ໂຣມ 3
3
1ຖ້າຢ່າງນັ້ນ ຄົນຢິວຈະໄດ້ປຽບກວ່າຄົນຕ່າງຊາດຢ່າງໃດ? ຫລືການຮັບພິທີຕັດມີປະໂຫຍດອັນໃດ? 2ກໍມີປະໂຫຍດຫລາຍໃນທຸກສິ່ງ ເປັນຕົ້ນວ່າພຣະເຈົ້າໄດ້ມອບພຣະຄຳໂອວາດຂອງພຣະອົງໃຫ້ຊາວຢິວຖືຮັກສາ. 3ເຖິງແມ່ນມີບາງຄົນບໍ່ສັດຊື່ ຄວາມບໍ່ສັດຊື່ຂອງພວກເຂົານັ້ນ ຈະເຮັດໃຫ້ຄວາມສັດຊື່ຂອງພຣະເຈົ້າເສຍປະໂຫຍດຫລື? 4ບໍ່ເປັນຢ່າງນັ້ນດອກ ພຣະເຈົ້າກ່າວແຕ່ຄວາມຈິງ ເຖິງແມ່ນວ່າມະນຸດທຸກຄົນເວົ້າຕົວະກໍຕາມ, ດັ່ງທີ່ມີຄຳຂຽນໄວ້ໃນພຣະຄຳພີວ່າ,
“ເພື່ອພຣະອົງຈະໄດ້ປາກົດວ່າ
ຊົງເປັນຜູ້ທ່ຽງທຳ
ໃນຖ້ອຍຄຳທັງຫລາຍຂອງພຣະອົງ
ແລະຊົງມີໄຊເມື່ອພວກເຂົາກ່າວໂທດໃສ່ພຣະອົງ.”
5ແຕ່ຖ້າວ່າຄວາມຊົ່ວຂອງພວກເຮົາ ເປັນເຫດຊີ້ໃຫ້ເຫັນຄວາມຍຸດຕິທຳຂອງພຣະເຈົ້າແລ້ວ ພວກເຮົາຈະວ່າຢ່າງໃດ? ຈະວ່າພຣະເຈົ້າລົງໂທດບໍ່ຍຸດຕິທຳຢ່າງນັ້ນບໍ່? (ເຮົາເວົ້າຢ່າງມະນຸດ). 6ບໍ່ແມ່ນຢ່າງນັ້ນດອກ, ຖ້າເປັນເຊັ່ນນັ້ນແລ້ວ ພຣະເຈົ້າຈະຊົງພິພາກສາໂລກໄດ້ຢ່າງໃດ?
7ແຕ່ຖ້າວ່າຄວາມຕົວະຂອງເຮົາ ເປັນເຫດໃຫ້ເຫັນຄວາມທ່ຽງທຳຂອງພຣະເຈົ້າໄດ້ປາກົດແຈ້ງຄັກ ແລະເປັນທີ່ໃຫ້ເກີດກຽດຕິຍົດແກ່ພຣະອົງ ເປັນຫຍັງເຮົາຈຶ່ງຖືກຊົງລົງໂທດເໝືອນຄົນຜິດບາບຜູ້ໜຶ່ງ? 8ຖ້າດັ່ງນັ້ນ ເປັນຫຍັງເຮົາຈຶ່ງບໍ່ເຮັດຊົ່ວ ເພື່ອຄວາມດີຈະເກີດຂຶ້ນຈາກຄວາມຊົ່ວນັ້ນ ຕາມທີ່ມີບາງຄົນໄດ້ໝິ່ນປະໝາດ ແລະກ່າວຫາວ່າເຮົາໃນທຳນອງນີ້ແລ້ວ ການລົງໂທດຄົນຢ່າງນັ້ນກໍຍຸດຕິທຳແລ້ວ.
ບໍ່ມີຜູ້ໃດເປັນຄົນຊອບທຳ
9ຖ້າເປັນດັ່ງນັ້ນແລ້ວ ພວກເຮົາຄົນຢິວໄດ້ປຽບກວ່າຄົນຕ່າງຊາດຊັ້ນບໍ? ບໍ່ເປັນຢ່າງນັ້ນດອກ ເພາະເຮົາກໍໄດ້ຊີ້ໃຫ້ເຫັນແລ້ວວ່າ ມະນຸດທຸກຄົນທັງຄົນຢິວແລະຄົນຕ່າງຊາດ ກໍຢູ່ໃຕ້ອຳນາດຂອງຄວາມຜິດບາບເໝືອນກັນທຸກຄົນ. 10ຕາມທີ່ມີຄຳຂຽນໄວ້ໃນພຣະຄຳພີວ່າ,
“ບໍ່ມີຄົນຊອບທຳ
ຈັກຄົນໜຶ່ງຄົນດຽວ.
