Luuk 5

Yesu ka tre mbe bebɛsopo juŋkparso be asheŋ

(Matiu 4:18-22; Maak 1:16-20)

1Kachako Yesu ka yil Gɛnɛsarɛt be kepagboŋ na ase nɛ basa mel abar m buu mo so nɛ b nu Ebɔrɛ be kubɔya na 2nɛ e yili ndoŋ n wu ekɔrɔtɔpɛpoana ko ka chɛ ekuloŋ anyɔ ko m muni nseŋ ya kaa fɔr bumo be ashewu to. 3Ndoŋ nna nɛ e luri amo be kuko to, Saimɔn peya, nseŋ kule mo fanɛ e gberge kumo ashi kedeŋi so n yɔ nchu na so gbrɛ. Ndoŋ nna nɛ e chena ekuloŋ na to a ŋini jimaŋ na abɔrɛsheŋ. 4E ka malga n loge nɛ e kaŋɛ Saimɔn le: “Far ekuloŋ na n yɔ kakpa nɛ k wɔ nchiŋ n ya lɛ fo keshewu ndoŋ m pɛ ekɔrɔtɔ.” 5Nɛ Saimɔn kaŋɛ mo: “Enyɛnpe, ndre kanyɛso kikɛ nɛ an shuŋ ŋ klade kabre, a maŋ nya shɛŋ, ama nɛ fo ere ka kaŋɛ le ere, meeŋ lɛ ma ashewu na n wɔtɔ.” 6B ka lɛ ashewu na nɛ b pɛ ekɔrɔtɔ damta ga hale nɛ ashewu na bee shin nɛ a kpɛa to. 7Nɛ b wora bumo braana nɛ b daa wɔ ekuloŋ mo na to na enɔ nɛ b ba chɛ bumo to. B ka ba chɛ bumo to n lara ekɔrɔtɔ na ashewu na to n wɔtɔ ekuloŋ anyɔ na to nɛ a bɔlɔ a shin nɛ a muni. 8Saimɔn Pita ka wu asheŋ nɛ a wora na kikɛ nɛ e ya gbir Yesu be anishito nseŋ kaŋɛ: “Enyɛnpe, yige ma, ŋkpal manɛ so, n la alubiworapo nna.” 9Ekɔrɔtɔ damta nɛ mo nɛ mo braana na daŋ pɛ na daŋ chinchiŋ mo nɛ bumo kikɛ ga. 10Loŋ koŋwule na nɛ Jeems nɛ Jɔn, Zɛbedi be mbia nɛ b daa la Saimɔn mo braana na gba daŋ ŋini. Nɛ Yesu kaŋɛ Saimɔn: “Sa maa lɔ kufu, ŋkpal manɛ so, yili kabre a yɔ menyeeŋ baa keta basa a ba ma kutɔ.” 11Ndoŋ nna nɛ b gberge ekuloŋana na n dii kedeŋi so n yige kusɔ kama nseŋ bɛ mo so.

Yesu ka chɛ botipo ko be asheŋ

(Matiu 8:1-4; Maak 1:40-45)

12Kachako Yesu yɔ kade ko nɛ kanyɛn ko wɔ ndoŋ a kɔ keboti mbe eyur so kikɛ. E ka wu Yesu nɛ e gbir mbe anishito ŋ kule mo: “Enyɛnpe, nɛ k par fo, feeŋ tiŋ n shin nɛ n nyalɛ so.” 13Nɛ Yesu teŋi enɔ to m beta mo nseŋ kaŋɛ: “Mm, k par ma. Keboti lar mo to.” Epul na to nɛ keboti na lar kanyɛn na to. 14Nɛ Yesu fiɛ mo so ŋ kaŋɛ: “Sa maŋ kaŋɛ esa kikɛ, ama yɔ n ya ta fo kumu ŋ ŋini bɔrɛmatapo na nɛ e keni fo. E kaŋ loge, fo lara sarga nɛ anebi Mosis nase na ŋ ŋini basa kikɛ fanɛ naniere fo nyalɛ so.” 15Ama Yesu be asheŋ na be baru daa naŋ sɔ kaplɛkama nna n ti so nɛ jimaŋ damta ba nɛ b ba nu mbe kubɔya na nɛ e chɛ bumo be alɔ be nnaŋ to kikɛ. 16Ama e daa tiŋ a yɔ kupuŋ to mo nawule nna n ya kaa kule Ebɔrɛ.

Yesu ka chɛ eyurwusowura ko be asheŋ

(Matiu 9:1-8; Maak 2:1-12)

