Mateo 2

Kuimbae yasɨtata re uyemboe wae reta yuweru ueka Jesús

1Jesús oa ɨwɨ Judea pe tëta wasu raɨ Belén pe. Jare Jesús oa yawe, Herodes iko mburuwicha wasurä opaete ɨwɨ Israel re. Jayawe jokua ara rupi yuweru uwäe kuimbae reta yasɨtata re uyemboe wae reta warasɨ oë wae kotɨ wi tëta wasu Jerusalén pe. 2Jare jae reta upɨrandu joko pewa reta pe: “¿Kiape pa oï sambiaɨ judío reta imburuwicha wasurä ikota wae?” jei reta. “Ore nduikuaa oa ma ko, echa’ä nduecha pëti yasɨtata warasɨ oë wae kotɨ. Jare jokua yasɨtata uikuaaka oï orewe jesewa. Jáeramo ndoyu ndueka numbutuicha waerä,” jei reta.

3Erëi kua mburuwicha wasu Herodes pe jeräkua yawe, ipɨa kawi’ä upɨta. Echa’ä jae uipota’ä etei uyekuaa waerä ïru mburuwicha, echa’ä uipota’ä uyepepɨka ramo. Jare opaete Jerusalén pewa reta uyembɨpɨa’ä Herodes ipɨa kawi’ä oï wae re, echa’ä jae reta ukɨye chuwi.

4Jayawe Herodes umbatɨka opaete sacerdote itenondewa reta jare Moisés uikuatía wae re oporomboe wae reta, jare upɨrandu chupe reta: “¿Kiape ra oata oï jokua Cristo yae chupe wae?” jei chupe reta.

5Jare jae reta jei chupe: “Jae oata oï ɨwɨ Judea pe tëta wasu raɨ Belén pe. Echa’ä pëti kuimbae Tumpa iñee arakae umɨmbeu wae jukuärái jei. Jae uikuatía kuärái:

6“Tumpa jei: ‘Belén jae ko tëta wasu raɨ ikawiete wae ɨwɨ Judea pe oï wae.

Echa’ä joko pe oata oï pëti mburuwicharä ikota wae.

Jare jae uyandareko kawita oï Israel iñemoñaa reta re – jae ko che aiparawo wae reta,’ jei.”#Miqueas 5.2

Jukuärái jei Tumpa iñeerɨru pe,” jei reta Herodes pe.

7Jayawe Herodes omondo uenika wɨari jokua yasɨtata re uyemboe wae reta. Echa’ä jae uipota upɨrandu chupe reta kërái yawe etei ra uyekuaa chupe reta jokua yasɨtata wae. 8Jare jae reta uikuaaka ma chupe yawe, Herodes jei tëi chupe reta umbɨtawɨ rewe: “Pekua Belén pe peka jokua sambiaɨ mii,” jei chupe reta. “Jare pewäe chupe yawe, peyu ye kua pe pemɨmbeu chewe. Echa’ä che aipota wi a ambutuicha jokua sambiaɨ mii,” jei chupe reta.

9Jayawe uyandu yawe mburuwicha wasu jei chupe reta wae, jokua kuimbae reta opa oë yuraa Jerusalén wi. Jare jawoi pewa mii uyekuaa ye chupe reta jokua yasɨtata tenonde uyekuaa chupe reta warasɨ oë wae kotɨ wae. Jare jokua yasɨtata oo jae reta jenonde jare oo uyemboɨ jokua tëta iáramo kiape sambiaɨ oï wae pe. 10Jare jokua uecha reta yawe, jae reta uyerowiaete ye yureko.

11Jayawe uike reta sambiaɨ oï wae pe jare uecha reta sambiaɨ jare ichɨ María ndiwe. Jayawe kuimbae reta uñeñono ɨwɨ re sambiaɨ jowai umbutuicha reta waerä. Jare joko wi pëti pëti wae uipea reta jewɨta umee waerä mbaembae ikawi wae sambiaɨ pewarä. Umee reta chupe oro jare mbaembae utimbo kawi wae jare jepɨete wae – jae ko incienso jare mirra jee wae.

