Lukas 21
21
Tug Puj Ntsuag Tso Nyaj
(Malakaus 12.41-44)
1Yexus tsaa qhovmuag saib, nwg pum cov tuabneeg npluanuj tso nyaj rua huv lub phijxaab kws nyob huv lub Tuamtsev, 2hab pum ib tug puj ntsuag pluag pluag taabtom muab ob lub txaj toog tso rua huv. 3Yexus has tas, “Kuv qha rua mej has tas, tug puj ntsuag nuav tso ntau dlua lwm tug. 4Rua qhov lwm tug muab tej nyaj kws seem tuaj tso xwb; tabsis tug puj ntsuag kws pluag pluag nuav, nwg muab hlo ob lub txaj toog kws nwg muaj tuaj tso huv tuabsi.”
Lub Tuamtsev Yuav Puamtsuaj
5Cov thwjtim qee leej sis thaam has txug lub Tuamtsev kws luas muab tej pobzeb kws zoo zoo nkauj lug ua, hab tej khoom kws luas coj tuaj fij rua Vaajtswv. Yexus has tas, “Tej kws mej pum nuav, thaus txug sijhawm lawm, 6yuav tsi muaj ob lub pobzeb dlhos ua ke, txhua lub yuav pluam nyag nyob nyag taag huv tuabsi.”
Kev Txomnyem hab Kev Tsimtxom thaus Nplajteb Yuav Kawg
7Puab nug Yexus has tas, “Xwbfwb, thaus twg maam le muaj tej nuav? Hab yaam dlaabtsi yuav qha rua peb paub has tas, tub txug lub sijhawm kws yuav muaj tej ntawd lawm?”
8Yexus qha has tas, “Mej yuavtsum ceevfaaj, tsi xob pub leejtwg dlaag ntxag tau mej yuam kev. Yuav muaj ntau leej tuav kuv lub npe has rua mej tas, ‘kuv yog nwg!’ Lub sijhawm tub lug ze lawm! Tabsis mej tsi xob caum cov tuabneeg ntawd moog. 9Thaus mej nov muaj kev tsuv kev rog hab muaj kev kub ntxhuv los mej tsi xob ntshai. Yeej yuav xub muaj tej ntawd ua ntej, tabsis tsi tau qha has tas, tub txug lub sijhawm kawg lawm.”
10Yexus has tas, “Ib tsaav tuabneeg yuav tawmtsaam ib tsaav tuabneeg; ib lub tebchaws yuav sawv tua ib lub tebchaws, 11yuav muaj aav qeeg luj heev, yuav muaj kev tshaib kev nqhes, hab yuav muaj mob thoob plawg txhua qhov huv tuabsi; yuav muaj tej yaam tshwm sau nruab ntug ua rua suavdlawg ntshai kawg le. 12Tabsis thaus tseem tsi tau muaj tej ntawd, yuav muaj tuabneeg nteg mej hab tsimtxom mej; puab yuav coj mej moog rua huv tej tsev saablaaj hab muab mej kaw rua huv tej tsev lojcuj. Luas yuav coj mej moog cuag tej vaajntxwv hab tej numtswv, vim mej yog cov kws ntseeg kuv. 13Thaus ntawd yog lub sijhawm zoo rua mej qha Txujmoo Zoo. 14Mej tsi xob txhawj has tas, mej yuav npaaj teb le caag txhaj zoo, 15rua qhov kuv yuav pub tswvyim rua mej kuas mej txawj has, mej cov yeebncuab yuav teb tsi taug mej, hab nrhav tsi tau lug rua mej.#Luk 12.11-12 16Mej nam mej txiv, mej tej kwvtij, mej tej neejtsaa hab mej tej phoojywg yuav muab mej coj moog rua tej numtswv, hab luas yuav muab mej qee leej tua povtseg. 17Txhua tug yuav ntxub mej vim mej yog cov kws ntseeg kuv. 18Tabsis txawm yog mej ib txuj plaubhau los yuav tsi tu sau mej taubhau moog. 19Mej yuavtsum ua sab ntev nyaj tej kev txomnyem, mej txhaj yuav tau txujsa.
