Hechos 15

Hermano itenondewa reta uyembatɨ tëta wasu Jerusalén pe

1Pablo jare Bernabé tëta wasu Antioquía pe ñonoï rambuewe, yuweru ɨwɨ Judea wi amokue oporomboe wae reta. Jae reta ko jae judío Cristo re wɨrowia wae reta. Kua reta umbɨpɨ omboe hermano reta kuärái: “Pe judío mbae piko wae reta piyembɨcircuncidaka’ä#15.1 Uyembɨcircuncidaka ko jae “circuncisión” karái ñee pe. Kua ñee uipota jei uikɨ̈tika chuwi jäkuipire mii. Jokua umbɨjaanga yemɨngeta Tumpa arakae uyapo Abraham jare Abraham iñemoñaa kuimbae reta ndiwe wae re. Emɨngeta Génesis 17.9-14 pe. yawe Moisés arakae uikuatía wae rupi, Tumpa ndarau perepɨ mbaembae piyawɨ ikotɨ wae wi.” Jukuärái oporomboe iko reta tëi.

2Erëi Pablo jare Bernabé täta rupi uyeaka jae reta ndiwe jokua re. Jáeramo hermano reta upɨta omondo waerä Pablo jare Bernabé amokue ïru hermano reta ndiwe tëta wasu Jerusalén kotɨ. Echa’ä uipota jae reta uyemɨngeta waerä Jesús jemimboe tenondewaete reta ndiwe jare Cristo re wɨrowia wae reta itenondewa reta ndiwe jokua yemboe re.

3Jayawe yuraa reta tëta wasu Jerusalén kotɨ. Jare yuraa yureko rambuewe, uasa reta ɨwɨ Fenicia rupi jare ɨwɨ Samaria rupi. Jare jokoropi umɨmbeu reta Cristo re wɨrowia wae reta pe kërái jeta judío mbae wae reta uyerowa ma Tumpa kotɨ. Jare kua uyandu yawe, uyerowiaete opaete jokua hermano reta.

4Jare Pablo jare Bernabé yuraa uwäe reta yawe tëta wasu Jerusalén pe, Jesús jemimboe tenondewaete reta jare opaete Cristo re wɨrowia wae reta itenondewa reta ndiwe umbɨasa kawi reta. Jare uyembatɨ reta yawe, Pablo jare Bernabé umɨmbeu chupe reta opaete Tumpa uyapo jae reta rupi wae, kërái jeta judío mbae wae reta uyerowa ma Tumpa kotɨ.

5Erëi amokue fariseo Cristo re wɨrowia wae reta uyemboɨ jare jei chupe reta: “Jokua judío mbae wae reta imeta ko uyembɨcircuncidaka reta, jare yaeta ko chupe reta uyapo waerä Moisés arakae uikuatía wae rupi,” jei reta. 6Jáeramo Jesús jemimboe tenondewaete reta jare Cristo re wɨrowia wae reta itenondewa reta wi uyembatɨ tee reta uyemɨngeta waerä jokua re.

7Jare jeta ma uyemɨngeta reta yawe jokua re, Pedro uyemboɨ jare omoë iñee jei rewe: “Hermano reta, pe reta pikuaa peï kërái tenondete Tumpa cheparawo amɨmbeu waerä judío mbae wae reta pe ñee ikawi wae, jae reta wi wɨrowia jese waerä,” jei. 8“Tumpa uikuaa opaete wae ipɨa pe oï wae. Jare jae uechaka uyerowia ko umae jese reta wae, echa’ä umee wi chupe reta Espíritu Santo yandewe umee wae rami,” jei. 9“Añetete Tumpa oyowake rupi umae jese reta jare yanderé wi. Echa’ä jae reta wɨrowia yawe jese, Tumpa opa ma oyoe ipɨa,” jei.

10“Jayawe, ¿maera pa pemboporowa peï Tumpa ipɨawasu? Pe pikuaa kawi ma Moisés arakae uikuatía wae ko jae pëti tewɨta poɨete wae rami. Jare jokua tewɨta yande parawete reta yandepuere’ä yawoɨ. Yanderamɨkue reta wi ipuere’ä owoɨ. Jayawe, ¿maera pa añawe pipota piñono jokua tewɨta yandehermano judío mbae wae reta re?” jei. 11“Mase, yande yarowia Tumpa yanderepɨ ma ko yandeYa Jesús ipɨakawi rupiño, mbaetɨ ko Moisés arakae uikuatía wae rupi. Jae nunga wi judío mbae wae reta uyerepɨka wi Jesús ipɨakawi rupiño,” jei Pedro chupe reta.

