Juan 18
18
Uipɨsɨ reta Jesús
(Mateo 26.47-56; Marcos 14.43-50; Lucas 22.47-53)
1Jesús opa ma uyerure yawe, uasa jemimboe reta ndiwe ɨäka wasu Cedrón jee wae jowaicho pe yuraa uwäe reta temitɨ jenda pe. 2Jare Judas – jae ko jokua kuimbae umee Jesús jowaicho reta pe wae – jae uikuaa wi jokua temitɨ jenda. Echa’ä Jesús joko pe uyembatɨseñoi jemimboe reta ndiwe. 3Jayawe Judas oo jokotɨ sɨndaro romano reta ndiwe. Jare yuraa reta wi jae jupie amokue fariseo reta jare sacerdote itenondewa reta isɨndaro reta. Opa yuraa reta mechero rewe jare kɨsepuku rewe uipɨsɨ reta waerä Jesús.
4Erëi Jesús uikuaa jokua uyeyapota iko chupe wae. Jayawe oo owäiti reta jei rewe: “¿Kía pa peka peï?” jei chupe reta.
5“Jesús Nazaret pewa,” jei reta.
Jayawe Jesús jei chupe reta: “CHE KO jae.”
Jare Judas – jae ko umee jowaicho reta pe wae – uyemboɨ oï joko pe jae reta ndiwe. 6Jare Jesús “CHE KO jae” jei chupe reta yawe, opa usɨrɨ reta jaɨkue kotɨ oa ɨwɨ re. 7Erëi Jesús jekuae upɨrandu ye chupe reta: “¿Kía pa peka peï?” jei.
“Jesús Nazaret pewa,” jei reta chupe.
8Jayawe Jesús jei chupe reta: “Che jae tëi ma pewe CHE KO jae wae. Pe reta cheeño chereka peï yawe, pemaeño too ye kua che ndiwe ñonoï wae reta,” jei chupe reta. 9Kua jei Jesús uyeyapo waerä tenonde yawe jei Tu pe wae. Echa’ä jae jei chupe: “Che ayandareko kawi nde nemee chewe wae reta re. Ndarau pëti awe ukañɨ chewi,” jei.
10Jare Simón Pedro ueru yepe pëti kɨsepuku. Jayawe ueki kɨsepuku aramoiño jɨru wi jare uiporu sacerdote tenondewaete pe uyeyokui wae re. Jare uyasɨa chuwi inambi iyakata kotɨwa. Kua kuimbae jee Malco. 11Jayawe Jesús jei Pedro pe: “Iñono ye ndekɨsepuku jɨru pe. CheRu umee chewe aiporara waerä wae, aiporara ñotái ko,” jei chupe.
Jesús uyemboɨ sacerdote tenondewaete ikose wae jowai
(Mateo 26.57-58; Marcos 14.53-54; Lucas 22.54)
12Jayawe jokua sɨndaro reta itenondewa ndiwe uipɨsɨ reta Jesús jare uñapɨ̈ti reta ipo. 13Jayawe wɨraa reta Jesús joko wi sacerdote tenondewaete ikose wae Anás jee wae jëta pe rani – jae ko Caifás jowaya. Caifás jae ko sacerdote tenondewaete jokua año rupi. 14Kua Caifás ko jae tenonde yawe jei judío reta pe: “Ikawita ko jokua kuimbae Jesús umano waerä awɨye waerä ñanerëtara reta opa ukañɨ romano reta ipo pe.”
