Luuk 2

B ka kurge Yesu be asheŋ

(Matiu 1:18-25)

1Kumo be jemanɛ na nɛ Ewura Ɔgastes kaŋɛ fanɛ b karga mbe efuli so be basa kikɛ. 2Saŋɛ na Kwirinias e daa la Siriya be gomena, mbe jemanɛ to be basa be kekarga be sososo e daa la na. 3Ewura Ɔgastes ka kaŋɛ loŋ nɛ ekama yɔ mbe kade to gbagba to nɛ b ya sibɛ mbe ketre.

4Nɛ Josɛf malɛ gba lar Nazarɛt, Galili be efuli so n yɔ Judiya be efuli so be kade ko to nɛ baa tre Bɛtlɛhɛm, kakpa nɛ b kurge Ewura Deevid na. Josɛf daŋ yɔ ndoŋ nna ŋkpal e ka daŋ shi Deevid be kanaŋ to so. 5Mo nɛ Mɛɛri nɛ b daŋ kre kumo fanɛ baaŋ ta abar na e daŋ yɔ nɛ b ya sibɛ bumo be atre.

6Mɛɛri daa kɔ kedampo nna. Bɛtlɛhɛm to nɛ b daa wɔ nɛ mbe kakurgeachɛ fo. 7Asɔbɔya be edikpa to nɛ b daa wɔ, ŋkpal manɛ so, ebu kikɛ daa maŋ naa wɔ befɔ be kowu na to. Ndoŋ nɛ e kurge mbe wurkoŋ, ebinyɛn n ta ewajɛ m mea mo nseŋ ta mo n nase asɔbɔya na be deka jiso to.

Mbolpɔkpapo nɛ emalaika be asheŋ

8Mbolpɔkpapoana ko daa wɔ efuli na so kiyi to be kakpa ko a keni bumo be mbolpɔ kanyɛso. 9Epul na to nɛ Enyɛnpe be malaika lar bumo so nɛ Enyɛnpe be kemaŋkura nyaŋɛ m buu bumo so nɛ kufu pɛ bumo ga. 10Nɛ malaika na kaŋɛ bumo: “Men sa maa lɔ kufu, ŋkpal manɛ so, baru lela nɛ k beeŋ sa basa kikɛ kagbenefuli nɛ m bar menyi. 11Kabre be kachɛ ere b kurge men be Emɔlgapo Kristo Enyɛnpe ashi Deevid be kade to. 12Kusɔ nɛ k beeŋ ŋini menyi kumo nde: Menyeeŋ wu b ka ta ewajɛ m mea kebia na n nase asɔbɔya be deka jiso to, asɔbɔya be edikpa to.” 13Epul na to nɛ emalaika damta ba ti emo na so a boŋ nshɛ a di Ebɔrɛ epaŋ a kaŋɛ:

14“Kemaŋkura e baa la Ebɔrɛ nɛ e wɔ esoso na peya nɛ kagbenewushi

e baa wɔ mbe kepar be basa kikɛ to ashi kasawule so.”

15Emalaika na ka yige bumo m bɛta n yɔ esoso nɛ mbolpɔkpapoana na kaŋɛ abar: “Men shin nɛ an yɔ Bɛtlɛhɛm n ya keni kusɔ nɛ k wora nɛ Enyɛnpe shin nɛ an pin ere.” 16Ndoŋ nna nɛ b nya manaŋ n ya wu Mɛɛri nɛ Josɛf nɛ kebia na dese asɔbɔya be deka jiso to asɔbɔya be edikpa. 17Mbolpɔkpapoana na ka wu kebia na nɛ b kaŋɛ Mɛɛri nɛ Josɛf kusɔ nɛ malaika na kaŋɛ bumo kebia na be asheŋ. 18K daŋ chinchiŋ bekama nɛ b nu mbolpɔkpapoana na be mmalga na ga. 19Mɛɛri malɛ daŋ ta asheŋ ere kikɛ nna n wɔtɔ mbe kagbene to a fɛ amo be nfɛra. 20Nɛ mbolpɔkpapoana na bɛta a boŋ nshɛ a di Ebɔrɛ epaŋ a yɔ ŋkpal asɔ nɛ b nu nseŋ wu na kikɛ so. Kusɔ nɛ malaika na daŋ malga na gbagba e daŋ wora chap.

