Éxodo 9

Mbaesusere mbaemɨmba reta imano rewa

1Jayawe Tumpa jei Moisés pe: “Ekua ye mburuwicha wasu jowai jare ere chupe kuärái: ‘Ore hebreo reta nduiko wae, oreTumpa ikoño mái wae jei ndewe nemaeño waerä jae uiparawo wae reta re oë yuraa jae jee umbutuicha reta waerä. 2Erëi imeño nembɨawái reta yawe jare nemaeño’ä oë yuraa reta yawe, Tumpa uiporarakata ndewe. 3Echa’ä ombouta mbaerasɨ jasɨ wae opaete pembaemɨmba tëta rupiwa reta re – jae ko pekawayu reta re, pemburika reta re, perɨmba camello reta re, pewaka reta re, peowecha reta re, jare pekapura reta re Tumpa ombouta mbaerasɨ jasɨ wae. 4Erëi jae oyowake’ä umae ndeɨwɨ pewa reta jɨmba reta re kërái jae uiparawo wae reta jɨmba reta re umae wae rami. Jukuärái pëti awe Israel iñemoñaa reta jɨmba umanota’ä.’ Jukuärái ere mburuwicha wasu pe,” jei Tumpa Moisés pe.

5Jare Tumpa jei wi ombouta iko jokua mbaesusere ïruwe ara rupi. 6Jayawe pɨarewe pe Tumpa uyapo jukuärái. Opaete ɨwɨ Egipto pewa reta jɨmba opa umano. Erëi pëti awe Israel iñemoñaa reta jɨmba umano’ä etei.

7Jare mburuwicha wasu omondo uikuaa waerä añetete ra pëti awe Israel iñemoñaa reta jɨmba umano’ä wae. Erëi yepe tëi uikuaa añetete wae, jesewe jekuae uyembɨpɨatäta ye jare umaeño’ä Israel iñemoñaa reta re oë yuraa reta waerä.

Mbaesusere atii reta rewa

8Jaɨkue rupi Tumpa jei Moisés jare Aarón pe: “Peki peraa pepo pe tanimbu pëti horno wi,” jei. “Jare nde, Moisés, emombo ɨwate kotɨ tanimbu mburuwicha wasu jowai. 9Jokua tanimbu ɨwɨatatimbo rami uñemɨaita opaete ɨwɨ Egipto rupi. Jukuärái opata iyatiitii ɨwɨ Egipto pewa reta jare opaete mbaemɨmba reta wi,” jei Tumpa chupe reta.

10Jayawe pëti horno wi Moisés jare Aarón ueki wɨraa reta tanimbu mburuwicha wasu jowai. Jare Moisés omombo yawe ɨwate kotɨ, jokua tanimbu ɨwɨatatimbo rami uñemɨái opaete ɨwɨ Egipto rupi. Jukuärái aramoiño opa iyatiitii ɨwɨ Egipto pewa reta jare opaete mbaemɨmba reta wi. 11Jare ichoropa wae reta ipuere’ä ma yuweru uyemboɨ Moisés jowai, echa’ä opaete ma iyatiitii ñonoï reta ramo, opaete ïru ɨwɨ Egipto pewa reta rami.

12Erëi Tumpa umɨtäta ye mburuwicha wasu ipɨa chuwi. Jayawe mburuwicha wasu uyapɨsaka’ä Moisés jare Aarón iñee re kërái Tumpa jei uyeyapota wae rami.

Mbaesusere amandau rewa

13Jaɨkue rupi Tumpa jei Moisés pe: “Epüa kuriye ndimboweasɨ, jare ekua mburuwicha wasu jowai jare ere chupe: ‘Ore hebreo reta nduiko wae, oreTumpa ikoño mái wae jei ndewe kuärái: ‘Emaeño aiparawo wae reta re oë yuraa umbutuicha reta waerä cheree. 14Erëi nemaeño’ä oë yuraa reta yawe, jeiete aiporarakata ndewe, jare nemborɨa nembɨarakuaa wae reta pe, jare opaete ndeɨwɨ pewa reta pe. Jukuärái ndikuaata neï mbaetɨ ko che rami wae opaete ɨwɨ rupi. 15Chepuereta tëi ma ambou mbaerasɨ jasɨete wae ndewe jare opaete ndeɨwɨ pewa reta pe, pe reta opa ma pemano waerä tëi. 16Erëitu amaeño nderé ndiko waerä aikuaaka waerä ndewe chembaepuere, jare opaete ɨwɨ pewa reta uikuaa waerä che rewa. 17Erëi jesewe nde jekuaeño nembɨawái neï aiparawo wae reta jare nemaeño’ä oë yuraa reta waerä. 18Jáeramo kuriye kuärái ora pe ambouta jeta amandau#9.18 Amokue wae reta jei chupe “amanda.” tuichaete kɨye pewa, jokua nunga uyeyapo mbaei ɨwɨ Egipto pe uyembɨpɨ wiwe wae. 19Jayawe iyokui ndeɨwɨ pewa reta umɨinge waerä opaete imbaemɨmba reta jokai pe, jare kuimbae oka rupi ñonoï wae reta tuike reta wi joo pe. Echa’ä opaete oka rupi ñonoï wae reta uipokou amandau yawe, umanota reta,’ jei ndewe oreTumpa.’ Jukuärái ere chupe,” jei Tumpa Moisés pe.

