Jɔn 7

Yesu nɛ mo siponyɛnsoana be asheŋ

1Ade be kaman nɛ Yesu shir a wɔ Galili be efuli so be nde nawule to a nite a maa sha kenite Judiya bre to, ŋkpal manɛ so, ndoŋ be Juwebi be benimuana na daa fin mo nna nɛ b mɔ. 2Ama Juwebi be daŋkare so be nshɛr nɛ baa tre Abuu to be Kebaawɔ be kejigboŋ na be jemanɛ na ka ba kaa fo 3nɛ Yesu mo siponyɛnsoana kaŋɛ mo le: “A daŋ daga fo ka lar nfe nna n yɔ Judiya nɛ fo bebɛsopo e ya wu fo asheŋ woraso. 4B yɛ: ‘Esa kama nɛ e bee sha nɛ basa e baa nyi mbe asheŋ maa ŋana a wora asheŋ.’ Amoso, fo ka baa wora asheŋ ere, shin nɛ durnya e wu fo.” 5Kede e naa ŋini fanɛ hale mo siponyɛnsoana gba daa maŋ yirda mo. 6Nɛ Yesu kaŋɛ bumo le: “Ma saŋɛ maŋ naŋ fo, ama menyi ere, saŋɛ kikɛ walɛ nna n sa menyi. 7Durnya maaŋ tiŋ ŋ kishi menyi ere, ama ma ere, k kishi ma nna ŋkpal ŋ ka bee kaŋɛ fanɛ kumo be asheŋ woraso maŋ walɛ so. 8Men baa yɔ Kejigboŋ be nshɛr na to. Ma ere maa yɔ, ŋkpal manɛ so, ma saŋɛ maŋ naŋ fo.” 9E ka kaŋɛ loŋ n loge nɛ e shir a wɔ Galili.

Yesu ka yɔ Abuu to be Kebaawɔ be daŋkare be kejigboŋ to be asheŋ

10Ama mo siponyɛnsoana na ka choŋ Kejigboŋ na to n loge nɛ Yesu malɛ gba yɔ, ama wulo to nɛ e daŋ ŋana n yɔ. 11Ama saŋɛ na so nɛ Juwebi na malɛ wɔ Kejigboŋ na to a fin mo a bishi le: “To, nnɛ nɛ kanyɛn na wɔ?” 12Jimaŋ na to be bedamta daŋ baa wɔtɔ nna a kuli a malga mbe asheŋ. Beko yɛ: “Esa lela nna.” Nɛ beko malɛ kaŋɛ: “Ayai, e bee fule basa nna.” 13Ama ekama daa maŋ nya kagbene m bugi to m malga mbe asheŋ, ŋkpal manɛ so, b daa ŋana Juwebi be benimuana na nna.

14Kejigboŋ na to be asheŋ woraso na daŋ kraa wɔ nferinto nna a yɔ nɛ Yesu koso n yɔ bɔrɛlambu na to n ya fara a ŋini basa abɔrɛsheŋ. 15Mbe keŋini na daŋ chinchiŋ Juwebi na ga nɛ b bishi abar: “Nnɛ nɛ kanyɛn ere nya le be keŋini ere, ŋkpal manɛ so, e maŋ koya ko?” 16Nɛ Yesu kaŋɛ bumo: “Ma keŋini maŋ la meya nna. K shi esa nɛ e shuŋi ma na kutɔ nna. 17Esa kama nɛ e bee sha kewora Ebɔrɛ be aparsheŋ beeŋ pin fanɛ asɔ nɛ mee ŋini ere shi Ebɔrɛ kutɔ nna ŋko ŋ gbagba be eleŋ nɛ ŋ kɔ a ŋini amo. 18Esa kama nɛ e kɔ mo gbagba be eleŋ a malga asheŋ, bee fin mo gbagba be kemaŋkura nna na. Ama esa kama nɛ e bee fin kemaŋkura a sa esa nɛ e shuŋi mo la kashenteŋwura nna nɛ efɛsheŋ kikɛ maŋ wɔ mo so. 19Mannɛ anebi Mosis e daŋ sa menyi mbra na ŋko? Ama men be ekama maa bɛ mbra na so. Nɛ manɛ e ba nɛ menyee sha kemɔ ma?” 20Ndoŋ nna nɛ jimaŋ na kaŋɛ mo le: “Fo kɔ kiyoyu lubi fo to. Wanɛ e naa sha kemɔ fo?” 21Nɛ Yesu kaŋɛ bumo: “Men keni, n wora mamachi be kesheŋ koŋwule nɛ k chinchiŋ menyi ga. 22Ama ŋkpal Mosis ka sa menyi mbra fanɛ men baa ku atutu so, menyee ku menyi be mbiana nna kewushiachɛ. Ama kashenteŋto, mannɛ Mosis e daŋ sa menyi mbra na, men nananyɛnana e nase kumo. 23To, nɛ menyee tiŋ a ku menyi be mbia atutu kewushiachɛ na, saŋɛ na so men maaŋ tɔr Mosis be mbra na, manɛ e ba nɛ menyee nya agbo a wora ma ŋkpal ŋ ka chɛ esa lelemu na kewushiachɛ so? 24Men sa maa yili basa be asheŋ nɛ menyee wu kenishiso so a ji bumo demu, men baa ji kashenteŋ be demu.”

