ໂກໂລຊາຍ 2
2
1ເຮົາຢາກໃຫ້ພວກເຈົ້າຮູ້ວ່າ ເຮົາໄດ້ອົດສາສູ້ຫລາຍພຽງໃດ ເພື່ອພວກເຈົ້າ ເພື່ອຊາວເມືອງລາວດີເກອາ ແລະເພື່ອຄົນທັງປວງທີ່ຍັງບໍ່ໄດ້ເຫັນໜ້າເຮົາເທື່ອ. 2ເພື່ອເຂົາທັງຫລາຍຈະໄດ້ຮັບຄວາມຊູໃຈ ແລະເຂົ້າຕິດສະໜິດກັນໃນຄວາມຮັກ ຈົນເຖິງຄວາມຮູ້ຄັກແນ່ອັນສົມບູນ ຊຶ່ງມາດ້ວຍຄວາມເຂົ້າໃຈ ຈຶ່ງຈະສັງເກດຮູ້ໄດ້ຂໍ້ລັບເລິກຂອງພຣະເຈົ້າ ຄືພຣະຄຣິດ 3ຊຶ່ງຊັບສົມບັດແຫ່ງສະຕິປັນຍາ ແລະຄວາມຮູ້ທັງໝົດຊົງບັງຊ້ອນໄວ້ໃນພຣະອົງ.
4ເຮົາກ່າວຢ່າງນີ້ ກໍເພື່ອບໍ່ໃຫ້ຜູ້ໃດຊັກຊວນເຈົ້າທັງຫລາຍດ້ວຍຄຳລໍ້ລວງອັນໜ້າຟັງ. 5ເພາະເຖິງແມ່ນຕົວຂອງເຮົາບໍ່ຢູ່ນຳເຈົ້າທັງຫລາຍ ແຕ່ຈິດໃຈຂອງພວກເຮົາກໍຢູ່ນຳພວກເຈົ້າ ແລະມີຄວາມຊົມຊື່ນຍິນດີທີ່ໄດ້ເຫັນພວກເຈົ້າພາກັນຢູ່ຢ່າງຮຽບຮ້ອຍ ແລະເຫັນຄວາມເຊື່ອອັນໝັ້ນຄົງຂອງເຈົ້າທັງຫລາຍໃນພຣະຄຣິດ.
ຄວາມສົມບູນຂອງຊີວິດໃນພຣະຄຣິດ
6ໃນເມື່ອພວກເຈົ້າຮັບເອົາພຣະຄຣິດເຈົ້າເຢຊູ ເປັນອົງພຣະຜູ້ເປັນເຈົ້າໄວ້ແລ້ວ ຈົ່ງດຳເນີນຊີວິດຢູ່ໃນພຣະອົງດ້ວຍ. 7ຈົ່ງຢັ່ງຮາກແລະກໍ່ຮ່າງສ້າງຊີວິດຂອງພວກເຈົ້າຂຶ້ນເທິງພຣະອົງ ແລະຈົ່ງຕັ້ງໝັ້ນຄົງຢູ່ໃນຄວາມເຊື່ອ ຕາມທີ່ພວກເຈົ້າໄດ້ຮັບຄຳສັ່ງສອນມາແລ້ວນັ້ນ ຈົ່ງໃຫ້ຈິດໃຈເຕັມລົ້ນດ້ວຍການຂອບພຣະຄຸນ.
8ຈົ່ງລະວັງໃຫ້ດີ ຢ່າໃຫ້ຜູ້ໃດນຳພວກເຈົ້າຕົກໄປເປັນເຫຍື່ອຂອງສະຕິປັນຍາ ອັນຫລອກລວງແລະໄຮ້ສາລະ ຊຶ່ງມາຈາກຄຳສັ່ງສອນຂອງມະນຸດ ແລະມາຈາກສິ່ງສັກສິດແຫ່ງສາກົນຈັກກະວານ ແລະບໍ່ແມ່ນມາຈາກພຣະຄຣິດ. 9ດ້ວຍວ່າ ສະພາບຂອງພຣະອົງ ກໍດຳລົງຢູ່ໃນພຣະກາຍຢ່າງເຕັມບໍລິບູນ. 10ແລະພວກເຈົ້າກໍໄດ້ມີຊີວິດຢ່າງເຕັມບໍຣິບູນຢູ່ໃນພຣະອົງ ຜູ້ຊົງເປັນໃຫຍ່ເໜືອການປົກຄອງແລະອຳນາດທຸກຢ່າງ.
