Génesis 45

José uyekuaaka tɨwɨ jare tɨkeɨ reta pe

1Jayawe José ipɨatɨtɨete Judá jei wae uyandu yawe. Jáeramo jei uyeyokui chupe wae reta pe usapɨkai rewe opa usɨrɨ reta chuwi waerä. Echa’ä José uipota iko jaeño pe etei tɨwɨ jare tɨkeɨ reta ndiwe uyekuaaka waerä chupe reta.

2Joko wi José umbɨpɨ uyao täta. Jare Egipto pewa oka pe ñonoï wae reta uyandu José uyao wae. Jare jawoi pewa jeräkua wi mburuwicha wasu pe jare jëtáɨwa reta pe wi.

3Joko wi José jei tɨwɨ jare tɨkeɨ reta pe: “¡Che ko jae José! ¿Imeño pa iko yanderu?” upɨrandu chupe reta. Erëi omoë'ä pëti awe iñee tɨwɨ jare tɨkeɨ reta, echa’ä täta ukɨye reta uikuaa ma yawe jae ko José wae. 4Jáeramo José jei chupe reta: “Peya mii cheré,” jei. Jayawe jae reta oya katu jese. Jare José jei ye chupe reta: “Che ko jae perɨwɨ José. Karamboe pe reta chemee korepoti pe kua ɨwɨ Egipto pe yuweru yureko wae reta pe,” jei chupe reta.

5“Erëi awɨye pepɨatɨtɨ jare awɨye piyembɨjeko kua re, echa’ä Tumpa ko chembou kua pe che rani pewi aepɨ waerä perekowe karuái wasu wi,” jei. 6“Mase, uasa ma oï mokui año rupi kua karuái wasu. Erëi uata wɨteño oï pandepo año ye mbaetɨta mbaewɨye,” jei. 7“Jáeramo Tumpa chembou kua pe che rani pewi aepɨ waerä perekowe jare piñemoñaa reta awɨye waerä opa ukañɨ ɨwɨ wi,” jei. 8“Pe reta’ä ko kua pe chembou. Tumpa etei ko chembou kua pe,” jei. “Jare Tumpa ko cheñono amee waerä arakuaa mburuwicha wasu pe,” jei. “Jae umee chewe ayandareko waerä opaete mburuwicha wasu imbaembae reta re. Jare umee wi chewe mbaepuere opaete ɨwɨ Egipto re,” jei chupe reta.

9“Añawe pekua woi yanderu pe jare pere chupe kuärái: ‘Nderaɨ José jei ndewe kuärái: Tumpa umee ma chewe mbaepuere opaete ɨwɨ Egipto pewa reta re. Jáeramo jawoi pewa eyu kua pe. 10Ndikota kua ɨwɨ Egipto japɨpe ɨwɨ Gosén jee wae pe neï waerä koiño chewi. Jayawe eru nderaɨ reta, nerumɨmino reta, opaete nderɨmba reta, jare opaete mbaembae ime nenoi wae. 11Kua pe ayandareko kawita nderé. Ameeta ndewe nderembiurä. Ameeta wi nerëtara reta pe jare opaete nde ndiwe ñonoï wae reta pe wi. Jukuärái uatata’ä mbae awe ndewe, echa’ä uata wɨteño oï pandepo año ye karuái wasu.’ Jukuärái pere chupe,” jei José chupe reta.

12Jare jei wi chupe reta: “Mase, pe reta etei cherecha peï, jare cherɨwɨ Benjamín cherecha oï wi. Jare pikuaa peï che ko José ayemɨngeta aï pe reta ndiwe wae. 13Pekua pemiäri yanderu pe che ko jae mburuwicha chembaepuere wae ɨwɨ Egipto pe. Pemiäri chupe opaete mbaembae pecha ayapo aï wae rewa, jare peru woi chewe yanderu kua pe,” jei José chupe reta.