Basa ka bee sha kepin esa nɛ Yesu la be asheŋ

25Saŋɛ ere so nɛ Jerusalɛm to be basa ko fara a bishi abar le: “Mannɛ kanyɛn ere nɛ baa fin nɛ b mɔ na a? 26To, mo e yil a malga basa kikɛ to na nɛ esa kama malɛ maa tuge shɛŋ. Ŋko Juwebi be benimuana na wu kumo naniere nna fanɛ mo e la Kristo na a? 27Kusɔ koŋwule nde fanɛ nɛ Mesaya na kaŋ ba, esa kama maaŋ pin kakpa nɛ e shi m ba, ama kanyɛn ere bre, an nyi kakpa nɛ e shi.” 28Saŋɛ na nɛ Yesu kraa ŋini abɔrɛsheŋ ashi bɔrɛlambu na to nseŋ ba kaŋɛ awɔrso le: “Kashenteŋ nna nɛ men nyi ma nsaa nyi kakpa nɛ n shi. Ama mannɛ ŋ gbagba be kumu so so nɛ n wɔ nfe, esa nɛ e shuŋi ma na la Kashenteŋwura nna. Men maŋ nyi mo. 29Ama ma ere nyi mo, ŋkpal manɛ so, mo kutɔ nɛ n shi. Mo alɛ e shuŋi ma.”

30E ka malga le ere nɛ b yɛlga kepɛ mo ndoŋ, ama esa kama maŋ tiŋ n ta enɔ m beta mo, ŋkpal manɛ so, mbe saŋɛ daa maŋ naŋ fo.

31Le be nfɛra e daa wɔ basa na to, ama jimaŋ na to be bedamta malɛ daŋ yirda mo nseŋ bishi abar le: “Menyee tama fanɛ Mesaya na kaŋ ba, e beeŋ ba wora emamachisheŋ damta mo nɛ a chɔ amo nɛ kanyɛn ere bee wora ere a?”

B ka shuŋi basa nɛ b ya pɛ Yesu be asheŋ

32Ndoŋ nna nɛ asheŋ nɛ basa na bee kuli a kaŋɛ Yesu be asheŋ na tɔr Efarisiana na be asoe to. Nɛ bɔrɛmatapowuraana nɛ Efarisiana na shuŋi bɔrɛlambu to be bekumpo fanɛ b ya pɛ Yesu m ba. 33Nɛ Yesu kaŋɛ le: “Ma nɛ menyi maaŋ naa wɔtɔ n chɛr. Meeŋ yɔ esa nɛ e shuŋi ma na kutɔ. 34Menyeeŋ fin ma, ama men maaŋ naŋ wu ma. Kakpa nɛ ma alɛ beeŋ baa wɔ na, menyi alɛ maaŋ tiŋ n yɔ ndoŋ.” 35Ndoŋ nna nɛ Juwebi be benimuana na fara a bishi abar le: “To, nnɛ nɛ kanyɛn ere bee sha keyɔ nɛ anyi ere maaŋ tiŋ n wu mo ere? Ŋko e bee yɔ an peebi nɛ b wɔ Griikebi to na nna nɛ e ya kaa ŋini bumo abɔrɛsheŋ? 36E yɛ: ‘Menyeeŋ fin ma, ama men maaŋ wu ma’, nseŋ naŋ kaŋɛ fanɛ: ‘Menyi maaŋ tiŋ n yɔ kakpa nɛ meeŋ ya kaa wɔ na.’ ”

