Jɔn 6

Yesu ka sa basa ŋgboŋ anu ajibi be asheŋ

(Matiu 14:13-21; Maak 6:30-44; Luuk 9:10-17)

1Asheŋ ere be kaman nɛ Yesu yɔ Galili be kepagboŋ na be kaba so ndoŋ. Teku koŋwule na nɛ baa tre Taibɛrias be kepagboŋ na. 2Ndoŋ nna nɛ jimaŋ damta ko muu m bɛ mo so ŋkpal kechɛ basa be alɔ be emamachisheŋ damta nɛ b daŋ wu e ka daa wora na so so. 3Ndoŋ nna nɛ Yesu dii kebee ko n yɔ nɛ mo nɛ mbe bebɛsopo ya chena. 4Kumo be kamɔnchɛ nɛ Juwebi be Kebansonchoŋ be daŋkare be kejigboŋ bee taga to. 5Yesu ka chena kebee na so nseŋ wu jimaŋ ko ka bee ba mo kutɔ nɛ e bishi Filip: “Filip, nnɛ nɛ anyeeŋ nya bodobodo n tɔ n sa basa ere nɛ b ji?” 6Yesu daŋ kute nna m bishi Filip loŋ, ŋkpal manɛ so, e daa nyi kusɔ nɛ e daa sha nɛ e wora gba nseŋ bishi mo loŋ na. 7Ndoŋ nna nɛ Filip kaŋɛ mo le: “Cha, pɔŋ alfa anyɔ gba be bodobodo maaŋ fo basa ere kikɛ nɛnɛ.” 8Ndoŋ nna nɛ mbe bebɛsopo na be emo nɛ baa tre Andru, Saimɔn Pita mo sipo na kaŋɛ: 9“Kebia ko wɔ nfe a kɔ ayunyifu be ebodobodo anu nɛ ekɔrɔtɔ anyɔ, ama manɛ nɛ a beeŋ tiŋ n wora n sa basa damta ere?” 10Nɛ Yesu kaŋɛ mbe bebɛsopo na le: “Men shin nɛ basa na e chena kasawule.” Afitiri damta ko malɛ daa wɔ ndoŋ nna nɛ basa na kikɛ chena amo so. B daa sa fanɛ benyɛn ŋgboŋ anu. 11Ndoŋ nna nɛ Yesu ta ebodobodo na nseŋ di Ebɔrɛ epaŋ nseŋ fara a sa basa nɛ b daŋ chena ndoŋ na. Loŋ koŋwule na nɛ e daŋ ta kɔrɔtɔ na gba n wora. Kanaŋkamaso nɛ ekama daa beeŋ tiŋ n we nɛ e we m moɛ. 12Basa na kikɛ ka baŋ we m moɛ nɛ Yesu kaŋɛ mbe bebɛsopo na: “Men tise n tise ejiŋka na nsaa maŋ shin nɛ shɛŋ shɛŋ e to jiga.” 13Ndoŋ nna nɛ b tise n tise ayunyifu be bodobodo nɛ basa na daŋ we ŋ ka na m bɔlɔ nlantaŋɛ kuduanyɔ. 14Basa na ka wu mamachi be kesheŋ nɛ e daŋ wora na nɛ b fara a kaŋɛ: “Kashenteŋto, Anebi mo nɛ e beeŋ ba durnya ere to na nna na.”

15Yesu ka pin fanɛ b daa sha kebaata mo katinso nna m buu mo kuwura nɛ e bɔl bumo to n naŋ lar mo nawule n yɔ kebeebi ko so.

Yesu ka nite nchu so be asheŋ

(Matiu 14:22-33; Maak 6:45-52)

16Kaase ka fo nɛ mbe bebɛsopo na malɛ yɔ kepagboŋ na ase 17n ya luri ekuloŋ ko to n dii kepagboŋ na a yɔ Kapɛɛniam, kepagboŋ na be kaba ndoŋ. B ta loŋ hale nɛ kaboŋ ya kaa pɛ anishi nɛ Yesu maŋ naŋ ba bumo kutɔ. 18B wɔ nchu na so nna nɛ afugboŋ ko fara a ber a baga nchu na to. 19B ka far ekuloŋ na loŋ fanɛ emayɛl asa ŋko ana n yɔ anishito nɛ b wu Yesu nɛ e na nchu na so a ba ekuloŋ na akpa nɛ kufu pɛ bumo ga. 20Nɛ e kaŋɛ bumo le: “Ma nna, men sa maa lɔ kufu.” 21Ndoŋ nna nɛ b daa sha keta mo ekuloŋ na to, epul na malɛ to nɛ ekuloŋ na teŋ fo kedeŋiso.