11 ບໍ່ມີຄົນທີ່ເຂົ້າໃຈ
ບໍ່ມີຄົນທີ່ສະແຫວງຫາພຣະເຈົ້າ.
12 ແຕ່ທຸກຄົນໄດ້ຫັນໜີຈາກພຣະເຈົ້າ
ພາກັນເປັນຄົນຊົ່ວໄປໝົດ
ຜູ້ເຮັດການດີບໍ່ມີຈັກຄົນດຽວ”
13 “ລຳຄໍຂອງພວກເຂົານັ້ນ
ເປັນດັ່ງຂຸມຝັງສົບທີ່ໄຂຢູ່
ພວກເຂົາໃຊ້ລີ້ນຂອງພວກເຂົາ
ໃນການລໍ້ລວງ”
“ມີພິດງູຮ້າຍຢູ່ໃຕ້ຮີມປາກຂອງພວກເຂົາ”
14 “ປາກຂອງພວກເຂົາເຕັມໄປດ້ວຍ
ຄຳປ້ອຍດ່າ ແລະ ຄຳຂົມຂື່ນ”
15 “ຕີນຂອງພວກເຂົາວ່ອງໄວ
ໃນການເຮັດໃຫ້ນອງເລືອດ,
16 ໃນທາງທີ່ພວກເຂົາເດີນໄປ
ມີແຕ່ຄວາມຈິບຫາຍ
ແລະຄວາມທຸກໂສກ.
17 ແລະພວກເຂົາບໍ່ຮູ້ຈັກ
ທາງແຫ່ງສັນຕິສຸກນັ້ນ”
18 “ພວກເຂົາບໍ່ເຄີຍຄິດທີ່ຈະຢຳເກງພຣະເຈົ້າ.”
19ແຕ່ເຮົາທັງຫລາຍຮູ້ຢູ່ວ່າ ກົດບັນຍັດທຸກຂໍ້ທີ່ໄດ້ກ່າວນັ້ນກໍກ່າວແກ່ຄົນເຫຼົ່ານັ້ນ ທີ່ຢູ່ໃຕ້ກົດບັນຍັດເພື່ອອັດປາກທຸກຄົນ ແລະເພື່ອໃຫ້ມະນຸດທຸກຄົນໃນໂລກ ຢູ່ໃຕ້ການພິພາກສາຂອງພຣະເຈົ້າ. 20ເພາະວ່າ ໃນສາຍຕາຂອງພຣະເຈົ້າແລ້ວ ບໍ່ມີມະນຸດຄົນໃດຈະຊົງຖືວ່າເປັນຄົນຊອບທຳດ້ວຍການເຮັດຕາມກົດບັນຍັດ, ເພາະວ່າ ກົດບັນຍັດໄດ້ເຮັດໃຫ້ສັງເກດຮູ້ຈັກຄວາມບາບ.