12Joko wi Bernabé jare Pablo umɨmbeu chupe reta kërái jae reta rupi Tumpa uyapo jeta mbaembae kiawe ipuere’ä uyapo wae judío mbae wae reta ipɨte rupi. Jare opaete uyembatɨ yureko wae reta kïiño uyapɨsaka jese reta.

13Jare Bernabé jare Pablo opa ma uyemɨngeta yawe, Jacobo omoë iñee jei rewe: “Hermano reta, piyapɨsaka mii cheré,” jei. 14“Simón Pedro umɨmbeu ma yandewe kërái Tumpa jaeramo etei uparawɨkɨ judío mbae wae reta ipɨte rupi oñono tee waerä amokue wae reta jae imaerä,” jei. 15“Kua re jei wi Tumpa iñee arakae umɨmbeu wae reta. Echa’ä uyekuatía oï kuärái:

16‘Tumpa jei: ‘Kua jaɨkue rupi che ayu yeta amupüa waerä David iñemoñaa ipɨte wi pëti wae Israel pewa reta imburuwicha wasurä.

Echa’ä David imbaepuere ko pëti tëta opa usururu wae rami.

Erëi che amupüa yeta usururukue, jare ambɨpɨau yeta.

17Jukuärái rupi ayapota jeta ambɨe ye ye ɨwɨ pewa reta chereka waerä.

Jare judío mbae wae reta che aiparawo ma chemaerä wae reta cherekata wi.’ Jukuärái jei Tumpa.

18Jae ko arakae wiwe uikuaaka kua mbaembae.’#Amós 9.11-12

Jukuärái uyekuatía oï,” jei Jacobo chupe reta.

19“Jáeramo che tae awɨye yambɨawái jokua judío mbae wae reta Tumpa kotɨ uyerowa wae. 20Erëi ikawi ko yaikuatía waerä chupe reta tupapire kuärái: ‘Awɨye tuyemɨngɨa reta Tumpa kotɨ tumparaanga reta rupi. Jare awɨye tou reta wi mbaemɨmba uyeyuwɨkue isoo, jare awɨye tou reta wi tuwɨ. Jare awɨye tuyapo reta awasa.’ Jukuärái yaikuatiata chupe reta,” jei.

21“Jae reta awɨyeta ko uyapo kua mbaembae awɨye waerä umbɨarasɨ judío reta jae reta ipɨte pe ñonoï wae. Echa’ä arakae wiwe opaete tëta wasu reta rupi Moisés arakae uikuatía wae uyemɨmbeu ma. Jare judío reta imeño jokua umɨngeta reta opa mbutuu ara rupi tupao reta rupi. Jare jeta wae reta uikuaa Moisés uikuatía wae pe jei awɨye yayapo waerä jokua mbaembae,” jei Jacobo chupe reta.

Tupapire uyekuatía hermano judío mbae wae reta pe wae

22Jokua Jacobo jei wae ikawi iko Jesús jemimboe tenondewaete reta pe, jare opaete Cristo re wɨrowia wae reta pe, jare itenondewa reta pe wi. Jáeramo upɨta reta omondo waerä tëta wasu Antioquía kotɨ amokue kuimbae reta Pablo jare Bernabé ndiwe wɨraa waerä tupapire. Jayawe uiparawo reta mokui hermano itenondewa reta Judas jare Silas jee wae reta. Jokua Judas jae nunga wi jee Barsabás. 23Jayawe omondo reta jae reta ndiwe pëti tupapire jei kuärái:

Pe judío mbae wae Cristo re wɨrowia wae reta tëta wasu Antioquía, ɨwɨ Siria jare Cilicia pewa reta pe, ore nduraaka noï pewe saludo. Ore ko jae Jesús jemimboe tenondewaete reta, jare Cristo re wɨrowia wae itenondewa reta – pehermano tëta wasu Jerusalén pewa reta.

24Jeräkua ma orewe kërái amokue orepɨte wi yuraa pepɨ. Jare jae reta oporomboe wae rupi pembopa jare pembɨpɨawiwe’ä. Jukuärái jae reta uyapo, yepe tëi ore nomondo’ä reta pepɨ.

