ຟີລິບປອຍ 4

ຈົ່ງຊົມຊື່ນຍິນດີໃນອົງພຣະຜູ້ເປັນເຈົ້າ

1ເຫດສະນັ້ນ ພີ່ນ້ອງທັງຫລາຍຂອງເຮົາເອີຍ ຜູ້ເປັນທີ່ປາຖະໜາ ເປັນທີ່ຍິນດີ ແລະເປັນມົງກຸດຂອງເຮົາ ພວກທີ່ຮັກຂອງເຮົາເອີຍ ຈົ່ງຕັ້ງໝັ້ນຢູ່ໃນອົງພຣະຜູ້ເປັນເຈົ້າ. 2ເຮົາຂໍເຕືອນນາງຢູໂອເດຍ ແລະ ນາງຊີນຕີເຂ ເຮົາຂໍຮ້ອງພວກເຈົ້າໃຫ້ຖືກຕ້ອງປອງດອງກັນ ເໝືອນຢ່າງເອື້ອຍນ້ອງໃນອົງພຣະຜູ້ເປັນເຈົ້າ. 3ເຮົາຂໍຮ້ອງພວກເຈົ້າ ຜູ້ເປັນເພື່ອນຮ່ວມງານທີ່ສັດຊື່ຂອງເຮົາແທ້ໆ ເຮົາຢາກໃຫ້ເຈົ້າຊ່ວຍເຫລືອຍິງທັງສອງຄົນນີ້ ເພາະພວກເຂົາໄດ້ເຮັດວຽກຢ່າງໜັກໜ່ວງກັບເຮົາ ໃນວຽກງານຂ່າວປະເສີດຮ່ວມກັບກະເລເມ ແລະເພື່ອນຮ່ວມງານຄົນອື່ນໆຂອງເຮົາດ້ວຍ ຊຶ່ງຊື່ຂອງເຂົາທັງຫລາຍມີຢູ່ໃນທະບຽນແຫ່ງຊີວິດແລ້ວ.

4ຈົ່ງຊົມຊື່ນຍິນດີໃນອົງພຣະຜູ້ເປັນເຈົ້າທຸກເວລາ ເຮົາຂໍຢໍ້າອີກວ່າ ຈົ່ງຊົມຊື່ນຍິນດີເທີ້ນ.

5ຈົ່ງໃຫ້ໃຈອ່ອນສຸພາບຂອງເຈົ້າທັງຫລາຍປາກົດແກ່ຄົນທັງປວງ ອົງພຣະຜູ້ເປັນເຈົ້າຊົງຢູ່ໃກ້ແລ້ວ. 6ຢ່າທຸກຮ້ອນໃຈດ້ວຍສິ່ງໃດເລີຍ ແຕ່ຈົ່ງທູນເລື່ອງຄວາມປາຖະໜາທຸກຢ່າງຂອງພວກເຈົ້າ ຕໍ່ພຣະເຈົ້າດ້ວຍການພາວັນນາອະທິຖານ ດ້ວຍການອ້ອນວອນທູນຂໍ ແລະດ້ວຍຈິດໃຈໂມທະນາຂອບພຣະຄຸນ. 7ແລ້ວສັນຕິສຸກອັນມາແຕ່ພຣະເຈົ້າ ຊຶ່ງເກີນຄວາມເຂົ້າໃຈ ຈະເຝົ້າຮັກສາຈິດໃຈ ແລະຄວາມຄິດຂອງເຈົ້າທັງຫລາຍ ໄວ້ໃນພຣະຄຣິດເຈົ້າເຢຊູ.

8ພີ່ນ້ອງທັງຫລາຍເອີຍ ໃນທີ່ສຸດນີ້ ສິ່ງໃດທີ່ສັດຈິງ ສິ່ງໃດທີ່ໜ້ານັບຖື ສິ່ງໃດທີ່ຍຸດຕິທຳ ສິ່ງໃດທີ່ບໍຣິສຸດ ສິ່ງໃດທີ່ໜ້າຮັກ ສິ່ງໃດທີ່ໜ້າຍິນດີ ສິ່ງໃດທີ່ລໍ້າເລີດ ແລະຖ້າມີສິ່ງໃດຄວນແກ່ການສັນລະເສີນ ຈົ່ງພິຈາລະນາເຖິງສິ່ງເຫຼົ່ານັ້ນ. 9ຈົ່ງເຮັດທຸກສິ່ງທີ່ພວກເຈົ້າໄດ້ຮຽນຮູ້ ໄດ້ຮັບໄວ້ ໄດ້ຍິນແລະໄດ້ເຫັນໃນເຮົາແລ້ວ ແລະພຣະເຈົ້າຜູ້ຊົງໂຜດປະທານສັນຕິສຸກ ຈະຊົງສະຖິດຢູ່ນຳເຈົ້າທັງຫລາຍ.