14Joko wi José uikuäwa tɨwɨ Benjamín jare uyao uyerowia pɨpei. Jare Benjamín umbɨpɨ uyao wi. 15Joko wi José uyurupɨte jowa pe opaete tɨkeɨ reta jare uyao rewe uikuäwa. Jayawe ramo tɨwɨ jare tɨkeɨ reta uyerowia rewe uyemɨngeta José ndiwe.

Mburuwicha wasu uparea wi Jacob jare jëtara reta pe uyakao waerä ɨwɨ Egipto pe

16Mburuwicha wasu jare imborɨa umbɨarakuaa wae reta uikuaa yawe José tɨwɨ jare tɨkeɨ reta yuweru ma uwäe reta ɨwɨ Egipto pe wae, uyerowiaete reta wi. 17Jayawe mburuwicha wasu jei José pe: “Ere woi nderɨwɨ jare nderɨkeɨ reta pe umbɨwɨta waerä imburika jare uñatima ye reta waerä ɨwɨ Canaán pe,” jei chupe. 18“Ere chupe reta ueru waerä nderu jare opaete nerëtara reta kua ɨwɨ Egipto pe yureko reta waerä kua pe. Ere chupe reta wi nde nemeeta chupe reta pëti ɨwɨ ikawiete wae kua ɨwɨ Egipto pe oï wae yureko reta waerä pɨpe. Jare imeta onoi reta wi tembiu ikawiete wae ɨwɨ Egipto pewa,” jei chupe. 19“Iyokui wi wɨraa reta waerä kua wi mbowɨ karosa ueru waerä pɨpe ikuña reta jare isambiaɨ reta wi nderu ndiwe,” jei chupe. 20“Ere chupe reta wi awɨye tipɨatɨtɨ reta amokue imbaembae ueya wae re, echa’ä opaete mbaembae ikawi wae kua ɨwɨ Egipto pewa jae reta imaerä ko.” Jukuärái jei mburuwicha wasu José pe.

21Jayawe Jacob taɨ reta jukuärái uyapo. José umee chupe reta karosa reta mburuwicha wasu oyokui rami. Umee wi chupe reta itapekerä. 22José umee wi chupe reta jemimonderä ipɨau wae. Erëi tɨwɨ Benjamín pe umee pandepo jemimonderä ipɨau wae jare mbapɨ chiëto riare korepoti. 23Jare tu pewarä José omondo mbaembae ikawiete wae ɨwɨ Egipto pewa payandepo mburika kuimbae reta re. Omondo chupe wi payandepo mburika kuña reta re kuärái: trigo, mbɨyape, jare itapekerä tu jou waerä tape rupi.

24Joko wi José wɨraa omondo waerä tɨwɨ jare tɨkeɨ reta, jare jei chupe reta: “Pekua pepɨakatu rewe. Awɨye ye ma pepɨatɨtɨ,” jei chupe reta.

25Jayawe José tɨwɨ jare tɨkeɨ reta yuraa ye ɨwɨ Egipto wi ɨwɨ Canaán kotɨ tu oï wae pe. 26Jare yuraa uwäe reta yawe jëta pe, imiäri reta tu pe: “¡Imeño yepe nderaɨ José iko! ¡Jae yepe opaete ɨwɨ Egipto pewa mburuwicha reta itenondewa!” jei imiäri reta tu pe. Jare kua uyandu yawe, Jacob ipɨakañɨete. Yawaiete chupe wɨrowia waerä.

27Erëi Jacob uyandu yawe José omondo jeika chupe wae, jare uecha yawe jokua karosa reta José omondo wae, jayawe ramo Jacob ipɨamaña ye. 28Jayawe jei: “¡Añetete ko aipo jayawe cheraɨ José imeño iko! Ata aecha ndei amano mbowe,” jei Jacob.

Currently Selected:

Génesis 45: gnwPB

Highlight

Copy