B ka nase Yesu mbe ketre be asheŋ

21Kebi na be kachɛ burwasopo nɛ b ku mo kututu nseŋ nase mo Yesu, ketre nɛ malaika na daŋ sa pɔɛŋ nɛ Mɛɛri di mbe kedampo na. 22Jemanɛ ka ba fo nɛ Josɛf nɛ Mɛɛri e lara kefɔrsonlar be daŋkare na be sarga nɛ anebi Mosis be mbra na bee kaŋɛ na nɛ b ta kebia na n yɔ Jerusalɛm nɛ b ya bɔɔ Enyɛnpe enɔ 23fanɛ kananɛ Enyɛnpe be mbra na bee kaŋɛ na: “Men ta men be ewurkoŋnyɛn m ba bɔɔ Enyɛnpe na enɔ.” 24Bumo alɛ daa naŋ yɔ nna nɛ b ya lara sarga nɛ Enyɛnpe be mbra na bee kaŋɛ fanɛ basa e baa ta, ali anyɔ ŋko elepɔbi anyɔ a lara na nna.

25Kanyɛn ko malɛ daa wɔ Jerusalɛm nɛ baa tre mo Simiɔn. E daa la esa lela nna a bunyaŋ Ebɔrɛ nsaa jo jemanɛ nɛ Israɛlebi beeŋ nya kumɔlga. Kiyoyu Cheeŋ na daa wɔ mo to. 26Kiyoyu Cheeŋ na malɛ e daŋ ŋini mo fanɛ e maŋ wu Kristo nɛ Enyɛnpe nase kɔnɔ fanɛ e beeŋ sa na, e maaŋ wu. 27Kachako nɛ Kiyoyu Cheeŋ na shin nɛ Simiɔn yɔ bɔrɛlambu na to nɛ b bar Yesu bɔrɛlambu na to nɛ b ba wora mo kusɔ nɛ mbra na bee ŋini na. 28Ndoŋ nna nɛ e sɔ kebia na ŋ keta nseŋ di Ebɔrɛ epaŋ ŋ kaŋɛ:

29“Enyɛnpe, naniere bre

fo shin nɛ fo kɔnɔ naseso na bɔla ekpa.

Amoso, nɛ k par fo, fo shin nɛ fo kenya e lar basa to nɛ kagbenewushi,

30ŋkpal manɛ so, ŋ gbagba be anishi

e baŋ wu fo kumɔlga be kakɛ

31nɛ fo kɔ a sa basa kikɛ na.

32Kumɔlga na e la kefulto nɛ k bee sa fo basa Israɛlebi kemaŋkura nsaa ŋini nnyamase fo ekpa na.”

33Kananɛ Simiɔn daŋ malga kebia na be asheŋ na daŋ chinchiŋ kebia na mo tuto nɛ mo nio ga. 34Amo be kaman nɛ Simiɔn nɛfa bumo nseŋ kaŋɛ kebia na mo nio Mɛɛri: “Ebɔrɛ e lara kebia ere nɛ e shin nɛ Israɛlebi be bedamta e foe Ebɔrɛ be ekpa so nɛ bedamta malɛ e pin Ebɔrɛ be ekpa na. E beeŋ ba kaa la Ebɔrɛ be tɔɔnɛ nɛ basa damta e malga ŋ gbiti mo, 35nɛ e bugi bumo be ewulosheŋ to ŋ ŋini basa, nɛ fo Mɛɛri gbagba be kagbene e jija fo fanɛ tokobi jiso ka ku fo na.”