20Jayawe Moisés uyapo Tumpa jei wae rupi. Jare amokue mburuwicha wasu imborɨa umbɨarakuaa wae reta ukɨye uyandu yawe Tumpa iñee. Jáeramo jawoi pewa yuraa umɨinge jɨmba reta jare kuimbae uyeyokui chupe wae reta oka wi o pe. 21Erëi amokue wae reta wɨrowia’ä Tumpa iñee re jare ueyaño reta oka pe. 22Jayawe pɨarewe pe Tumpa jei Moisés pe: “Eupi ndepo ara kotɨ, jare oata amandau opaete ɨwɨ Egipto rupi. Oata oï kuimbae jare kuña reta re, mbaemɨmba reta re, jare opaete temitɨ reta jare ñana reta ɨwɨ Egipto rupi oï wae re,” jei chupe.

23Jáeramo Moisés upi yawe ipopoka ara kotɨ, Tumpa ombou woi amandau uwera amaterere rewe. Jukuärái Tumpa ombou jeta amandau tuichaete wae opaete ɨwɨ Egipto rupi. 24Jokua nunga mbaetɨi uyeyapo ɨwɨ Egipto pe uyembɨpɨ wiwe. Amandau oa upɨta mbae, jare uwera pɨi pɨi. 25Opaete ɨwɨ Egipto rupi oa amandau, jare opa urükumewa jare uyuka opaete oka pe ñonoï wae. Kuimbae jare kuña jare mbaemɨmba oka pe ñonoï wae reta opa umano. Jare amandau oa wae opa urükumewa wi opaete temitɨ reta, jare opa uakɨo opaetei ɨwɨra reta jäka chuwi. 26Jaeño ɨwɨ Gosén pe, kiape Israel iñemoñaa reta ñonoï wae pe, oa’ä etei amandau.

27Joko wi mburuwicha wasu uenika woi Moisés jare Aarón, jare jei chupe reta: “Añawe aikuaa ayawɨ ma ko peTumpa kotɨ. Añetete peTumpa jupi wae ko, erëi che jare cheɨwɨ pewa reta opaete teko iya ko ore. 28Piyerure peTumpa pe oreré umɨmbɨta waerä kua ama jɨapu jare amandau kɨyete pewa. Tamaeño ma peré peë peo waerä. Awɨye ye ma pepɨta kua ɨwɨ Egipto pe,” jei mburuwicha wasu chupe reta.

29Jayawe Moisés jei mburuwicha wasu pe: “Aë yawe tëta wasu wi, ayerure woita oreTumpa ikoño mái wae pe umɨmbɨta waerä ama jɨapu wae jare amandau,” jei. “Jukuärái ndikuaata oreTumpa ikoño mái wae ko jae kua ɨwɨ jare opaete pɨpe oï wae iYa,” jei. 30“Erëitu aikuaa aï nde jare nemborɨa nembɨarakuaa wae reta pipɨu’ä etei peï oreTumpa wi,” jei Moisés chupe.

31Jayawe jokua amandau opa urükumewa opaete temitɨ lino#9.31 Lino ko jae temitɨ uiporu reta uyapo waerä tela ikawiete wae. jee wae jare cebada jee wae, echa’ä cebada jäɨ ma iko jare lino ipotɨ ma iko. 32Erëi urükumewa’ä trigo, echa’ä ndei jeñɨ iko.

33Jayawe Moisés opa uyemɨngeta yawe mburuwicha wasu ndiwe, oë ye oo tëta wasu wi jare upi ipo uyerure waerä Tumpa pe. Jupiwoi opa upɨta amandau jare okɨ wae, jare opa kïi ama jɨapu wae. 34Erëi mburuwicha wasu jokua uecha yawe, jekuae uyawɨ ye Tumpa kotɨ. Jae jare imborɨa umbɨarakuaa wae reta ndiwe umɨtäta reta ye ipɨa. 35Mburuwicha wasu uyembɨpɨatäta ye jare umaeño’ä Israel iñemoñaa reta re oë yuraa waerä kërái Tumpa jei uyeyapota iko wae rami.

Currently Selected:

Éxodo 9: gnwPB

Highlight

Copy