11ໃນພຣະອົງນັ້ນ ພວກເຈົ້າໄດ້ຮັບພິທີຕັດແລ້ວ ບໍ່ແມ່ນພິທີຕັດທີ່ເຮັດໂດຍມືມະນຸດ ແຕ່ແມ່ນພິທີຕັດທີ່ກະທຳໂດຍພຣະຄຣິດ ຊຶ່ງເປັນການຊົງໂຜດໃຫ້ພົ້ນຈາກກິເລດຕັນຫາຂອງເນື້ອກາຍນີ້. 12ແລະ ໄດ້ຖືກຝັງໄວ້ກັບພຣະອົງໃນພິທີບັບຕິສະມາແລ້ວ ແລະໃນພິທີນັ້ນ ພວກເຈົ້າໄດ້ຮັບການຊົງບັນດານໃຫ້ຄືນມາດ້ວຍກັນກັບພຣະອົງ ໂດຍຄວາມເຊື່ອໃນຣິດເດດອຳນາດຂອງພຣະເຈົ້າ ຜູ້ຊົງບັນດານໃຫ້ພຣະອົງຄືນພຣະຊົນ. 13ເມື່ອກ່ອນນັ້ນ ພວກເຈົ້າໄດ້ຕາຍແລ້ວຝ່າຍຈິດວິນຍານຍ້ອນບາບກຳຂອງພວກເຈົ້າ ແລະຍ້ອນເປັນຄົນບໍ່ຮັບພິທີຕັດຝ່າຍເນື້ອກາຍ ພຣະອົງໄດ້ຊົງບັນດານໃຫ້ພວກເຈົ້າເປັນຄືນມາສູ່ຊີວິດຮ່ວມກັບພຣະອົງ ແລະພຣະອົງໄດ້ອະໄພບາບກຳທຸກຢ່າງຂອງພວກເຮົາແລ້ວ, 14ພຣະອົງໄດ້ລຶບລ້າງກົດບັນຍັດພ້ອມກັບກົດລະບຽບຕ່າງໆ ທີ່ຜູກມັດຂັດຂວາງພວກເຮົາ ແລະໄດ້ຍົກເລີກສິ່ງນັ້ນເສຍ ໂດຍຕອກຕິດໄວ້ທີ່ໄມ້ກາງແຂນ. 15ໂດຍໄມ້ກາງແຂນນັ້ນ ພຣະອົງໄດ້ຊົງປົດວິນຍານຄອບຄອງ ແລະອຳນາດວິນຍານຊົ່ວທັງຫລາຍເສຍ ແລະໄດ້ຊົງປະຈານພວກເຂົາຢ່າງເປີດເຜີຍ ໂດຍນຳພວກເຂົາເປັນຊະເລີຍໃນຂະບວນແຫ່ງໄຊຊະນະຂອງພຣະອົງ.
16ເຫດສະນັ້ນ ຢ່າໃຫ້ຜູ້ໃດກ່າວໂທດພວກເຈົ້າໃນເລື່ອງການກິນການດື່ມ ຫລືໃນເລື່ອງວັນສຳຄັນທາງສາສະໜາ ຫລືໃນເລື່ອງງານສະຫລອງວັນເດືອນອອກໃໝ່ ຫລືໃນເລື່ອງວັນຊະບາໂຕ. 17ສິ່ງເຫຼົ່ານັ້ນ ເປັນພຽງແຕ່ເງົາຂອງເຫດການໃນອະນາຄົດ ແຕ່ຕົວຈິງນັ້ນແມ່ນພຣະຄຣິດ. 18ຢ່າໃຫ້ຜູ້ໃດໄດ້ສໍ້ໂກງເອົາລາງວັນຂອງເຈົ້າທັງຫລາຍ ດ້ວຍໃຊ້ກິຣິຍາທຳທ່າເປັນຜູ້ຖ່ອມຕົວລົງ ໄຫວ້ເທວະດາ ແລະ ໄຝ່ຝັນຢູ່ໃນນິມິດທີ່ເຂົາເຫັນ ແລະອວດອ້າງຕົວຂຶ້ນເປົ່າໆດ້ວຍຄວາມຄິດຢ່າງທຳມະດາມະນຸດ 19ແລະບໍ່ໄດ້ຢຶດໝັ້ນໃນພຣະອົງ ຜູ້ທີ່ເປັນຫົວຂອງຮ່າງກາຍ, ໂດຍການຄວບຄຸມຂອງພຣະອົງນັ້ນ ທົ່ວທັງຮ່າງກາຍກໍໄດ້ຮັບການບຳລຸງລ້ຽງ ແລະຕໍ່ເຂົ້າກັນ ດ້ວຍຂໍ້ແລະເອັນຕ່າງໆ ຈຶ່ງຈະເລີນຂຶ້ນ ຕາມທີ່ພຣະເຈົ້າຕ້ອງການໃຫ້ຈະເລີນຂຶ້ນນັ້ນ.
ການຕາຍແລະການຄືນມາດ້ວຍກັນກັບພຣະຄຣິດ
20ຖ້າພວກເຈົ້າໄດ້ຕາຍກັບພຣະຄຣິດ ແລະໄດ້ພົ້ນຈາກສິ່ງສັກສິດແຫ່ງສາກົນຈັກກະວານແລ້ວ, ເຫດສະນັ້ນ ເປັນຫຍັງພວກເຈົ້າຈຶ່ງດຳເນີນຊີວິດເໝືອນດັ່ງຄົນຍັງຢູ່ຝ່າຍໂລກ ເປັນຫຍັງພວກເຈົ້າຈຶ່ງຍັງປະຕິບັດຕາມກົດບັນຍັດທີ່ວ່າ, 21“ຢ່າຈັບ” “ຢ່າຊີມ” “ຢ່າແຕະຕ້ອງ” 22ສິ່ງທີ່ກ່າວມານັ້ນຕ້ອງເກີດວິບັດເມື່ອໃຊ້ມັນ ຊຶ່ງເປັນຫລັກທຳແລະຄຳສອນຂອງມະນຸດ. 23ຈິງຢູ່ ສິ່ງເຫຼົ່ານີ້ເບິ່ງທ່າທີເໝືອນມີປັນຍາ ຄືການເຕັມໃຈນະມັດສະການ, ການຖ່ອມຕົວລົງ, ການທໍລະມານຮ່າງກາຍ ຊຶ່ງບໍ່ມີປະໂຫຍດອັນໃດ ໃນການຕໍ່ສູ້ກັບຄວາມປາຖະໜາຝ່າຍເນື້ອກາຍ.
Currently Selected:
ໂກໂລຊາຍ 2: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.