ຄວາມຊອບທຳໂດຍທາງຄວາມເຊື່ອ
21ແຕ່ບັດນີ້ ພຣະເຈົ້າໄດ້ຊົງຊີ້ໃຫ້ເຫັນວ່າ ມະນຸດເປັນຄົນຊອບທຳຕໍ່ໜ້າພຣະອົງໄດ້ ໂດຍບໍ່ອີງໃສ່ກົດບັນຍັດ, ກົດບັນຍັດ ແລະຜູ້ທຳນວາຍກໍເປັນພະຍານເຖິງເລື່ອງນີ້. 22ຄືຄວາມຊອບທຳທີ່ມາຈາກພຣະເຈົ້າ ຊຶ່ງຊົງປະທານແກ່ຜູ້ທີ່ເຊື່ອທຸກຄົນ ດ້ວຍອາໄສຄວາມເຊື່ອໃນພຣະເຢຊູຄຣິດເຈົ້າ ເພາະວ່າ ຄົນທັງຫລາຍສະເໝີກັນທຸກຄົນ. 23ດ້ວຍວ່າ, ທຸກຄົນໄດ້ເຮັດຜິດບາບ ແລະຂາດຈາກພຣະຣັດສະໝີຂອງພຣະເຈົ້າ; 24ແຕ່ດ້ວຍພຣະຄຸນອັນບໍ່ຄິດຄ່າຂອງພຣະເຈົ້າ ພວກເຂົາຈຶ່ງເປັນຄົນຊອບທຳຕໍ່ໜ້າພຣະອົງ ໂດຍທາງພຣະເຢຊູຄຣິດເຈົ້າ ຜູ້ທີ່ປົດປ່ອຍພວກເຂົາໃຫ້ເປັນອິດສະຫລະ. 25ທີ່ພຣະເຈົ້າໄດ້ຊົງໃຫ້ປາກົດນັ້ນ ເພື່ອໃຫ້ເປັນຜູ້ໄຖ່ໂທດແທນບາບກຳ ໂດຍຄວາມເຊື່ອໃນພຣະໂລຫິດຂອງພຣະອົງ ອັນນີ້ກໍເພື່ອສະແດງໃຫ້ເຫັນຄວາມຍຸດຕິທຳຂອງພຣະເຈົ້າ ໃນການທີ່ພຣະອົງໄດ້ຊົງອົດກັ້ນພຣະໄທໄວ້ ແລະບໍ່ໄດ້ຊົງລົງໂທດມະນຸດທີ່ໄດ້ເຮັດຜິດໄປແລ້ວນັ້ນ 26ແລະເພື່ອຈະຊົງສຳແດງໃນປະຈຸບັນວ່າ ພຣະອົງຊົງເປັນຜູ້ຍຸດຕິທຳ ແລະຊົງໂຜດຜູ້ທີ່ເຊື່ອໃນພຣະເຢຊູເຈົ້າເປັນຜູ້ຊອບທຳດ້ວຍ.
27ເມື່ອເປັນຢ່າງນັ້ນແລ້ວ ເຮົາຈະເອົາອັນໃດມາອວດກໍໝົດຫົນທາງ ຈະອ້າງຫລັກອັນໃດວ່າໝົດຫົນທາງ ຈະອ້າງຫລັກການປະຕິບັດຕາມກົດບັນຍັດຫລື? ບໍ່ແມ່ນດອກ ແຕ່ຕ້ອງອ້າງເອົາຫລັກຂອງຄວາມເຊື່ອ. 28ໂດຍພວກເຮົາເຫັນວ່າ ຄົນໜຶ່ງຄົນໃດຈະຖືວ່າຊອບທຳໄດ້ ກໍຕ້ອງອາໄສຄວາມເຊື່ອ ນອກຈາກການປະຕິບັດຕາມກົດບັນຍັດ. 29ຫລືວ່າ ພຣະເຈົ້ານັ້ນເປັນພຣະເຈົ້າຂອງຄົນຢິວເທົ່ານັ້ນບໍ? ພຣະອົງບໍ່ໄດ້ເປັນພຣະເຈົ້າຂອງຄົນຕ່າງຊາດດ້ວຍບໍ? ແມ່ນແລ້ວ ພຣະອົງເປັນພຣະເຈົ້າຂອງຄົນຕ່າງຊາດດ້ວຍ. 30ດ້ວຍວ່າ, ມີພຣະເຈົ້າພຽງແຕ່ອົງດຽວ ພຣະອົງຈະໃຫ້ຄົນຢິວເປັນຄົນຊອບທຳໂດຍຄວາມເຊື່ອຂອງພວກເຂົາ ແລະໃຫ້ຄົນຕ່າງຊາດເປັນຄົນຊອບທຳ ໂດຍຄວາມເຊື່ອຂອງພວກເຂົາເໝືອນກັນ. 31ຖ້າຢ່າງນັ້ນ ພວກເຮົາຈະລຶບລ້າງກົດບັນຍັດດ້ວຍຄວາມເຊື່ອຫລື? ບໍ່ແມ່ນຢ່າງນັ້ນດອກ ແຕ່ພວກເຮົາຍັງເປັນຜູ້ສະໜັບສະໜູນກົດບັນຍັດອີກ.
Currently Selected:
ໂຣມ 3: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.