Pedro uikuaku Jesús
(Mateo 26.69-70; Marcos 14.66-68; Lucas 22.55-57)
15Jayawe Jesús jemimboe reta mokui wae – jae ko Simón Pedro jare ïru wae – yuraa reta Jesús jaɨkue rupi. Jare yuraa ma uwäe reta yawe sacerdote tenondewaete jëta pe, kua ïru jemimboe uike öke wasu rupi oo uwäe joka pe Jesús jaɨkue. Echa’ä sacerdote tenondewaete uikuaa jokua kuimbae; jáeramo öke uäro wae umaeño jese. 16Erëi Pedro upɨtaño oka pe koiño öke wasu wi. Uasa’ä oo. Jayawe jokua ïru jemimboe oë oo umɨngeta kuñatái öke uäro wae jare uruike Pedro. 17Jare kuñatái öke uäro wae jei Pedro pe: “¿Nde jae ko wi Jesús jemimboe?” jei chupe.
“Mbaetɨ. Jae’ä ko che,” jei Pedro chupe.
18Jokua pɨ̈tu roɨete iko. Jáeramo sacerdote tenondewaete pe uyeyokui wae reta jare sɨndaro reta uyatapɨ ma yepe reta jokua tëta joka pe jare uyepee yureko reta. Jayawe Pedro wi oya tata re, joko pe uyepee waerä jae reta ndiwe.
Anás upɨrandu Jesús pe
(Mateo 26.59-66; Marcos 14.55-64; Lucas 22.66-71)
19Jare jokua rambuewe sacerdote tenondewaete umbɨpɨ upɨrandu Jesús pe jae oporomboe wae re jare jemimboe reta re. 20Jayawe Jesús jei chupe: “Che ayemɨngeta ko opaete wae jowake. Jekuaeño aporomboe tupao reta pe jare tupao wasu joka pe kiape opaete wae uyembatɨñoi wae pe. Che ayemɨngeta wɨari’ä etei,” jei chupe. 21“¿Maera pa chewe ndiyapo neï kua mbɨrandu reta? Añetete ndipota ndikuaa yawe kua ndepɨrandu neï chewe wae, epɨrandu jokua uyapɨsaka cheré wae reta pe. Echa’ä jae reta uikuaa mbae re che ayemɨngeta wae,” jei chupe.
22Jesús kua jei ma yawe, pëti sɨndaro tupao wasu iyandarekoa owapete Jesús jare jei chupe: “¿Kiaete pa nde jukuärái ndiyemɨngeta waerä sacerdote tenondewaete pe?” jei chupe.
23Jayawe Jesús jei chupe: “Awɨyeta tëi ko cherowapete, echa’ä che ayemɨngeta ko jupi rupi. Erëi che ayemɨngeta kawi’ä aï yawe, jayawe emɨmbeu opaete wae pe kiape ra ayemɨngeta kawi’ä,” jei chupe.
24Jayawe Anás omondo Jesús uñeñapɨ̈ti rewe sacerdote tenondewaete Caifás oï wae pe.
Pedro uikuaku ye Jesús
(Mateo 26.71-75; Marcos 14.69-72; Lucas 22.58-62)
25Jare Simón Pedro imeño uyepee iko tataɨpɨ pe. Jayawe ïru wae reta upɨrandu chupe: “¿Nde jae ko wi Jesús jemimboe?” jei chupe.
Erëi Pedro uikuaku jare jei: “Jae’ä ko che.”
26Jare joko pe ime iko wi Pedro uyasɨa chuwi inambi wae jëtara. Jae ko sacerdote tenondewaete pe uyeyokui wae wi. Jare jae jei Pedro pe: “¿Nde jae’ä yerá che nduecha temitɨ reta jenda pe Jesús ndiwe wae?” jei chupe.
27Jayawe Pedro jekuae uikuaku ye. Jare jupiwoiño pëti uru kuimbae uñee.
Jesús uyemboɨ Pilato jowai
(Mateo 27.1-2,11-14; Marcos 15.1-5; Lucas 23.1-5)
28Añawe köe ma jare ndimboweasɨ wɨraa reta Jesús Caifás jëta wi mburuwicha Roma pewa jëta wasu pe umbɨyemboɨ reta waerä Jesús jae jowai. Jokua mburuwicha jee Pilato. Erëi jokua judío itenondewa reta uike’ä o pe, echa’ä jokua mburuwicha judío mbae wae ko. Jare jae reta wɨrowia tëi uike reta yawe judío mbae wae jëta pe, upɨtata reta ikɨa rewe Tumpa kotɨ. Jare jukuärái yawe, ndarau ipuere jou reta tembiu pascua pewa. Jáeramo upɨta reta oka pe.