Nchu nɛ a bee sa ŋkpa na be asheŋ

37Kejigboŋ na be nshɛr na be lalaloge be kachɛ, kumo be kachɛgboŋ na ka fo nɛ Yesu niŋi to n yili ŋ kaŋɛ awɔrso: “Esa kama nɛ achukoŋ kɔ mo, e ba ŋ kutɔ m ba nuu. 38Esa kama nɛ e yirda ma, nchu nɛ a bee sa ŋkpa na e naaŋ ba lar mo to fanɛ kananɛ abɔrɛsibɛ na bee kaŋɛ na.” 39Yesu daŋ malga le nna a ŋini Kiyoyu nɛ bumo nɛ baaŋ yirda mo na beeŋ ba nya kachako na be asheŋ. Amo be saŋɛ na so malɛ kikɛ nɛ b maŋ naŋ shin nɛ Kiyoyu na ba, ŋkpal manɛ so, saŋɛ na so b maŋ naŋ maŋ Yesu so n sa mo kemaŋkura.

40Basa na ka nu mbe mmalga na nɛ bumo be beko kaŋɛ le: “Kashenteŋto, kanyɛn ere e la Anebi na.” 41Nɛ beko malɛ kaŋɛ: “Mesaya na nna.” Ndoŋ nna nɛ beko malɛ bishi: “Nuso nɛ Mesaya na bee wora ashi Galili? 42Abɔrɛsibɛ na bee kaŋɛ fanɛ Ewura Deevid be kanaŋ to nɛ Mesaya na beeŋ shi nɛ b kurge mo ashi Bɛtlɛhɛm, kade nɛ Ewura Deevid daŋ shi na.” 43Amoso, basa na daŋ barga to nna ŋkpal Yesu so. 44Beko daa sha kepɛ mo m mɔ, ama esa kikɛ daa maŋ ta enɔ m beta mo.

Kananɛ Juwebi be bejuŋkparpo maŋ kɔ yirda be asheŋ

45Ade kikɛ be kaman nɛ bɔrɛlambu to be bekumpo na bɛta n yɔ bɔrɛmatapowuraana nɛ Efarisiana na kutɔ nɛ b bishi bekumpo na: “Manɛ e ba nɛ men maŋ bar mo?” 46Nɛ bekumpo na kaŋɛ bumo le: “Kananɛ kanyɛn na bee malga na, esa kikɛ maŋ naŋ malga loŋ.” 47Nɛ Efarisiana na bishi bekumpo na: “E fule menyi alɛ gba nna a? 48Kumo be kaman, men daŋ wu Juwebi be ejuŋkparpo kama ŋko Farisi kama ka yirda mo a? 49To, jimaŋ na to ebi ka maŋ nyi Mosis be mbra na so so nɛ baa yirda mo na, bumo alɛ wɔ kɔnɔso to nna so.” 50Nikodimɔs nɛ e daŋ yɔ n ya wu Yesu kachako na daa la bumo be eko nna nɛ e bishi mo braana le: 51“Anyi be mbra na wɔtɔ fanɛ an kaŋɛ fanɛ esa daga kasogberge nɛ anyi alɛ maŋ nu kusɔ nɛ amodoŋwura kɔ nɛ e kaŋɛ nseŋ naŋ bishi m pin to pɔɛŋ nsaa ji mo demu a?” 52Ndoŋ nna nɛ mo braana na bishi mo le: “Fo alɛ gba shi Galili nna a? Kraŋ abɔrɛsibɛ na, feeŋ wu fanɛ anebi kikɛ maa lar Galili.”

Kache nɛ b pɛ kesakalea to na be asheŋ

53Ade be kaman nɛ ekama yɔ mo pe.

Currently Selected:

Jɔn 7: GJNb

Highlight

Copy