Hechos 11

Pedro umɨmbeu kërái judío mbae wae reta wɨrowia ma Jesús re wae

1Ɨmambae rupi jeräkua Jesús jemimboe tenondewaete reta pe jare ïru hermano reta ɨwɨ Judea rupi yureko wae reta pe wi kërái judío mbae wae reta wi uyapɨsaka ma Tumpa iñee re jare wɨrowia ma reta Jesucristo re.

2Jayawe Pedro uñatima ye yawe Jerusalén pe, amokue hermano judío reta umbɨeta chupe. 3Jare jei reta chupe: “¡Ndiyawɨ ma yandereko jei wae, echa’ä ndike judío mbae wae reta jëta pe jare ndekaru jae reta ndiwe!” jei reta chupe.

4Jayawe Pedro umbɨpɨ uikuaaka kawi chupe reta iyɨpɨ wiwe opaete uyeyapo tëta wasu Jope pe wae rewa. 5Jae jei chupe reta: “Pëti ara tëta wasu Jope pe aiko rambuewe, ayerure aiko Tumpa pe. Jare aramoiño Tumpa chembɨpau wae echa,” jei. “Jukuärái aecha ara uyepea oï jare uweyɨ ou ɨwɨ kotɨ pëti tarapo tuicha wae. Kua uyembɨweyɨ wae uyepɨsɨ iko irundɨ itiäkua reta pe,” jei chupe reta.

6“Jare amae ngatu jese yawe, aecha tarapo japɨpe yureko opa yea mbaemɨmba reta. Ime iko mbaemɨmba ñana rupiwa reta, jare ɨwɨ rupi uyewichɨ wae reta, jare ipotawe wɨra reta wi,” jei. 7“Jare che ayandu pëti ñee jei chewe: ‘Pedro, epüa ekua iyuka jeu,’ jei chewe.

8Erëi che jae chupe: ‘Ndarau, cheYa. Moisés arakae uikuatía wae uikuaaka orewe jokua nunga mbaemɨmba reta isoo ndou yawe, oremɨngɨata ko ndekotɨ. Che jau’ä etei ko kua nunga soo aa wiwe,’ jae chupe.

9“Jayawe ñee jei chewe: ‘Tenonde yawe che jae ikɨa wae ko jokua mbaemɨmba reta. Erëi añawe jae aï ikɨa mbae wae reta ko. Jokua che jae ikɨa mbae wae ko, awɨye ere ikɨa wae ko,’ jei chewe.

10“Jare kua mokui wese ye aecha jare ayandu. Joko wi tarapo aramoiño uyereraa ye ara kotɨ jare aecha’ä ma ye,” jei Pedro chupe reta.

11“Jupiwoiño yuweru uwäe jokua tëta che aiko wae pe mbapɨ kuimbae tëta wasu Cesarea wi ombou cherekaka wae,” jei. 12“Jare Espíritu Santo chepɨa pe jei chewe a waerä jae reta ndiwe, jare awɨye waerä ayembɨpɨa’ä jese jae reta ko judío mbae wae reta. Jayawe che aë a jae reta ndiwe. Jare yuraa wi che ndiwe kua owa hermano reta. Jare opa rewe ore noë ndoo tëta wasu Cesarea kotɨ kuimbae Cornelio jee wae jëta pe. Jare ndoo nuwäe yawe, nduike jëta japɨpe,” jei chupe reta.

13“Joko pe Cornelio umɨmbeu orewe kërái araɨwa uyekuaa chupe jëta pe wae jare jei chupe: ‘Emondo amokue kuimbae reta tëta wasu Jope pe ueru waerä pëti kuimbae Simón jee wae. Jae jee ko wi Pedro,’ jei chupe. 14‘Jae umɨmbeuta ndewe ñee ikawi wae. Jare nde jare nerëtara reta perowia jese yawe, Tumpa perepɨta mbaembae piyawɨ Tumpa kotɨ wae wi.’ Jukuärái araɨwa jei chupe,” jei.

15“Jayawe che ambɨpɨ amboe reta yawe, aramoiño Espíritu Santo ou umɨmbaepuere reta kërái ou yandewe yanemɨmbaepuere Pentecostés ara pe rami,” jei chupe reta.

16“Jare aramoiño chemandúa jokua yandeYa jei orewe wae re, echa’ä jei orewe: ‘Espíritu Santo outa pepɨa pe iko waerä. Jare kërái Juan karamboe rupi pembɨsakambu ɨ pe rami, jukuärái wi Espíritu Santo peñonota pe reta peï waerä pëti ramiño che ndiwe,’ jei yandeYa orewe,” jei.

17“Jayawe aikuaa aiko Tumpa umee wi Espíritu Santo jokua judío mbae wae reta pe kërái umee yandewe wae rami yarowia yandeYa Jesucristo re yawe. Jáeramo, ¿kía ra ko che ambɨawái waerä Tumpa uipota uyapo wae?” jei Pedro chupe reta.

