Luuk 23

B ka yɛr Yesu Gomena Pailat kutɔ be asheŋ

(Matiu 27:1-2, 11-14; Maak 15:1-5; Jɔn 18:28-38)

1Ndoŋ nna nɛ nshɛrwuraana na kikɛ koso n yɛr Yesu Gomena Pailat kutɔ 2n ya kaŋɛ mo fanɛ le be alubi nɛ Yesu wora. B yɛ: “An wu fanɛ kanyɛn ere wɔtɔ nna a wul anyi be efuli ere so ebi to nsaa kaŋɛ anyi fanɛ an sa maa ka lampo a sa Romebi be ewurgboŋ Siza nseŋ naa wɔtɔ a tre mo gbagba be kumu Kristo nɛ e la ewura na.” 3Nɛ Gomena Pailat bishi mo le: “Fo e la Juwebi be Ewura na a?” Nɛ Yesu shuli so ŋ kaŋɛ: “Loŋ gbagba nɛ fo kaŋɛ na.” 4Ndoŋ nna nɛ Pailat kaŋɛ bɔrɛmatapowuraana na nɛ jimaŋ na le: “Ma ere maŋ wu kulubi kikɛ kanyɛn ere so.” 5Nɛ b kini nseŋ kaŋɛ: “E ta mbe asheŋ ŋiniso nna a wɔ Judiya be efuli so kikɛ a ŋini basa nsaa fur bumo a wɔtɔ kumuleŋ to. Hale Galili kikɛ nɛ e yili n wora loŋ m ba fo nfe.” 6Pailat ka nu loŋ nɛ e bishi bumo le: “Galili be esa e la mo a?” Nɛ b shuli so. 7E ka pin fanɛ Yesu shi Galili, Ewura Hɛrɔd be kasawule so na nɛ e shin nɛ b yɛr mo n ya sa Ewura Hɛrɔd, saŋɛ na so nɛ mo alɛ gba ba Jerusalɛm be kade na to. 8Ewura Hɛrɔd ka wu Yesu nɛ mbe kagbene fuli mo ga, ŋkpal manɛ so, e daŋ nu mbe asheŋ ga nseŋ daa fin kewu mo nɛ e wora mbe emamachisheŋ na be kuko nɛ e keni. 9Amoso, e daŋ bishi mo asheŋ damta, ama mo alɛ daa maŋ kaŋɛ mo shɛŋ. 10Ndoŋ nna nɛ bɔrɛmatapowuraana na nɛ mbraŋinipoana na yili nshɛr na to m malga kenishipereso ŋ gbiti Yesu. 11Nɛ Hɛrɔd nɛ mbe benapo wora mo nfɛlsheŋ nseŋ wora mo eyurto ga. Ade be kaman nɛ Hɛrɔd shin nɛ b ta asɔbuuso lela m buu Yesu shiaso nseŋ shin nɛ b naŋ bɛta mo n ya sa Pailat. 12Kumo be kamɔnchɛ kikɛ nɛ Hɛrɔd nɛ Pailat ki beteri, ŋkpal manɛ so, pɔɛŋ nɛ Yesu be demu na ba, b daa maŋ wɔ ebel abar so.

B ka yɛ Yesu daga luwu be asheŋ

(Matiu 27:15-26; Maak 15:6-15; Jɔn 18:39—19:16)

13Ndoŋ nna nɛ Pailat tre bɔrɛmatapowuraana na nɛ benimuana na nɛ jimaŋ na kikɛ m ba shɛr 14ŋ kaŋɛ bumo le: “Men yɛ kanyɛn nɛ men bar ma na la esa lubi nna a wɔtɔ a fur basa a wɔtɔ kumuleŋ to. Ma alɛ ka yili menyi kikɛ be anishito nfe ŋ keni mbe demu na to m maŋ wu alubi nɛ men kaŋɛ fanɛ e wora na be kekama mo so. 15Ewura Hɛrɔd gba daa maŋ wu kulubi kikɛ mo so, ŋkpal manɛ so, e laŋɛ mo nna n naŋ ba sa anyi. Men keni, mo alɛ maŋ wora kulubi kikɛ nɛ k daga mbe luwu. 16Amoso, meeŋ shin nɛ b kuya mo so nseŋ yige mo.” 17[Kebansonchoŋ be kejigboŋ be jemanɛ kikɛ k daa la daŋkare be kusɔ nna fanɛ Pailat e lara basa na be keparso be esa ashi kabuti to.]

