Matiu 7

Kebaawu abar kulubi be asheŋ

(Luuk 6:37-38, 41-42)

1“Men sa maa wu abar be alubi nɛ Ebɔrɛ e sa maŋ ji menyi alɛ gba sheria. 2Ŋkpal manɛ so, ekpa kama so nɛ menyee bɔla a wu abar be alubi na gbagba so nɛ Ebɔrɛ gba beeŋ bɔla n wu menyi be alubi nseŋ ber asɔ kanaŋkamaso nɛ menyee ber amo a sa men braana na gbagba chap n sa menyi. 3Manɛ e ba nɛ fee wu kaduubi nɛ k wɔ fo niopibi be kenishi to nsaa kplaŋ kedishaŋ nɛ k wɔ fo gbagba be kenishi to so 4Nuso nɛ feeŋ wora n nya kagbene ŋ kaŋɛ fo niopibi: ‘Shin nɛ n lara kaduubi fo kenishi to n sa fo’, nɛ kedishaŋ wɔ fo gbagba be kenishi to? 5Kebirkɔnshiwura ere, a daga fanɛ fo lara kedishaŋ nɛ k wɔ fo gbagba be kenishi to na pɔɛŋ nseŋ tiŋ n wu nɛnɛ n lara kaduubi ashi fo barkasa be kenishi to. 6Men sa maa ta kusɔ cheembi a sa njɔnɔ. Menyi alɛ e sa maŋ naa ta menyi be eyawu kpakpaso be ashembi a lɛ a sa epreku, ŋkpal manɛ so, epreku na beeŋ chichi amo so nɛ njɔnɔ na malɛ e kilgi n diewu n wora menyi.”

Kakule nɛ kefin nɛ keŋmɛa be asheŋ

(Luuk 11:9-13)

7Men kule nseŋ nya, men fin nseŋ wu, men ŋmɛa kabuna nɛ b bugi n sa menyi. 8Ŋkpal manɛ so, ekama nɛ e kule beeŋ nya, ekama nɛ e fin beeŋ wu nɛ ekama malɛ nɛ e ŋmɛa kabuna, baaŋ bugi n sa mo. 9Menyi nɛ men la betuto ere be emo pibi e naaŋ kule mo bodobodo nɛ e ta kejembu n sa mo? 10Ŋko nɛ e kule fo kɔrɔtɔ, feeŋ shuli n ta kuwɔ n sa mo a? 11To, nɛ menyi ere ka la basa lubi le nsaa nyi asɔ lela be kebaata a sa men be mbia, nɛ men Tuto Ebɔrɛ nɛ e wɔ ebɔrɛso na ai? Mo ere maaŋ shuli n sa bekama nɛ b kule mo asɔ lela a? 12Amoso, kusɔ kama nɛ menyee sha fanɛ basa e baa wora a sa menyi, menyi alɛ gba e baa wora loŋ a sa bumo. Kusɔ nɛ anebi Mosis be mbra na nɛ anebiana nɛ b ka na be keŋini na bee ŋini nna na.

Kabunabi be asheŋ

(Luuk 13:24)

13Men bɔla kabunabi na to n luri. Ŋkpal manɛ so, ekpa nɛ k bee yɔ kemur be kakpa na kpalga to nna nɛ kumo be kabuna gba kpalga to. Nɛ basa nɛ baa bɔla kumo so a luri na malɛ shi. 14Ama ekpa nɛ k bee yɔ ŋkpa to na maŋ kpalga to nɛ kumo be kabuna malɛ maŋ shi. Basa nɛ baa nya kumo a nite to na malɛ maŋ shi.

Kedibi nɛ kumo be asɔrso be asheŋ

(Luuk 6:43-44)

15Men baa de anebi fɛpoana so. Baa kaa wɔ mbolpɔ be nwɔl to nna a ba men kutɔ, ama ekuntuŋ lubi gbagba nna na. 16Bumo be asheŋ woraso to nɛ menyeeŋ pin bumo. Ewidibi so nɛ baa chuge apɔl a? Ŋko baa chuge elemu ashi gbaŋgbanturbidibi so nna a? 17Kedibi lempo kama bee sɔr asɔrso lela nna nɛ kedibi pɔso kama malɛ bee sɔr asɔrso lubi. 18Kedibi lempo maaŋ tiŋ n sɔr asɔrso lubi, kedibi pɔso malɛ gba maaŋ tiŋ n sɔr asɔrso lela. 19Kedibi kama nɛ k maa sɔr asɔrso lela, baa ku kumo nna n lɛ n ta n wɔtɔ edɛ to. 20Ade kikɛ e naa ŋini fanɛ anebi fɛpoana na be asheŋ woraso to nɛ menyeeŋ pin bumo.

Kusɔ nɛ Yesu beeŋ kaŋɛ basa ko kachako be asheŋ

(Luuk 13:25-27)

21Mannɛ basa nɛ baa tre ma Enyɛnpe, Enyɛnpe na kikɛ e naaŋ luri ebɔrɛso be kuwura na to she bumo nɛ baa wora n Tuto nɛ e wɔ ebɔrɛso na be aparsheŋ na. 22Kachɛ na kaŋ fo, basa damta beeŋ kaŋɛ ma le: ‘Enyɛnpe, Enyɛnpe, an daŋ bɔla fo ketre so nna n wu abɔrɛsheŋ ŋ kaŋɛ. An bɔla fo ketre so n ju mbuibi lubi basa to nseŋ wora emamachisheŋ damta!’ 23Ama le nɛ meeŋ kaŋɛ bumo: ‘Alubiworapoana ere, men shile ma so. Ma ere maŋ nyi menyi.’

Nwupɔrpo anyɔ be asheŋ

(Luuk 6:47-49)

24Amoso, ekama nɛ e nu ma mmalga ere nsaa bɛ amo so du fanɛ enyiashempo nɛ e pɔr mbe ebu n yili kefalta so nna. 25E ka pɔr n loge nɛ afugboŋ ber ebu na so eleŋso ga nɛ bɔrɛ ba ga n to chuful kaplɛkama, ama k maŋ tɔr, ŋkpal e ka pɔr kumo kefalta so na so. 26Ama ekama nɛ e nu ma mmalga ere nsaa maa bɛ amo so beeŋ baa du fanɛ ewulpo nɛ e pɔr mbe ebu shishɛrpumpuŋ so nna. 27E ka pɔr n loge nɛ afugboŋ ber ebu na so eleŋso ga nɛ bɔrɛ ba ga n to chuful kaplɛkama, nɛ k tɔr. Kumo be ketɔr na daŋ lubi ga.

Yesu be eleŋ be asheŋ

28Yesu ka malga asheŋ ere kikɛ n loge nɛ mbe keŋini na daa chinchiŋ jimaŋ na ga. 29E daa maŋ du fanɛ bumo be mbraŋinipoana na, ŋkpal manɛ so, mo ere be keŋini na daa kɔ eleŋ nna kumo to.

Currently Selected:

Matiu 7: GJNb

Highlight

Copy