Luuk 3

Jɔn kabɔrɛbɛrpo be kubɔya be asheŋ

(Matiu 3:1-12; Maak 1:1-8; Jɔn 1:19-28)

1Ewurgboŋ Tiberius ka ji mbe kafɛ kuduanusopo to, Pɔnshes Pailat e daa la Judiya be gomena nɛ Hɛrɔd malɛ daa keni Galili be efuli so nɛ mo sipo Filip malɛ daa keni Ituriya nɛ Trakɔnaites be nsawule ko so. Lisanias e daa keni Abileene so nɛ Anas nɛ Kayafas malɛ daa la bɔrɛmatapo nimusoana. 2Amo be saŋɛ nɛ Ebɔrɛ ta mbe kamalga n wɔtɔ Zakareya pibi Jɔn to ashi kiyi to. 3Nɛ e yɔ Jɔɔdan be lɔr be kasawule so be ndeana kikɛ to n ya kaa bɔ le be kubɔya: “Men lar men be alubi to nɛ b bɛr menyi kabɔrɛbɛr nɛ Ebɔrɛ e ta men be alubi m paŋ menyi.” 4Loŋ malɛ nɛ anebi Aizaaya be kawɔl na bee kaŋɛ fanɛ Ebɔrɛ kaŋɛ:

“Esa ko bee ponte kiyi to a kaŋɛ le:

‘Men lɔŋɛ Enyɛnpe be ekpa niŋiso

n sa mo nɛ e bɔla so.

5A daga kumo be amambi kikɛ ka bɔlɔ so a walɛ.

A daga kumo be abeebiana

nɛ abeegboŋana kikɛ ka kpal so n nyalɛ.

Men niŋi ekpa na be mboŋ kɔntoana na

nseŋ lɔŋɛ ekpa tisoana na.

6Durnya kikɛ malɛ beeŋ wu kananɛ Ebɔrɛ be kumɔlga be kakɛ na du.’ ”

7Basa damta daŋ ba Jɔn kutɔ nɛ e bɛr bumo kabɔrɛbɛr nɛ e bishi bumo le: “Awɔ lubi be mbia ere, wanɛ e ŋini menyi fanɛ menyeeŋ tiŋ ŋ gelge Ebɔrɛ be agbo nɛ k bee ba basa so na? 8Men baa wora asheŋ nɛ a bee ŋini fanɛ men lar men be alubi to n sa maa wɔtɔ a kaŋɛ men be amu le: ‘An nana e la Eebraham,’ a fɛ fanɛ menyeeŋ ji n lar. Ma e kaŋɛ menyi na fanɛ Ebɔrɛ beeŋ tiŋ n ta ajembu ere m pɔr kaman to ebi n sa Eebraham. 9Men du fanɛ ndibi sɔrso nna. Kekama nɛ k maa sɔr asɔrso lela, kekpanfu tea wɔtɔ epul na to nɛ b ta ŋ ku kumo be kaseto n lɛ nseŋ ta kumo n wɔtɔ edɛ to.”

10Nɛ jimaŋ na bishi mo: “Nɛ nuso nɛ anyeeŋ wora?” 11Nɛ e kaŋɛ bumo: “Ekama nɛ e kɔ nle anyɔ, e lara kuko n sa emo nɛ e maŋ kɔ. Nɛ ekama malɛ nɛ e kɔ ajibi e sa beko.” 12Lamposɔpoana ko malɛ ba kabɔrɛbɛr to nseŋ ba bishi mo: “Eŋinipo, manɛ nɛ anyeeŋ wora?” 13Nɛ e kaŋɛ bumo: “Men sa maa sɔ basa lampo ga a chɔ kananɛ a daga.” 14Nɛ benapo ko malɛ ba bishi mo: “Manɛ nɛ anyi alɛ beeŋ wora?” Nɛ e kaŋɛ bumo: “Men sa maa suge basa be amansherbi ŋko a ji bumo so. Men shin nɛ men be kakɔka e baa kukwe menyi.”

15Ŋkpal basa ka daa jo Kristo na be keba na so, Jɔn be asheŋ daŋ fara nna a chinchiŋ bumo nɛ b fara a fɛ fanɛ ashere mo e la Kristo na. 16Nɛ Jɔn kaŋɛ bumo kikɛ le: “Nchu nɛ ma ere kɔ a bɛr menyi kabɔrɛbɛr, ama emo nɛ e wɔ ma kaman a ba na beeŋ shin nɛ Kiyoyu Cheeŋ na nɛ edɛ e gbelge menyi so. E chɔ ma ga hale m maŋ fo mbe aya to be shishɛr gba so. 17E du fanɛ esa nɛ e kɔ kawie chela asɔ to nna a chela asɔ to. E beeŋ chela mbe ayu to n ta amo be alela n wɔtɔ mbe kapuro to nseŋ ta amimi na n wɔtɔ edɛ nɛ a maa duŋ to.”

18Ekpa damtaana nɛ Jɔn daŋ bɔla m bɔ baru lela na n sa basa na ŋ kaŋɛ bumo asɔ nɛ a daga. 19Ewura Hɛrɔd bre, Jɔn daŋ kaŋɛ mo nna fanɛ e maŋ wora n nyalɛ ŋkpal e ka daŋ ta mo gbagba mo sipo be eche Hɛrodias nseŋ naŋ wora asheŋ lubi damta ko n ti so na so. 20Ade malɛ kikɛ be kaman nɛ e pɛ Jɔn n ti ebu gba kuraa.

