Luuk 7

Yesu ka chɛ kenya ko be asheŋ

(Matiu 8:5-13; Jɔn 4:43-54)

1Yesu ka kaŋɛ basa asheŋ ere kikɛ n loge nɛ e luri Kapɛɛniam be kade to. 2Romebi be benapo be enimu ko daa wɔ ndoŋ a kɔ kenya ko a sha mo ga nɛ kenya na daa lɔ a shin nɛ e wu. 3Benapo be enimu na ka nu Yesu be asheŋ nɛ e shuŋi Juwebi be benimu ko fanɛ b ya kule mo nɛ e ba chɛ mbe kenya na. 4B ka ba Yesu kutɔ nɛ b ba kule mo ga ŋ kaŋɛ: “Kanyɛn nɛ e shuŋi anyi ere daga fo kechɛto ga. 5E bee sha an be efuli ere so be basa ga, mo e shin nɛ b pɔr nshɛrbu n sa anyi na.” 6Ndoŋ nna nɛ Yesu tu bumo n yɔ. E ka ya kaa taga to benapo be enimu na be kowu nɛ benapo be enimu na shuŋi mo teriana fanɛ b ya kaŋɛ Yesu le: “Enyɛnpe, sa maŋ tɔrɔ fo kumu m ba ma pe, ŋkpal manɛ so, m maŋ fo keshin nɛ fo ba ma pe, 7ma alɛ maa ta ma kumu fanɛ esagboŋ nɛ e beeŋ tiŋ m ba fo kutɔ. Amoso, baŋ malga kamalga koŋwule fanɛ fo chɛ ma kenya na, nɛ e nya eleŋ. 8Ma alɛ gba la benimu ko be kebia nna nseŋ naa la benapo ko malɛ be enimu a keni bumo so. Benapo nɛ mee keni so na be ekama nɛ m baŋ kaŋɛ: ‘Kuti, yɔ ndoŋ ere’, e bee yɔ nna. Ekama malɛ nɛ m baŋ kaŋɛ: ‘Ba’, e bee ba nna nɛ ma alɛ naŋ kaŋɛ ma kenya: ‘Wora le’, e bee wora kumo nna.” 9Yesu ka nu mbe kamalga na nɛ k chinchiŋ mo ga nɛ e kilgi ŋ kaŋɛ jimaŋ nɛ k daŋ bɛ mo so na: “Ma e kaŋɛ menyi na fanɛ Israɛl be efuli so ebi gba to, m maŋ naŋ wu le be yirda kikɛ.” 10Mbɔ na ka bɛta n yɔ benapo be enimu na pe nɛ mbe kenya na nya alenfia.

Yesu ka tiŋi ekulpoche pibinyɛn be asheŋ

11K maŋ chɛr ko nɛ Yesu yɔ kade ko nɛ baa tre Neen. Mo nɛ mbe bebɛsopo nɛ jimaŋ damta ko e daŋ yɔ. 12E ka baŋ ba kaa fo kade na be kabuna nɛ b sulɔ ebuni a yɔ nɛ b ya puli. Ebuni na daa la ekulpoche ko be ebi koŋwule nna nseŋ wu nɛ kade na to be basa damta ko bɛ ekulpoche na so a lar a yɔ nchaŋ na ase. 13Enyɛnpe ka wu ekulpoche na nɛ mbe asheŋ pɛ mo kuwɔr ga nɛ e kaŋɛ mo: “Sa maa shu.” 14Kumo be kaman nɛ e yɔ n ya beta deka nɛ ebuni na daa wɔ to na nɛ basa nɛ b daŋ sulɔ ebuni na yili. Nɛ Yesu kaŋɛ: “Kabrantiɛbia, ma e kaŋɛ fo na: Niŋi to.” 15Nɛ ebuni na niŋi to n chena n fara a malga nɛ Yesu naŋ ta mo m bɔɔ mo nio enɔ. 16Kufu daŋ pɛ ekama ga nɛ bumo kikɛ di Ebɔrɛ epaŋ ŋ kaŋɛ: “Esa nɛ e chɔ Anebi gboŋ ba anyi to,” nseŋ naŋ kaŋɛ: “Ebɔrɛ ba nɛ e ba mɔlga mbe basa.” 17Yesu be asheŋ na be baru ere daŋ sɔ Judiya nɛ kasawule na so be nde kikɛ to nyam.