18Nɛ bumo kikɛ ponte kɔnɔkoŋwuleso ŋ kaŋɛ le: “Lara mo basa to nseŋ lara Barabas kabuti to n sa anyi.” 19Barabas daŋ yɔ kabuti to nna ŋkpal e ka daŋ fur basa nɛ b ta kumuleŋ ŋ kɔ ewura be eleŋ kelantokɔ to nɛ esa ko daŋ wu so. 20Ndoŋ nna nɛ Pailat naŋ malga basa na kutɔ eleŋso a sha keshin nɛ Yesu e yɔ. 21Nɛ jimaŋ na ponte eleŋso ŋ kaŋɛ le: “Gbir mo m mata kedibi largato so, gbir mo m mata kedibi largato so.” 22Nɛ e naŋ bishi bumo kela sasopo: “Manɛ nna, manɛ be kulubi nɛ e wora? M maŋ wu kulubi kikɛ mo so nɛ k daga mbe luwu. Amoso, meeŋ shin nɛ b kuya mo so nseŋ yige mo nɛ e yɔ.” 23Nɛ b kini nseŋ ponte eleŋso a kaŋɛ fanɛ Pailat e shin nɛ b gbir mo m mata kedibi largato so. Bumo be kaponte na shin nɛ b pɔɔ Pailat so. 24Ndoŋ nna nɛ Pailat shuli n sa bumo 25n shin nɛ b lara kanyɛn nɛ b daŋ ti ebu ŋkpal e ka daŋ fur basa n wɔtɔ kumuleŋ to nɛ b kɔ ewura be eleŋ ashi kelantokɔ to m mɔ esa na so ashi kabuti na to. Ŋkpal manɛ so, mo nɛ b daŋ kule Pailat fanɛ e lara n sa bumo. Amo be kaman nɛ e yige Yesu bre n sa bumo fanɛ b wora mo kusɔ nɛ baa sha.

B ka gbir Yesu m mata kedibi largato so be asheŋ

(Matiu 27:32-44; Maak 15:21-32; Jɔn 19:17-27)

26B ka kɔ mo a yɔ nɛ b ya nyaŋ Sairini be kanyɛn ko nɛ baa tre Saimɔn nɛ e shi adɔ to a luri kade to n tintiŋ mo nɛ e sulɔ Yesu be kedibi largato na m bɛ Yesu so. 27Nɛ jimaŋ na be basa damta bɛ Yesu so nɛ beche damta ko ta enɔana n deŋi amu so a shu ŋkpal mo so. 28Nɛ Yesu kilgi ŋ kaŋɛ bumo le: “Jerusalɛm to be beche, men sa maŋ kpal ma so a shu. Men baa shu ŋkpal menyi nɛ menyi be mbia so. 29Ŋkpal manɛ so, saŋko bee ba nɛ b kaŋɛ le: ‘Begbentepoana nɛ basa nɛ b maŋ naŋ kurge ŋ ku so nɛ beche nɛ mbia maŋ naŋ nyipo ŋ ku so nu ebel kashenteŋto bre.’ 30Saŋɛ na so baaŋ fara a kule abeegboŋ nɛ abeebi fanɛ a ka la enyiŋgbasa na ŋ kaŋɛ abeegboŋ le: ‘Men tɔr anyi so’, nseŋ kaŋɛ abeebi malɛ: ‘Men buu anyi so.’ 31Ŋkpal manɛ so, ma ere ka du fanɛ kedibi wushiso nɛ b wora ma le ere, nuso nɛ baaŋ wora menyi nɛ men du fanɛ ndibi wɔlso ere?”

32B daŋ ta beyu anyɔ ko nna n ti mo so a yɔ nɛ b ya gberge bumo kusoe m mɔ bumo. 33B ka ba fo kakpa nɛ baa tre Kumuwibi be Kakpa na nɛ b ta mo nɛ beyu anyɔ na ŋ gbir m mata ndibi largato so. Beyu anyɔ na be ekoŋwule daa wɔ mbe jisoso nna nɛ ekoŋwule malɛ daa wɔ mbe bena so. 34Nɛ Yesu kaŋɛ le: “Etuto, ta m paŋ bumo, ŋkpal manɛ so, b maŋ nyi kusɔ nɛ baa wora.” Nɛ b to beri a fin bumo nɛ baaŋ nya mbe asɔbuuso. 35Ndoŋ nna nɛ basa ba yili ndoŋ a keni mo nɛ benimuana na bee wora mo eyurto a kaŋɛ mo le: “Men keni, e mɔlga basa pɔtɛ, men shin nɛ e mɔlga mo gbagba be kumu nɛ an keni ŋko kashenteŋ nɛ e la Kristo nɛ Ebɔrɛ be esa laraso na a.” 36Nɛ benapo malɛ gba wora mo eyurto nseŋ firgi n taga mo to n ta yabra nyannyanso ko a sa mo fanɛ e sɔ n nuu 37a kaŋɛ mo le: “Nɛ fo kaŋɛ fo la Juwebi be Ewura na gbagba nna, fo mɔlga fo kumu.” 38Kasibɛ nɛ basa na daŋ sibɛ ŋ gbir m mata Yesu be kumu ase e daa la:

“JUWEBI BE EWURA NA NDE.”

