Luuk 8
8
Beche nɛ b daŋ tu Yesu n yɔ na be asheŋ
1K daa maŋ naŋ chɛr ko nɛ Yesu koso a na ndegboŋana nɛ ndewurbiana to n ya kaa bɔ Ebɔrɛ be kuwura na to be baru lela na a sa ndoŋebiana. 2Mo nɛ mbe bebɛsopo kuduanyɔ na nɛ beche ko e ka daŋ ju mbuibi lubiana nɛ alɔ be nnaŋ to bumo to na e daŋ yɔ. Beche na be eko e daa la Mɛɛri, emo nɛ baa tre Magdalin na. Mbuibi lubi ashunu nɛ Yesu daŋ ju ashi mo to. 3Beche na be eko e daa la Joana, Kuza nɛ e daa keni Hɛrɔd be kowu so be eche na nɛ Suzana, n ta beche damta ko nɛ b daa ta bumo gbagba be asɔ a chɛ Yesu nɛ mbe bebɛsopo to na.
Eduupo be keŋasa na be asheŋ
(Matiu 13:1-9; Maak 4:1-9)
4Basa damta daŋ baa shi nde damta to nna a ba Yesu kutɔ hale nɛ jimaŋ damta ko ya shɛr ndoŋ nɛ Yesu bɔ keŋasa ere n sa bumo: 5“Kanyɛn ko e daa wɔtɔ n lar n yɔ mbe kudɔsawule so nɛ e ya duu mbe asɔ duuso. E ka ya kaa ŋmenyaŋ asɔ duuso na nɛ amo be ako tɔr ekpa to nɛ b chicha amo so nɛ mbuibi ba tise amo n ji. 6Nɛ ako malɛ tɔr kejasawule so. Asɔ na ka kɔr nɛ a bolo to n wɔl, ŋkpal manɛ so, kakpa na daa maŋ kɔ koyul. 7Asɔ duuso na be ako malɛ tɔr ewi to nɛ amo nɛ ewi na daŋ nɛ ewi na pɛ amo. 8Asɔ duuso na be ako malɛ tɔr eshishɛr lela to ŋ kɔr n daŋ n wora, kekama wora bibi kalfa kalfa.” Keŋasa ere be kaman nɛ Yesu kaŋɛ: “To, fo nɛ fo kɔ asoe, fo nu!”
Kusɔ nɛ k ba nɛ Yesu daa bɔ aŋasa na be asheŋ
9Nɛ Yesu be bebɛsopo na bishi mo keŋasa na be kifito. 10Nɛ e kaŋɛ: “Ebɔrɛ bugi mbe kuwura na to be kesheŋ ŋini be ewulo nna n sa menyi, ama aŋasa to nɛ basa pɔtɛ bre beeŋ nu Ebɔrɛ be kuwura na to be asheŋ. Loŋ nɛ baaŋ keni, ama b maaŋ wu shɛŋ, baaŋ nu, ama b maaŋ pin to.”
Yesu ka ŋini eduupo be keŋasa na be kifito be asheŋ
(Matiu 13:18-23; Maak 4:13-20)
11Ade be kaman nɛ Yesu naŋ kaŋɛ: “Kusɔ nɛ keŋasa na bee ŋini nde: Asɔ duuso na e la Ebɔrɛ be kamalga na. 12Amo nɛ a tɔr ekpa to na du fanɛ basa nɛ baa nu Ebɔrɛ be kamalga nɛ Setani e ba epul na to m ba lara kamalga na ashi bumo be ŋgbene to nɛ b sa maŋ kaŋ yirda n nya kumɔlga na nna. 13Asɔ duuso nɛ a tɔr kejasawule so na du fanɛ basa nɛ baa nu kamalga na nsaa sɔ kumo nɛ kagbenefuli na nna. Ama k maa luri bumo to nɛnɛ, amoso, b maa yirda a yɔ kufɔ. Kechɔŋkeni be jemanɛ baŋ ya fo nɛ b bɛ so ŋ gben. 14Asɔ duuso nɛ a tɔr ewi to na malɛ du fanɛ basa nɛ baa nu kamalga na nseŋ fara a bɛ so nna. Ama durnya ere to be kafɔŋ nɛ kumo be amansherbisheŋ nɛ kebaawɔtɔ be asɔ belbelso baŋ luri m bɔlɔ bumo to nɛ b bɛ so ŋ gben. 15Asɔ duuso nɛ a tɔr eshishɛr lela to na du fanɛ basa nɛ baa nu kamalga na nsaa bugi kagbene to a sɔ kumo a bɛ kumo so nɛnɛ a kɔ kumo to kpakpa kanyitiso hale n ya bar tɔnɔ fanɛ kananɛ asɔ duuso bee wora bibi na nna.”