36Epul na to gbagba nɛ anebiche ko nɛ baa tre Ana ba ndoŋ. Mo tuto e daa la Fanuwɛl nɛ e shi Ashɛr be kanaŋ to na. 37E ka daŋ kil kumo be kafɛ shunusopo to nɛ mo kul wu ŋ ka mo nɛ e wɔtɔ loŋ n ya ji nfɛ aduburwa nɛ ana. E daa sha bɔrɛlambu na to ga nseŋ daa wɔtɔ a kule Ebɔrɛ nsaa kishi a bunyaŋ mo saŋkama. 38E ka ba tu Simiɔn nɛ kebia na nɛ mo nio nɛ mo tuto bɔrɛlambu na to nɛ mo alɛ gba di Ebɔrɛ epaŋ ga nseŋ kaŋɛ basa nɛ b daa jo jemanɛ nɛ Jerusalɛm beeŋ nya kesɔnyige na kikɛ kebia na be asheŋ.

B ka keta kebia na m bɛta n yɔ Nazarɛt be asheŋ

39Josɛf nɛ Mɛɛri ka wora asɔ nɛ Enyɛnpe be mbra bee ŋini na n loge nɛ b bɛta n yɔ bumo be kade to Nazarɛt ashi Galili be efuli so.

40Nɛ kebia na daŋ eyur to a kɔ eleŋ, nɛ kanyiasheŋ bɔlɔ mo to nɛ Ebɔrɛ malɛ be kasha wɔ mo so.

Yesu ka yɔ bɔrɛlambu na to be asheŋ

41Kafɛ kikɛ Yesu mo nio nɛ mo tuto daa yɔ Kebansonchoŋ be kejigboŋ na to ashi Jerusalɛm nna. 42Kafɛ ko Yesu ka fo nfɛ kuduanyɔ nɛ b yaŋ yɔ Kejigboŋ na to. 43Kejigboŋ na be jemanɛ ka ba choŋ nɛ b bɛta m pɛ epe be ekpa. Ama bumo alɛ daa maŋ nyi Yesu ka kraa wɔ Jerusalɛm to. 44B daa tama fanɛ e daa wɔ basa damta na to nna nseŋ nite loŋ hale nɛ epeŋi ya kaa tɔr pɔɛŋ nɛ b fara a bishi bumo kurgepoana nɛ bumo teriana kebia na be asheŋ. 45B fin mo loŋ n ya gben nseŋ naŋ bɛta n fin mo n yɔ Jerusalɛm. 46Kachɛ nasopo to nɛ b ya wu mo bɔrɛlambu na to nɛ e tase a nu asheŋ ashi Juwebi be mbraŋinipoana na kutɔ, mo alɛ nseŋ naa bishi bumo asheŋ. 47K daŋ chinchiŋ bekama nɛ b daŋ nu kananɛ e daŋ sa asheŋ bishiso na be afito kanyiashenso na ga. 48Mo nio nɛ mo tuto ka wu mo nɛ k chinchiŋ bumo ga nɛ mo nio bishi mo: “M pibi, manɛ e ba nɛ fo wora anyi loŋ? Ma nɛ fo tuto ka bee fin fo a gben anyi be ŋgbene jija anyi ga.” 49Ndoŋ nna nɛ e bishi bumo: “Manɛ e ba nɛ men daa fin ma? Men daa maŋ nyi ŋ ka beeŋ baa wɔ n Tuto pe a?” 50B daa maŋ pin mbe kesheŋ bishiso na be kifito. 51Amo be kaman nɛ mo nɛ bumo bɛta n yɔ Nazarɛt nɛ e ya kaa wɔtɔ a nu a sa bumo. Nɛ mo nio ta asheŋ ere kikɛ n wɔtɔ mbe kagbene to a wɔtɔ.

52Nɛ Yesu daŋ eyur to a wɔtɔ a pin kanyiasheŋ a ti so nsaa nya kasha ashi Ebɔrɛ nɛ basa kutɔ.

Currently Selected:

Luuk 2: GJNb

Highlight

Copy