Lub Nroog Yeluxalees Yuav Puamtsuaj
20“Thaus mej pum tubrog tuaj vij lub nroog Yeluxalees, mej yuav paub has tas, tsi ntev lub nroog yuav puamtsuaj. 21Lub sijhawm ntawd cov tuabneeg kws nyob huv xeev Yudas, puab yuavtsum tsiv moog rua peg tej roob; cov tuabneeg kws nyob huv lub nroog yuavtsum tawm, hab cov tuabneeg kws nyob peg tej yaajsaab, tsi xob tsiv moog rua huv lub nroog. 22Rua qhov lub sijhawm ntawd yog ‘Nub Rau Txim,’ kuas muaj tav lawv le Vaajtswv txujlug has tseg lawm.#Hau 9.7 23Luj sijhawm ntawd tej quaspuj kws suab mivnyuas, hab tej quaspuj kws muaj mivnyuas mog yuav txomnyem kawg le! Lub tebchaws nuav yuav raug kev txomnyem kawg nkaus le. Vaajtswv yuav rau txim rua cov tuabneeg nuav. 24Ibtxha yuav tuag rua nav ntaaj nav rag, hab ibtxha yuav raug nteg moog rua lwm lub tebchaws; hab lwm tsaav tuabneeg yuav tuaj tsuj lub nroog Yeluxalees moog txug nub kws tav lawv le lub sijhawm.
Tuabneeg Leej Tub Yuav Lug
(Mathais 24.29-31; Malakaus 13.24-27)
25“Thaus ntawd lub nub, lub hli, hab tej nubqub yuav tsi zoo le qub lawm. Txhua tsaav tuabneeg kws nyob huv nplajteb nuav yuav yoob taag, hab ntshai lub suab dlej havtxwv ndlaas.#Yay 13.10; Exk 32.7; Yau 2.31; Tsm 6.12-13 26Tej tuabneeg yuav tsaus muag vim puab ntshai tej kws yuav muaj lug raug thoob plawg lub nplajteb nuav, rua qhov tej kws muaj fwjchim sau nruab ntug yuav ua zug koog. 27Thaus ntawd suavdlawg yuav pum Tuabneeg Leej Tub tshwm sau nruab ntug, nwg lub fwjchim hab tug tshwjchim yuav ci ntsaa ab.#Dan 7.13; Tsm 1.7 28Thaus taabtom pib muaj tej nuav, mej yuavtsum sawv ntsug hab tsaa taubhau, rua qhov txujkev cawm dlim tub lug ze lawm.”
Tsob Txiv Ncuav Pas Pib Hlaav Nplooj
(Mathais 24.32-35; Malakaus 13.28-31)
29Yexus has ib zaaj lug pevtxwv rua puab noog has tas: “Mej sim saib tsob ntoo txiv ncuav pas hab txhua yaam ntoo. 30Thaus mej pum tej ntoo ntawd pib hlaav nplooj, mej paub has tas tub yuav txug lub caij ntuj naag. 31Ib yaam nkaus le ntawd, thaus mej pum tej ntawd, mej yuav paub has tas, Vaajtswv lub Tebchaws tub lug ze lawm.
32“Kuv qha tseeb rua mej has tas, thaus cov tuabneeg tam nuav tseem tuag tsi tau taag, tub xub muaj tej ntawd lawm. 33Lub ntuj hab lub nplajteb nuav yuav pluj moog, tabsis kuv tej lug yuav tsi muaj ib lus poob le.
Yuavtsum Ceevfaaj
34“Mej yuavtsum ceevfaaj, tsi xob ca mej lub sab qaug rua kev noj kev haus, hab tsi xob txhawj rua mej lub neej lossis yuav ca nub ntawd lug txug thaus mej tsi ceevfaaj. 35Rua qhov nub ntawd yuav lug khwb nkaus tej tuabneeg suavdlawg thoob plawg lub nplajteb nuav ib yaam le rooj yej. 36Mej yuavtsum ceevfaaj hab zuv tog, naj nub thov Vaajtswv paab kuas mej nyaj taug txhua yaam kws yuav muaj lug nuav, hab mej txhaj yuav moog sawv taug ntawm Tuabneeg Leej Tub lub xubndlag.”
37Yexus naj nub qha huv lub Tuamtsev, hab thaus tsaus ntuj nwg moog pw peg Roob Txiv Ntoo Roj.#Luk 19.47 38Txhua taagkig sawv ntxuv, suavdlawg tuaj noog Yexus qhuab qha huv lub Tuamtsev.
Currently Selected:
Lukas 21: HNJ2000
Highlight
Share
Copy
Want to have your highlights saved across all your devices? Sign up or sign in
© 2000 United Bible Societies. All rights reserved.