Fitila nɛ katishaŋ buuso na be asheŋ
(Maak 4:21-25)
16Nɛ Yesu kaŋɛ: “B maa chɔɔ fitila so nsaa ta katishaŋ a buu kumo so ŋko a ta kumo a yili gedo be kaseto. Fitila be eyilikpa nɛ baa ta kumo a yili nɛ basa nɛ baa luri ebu na to na e nya kefulto. 17Kusɔ nɛ k ŋana kikɛ beeŋ ba dii efuli nɛ kusɔ nɛ k buu so malɛ kikɛ be wulo e ba bugi so n lar efuli. 18Amoso, men baa da so kananɛ menyeeŋ nu asheŋ so, ŋkpal manɛ so, ekama nɛ e kɔ beeŋ nya n ti so, ama ekama nɛ e maŋ kɔ shɛŋ na gba, baaŋ sɔ gbrɛ nɛ e bee tama fanɛ e kɔ na gba mo kutɔ.”
Yesu mo nio nɛ mo siponyɛnsoana be asheŋ
(Matiu 12:46-50; Maak 3:31-35)
19Kachako Yesu mo nio nɛ mo siponyɛnsoana ka bee ba mo kutɔ, b maŋ tiŋ n fo mo ŋkpal jimaŋ na so. 20Nɛ esa ko kaŋɛ mo: “Fo nio nɛ fo siponyɛnsoana yil kowushina a sha kewu fo.” 21Nɛ e kaŋɛ basa na: “N nio nɛ n sipoana e la bumo nɛ baa nu Ebɔrɛ be kamalga na nsaa wora kusɔ nɛ k bee ŋini na.”
Yesu ka yɔɔ afugboŋ ko be asheŋ
(Matiu 8:23-27; Maak 4:35-41)
22Kachako Yesu nɛ mbe bebɛsopo luri ekuloŋ to nɛ e kaŋɛ bumo: “Men shin nɛ an dii kepagboŋ ere be kaba ndoŋ.” Ndoŋ nna nɛ b fara a yɔ. 23B ka wɔ ekuloŋ na to a yɔ nɛ Yesu fara a di. Ndoŋ nna nɛ afugboŋ ko ber kepa na so nɛ nchu na fara a da a luri a bɔlɔ ekuloŋ na nɛ kenishipere tu bumo kikɛ. 24Ndoŋ nna nɛ b ya tiŋi Yesu ŋ kaŋɛ mo: “Enyɛnpe, Enyɛnpe, anyee shin nɛ an mur nna na!” Nɛ Yesu koso m ponte afu nɛ nchu nɛ atiliana nɛ a koso na so nɛ amo kikɛ yɔɔ nɛ kakpa na wora shruum. 25Kumo be kaman nɛ e bishi mbe bebɛsopo na: “Nnɛ nɛ men be yirda na wɔ?” Ama k daŋ chinchiŋ bumo ga nɛ kufu pɛ bumo nɛ b fara a bishi abar: “Nuso malɛ be nyiŋgbasa nde, hale nɛ e bee shin nɛ afu nɛ nchuana bee nu mbe kɔnɔ?”
