare jeta wae reta uechata cheré wɨrowia wae reta uyapo ñonoï kua nunga mbaembae reta: Cheree re jae reta omoëta aña uyembɨiya jese wae reta wi. Jare uyemɨngetata reta ambɨe ñee reta pe – jokua jae ñee mbaetɨi uyemɨngeta pɨpe wae. 18Jare yepe tëi aramoi uipɨsɨta reta mboi, jare yepe tëi aramoi jouta reta mbayachi, erëi ndarau mbae awe uyeyapo chupe reta. Jare oñonota reta ipo imbaerasɨ wae reta re umɨnguera waerä.” Jukuärái Jesús jei jemimboe reta pe.

Jesús oo ye ara pe

(Lucas 24.50-53)

19Jayawe yandeYa Jesús opa ma jemimboe reta umɨngeta yawe, uyereraa ara pe. Jare uwapɨ yandeRu Tumpa iyakata kotɨ jae ndiwe onoi waerä mbaepuere.

20Jayawe jemimboe reta opa yuraa umɨmbeu Tumpa iñee opaete kerupi rupi. Jare yandeYa umee chupe reta mbaepuere uyapo waerä mbaembae ipuere’ä ambɨe kuimbae reta uyapo wae. Jare jukuärái jae uikuaaka opaete wae pe añetete wae ko jemimboe reta jei wae.

Jaeño ma.

Currently Selected:

Marcos 16: gnwPB

Highlight

Copy