Basa na ka fin Yesu be asheŋ

22Kumo be ŋklade nɛ jimaŋ nɛ b daŋ shir a wɔ kepagboŋ na be kaba ndoŋ na wu fanɛ ekuloŋ koŋwule e ka ndoŋ nseŋ naŋ pin fanɛ mannɛ Yesu nɛ mbe bebɛsopo e yɔ, bumo nawule e daŋ yɔ. 23Taibɛrias be ekuloŋ ko malɛ daŋ ba kaa yil kepagboŋ na be ekarso a mata kakpa nɛ Yesu daŋ di Ebɔrɛ epaŋ nseŋ sa basa na ajibi na. 24Amoso, jimaŋ na ka maŋ wu Yesu ŋko mbe bebɛsopo ndoŋ na nɛ b luri ekuloŋana na to a yɔ Kapɛɛniam nɛ b ya fin Yesu.

Yesu ka la ŋkpa be bodobodo be asheŋ

25B ka ya wu mo kepagboŋ na be kaba ere so ndoŋ nɛ b bishi mo: “Eŋinipo, saŋɛ mo nɛ fo fo nfe?” 26Nɛ Yesu kaŋɛ bumo le: “Ma e kaŋɛ menyi kashenteŋto na fanɛ, mannɛ emamachisheŋ nɛ men wu na so nɛ menyee fin ma, ama men ka we ebodobodo na ŋ kukwe kananɛ menyee sha na so e shin nɛ menyee fin ma na. 27Men sa maa kɔ a fin ajibi nɛ a bee jija ere, men baa kɔ a fin ajibi nɛ a bee sa ŋkpa nɛ k maŋ kɔ ekar na. Ma, Nyiŋgbasa Pibinyɛn e naa sa loŋ be ajibi na, ŋkpal manɛ so, Ebɔrɛ Etuto na e ŋini fanɛ mbe kenyi wɔ ma so.” 28Nɛ b bishi mo: “To, nɛ manɛ nɛ anyeeŋ wora n tiŋ n shuŋ Ebɔrɛ be ashuŋ?” 29Nɛ Yesu kaŋɛ bumo le: “Ebɔrɛ be kushuŋ e la keyirda esa nɛ e shuŋi na.” 30Ndoŋ nna nɛ b bishi mo: “To, nɛ nuso be mamachi be kesheŋ nɛ feeŋ wora n sa anyi nɛ an wu nseŋ yirda fo? Manɛ nɛ feeŋ wora? 31An nanaana daŋ ji ajibi nɛ baa tre manna na nna ashi kiyi to, loŋ malɛ nɛ abɔrɛsibɛ na bee kaŋɛ fanɛ: ‘Ebɔrɛ daŋ shin nɛ bodobodo shi ebɔrɛso nna m ba sa bumo nɛ b we.’ ”