25Ore jeta ma nduyemɨngeta jokua re jare ndupɨta nomondo waerä pepɨ amokue kuimbae orepɨte wi. Jae reta yuraa ñonoï yandehermano mii reta Pablo jare Bernabé ndiwe. 26Jeta wese jae reta ukɨye mbae rewe umɨjëwa reta jekowe jowaicho reta pe uyeyokui kawi waerä yandeYa Jesucristo pe. 27Jokua kuimbae reta nomondo noï Pablo jare Bernabé ndiwe ko jae Judas jare Silas jee wae reta. Jae reta umɨmbeuta wi pewe perowake etei kua tupapire jei wae.

28Ore ndarau pumbɨawái Moisés arakae uikuatía wae pɨpe, echa’ä tewɨta poɨ wae rami ko pewe. Kua ikawi oï Espíritu Santo pe jare orewe wi. Jáeramo kua mbowɨño numɨmbeuta pewe:

29Awɨye peu soo tumparaanga pe uñemee wae.

Awɨye peu wi mbaemɨmba uyeyuwɨkue isoo.

Awɨye peu tuwɨ.

Jare awɨye piyapo awasa.

Kua ore ndoe pewe wae piyapo yawe, ikawita pewe. Tumpa tumae kawi peré.

Jukuärái uyekuatía oï tupapire pe.

30Jayawe Pablo, Bernabé, Judas, jare Silas oë yuraa reta Jerusalén wi jare yuraa uwäe reta Antioquía pe. Joko pe umbatɨka reta Cristo re wɨrowia wae reta jare umee chupe reta jokua tupapire. 31Jare opa ma umɨngeta reta yawe, opa rewe uyerowiaete jokua ñee umbɨpɨakatu wae re. 32Joko wi Judas jare Silas jeta umɨmbeu chupe reta umɨkɨrëɨ reta waerä jare umɨmɨräta kawi reta waerä Tumpa re. Echa’ä jae reta ko ñee Tumpa wi etei ou wae umɨmbeu wae reta.

33Mbowɨ ara rupi Judas jare Silas upɨta reta yawe joko pe, Cristo re wɨrowia wae reta ipɨakatu rewe omondo ye reta. Jayawe Judas uñatima ye Jerusalén kotɨ. 34Erëi Silas uipota upɨta joko pe.

35Pablo jare Bernabé upɨta wi Antioquía pe oporomboe waerä yandeYa iñee re jare umɨmbeu waerä ñee ikawi wae jeta ïru wae reta ndiwe.

Pablo jare Bernabé uyembɨsɨrɨ iyuwi reta

36Joko wi mbowɨ ara rupi Pablo jei Bernabé pe: “Ikawi ko ñañatima ye ya yapou waerä Cristo re wɨrowia wae reta ipɨ kiape kiape yandeYa iñee re yaporomboe wae rupi. Ya yaikuaa waerä kërái ra jae reta ñonoï wae,” jei chupe. Jare kua ikawi Bernabé pe.

37Jare Bernabé uipota tëi Juan Marcos oo ye waerä jae reta ndiwe. 38Erëi jokua ikawi’ä Pablo pe. Echa’ä tenonde yawe, jae reta mbapɨ rewe uparawɨkɨ yureko Tumpa pewarä ɨwɨ Panfilia pe. Erëi Juan Marcos ueya reta jare oo ye chuwi reta jëta kotɨ.

39Jayawe Pablo jare Bernabé uyeaka reta täta rupi jokua re. Jáeramo uyembɨsɨrɨ reta iyuwi. Joko wi Bernabé wɨraa Juan Marcos jae ndiwe, jare jae reta uyupi chalana wasu pe jare uasa reta ɨwɨ Chipre kotɨ.

40Jare Pablo uiparawo Silas iwataïrurä. Jare ndei yuraa reta mbowe, hermano reta uyerure Tumpa pe jese reta jare oñono reta Tumpa ipɨakawi wae ipo pe. 41Jayawe Pablo jare Silas uasa reta ɨwɨ Siria jare Cilicia rupi, jare jekuaeño umɨmɨräta Tumpa re hermano reta ime yureko jokoropi wae.

Currently Selected:

Hechos 15: gnwPB

Highlight

Copy