17Kachako Yesu ka bee ŋini basa abɔrɛsheŋ nɛ Efarisiana nɛ mbraŋinipoana ko tase ndoŋ. Bumo kikɛ daŋ shi Galili nɛ Judiya be ndeana kikɛ nɛ Jerusalɛm be kade to nna m ba. Jemanɛ na gbagba nɛ Kiyoyu na wɔ Yesu to a sha nɛ e chɛ belɔpo. 18Ndoŋ nna nɛ basa ko sulɔ eyurwusowura ko mbe kekpata so m ba kaa kɔ a fin nɛ b ta mo n luri ebu na to n nase Yesu be anishito. 19Ama jimaŋ na ka wora keshi so b maŋ tiŋ n nya kakpa n ta mo n luri nseŋ sulɔ mo n dii kuchoŋi nɛ Yesu daa wɔtɔ na so n ya wora kemaŋ ndoŋ n ta mo nɛ kekpata na ŋ gbelge to n yɔ basa na be nferinto Yesu be anishito. 20Yesu ka wu yirda nɛ basa nɛ b bar mo na kɔ nɛ e kaŋɛ eyurwusowura na: “N teri, n ta fo alubi m paŋ fo.” 21Ndoŋ nna nɛ Efarisiana na nɛ mbraŋinipoana na fara a bishi abar: “Manɛ be ekpa nɛ kanyɛn ere kɔ a malga a gbiti Ebɔrɛ le? Nyiŋgbasa kikɛ maaŋ tiŋ n ta alubi m paŋ ama Ebɔrɛ nawule.” 22Ndoŋ nna nɛ Yesu pin bumo be nfɛra na nseŋ bishi bumo: “Manɛ nna nɛ menyee fɛ le be nfɛra? 23Ma ketiŋ ŋ kaŋɛ kanyɛn ere: ‘N ta fo alubi m paŋ fo’, e du ma so kpakpa ŋko ma ketiŋ ŋ kaŋɛ: ‘Koso n nite’, e du ma so kpakpa? 24To, meeŋ ŋini menyi fanɛ ma, Nyiŋgbasa Pibinyɛn kɔ ekpa durnya to nɛ n ta alubi m paŋ.” Kumo be kaman nɛ e kaŋɛ eyurwusowura na: “Ma e kaŋɛ fo na: Niŋi to n ta fo kekpata n yɔ epe.” 25Epul na to nɛ kanyɛn na koso bumo kikɛ be anishito ndoŋ n ta mbe kekpata nɛ e daa dese so na a yɔ epe nsaa di Ebɔrɛ epaŋ. 26Demu na daŋ chinchiŋ bumo ga nɛ kufu pɛ bumo nɛ b di Ebɔrɛ epaŋ a kaŋɛ: “An wu mamachi kabre!”

Yesu ka tre Livai be asheŋ

(Matiu 9:9-13; Maak 2:13-17)

27Kede be kaman nɛ Yesu lar a yɔ n ya wu lamposɔpo nɛ baa tre Livai na nɛ e tase mbe eshuŋkpa nɛ Yesu kaŋɛ mo: “Bɛ ma so.” 28Nɛ Livai yige kusɔ kama nseŋ koso m bɛ mo so.

29Kumo be kaman nɛ Livai ya wora kejigboŋ mo pe n sa Yesu nɛ bumo kikɛ nɛ lamposɔpoana ko nɛ basa damta ko chena a ji. 30Ndoŋ nna nɛ Efarisiana na nɛ bumo to be mbraŋinipoana na bile asheŋ nseŋ bishi Yesu be bebɛsopo na: “Manɛ e ba nɛ menyi nɛ lamposɔpoana nɛ alubiworapoana bee ji nsaa nuu?” 31Nɛ Yesu kaŋɛ bumo: “Basa nɛ b kɔ alenfia maa fin echɛpo she basa nɛ baa lɔ. 32M maŋ ba nna nɛ m ba tre basa nɛ baa tre bumo be amu basa lela. Alubiworapoana nɛ m ba m ba tre nɛ b lar bumo be alubi to.”

Ekishi be demu be kebishi be asheŋ

(Matiu 9:14-17; Maak 2:18-22)

33Basa ko malɛ daŋ bishi Yesu: “Manɛ e ba nɛ Jɔn be bebɛsopo nɛ Efarisiana be bebɛsopo bee kaa kishi saŋɛ damta nsaa kule Ebɔrɛ nɛ fo ere be bebɛsopo wɔtɔ a ji a nuu?” 34Nɛ Yesu bishi bumo: “Menyee sha kejafɔ to be befɔ ka chena akoŋ nna a? Akai, loŋ maŋ daga. Ŋkpal kejafɔ mo kul ka wɔtɔ na so, akoŋ maaŋ pɛ kejafɔ to be befɔ na kikɛ. 35Ama jemanɛ ko bee ba nɛ b lara kejafɔ mo kul na bumo to, saŋɛ na so nawule nɛ baaŋ kishi.”

36Kamalga ere be kaman nɛ Yesu bɔ bumo keŋasa ere: “Basa maa kaa ku kusɔbuuso popɔr a tɛ kusɔbuuso dra. Nɛ b wora loŋ baaŋ kpɛa kepopɔr na to. Kechɛbi popɔr na nɛ kedra na malɛ maaŋ kukwe abar to. 37Ekama malɛ maaŋ shuli n chulgi nsa popɔr n wɔtɔ nsa be asɔ dra to. Nɛ e wora loŋ, nsa na beeŋ shin nɛ asɔ na e pante n jija nɛ nsa na e wurge. 38Kashenteŋto, nsa popɔr daga asɔ popɔr to be keluri nna! 39Esa kama malɛ nɛ e nuu nsa dra, maaŋ naa sha nsa popɔr, ŋkpal manɛ so, e beeŋ kaŋɛ: ‘Nsa dra e bɔ.’ ”

Currently Selected:

Luuk 5: GJNb

Highlight

Copy