Jɔn ka bɛr Yesu kabɔrɛbɛr be asheŋ

(Matiu 3:13-17; Maak 1:9-11)

21Ama pɔɛŋ nɛ Hɛrɔd ti Jɔn ebu na Jɔn daŋ bɛr basa damta na kabɔrɛbɛr nna n loge nseŋ bɛr Yesu gba. Kumo be kaman Yesu ka bee kule Ebɔrɛ nɛ ebɔrɛso bugi 22nɛ Kiyoyu Cheeŋ na gbelge m ba mo so fanɛ lepɔ gbagba nɛ ebɔl shi ebɔrɛso ŋ kaŋɛ le: “Fo e la m Pibinyɛn shaso na. Ma kagbene fuli fo so ga.”

Yesu be kanaŋ to ebi be asheŋ

(Matiu 1:1-17)

23Yesu daŋ fo fanɛ nfɛ adesa nna nseŋ fara mbe kushuŋ. Mo tuto e daa la Josɛf fanɛ kananɛ basa daa fɛ na. Josɛf mo tuto e daa la Ilai, Matat pibi. 24Matat mo tuto e daa la Livai, Mɛlkai pibi, Mɛlkai malɛ mo tuto e daa la Janai nɛ mo alɛ mo tuto daa la Josɛf 25nɛ Josɛf malɛ mo tuto daa la Matatiyas, Eemɔs pibi. Eemɔs malɛ mo tuto e daa la Nahum, 26nɛ Nahum malɛ mo tuto daa la Ɛzli, Nagai pibi. Nagai malɛ mo tuto e daa la Maaf nɛ mo alɛ mo tuto daa la Matatiyas, Sɛmeen pibi. Sɛmeen mo tuto e daa la Josɛk, Joda pibi. 27Joda malɛ mo tuto e daa la Joana nɛ mo alɛ mo tuto daa la Risa nɛ Risa malɛ mo tuto daa la Zerubabel nɛ mo alɛ mo tuto daa la Shialtiɛl, Nɛrai pibi. 28Nɛrai mo tuto e daa la Mɛlkai nɛ mo alɛ mo tuto daa la Adai, Kosam pibi nɛ Kosam malɛ mo tuto daa la Ɛlmadam, Ɛr pibi. 29Ɛr malɛ mo tuto e daa la Joshuwa nɛ mo alɛ mo tuto daa la Eliaza nɛ mo alɛ mo tuto daa la Jɔrim nɛ mo alɛ mo tuto daa la Matat, Livai pibi. 30Livai malɛ mo tuto e daa la Simiɔn nɛ mo alɛ mo tuto daa la Juda nɛ Juda malɛ mo tuto daa la Josɛf nɛ Josɛf malɛ mo tuto daa la Jonam, Ilayakim pibi. 31Ilayakim mo tuto e daa la Mɛliya nɛ mo alɛ mo tuto daa la Mɛna nɛ Mɛna malɛ mo tuto daa la Matata nɛ mo alɛ mo tuto daa la Neetan, Deevid pibi. 32Deevid malɛ mo tuto e daa la Jɛsi nɛ mo alɛ mo tuto daa la Obɛd nɛ Obɛd malɛ mo tuto daa la Bowas nɛ mo alɛ mo tuto daa la Salmon, Naashɔn pibi. 33Naashɔn malɛ mo tuto e daa la Aminadab nɛ mo alɛ mo tuto daa la Admin nɛ Admin malɛ mo tuto daa la Aani nɛ mo alɛ mo tuto daa la Hɛzrɔn nɛ Hɛzrɔn malɛ mo tuto daa la Pɛrɛs, Juda pibi. 34Juda malɛ mo tuto e daa la Jeekɔb nɛ mo alɛ mo tuto daa la Aizek nɛ Aizek malɛ mo tuto daa la Eebraham nɛ mo alɛ mo tuto daa la Tɛɛra, Nahɔɔ pibi. 35Nahɔɔ malɛ mo tuto e daa la Sɛrug nɛ Sɛrug malɛ mo tuto daa la Rehu nɛ Rehu malɛ mo tuto daa la Pɛlɛg, Ibaa pibi, Ibaa malɛ mo tuto e daa la Shɛla. 36Shɛla mo tuto e daa la Keenan nɛ mo alɛ mo tuto daa la Aafaksad nɛ mo alɛ mo tuto daa la Shɛm nɛ Shɛm malɛ mo tuto daa la Nowa nɛ Nowa malɛ mo tuto daa la Lamɛk. 37Lamɛk mo tuto e daa la Mɛtusela nɛ mo alɛ mo tuto daa la Inɔk nɛ Inɔk malɛ mo tuto daa la Jarɛɛd nɛ mo alɛ mo tuto daa la Mahalalɛl nɛ Mahalalɛl malɛ mo tuto daa la Keenan. 38Keenan malɛ mo tuto e daa la Inɔsh nɛ Inɔsh malɛ mo tuto daa la Sɛt nɛ Sɛt malɛ mo tuto daa la Adam, Ebɔrɛ pibi.

Currently Selected:

Luuk 3: GJNb

Highlight

Copy