ໂປໂລຂອບໃຈສຳລັບຂອງຝາກ

10ໃນອົງພຣະຜູ້ເປັນເຈົ້າຂອງເຮົານັ້ນ ເຮົາຊົມຊື່ນຍິນດີຫລາຍ ເພາະໃນທີ່ສຸດ ພວກເຈົ້າກໍໄດ້ລະນຶກເຖິງເຮົາອີກ ເຮົາບໍ່ໄດ້ໝາຍຄວາມວ່າພວກເຈົ້າເຊົາເປັນຫ່ວງເຮົາແລ້ວ ແຕ່ພວກເຈົ້າຍັງບໍ່ໄດ້ມີໂອກາດສະແດງອອກເທົ່ານັ້ນ. 11ເຮົາບໍ່ໄດ້ຈົ່ມເຖິງເລື່ອງການຂັດສົນ ເພາະເຮົາຈະມີຖານະຢ່າງໃດກໍຕາມ ເຮົາກໍຮຽນຮູ້ແລ້ວທີ່ຈະພໍໃຈຢູ່ຢ່າງນັ້ນ. 12ເຮົາຮູ້ຈັກທີ່ຈະປະສົບກັບການຕົກຕໍ່າ ແລະຮູ້ຈັກທີ່ຈະປະສົບກັບຄວາມອຸດົມສົມບູນ ບໍ່ວ່າໃນກໍລະນີໃດໆ ເຮົາໄດ້ຮຽນຮູ້ເຖິງແງ່ຄວາມລັບ ທີ່ຈະປະສົບກັບຄວາມອີ່ມທ້ອງແລະຄວາມອຶດຢາກ ຄວາມສົມບູນພູນສຸກແລະຄວາມຂັດສົນ. 13ເຮົາສາມາດສູ້ກັບທຸກສິ່ງໄດ້ໂດຍພຣະອົງຜູ້ຊົງຊູກຳລັງເຮົາ.

14ເຖິງປານນັ້ນ ກໍເປັນຄວາມກະລຸນາຂອງເຈົ້າທັງຫລາຍ ທີ່ໄດ້ຮ່ວມທຸກກັບເຮົາ. 15ພວກເຈົ້າຊາວຟີລິບປອຍເອີຍ, ພວກເຈົ້າກໍຮູ້ດີຢູ່ວ່າ ການປະກາດຂ່າວປະເສີດໃນຄັ້ງທຳອິດນັ້ນ ຄືເມື່ອເຮົາໄດ້ຈາກແຂວງມາເກໂດເນຍໄປນັ້ນ ແມ່ນພວກເຈົ້າຄຣິສຕະຈັກດຽວເທົ່ານັ້ນ ທີ່ຊ່ວຍເຫລືອເຮົາ ມີແຕ່ພວກເຈົ້າເທົ່ານັ້ນ ທີ່ມີສ່ວນຮ່ວມໃນລາຍໄດ້ລາຍຈ່າຍກັບເຮົາ. 16ເມື່ອເຮົາຢູ່ໃນເມືອງເທສະໂລນິກ ຂະນະທີ່ເຮົາມີຄວາມຂັດສົນ ພວກເຈົ້າກໍໄດ້ສົ່ງຂອງໄປຊ່ວຍເຮົາຫລາຍກວ່າໜຶ່ງຄັ້ງ. 17ບໍ່ແມ່ນວ່າເຮົາປາຖະໜາຈະໄດ້ຮັບຂອງຖວາຍຈາກເຈົ້າທັງຫລາຍ ແຕ່ເຮົາປາຖະໜາຢາກໃຫ້ພວກເຈົ້າ ໄດ້ຜົນກຳໄລເພີ່ມຂຶ້ນໃນບັນຊີຂອງພວກເຈົ້າ. 18ເຮົາໄດ້ຮັບຄົບຈຳນວນ ແລະມີບໍຣິບູນຢູ່ແລ້ວ ເຮົາກໍອີ່ມເຕັມໃຈຢູ່ ເພາະໄດ້ຮັບຂອງຈາກເອປາໂຟດີໂຕ ຊຶ່ງເຈົ້າທັງຫລາຍສົ່ງໄປໃຫ້ ເປັນຂອງຖວາຍທີ່ມີກິ່ນຫອມຫວານ ເປັນເຄື່ອງບູຊາທີ່ຊົງໂຜດຮັບ ແລະເປັນທີ່ພໍພຣະໄທພຣະເຈົ້າ. 19ແລະພຣະເຈົ້າຂອງເຮົາຈະຊົງໂຜດປະທານສາລະພັດ ທີ່ພວກເຈົ້າຂາດຢູ່ນັ້ນ ຈາກຊັບອັນຮຸ່ງເຮືອງຂອງພຣະອົງໃນພຣະຄຣິດເຈົ້າເຢຊູ. 20ຂໍໃຫ້ພຣະກຽດຕິຍົດ ຈົ່ງມີແກ່ພຣະເຈົ້າ ຄືພຣະບິດາເຈົ້າຂອງເຮົາທັງຫລາຍສືບໆໄປເປັນນິດ ອາແມນ.

ຄຳທັກທາຍປາໄສສຸດທ້າຍ

21ເຮົາຂໍຝາກຄວາມຄິດເຖິງ ມາຍັງໄພ່ພົນຂອງພຣະເຈົ້າທຸກຄົນ ໃນພຣະຄຣິດເຈົ້າເຢຊູ ພີ່ນ້ອງທັງຫລາຍທີ່ຢູ່ກັບເຮົາ ກໍສົ່ງຄວາມຄິດເຖິງມາດ້ວຍ.

22ໄພ່ພົນທັງປວງຂອງພຣະເຈົ້າ ກໍຝາກຄວາມຄິດເຖິງ ມາຍັງພວກເຈົ້າດ້ວຍ ໂດຍສະເພາະແລ້ວແມ່ນພວກທີ່ເຮັດວຽກຢູ່ໃນວັງຂອງຈັກກະພັດ. 23ຂໍໃຫ້ພຣະຄຸນຂອງອົງພຣະເຢຊູຄຣິດເຈົ້າ ຈົ່ງສະຖິດຢູ່ກັບຈິດວິນຍານຂອງພວກເຈົ້າທຸກຄົນເທີ້ນ ອາແມນ.

Currently Selected:

ຟີລິບປອຍ 4: ພຄພ

Highlight

Copy