12Jayawe umbutuicha ma reta sambiaɨ yawe, opa ye yuraa reta jëta kotɨ ambɨe tape rupi. Echa’ä Tumpa umɨmbeu chupe reta ipau rupi awɨye waerä yuraa ye reta Herodes jëta rupi.

Herodes uipota tëi uyukaka Jesús

13Jayawe kuimbae yasɨtata re uyemboe wae reta opa ye ma yuraa yawe, pëti araɨwa Tumpa ombou wae uyekuaa José pe ipau pe jare jei chupe: “Epüa. Eraa jupiwoiño sambiaɨ jare ichɨ ndiwe ɨwɨ Egipto kotɨ. Jare pepɨta joko pe che amɨmbeu ye ndewe rewa. Echa’ä Herodes uekakata onoi sambiaɨ uyukaka waerä tëi,” jei chupe.

14Jayawe jawoi pewa José upüa, jare pɨ̈tu oï rewe wɨraa sambiaɨ ichɨ ndiwe ɨwɨ Egipto kotɨ. 15Jare joko pe upɨta reta Herodes umano rewa. Jukuärái uasa uyeyapo waerä Tumpa arakaete jei uyeyapota iko wae. Echa’ä Tumpa jei arakae pëti wae jae iñee umɨmbeu wae rupi kuärái: “Aru ye cheRaɨ ɨwɨ Egipto wi,”#Oseas 11.1 jei.

16Jayawe jeräkua Herodes pe jokua yasɨtata re uyemboe wae reta opa ye ma yepe yuraa ikotɨ̈a rupi jare mbaetɨ uyapo reta Herodes jei wae. Jáeramo Herodes pochɨete rewe omondo sɨndaro reta Belén pe jare Belén iyɨpɨ rupi uyuka reta waerä opaete sambiaɨ kuimbae mii reta ndei mokui año onoi wae reta. Jukuärái uyapo Herodes uyukaka waerä tëi Jesús. Echa’ä yasɨtata re uyemboe wae reta uyemboɨ yawe Herodes jowai, jae reta jei chupe: “Mokui año ma oï jokua yasɨtata umbɨpɨ uyekuaa orewe wae,” jei reta chupe. 17Jukuärái uasa Tumpa jei arakaete uyeyapota iko wae. Echa’ä jae jei iñee umɨmbeu wae Jeremías jee wae rupi kuärái:

18“Tëta wasu Ramá pe uyenduta jäse ikuasɨ katu rewe uyao ñonoï wae reta.

Echa’ä Raquel iñemoñaa reta uyaota ñonoï imembɨ reta re.

Jare ndarau etei kía ipuere umbɨpɨakatu reta, echa’ä imembɨ reta opa ma ko umano chuwi.”#Jeremías 31.15

Jukuärái jei.

José, María, jare Jesús uñatima ye ɨwɨ Israel pe

19Jayawe kua jaɨkue rupi Herodes umano. Jare José imeño iko ɨwɨ Egipto pe. Jayawe uyekuaa ye chupe ipau pe pëti araɨwa Tumpa ombou wae. 20Jare jei chupe: “Epüa. Eraa ye sambiaɨ ichɨ ndiwe ɨwɨ Israel pe. Awɨye ekɨye, echa’ä jokua sambiaɨ uipota tëi uyuka yureko wae reta opa ma umano,” jei chupe.

21Jayawe José upüa jare wɨraa ye sambiaɨ ichɨ ndiwe ɨwɨ Israel pe. 22Erëi jeräkua José pe Herodes ipepɨka pe iko taɨ Arquelao jee wae mburuwicha wasurä ɨwɨ Judea pe. Jáeramo José ukɨye oo waerä jokotɨ. Jayawe Tumpa uikuaaka José pe ipau rupi yuraa waerä ɨwɨ Galilea pe. Jáeramo jokotɨ yuraa reta.

23Jare yuraa uwäe reta pëti tëta wasu Nazaret jee wae pe jare joko pe uyakao reta. Kua uasa uyeyapo waerä Tumpa iñee arakae umɨmbeu wae reta jei uyeyapota iko wae. Echa’ä jei reta Upuruepɨ wae rewa kuärái: “Jeita chupe reta: ‘Jae ko pëti Nazaret pewa,’ jeita reta.”

Currently Selected:

Mateo 2: gnwPB

Highlight

Copy