18Jayawe Pedro jei wae uyandu reta yawe, jokua Pedro pe umbɨeta wae reta kïi ngatu upɨta reta. Jare umbɨpɨ umbutuicha reta Tumpa jee jei rewe: “Mase, añawe Tumpa umee ma yepe oï judío mbae wae reta pe wi ipuere waerä ueya ipɨayemɨngeta jupi mbae wae Tumpa rewa. Jukuärái jae reta wi ipuere onoi tekowe opa mbae wae,” jei reta.

Cristo re wɨrowia wae reta tëta wasu Antioquía pewa rewa

19Jokua ara uyuka reta Esteban wiwe, jeta Jerusalén pewa reta umbɨpɨ iarasɨ rewe uiporaraka Cristo re wɨrowia wae reta pe. Jáeramo jeta hermano reta opa uñemɨái ambɨe ɨwɨ reta rupi. Amokue reta yuraa uwäe ɨwɨ reta Fenicia jare Chipre jee wae rupi. Jare ïru wae reta yuraa uwäe tëta wasu Antioquía pe, ɨwɨ Siria jee wae pe. Opaete jae reta jekuaeño umɨmbeu ñee ikawi wae, erëi judío reta peño.

20Erëitu amokue jokua hermano reta yuraa uwäe tëta wasu Antioquía pe. Jae reta ɨwɨ Chipre pewa ko jare tëta wasu Cirene jee wae pewa ko. Jae reta umbɨpɨ umɨmbeu ñee ikawi wae yandeYa Jesús rewa judío mbae wae reta pe wi. 21Jare yandeYa omborɨ reta umɨmbeu kawi waerä jae iñee chupe reta. Jayawe jeta judío mbae wae reta wi wɨrowia jese jare uyerowa reta yandeYa kotɨ.

22Kua jeräkua hermano reta Jerusalén pe ñonoï wae pe. Jáeramo omondo reta Bernabé tëta wasu Antioquía pe. 23Jare jae oo uwäe yawe, uecha kërái jokua judío mbae wae reta añetete wɨrowia ñonoï yandeYa re jare uyekou ñonoï ipɨakawi re. Jayawe Bernabé tuicha rupi uyerowia jokua re. Jare jae jekuaeño umɨkɨrëɨ reta awɨye waerä uyerowa reta ye yandeYa wi. Jare umɨkɨrëɨ reta wi jekuaeño uyapo reta waerä ipɨa rewe yandeYa jei wae rupi.

24Bernabé ko jae kuimbae jupi wae, jare wɨrowia kawi Tumpa re wae, jare uyekuaa jese Espíritu Santo jei wae rupi iko wae. Jayawe jae omborɨ jeta jokua tëta wasu pewa reta wɨrowia waerä yandeYa re.

25Joko wi Bernabé oë oo tëta wasu Tarso kotɨ ueka waerä Saulo. Jare uwäe chupe yawe, ueru tëta wasu Antioquía pe. 26Jare joko pe pëti año rupi Bernabé jare Saulo jekuaeño uyembatɨ reta Cristo re wɨrowia wae reta ndiwe. Jare jae reta omboe jeta wae reta yandeYa rewa. Jare tëta wasu Antioquía pe jaeramo etei ïru wae reta umbɨpɨ jei Cristo re wɨrowia wae reta pe cristiano#11.26 Kua tee uipota jei “Cristo ndiwe uñemɨïru wae.” reta.

27Jokua ara reta rupi amokue kuimbae reta yuweru Jerusalén wi Antioquía pe. Jae reta ko jae ñee Tumpa wi etei ou wae umɨmbeu wae reta. 28Pëti wae ko jee Agabo. Jare pëti yembatɨ pe, aramoiño Agabo uyemboɨ jare Espíritu Santo imbaepuere rupi uyemɨngeta jei rewe: “Outa oï karuái tuicha wae opaete ɨwɨ rupi.” Jukuärái jei. Kua karuái uyeyapo Claudio mburuwicha wasurä iko yawe.

29Jayawe jokua uyandu reta yawe, Cristo re wɨrowia wae reta Antioquía pewa uyembɨpɨa’ä hermano reta ɨwɨ Judea pewa reta re. Jáeramo umbɨpɨ umbatɨ reta korepoti omborɨ reta waerä. Pëti pëti wae umee kërái ipuere wae rupi wɨraaka waerä chupe reta. 30Jare opa ma umbatɨ reta korepoti yawe, uiparawo reta Bernabé jare Saulo wɨraa waerä ɨwɨ Judea pe Cristo re wɨrowia wae reta itenondewa reta pe.

Currently Selected:

Hechos 11: gnwPB

Highlight

Copy