Mbɔ nɛ Jɔn kabɔrɛbɛrpo shuŋi na be asheŋ

(Matiu 11:2-19)

18Nɛ Jɔn be bebɛsopo kaŋɛ mo asheŋ ere kikɛ 19nɛ e tre bumo to be benyɔ n shuŋi bumo Enyɛnpe na kutɔ nɛ b ya bishi mo: “Fo e la emo nɛ e beeŋ ba na ŋko an baa kraa jo amodoŋwura a?” 20Mbɔ na ka ba Yesu kutɔ nɛ b ba kaŋɛ mo: “Jɔn kabɔrɛbɛrpo e shuŋi anyi fanɛ an ba bishi fo le: ‘Fo e la emo nɛ e beeŋ ba na ŋko an baa kraa jo amodoŋwura a?’ ” 21Kumo be jemanɛ na malɛ gbagba so nɛ Yesu chɛ belɔpo damta be alɔ be nnaŋ to kikɛ nseŋ ju mbuibi lubi basa to nseŋ bugi betanpo damta be anishi. 22Amoso, le nɛ e daŋ kaŋɛ Jɔn be mbɔ na: “Men bɛta n ya kaŋɛ Jɔn asɔ nɛ men wu nɛ amo nɛ men nu ere be asheŋ fanɛ: Mee shin nɛ betanpo bee wu nɛ ebobi bee nite nɛ bebotipo bee nyalɛ so nɛ ekpawu bee nu nɛ bubuni bee tiŋi luwu to nɛ bebɔlpo malɛ bee nya a nu baru lela na be asheŋ. 23Kagbenefuli la ekama nɛ e maa wora ma shikashika peya nna.”

24Jɔn be mbɔ na ka bɛta n yɔ nɛ Yesu fara a malga Jɔn be asheŋ a kaŋɛ jimaŋ na: “Men ka daŋ yɔ Jɔn kutɔ kiyi to na, manɛ nɛ men daŋ tama keyawu? Men daŋ yɔ nna nɛ men ya wu kefitiri be keyɛlbi nɛ afu wɔtɔ a ber a dɛlɛ to na nna ŋko? 25Manɛ nɛ men daŋ lar n yɔ nɛ men ya keni? Men daŋ yɔ nna nɛ men ya keni kanyɛn ko ka buu damaso be asɔbuuso ŋko? Kashenteŋto basa nɛ baa kaa buu loŋ be asɔbuuso a wɔ dama to na bee kaa wɔ ewurkpaana nna. 26Men kaŋɛ ma, manɛ nɛ men daa tama keyawu? Men daa tama keyawu anebi nna ŋko? Kashenteŋ nɛ mee kaŋɛ menyi na fanɛ men ya wu emo nɛ e chɔ anebi gba, 27ŋkpal manɛ so, Jɔn be asheŋ nɛ abɔrɛsibɛ na bee kaŋɛ fanɛ Ebɔrɛ kaŋɛ le na:

‘Ma kabɔ nde, meeŋ shuŋi mo nɛ e juŋkpar fo

n ya lɔŋɛ ekpa n sa fo.’ ”

28Kede be kaman nɛ Yesu naŋ kaŋɛ: “Mee kaŋɛ menyi nna fanɛ Jɔn chɔ durnya to be bomin kikɛ, ama Ebɔrɛ be kuwura na to be ekekarso gba chɔ mo.” 29Basa nɛ b daŋ nu mbe kamalga na kikɛ nɛ elamposɔpoana na sɔ Jɔn kabɔrɛbɛrpo be kabɔrɛbɛr na ŋ ŋini kananɛ b shuli fanɛ ekpa nɛ Ebɔrɛ nase na e la kashenteŋ. 30Ama kananɛ Efarisiana nɛ mbraŋinipoana na kini kesɔ Jɔn be kabɔrɛbɛr ere ŋini kananɛ b kplaŋ Ebɔrɛ be kɔnɔ naseso nna na.

31Nɛ Yesu naŋ kaŋɛ: “Manɛ nɛ meeŋ ta mbreebi m ber? Manɛ nɛ b duli? 32B du fanɛ mbia ka tase kelɔnɛ so ntuŋ so nna nɛ katuŋ ko to ebi bishi kuko to ebi le ere:

‘Manɛ e ba nɛ an laŋ ŋkure kejafɔ to n sa menyi nɛ men kini kecha?

Nɛ manɛ e ba nɛ an shu keeli to n sa menyi

nɛ men kini kechɛ anyi to n shu?’