39Beyu anyɔ nɛ b daŋ gbir m mata ndibi largatoana so n ti mo so na be eko daŋ tege mo nna ŋ kaŋɛ: “Fo e la Kristo na, amoso, mɔlga fo kumu nseŋ mɔlga anyi alɛ gba.”

40Nɛ eyu nyɔsopo na fiɛ mo barkasa na so m bishi mo le: “Keni, fo maa ŋana Ebɔrɛ nna a? Ŋko fo maŋ wu kananɛ fo nɛ mo kikɛ wɔ luwu be kasogberge koŋwule to a? 41Anyi ere be alubi be tɔnɔ nɛ anyee ji na, ama kanyɛn ere bre maŋ wora shɛŋ.” 42E ka kaŋɛ loŋ nɛ e kilgi ŋ kaŋɛ Yesu le: “Yesu, fo kaŋ luri fo kuwura na to, fo nyiŋi ma.” 43Ndoŋ nna nɛ Yesu kaŋɛ mo le: “Kashenteŋ nɛ mee kaŋɛ fo na fanɛ kabre ma nɛ fo beeŋ ya kaa wɔ paradisi.”

Yesu be luwu be asheŋ

(Matiu 27:45-56; Maak 15:33-41; Jɔn 19:28-30)

44Ta a ba kapaso, kerfi kuduanyɔ be jemanɛ nɛ tentembiri ba buu efuli na kikɛ so m biri to loŋ hale n ya fo kaaseso kerfi asa. 45Ŋkpal manɛ so, epeŋi daa maŋ naa nyaŋɛ nɛ bɔrɛlambu na to be patisa na yili kumo be esoso n chaŋɛ to m ba kaseto. 46Nɛ Yesu boŋ to awɔrso ŋ kaŋɛ: “Etuto, n ta ma kiyoyu m bɔɔ fo enɔ.” E ka baŋ kaŋɛ loŋ n loge nɛ e fute mbe lalaloge be efute. 47Benapo be enimu ko ka daŋ wu asɔ nɛ a wora na kikɛ nɛ e di Ebɔrɛ epaŋ nseŋ kaŋɛ le: “Kashenteŋto, kanyɛn ere daa maŋ wora shɛŋ.” 48Basa damta nɛ b daŋ ba shɛr ndoŋ a keni na, ka wu asheŋ na kikɛ nɛ b bɛta n ta enɔana a bri bumo be ŋgbene so a yɔ epe. 49Nɛ Yesu be benyipoana na nɛ beche nɛ b daŋ shi Galili m bɛ mo so m ba na kikɛ ya kaa yil ekarso gbrɛ a keni asheŋ nɛ a daa wora na kikɛ.

Yesu be kepuli be asheŋ

(Matiu 27:57-61; Maak 15:42-47; Jɔn 19:38-42)

50Kanyɛn ko e daa wɔtɔ nɛ baa tre mo Josɛf. E daŋ shi Juwebi be kade nɛ baa tre Arimatiya na nna nseŋ daa la Juwebi be nshɛrwuraana na to be esa lela nɛ kashenteŋshapo. 51E daa la nshɛrwuraana na be eko nna, ama e daa maŋ sa bumo kashuli ashi kesheŋ nɛ b daŋ wora na to. E daa wɔtɔ nna a jo Ebɔrɛ be kuwura na be keba. 52Mo e daŋ yɔ Pailat kutɔ n ya kule mo Yesu be kebuni. 53Pailat ka sa mo ekpa, nɛ e ya lara ebuni na kedibi largato na so nseŋ ta kesaŋɛ lela ko m mea mo nseŋ ta mo n nase kejembulaŋ kurso ko be nchaŋ to nɛ b daa maŋ naŋ ta esa kikɛ n nase kumo to kikɛ na. 54Kebelaseachɛ e daa la nɛ Kewushiachɛ na daa fara.

55Beche nɛ b daŋ shi Galili m bɛ Yesu so m ba na daŋ bɛ Josɛf so n ya wu nchaŋ na nɛ kananɛ b daŋ nase mo kumo to. 56Kumo be kaman nɛ b bɛta n yɔ epe n ya wora ŋku dufɛso nɛ etulale n yili.

Kewushiachɛ ka fo nɛ b wushi m bɛ kusɔ nɛ mbra na bee kaŋɛ na so.

Currently Selected:

Luuk 23: GJNb

Highlight

Copy