29Jare Pilato oë ou uyemɨngeta jae reta ndiwe. “¿Mbae re pa pembɨjeko peï kua kuimbae?” jei chupe reta.
30Jayawe jei reta chupe: “Kua kuimbae uyapo’ä yawe mbae ikawi mbae wae, ndarau tëi ndueru numee ndewe,” jei reta chupe.
31Jayawe Pilato jei chupe reta: “Pe reta etei peraa piporaraka chupe pereko rupii,” jei tëi chupe reta.
“Ndarau orepuere nduyapo jokua,” jei reta. “Pe romano piko wae reta pemaeño’ä oreré nduyuka waerä kiawe,” jei reta.
32Kua uasa uyeyapo waerä Jesús tenonde yawe jei imano rewa wae. Echa’ä jae jei umanota iko romano reta ipo pe.
33Jayawe Pilato oo ye uike jëta japɨpe jare ueruruka Jesús jae jowai. Jare upɨrandu chupe: “¿Jae yerá nde judío reta imburuwicha wasu?” jei chupe.
34Jayawe Jesús jei chupe: “¿Ndeeño pa ndiyemɨngeta neï jukuärái, ani ïru wae reta pa imiäri ma ndewe che rewa?” jei chupe.
35Jare Pilato jei chupe: “¿Jae yerá che judío? Nerëtáɨwa reta etei jare sacerdote itenondewa reta ndereru nembɨyemboɨ cherowai. ¿Mbae pa ndiyapo nembopochɨka reta waerä?” jei chupe.
36Jayawe Jesús jei chupe: “Chembaepuere mburuwicha pewa ou’ä ko kua ɨwɨ pewa reta wi,” jei. “Jukuärái yawe moná, uyeyokui chewe wae reta uñerärota tëi awɨye waerä chepɨsɨ judío itenondewa reta. Erëi chembaepuere mburuwicha pewa ou ikotɨ̈a wi. Jae’ä ko kua ɨwɨ pewa,” jei chupe.
37Jayawe Pilato jei chupe: “Jayawe nde yepe jae pëti mburuwicha,” jei chupe.
Jayawe Jesús jei chupe: “Nde ndere wae rami jae ko che. Jokuaerä ko aa chesɨ wi. Jare ayu ko kua ɨwɨ pe amɨmbeu waerä añetete wae. Jare opaete uipota yureko añetete wae rupi wae reta, jae reta ko uyapɨsaka chiñee re,” jei chupe.
38Jayawe Pilato jei chupe: “¿Mbae ra ko jokua añetete wae?”
Pilato jei Jesús umanota ko
(Mateo 27.15-31; Marcos 15.6-20; Lucas 23.13-25)
Jare kua jei ma yawe, Pilato oë ye oo judío reta oï wae pe jare jei chupe reta: “Che mbaetɨ etei awäe teko jese,” jei. 39“Erëi pe judío piko wae reta jekuaeño pipota ambopoika waerä pewe pëti pereso pascua ara reta rupi. ¿Pipota pa jayawe ambopoika waerä pewe kua pemburuwicha wasu?” jei chupe reta.
40Jare jae reta jei usapɨkai rewe: “¡Awɨye embopoika jokua kuimbae! ¡Embopoika orewe Barrabás!” jei reta.
Jokua Barrabás ko jae pëti kuimbae imonda jeko kachi wae ñeräro reño iko wae.
Currently Selected:
Juan 18: gnwPB
Highlight
Share
Copy
Want to have your highlights saved across all your devices? Sign up or sign in
© 2017, Ethnos360 (New Tribes Mission). All rights reserved.