33Men du fanɛ mbia ere nna, ŋkpal manɛ so, Jɔn kabɔrɛbɛrpo ka ba kaa kishi, mo alɛ ŋkaa maa nuu nsa be yiri kikɛ, le nɛ men kaŋɛ: ‘Kiyoyu lubi e wɔ mo to.’ 34Nɛ ma, Nyiŋgbasa Pibinyɛn ba kaa ji nsaa nuu nɛ men naa kaŋɛ le: ‘Men keni kanyɛn ere, ajibishapo nɛ nsanuupo nɛ lamposɔpoana nɛ alubiworapoana bumo teri e la mo.’ 35Ama benyiashempo malɛ kikɛ e naa ŋini kanyiasheŋ ka kɔ kashenteŋ.”

B ka chulgi tulale n wurge Yesu so be asheŋ

36Farisinyɛn ko daŋ tre Yesu n yɔ mo pe nɛ mo nɛ mo ya ji ajibi. Nɛ Yesu yɔ mbe kowu na to n ya chena a ji. 37Kache ko malɛ daa wɔ kade na to a la bojuache. E ka nu fanɛ Yesu wɔ Farisinyɛn na pe a tase a ji nɛ e keta tulale dufɛso ko nɛ amo be kɔlba lelabi 38m ba kaa yil Yesu be aya ase a shu anishichubi a wurge Yesu be aya so. Kumo be kaman nɛ e gbir n ta mbe emin m melti anishichubi na nseŋ pipe Yesu be aya na bunyanso nseŋ chulgi tulale lelabi na n wurge mbe aya na so. 39Farisinyɛn nɛ e daŋ tre Yesu fanɛ e ba ji ajibi na ka wu loŋ nɛ e kaŋɛ mbe kumu: “Nɛ kanyɛn ere baa la anebi gbagba nna, e beeŋ pin esa nɛ e la kache nɛ e bee beta mo ere, e beeŋ pin kebaawɔtɔ lubi nɛ e wɔ to.” 40Ndoŋ nna nɛ Yesu kaŋɛ mo: “Saimɔn, mee sha nɛ ŋ kaŋɛ fo kusɔ ko.” Nɛ Saimɔn kaŋɛ: “To, kaŋɛ ma Enyɛnpe.”

41Nɛ Yesu kaŋɛ: “Benyɛn anyɔ ko e daŋ ji amansherbipampo ko be kukɔ. Eko be kukɔ daa la pɔŋ alfa anu nɛ eko malɛ peya daa la pɔŋ adunu. 42Bumo be ekama daa maŋ tiŋ ŋ ka nɛ e yige amo m paŋ bumo. To, basa anyɔ ere to be emo e naaŋ baa sha amansherbipampo na ga?” 43Nɛ Saimɔn kaŋɛ: “Mee tama fanɛ emo nɛ e beeŋ baa sha mo ga e la emo nɛ mbe kukɔ daa shi ga na.” 44Nɛ Yesu kaŋɛ: “Kashenteŋ nɛ fo ji.” Kumo be kaman nɛ e kilgi kache na kutɔ nseŋ bishi Saimɔn: “Fo wu kache ere a? Ŋ ka ba fo pe fo maŋ sa ma aya be nchu, ama mo ere ta mbe anishichubi n fɔr ma aya so nseŋ ta mbe emin m melti amo ashi to. 45Fo maŋ pipe ma kegbuŋ kechɔrɔso n sɔ ma fanɛ efɔ, ama ŋ ka ba luri nfe nɛ kache ere bre ba kaa pipe ma ayadra daŋkare so hale e maŋ naŋ loge. 46Ŋ ka ba, fo maŋ ta ŋku n do ma kumu so, ŋkeshin nɛ mo ere ta tulale n wurge ma ayadra kikɛ so. 47Amoso, mee kaŋɛ fo nna fanɛ kashagboŋ nɛ e ŋini ma ere e naa ŋini b ka ta mbe alubi damta na m paŋ mo. Ama ekama nɛ b yige gbrɛ m paŋ be kasha gba maŋ shi.” 48Ade be kaman nɛ Yesu kaŋɛ kache na: “N ta fo alubi m paŋ fo.” 49Ndoŋ nna nɛ basa nɛ bumo nɛ mo daa tase a ji na fara a bishi abar: “Manɛ be ekpa nɛ kanyɛn ere kɔ hale a tiŋ a ta basa be alubi a paŋ bumo?” 50Nɛ Yesu kaŋɛ kache na: “Baa yɔ nɛ kagbenewushi, fo yirda e mɔlga fo.”

Currently Selected:

Luuk 7: GJNb

Highlight

Copy