32Nɛ Yesu kaŋɛ bumo: “Men keni, kashenteŋ nɛ mee kaŋɛ menyi na fanɛ mannɛ Mosis e daŋ sa menyi ebɔrɛso be bodobodo na. N Tuto e naa sa menyi kashenteŋ be bodobodo nɛ k bee shi ebɔrɛso na. 33Ŋkpal manɛ so, Ebɔrɛ be bodobodo na e la bodobodo nɛ k shi ebɔrɛso m ba kaa sa durnya ŋkpa na.” 34Ndoŋ nna nɛ b kaŋɛ Yesu le: “Ebunyampo, kumo ere, yili kabre a yɔ, baa sa anyi loŋ be bodobodo na.” 35Nɛ Yesu kaŋɛ bumo: “Ma e la loŋ be bodobodo nɛ k bee sa ŋkpa na. Ekama nɛ e ba ŋ kutɔ, akoŋ maaŋ pɛ mo kikɛ nɛ ekama nɛ e yirda ma, achukoŋ malɛ maaŋ pɛ mo. 36Ama n teŋ kaŋɛ menyi kumo fanɛ men wu ma, ama menyi alɛ kraa maŋ yirda. 37Esa kama nɛ n Tuto na ta m bɔɔ ma enɔ beeŋ ba ŋ kutɔ nɛ ekama malɛ nɛ e ba ŋ kutɔ, m maaŋ ju mo n lɛ kikɛ. 38Ŋkpal manɛ so, n shi ebɔrɛso nna m ba nɛ m ba wora esa nɛ e shuŋi ma na be aparsheŋ, mannɛ ŋ gbagba be aparsheŋ so e shin nɛ m ba. 39Esa nɛ e shuŋi ma na malɛ be aparsheŋ nde fanɛ n sa maŋ kaŋ paŋ basa nɛ e ta m bɔɔ ma enɔ na kikɛ be ekama, ama e yili kumo nna fanɛ n tiŋi bumo ashi luwu to lalaloge be kachɛ na. 40Ŋkpal manɛ so, n Tuto be aparsheŋ e la fanɛ esa kama nɛ e wu ma, Nyiŋgbasa Pibinyɛn na nseŋ yirda, amodoŋwura beeŋ nya ŋkpa nɛ k maŋ kɔ ekar na nɛ n tiŋi mo ashi luwu to lalaloge be kachɛ na.”

41Ndoŋ nna nɛ Juwebi na fara a malga a gbiti mo ŋkpal e ka kaŋɛ fanɛ: “Ma e la bodobodo nɛ k shi ebɔrɛso m ba na” so. 42B yɛ: “Mannɛ mo e la Yesu, Josɛf pibi na a? To, an nyi mo tuto nɛ mo nio nɛ a ji nuso nna nɛ e bee kaŋɛ mbe kumu fanɛ: ‘Ebɔrɛso nɛ n shi m ba?’ ” 43Ndoŋ nna nɛ Yesu kaŋɛ bumo le: “Men yige kebaamalga le be asheŋ a sa abar.

44Esa kama maaŋ tiŋ m ba ma kutɔ ama Etuto nɛ e shuŋi ma na baŋ bar mo ŋ kutɔ nna, ma alɛ beeŋ tiŋi amodoŋwura ashi luwu to lalaloge be kachɛ na. 45Anebiana na be nsibɛ na to bee kaŋɛ fanɛ: ‘Ebɔrɛ beeŋ ŋini basa kikɛ asheŋ.’ Ekama nɛ e bee nu kusɔ nɛ Etuto na bee kaŋɛ nseŋ naa koya asheŋ ashi mo kutɔ bee ba ŋ kutɔ nna. 46Ama mannɛ fanɛ esa daŋ wu Etuto na kenishiso nna. Emo nɛ e shi Ebɔrɛ na kutɔ na nawule e wu Etuto na. 47Ma e kaŋɛ menyi kashenteŋto na fanɛ ekama nɛ e yirda ma kɔ ŋkpa nɛ k maŋ kɔ ekar na.

48Ma e la bodobodo nɛ k bee sa ŋkpa na. 49Men nananyɛnana daŋ we manna kiyi to ŋkeshin nɛ bumo alɛ daŋ wu. 50Ama bodobodo nɛ k shi ebɔrɛso m ba nɛ esa e we a maaŋ wu na nde. 51Ma e la bodobodo nɛ k bee sa ŋkpa n shi ebɔrɛso na. Esa kama nɛ e we le be bodobodo ere beeŋ baa wɔtɔ mbaanaayɔ. Bodobodo mo nɛ meeŋ ta n sa basa na e la ma eyur ere nɛ ŋ kɔ a sa durnya nɛ k nya ŋkpa na.”