Yesu ka chɛ mbuibilubiwura ko be asheŋ
(Matiu 8:28-34; Maak 5:1-20)
26Kumo be kaman nɛ b ta ekuloŋ na n far n ya luri Gɛrasaebi be efuli so, efuli na wɔ Galili be kepagboŋ na be kaba ndoŋ nna. 27Yesu ka baŋ lar ekuloŋ na to a dii kedeŋi so nɛ kade na to be kanyɛn ko nɛ mbuibi lubi daŋ tɔr mo so na ba tu mo. Amo be kanyɛn daŋ delge so nna a na, e daa maa chena laŋ to kikɛ. Abeelaŋ nɛ baa puli bubuni na akpa nɛ e daa wɔ saŋkama. 28E ka wu Yesu nɛ e boŋ to eleŋso nseŋ ba gbir mbe anishito nseŋ malga awɔrso m bishi: “Yesu, Ebɔrɛ Enyɛnpetale Pibinyɛn, manɛ nɛ fee fin ma to? Mee kule fo nna, sa maŋ tɔrɔ ma.” 29E daŋ kaŋɛ le nna ŋkpal Yesu ka daŋ kaŋɛ fanɛ kiyoyu lubi na e lar mo to so. Saŋɛ damta kiyoyu lubi na daa tiŋ a dii mo ga nɛ basa daa ta ŋgbɛlɛbi a kre mbe aya nɛ enɔana a nase nsaa de mo so, ama e daa tuge amo to nna nɛ kiyoyu lubi na daa yeŋ mo to a yɔ kiyi to. 30Nɛ Yesu bishi mo: “Fo ketre?” Nɛ e kaŋɛ: “Ma ketre e la jimaŋ.” Ŋkpal manɛ so, ayoyu lubi damta e daŋ luri mo to. 31Nɛ ayoyu lubi na kule Yesu fanɛ e sa maŋ shin nɛ b yɔ kemaŋ nɛ k maŋ kɔ ekar na to. 32Jemanɛ na so nɛ epreku damta ko daŋ taga to ndoŋ a ji kebeebi ko ase. Nɛ ayoyu lubi na kule Yesu fanɛ e shin nɛ b ya luri epreku na to, nɛ e sa bumo ekpa. 33Nɛ b lar kanyɛn na to n ya luri epreku na to nɛ epreku na kikɛ shile m bɔla kebeebi na be kaseto n ya luri kepagboŋ na to m mur. 34Eprekukpapoana na ka wu kusɔ nɛ k wora na nɛ b shile n ya bɔ kumo be kubɔya n sa kade na to ebi nɛ bumo nɛ b wɔ ndɔana kikɛ to. 35Nɛ basa lar n ya keni kusɔ nɛ k wora na. B ka ba Yesu kutɔ m ba wu kanyɛn nɛ ayoyu lubi na lar mo to na ka kɔ mbe nfɛra lela m buu asɔ a tase Yesu be anishito nɛ kufu pɛ bumo ga. 36Bumo nɛ b daa wɔtɔ n wu kusɔ nɛ k wora na kaŋɛ basa na kananɛ Yesu chɛ kanyɛn na. 37Ndoŋ nna nɛ Gɛrasa be efuli na so ebi kikɛ ba kule Yesu fanɛ e lar bumo to ŋkpal kananɛ kufu daŋ pɛ bumo ga na so. Nɛ Yesu luri ekuloŋ na to a shin nɛ e yɔ 38nɛ kanyɛn nɛ mbuibi lubi lar mo to na ba kule Yesu ŋ kaŋɛ: “Shin nɛ n tu fo a yɔ.” Ama Yesu daa maŋ shuli nseŋ kaŋɛ mo: 39“Bɛta n yɔ epe n ya kaŋɛ basa kusɔgboŋ nɛ Ebɔrɛ wora n sa fo.” Nɛ kanyɛn na yɔ kade na kikɛ to n ya kaa kaŋɛ kusɔgboŋ nɛ Yesu wora n sa mo na be asheŋ.