52Ndoŋ nna nɛ Juwebi na fara a bile asheŋ agboso a kaŋɛ: “Nuso nɛ le be esa bee wora a sa anyi mbe eyur nɛ an we?” 53Nɛ Yesu kaŋɛ bumo: “Ma e kaŋɛ menyi kashenteŋto na fanɛ nɛ men baa maŋ we Nyiŋgbasa Pibinyɛn na be eyur na nseŋ nuu mbe ŋklaŋ na, men maaŋ nya ŋkpa. 54Esa kama nɛ e bee we ma eyur na nsaa nuu ma ŋklaŋ na kɔ ŋkpa nɛ k maŋ kɔ ekar na. Ma alɛ beeŋ tiŋi mo ashi luwu to lalaloge be kachɛ na, 55ŋkpal manɛ so, ma eyur ere la ajibi gbagba nna nɛ ma ŋklaŋ malɛ la asɔnuuso gbagba. 56Esa kama malɛ nɛ e we ma eyur ere nseŋ nuu ma ŋklaŋ wɔ ma to nna nɛ ma alɛ gba wɔ mo to. 57Kananɛ Etuto nɛ e bee sa ŋkpa na baŋ shuŋi ma nɛ n wɔ ŋkpa to ŋkpal Etuto na so na, loŋ koŋwule na nɛ esa kama nɛ e we ma eyur na malɛ gba beeŋ baa wɔ ŋkpa to ŋkpal ma so. 58Bodobodo nɛ k shi ebɔrɛso m ba na nde. An nananyɛnana daŋ we manna nna, ama b wu. Ama esa kama nɛ e we le be bodobodo beeŋ baa wɔ ŋkpa to hale mbaanaayɔ.”

59Yesu daa wɔ Kapɛɛniam be nshɛrbu to nna a ŋini basa abɔrɛsheŋ nseŋ malga kesheŋ ere.

Bebɛsopo damta ka shile Yesu be asheŋ

60Mbe bebɛsopo damta ko ka nu kesheŋ nɛ e malga na nɛ b kaŋɛ abar le: “Cha, keŋini ere bre la kesheŋ kpakpaso nna, wanɛ e naaŋ tiŋ n sɔ kumo?” 61Yesu ka pin fanɛ mbe bebɛsopo daa bile asheŋ nna ŋkpal kesheŋ na so nɛ e bishi bumo: “Kesheŋ nɛ m malga na bee pɔ menyi aba nna ŋko? 62To, nɛ men daŋ wu ma, Nyiŋgbasa Pibinyɛn ka bɛta a yɔ ebɔrɛso, kakpa nɛ n daa wɔ na ai? 63Kiyoyu na bee sa ŋkpa nna, ama eyur ere bre maaŋ tiŋ n wora shɛŋ. Mmalga nɛ m malga n sa menyi ere e naa shin nɛ menyee nya Kiyoyu nɛ e bee sa ŋkpa na. 64Ama menyi to be beko maŋ yirda.” Yesu daŋ kaŋɛ loŋ nna, ŋkpal manɛ so, sososo na kikɛ e daa nyi bumo nɛ b maŋ yirda nɛ emo nɛ e beeŋ debɔr mo. 65Kumo be kaman nɛ e naŋ kaŋɛ le: “Amoso nɛ n daŋ kaŋɛ menyi fanɛ esa kama maaŋ tiŋ m ba ŋ kutɔ ama Etuto na e naaŋ shin nɛ amodoŋwura na e ba na.”

66Baŋ yili kumo be jemanɛ na so a yɔ nɛ mbe bebɛsopo na be bedamta lar mo kaman m bɛ mo so ŋ gben.

Pita ka kaŋɛ Yesu e la Ebɔrɛ be Esa cheembi na be asheŋ

67Nɛ Yesu kilgi m bishi bebɛsopo kuduanyɔ na le: “Menyi alɛ gba bee sha keyɔ nna ŋko?” 68Ndoŋ nna nɛ Saimɔn Pita kaŋɛ mo: “Enyɛnpe, fo e kɔ ŋkpa nɛ k maŋ kɔ ekar na be mmalga. 69To, nɛ wanɛ malɛ kutɔ nɛ anyeeŋ naŋ yɔ? Anyi ere yirda nsaa nyi fanɛ fo e la Ebɔrɛ be Esa cheembi na.” 70Nɛ Yesu kaŋɛ: “Kashenteŋto, ma e lara menyi basa kuduanyɔ ere, ama menyi to be eko la alubipo nna.” 71Judas, Saimɔn Iskareɔt pibi nɛ e daa de na, ŋkpal manɛ so, bebɛsopo kuduanyɔ na to be eko e daa la mo, ama mo e daa shin nɛ e ba debɔr Yesu kacha ko.

Currently Selected:

Jɔn 6: GJNb

Highlight

Copy