Jairus pibiche nɛ kache nɛ e beta Yesu na be asheŋ
(Matiu 9:18-26; Maak 5:21-43)
40Yesu ka naŋ bɛta n yɔ kepa na be kaba ndoŋ nɛ jimaŋ na kikɛ daa jo nɛ e ba nɛ b wora mo ansaŋ nɛ keba. 41Ndoŋ nna nɛ kade na to be nshɛrbu to be enimu ko nɛ baa tre Jairus na ba gbir Yesu be anishito ŋ kule mo ga fanɛ e yɔ mo pe 42ŋkpal mo pibichesobi koŋwule ka daa shin nɛ e wu so. Kebia na daa la nfɛ kuduanyɔ nna. Yesu ka daa yɔ kanyɛn na pe nɛ basa damta buu mo so. 43Kache ko malɛ daa wɔ bumo to a shil ŋklaŋ nfɛ kuduanyɔ n tɔrɔ mbe kumu adurwuraana damtaana be enɔ to n jija mbe amansherbi kikɛ a fin kechɛ mbe kumu, ama bumo be ekama daa maŋ tiŋ n chɛ mo. 44Ndoŋ nna nɛ e choŋ Yesu be kaman m beta mbe kusɔbuuso be kɔnɔ so nɛ ŋklaŋ na ku epul na to. 45Nɛ Yesu bishi: “Esa mo e beta ma?” Nɛ ekama kaŋɛ fanɛ e maŋ beta mo nɛ Pita kaŋɛ: “Enyɛnpe, fo alɛ gba wu kananɛ basa buu fo so a ŋin abar gbergber le.” 46Nɛ Yesu kaŋɛ: “Esa ko beta ma, ŋkpal manɛ so, m pin eleŋ ka lar ma to kumo be jemanɛ na.” 47Kache na ka wu fanɛ e maaŋ naŋ tiŋ ŋ ŋana nɛ e chicha m ba lar ŋ gbir Yesu be anishito ŋ kaŋɛ mo basa na kikɛ be anishito kusɔ nɛ k ba nɛ e beta mo nɛ kananɛ e nya alenfia epul na to. 48Nɛ Yesu kaŋɛ mo: “M pibiche, fo yirda e chɛ fo. Baa yɔ nɛ kagbenewushi.”
49Yesu daŋ kraa malga nna nɛ kabɔ shi nshɛrbu to be enimu na pe m ba kaŋɛ Jairus: “Fo pibiche na wu, amoso, sa maŋ naŋ tɔrɔ Eŋinipo na.” 50Yesu ka nu loŋ nɛ e kaŋɛ Jairus: “Sa maa lɔ kufu, fo ere e yirda de, e beeŋ nya alenfia.” 51E ka fo kowu na akpa, e maŋ shin nɛ ekama bɛ mo so n luri she Pita nɛ Jɔn nɛ Jeems nɛ kebia na mo tuto nɛ mo nio nawule. 52Saŋɛ na so nɛ ekama wɔ ndoŋ a shu kebia na be keeli a boŋ to. Nɛ Yesu kaŋɛ bumo: “Men sa maa shu, kebia na maŋ wu nna, e bee di nna.” 53Nɛ basa na fara a mushe mo, ŋkpal manɛ so, b nyi kebia na ka wu kashenteŋto. 54Nɛ Yesu ya pɛ kebichebi na be enɔ to nseŋ kaŋɛ awɔrso: “Kebia, niŋi to.” 55Ndoŋ nna nɛ e naŋ nya mbe ŋkpa ŋ koso epul na to nɛ Yesu kaŋɛ bumo fanɛ b sa kebia na kusɔ ko nɛ e ji. 56Kesheŋ na daŋ chinchiŋ kebia na mo tuto nɛ mo nio na ga, ama Yesu daŋ kaŋɛ bumo nna fanɛ b sa maŋ kaŋɛ esa kikɛ kusɔ nɛ k wora na be asheŋ.
Currently Selected:
Luuk 8: GJNb
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
