Lukas 16

Tug Thawj Tubkhai Kws Sab tsi Ncaaj

1Yexus has rua nwg cov thwjtim has tas, “Muaj ib tug tuabneeg npluanuj, nwg muaj ib tug thawj tubkhai kws saib nwg lub vaaj tse. Muaj tuabneeg lug qha rua tug npluanuj has tas, koj tug thawj tubkhai muab koj tej nyaj coj moog siv phuam laam ntsuav lawm. 2yog le ntawd, tug npluanuj txhaj hu tug thawj tubkhai lug hab has rua nwg tas, ‘Zaaj kws kuv nov koj ua ntawd yog le caag tag? Koj ca le muab tej ntaub ntawv kws teev tej nyaj lug rua kuv, rua qhov kuv tsi yuav koj ua kuv tej num lawm.’ 3Tug thawj tubkhai ntawd xaav has tas, ‘Kuv tug tswv tub yuav rhu kuv tawm num, kuv yuav ua le caag txhaj zoo? Kuv yuav moog khawb aav los tsi muaj zug, yuav moog thov khawv noj los txaajmuag. 4Nwgnuav, kuv paub has tas kuv yuav ua le caag, thaus tug tswv tsi pub kuv ua num lawm, txhaj muaj tuabneeg hu kuv moog huv puab tej tsev.’ 5Nwg txawm hu txhua tug kws tshuav nwg tug tswv nqe ib tug zuj zug tuaj cuag nwg. Nwg nug thawj tug has tas, ‘Koj tshuav tug tswv nqe npaum le caag?’ 6Tug ntawd teb has tas, ‘Kuv tshuav nwg ib puas thoob roj.’ Tug thawj tubkhai has rua tug ntawd tas, ‘Dlaim ntawv nuav yog dlaim kws koj tshuav nqe, koj ca le moog nyob quastsawg hab sau kag ua tsib caug thoob.’ 7Tug thawj tubkhai txawm nug dlua ib tug has tas, ‘Koj tshuav npaum le caag?’ Tug ntawd teb has tas, ‘Kuv tshuav ib txheeb naab nplej.’ Tug thawj tubkhai has rua tug ntawd tas, ‘Dlaim ntawv nuav yog dlaim kws koj tshuav nqe, koj ca le sau ua yim caum naab.’ 8Tug tswv qhuas tug thawj tubkhai kws tsi ncaaj has tas, tug tubkhai ntawd muaj tswvyim kawg le; rua qhov cov tuabneeg kws nyob huv nplajteb nuav muaj tswvyim ua num heev dlua cov tuabneeg kws nyob qhov pum kev.”

9Yexus has ntxiv tas, “Yog le ntawd kuv qha rua mej has tas, mej yuavtsum muab tej nyaj huv nplajteb nuav coj moog zeem phoojywg. Thaus mej tej nyaj taag lawm, cov tuabneeg ntawd txhaj yuav tog txais mej huv qhov chaw kws yuav nyob moog ibtxhis. 10Tug kws ua ncaaj rua tej yaam tsawg, nwg yeej yuav ua ncaaj rua yaam ntau hab; tug kws ua tsi ncaaj rua tej yaam tsawg, nwg yeej yuav ua tsi ncaaj rua tej yaam ntau hab. 11Tej nyaj huv nplajteb nuav, mej tub siv tsi ncaaj. Yog le ntawd, leejtwg yuav muab tej kws tseemceeb dlua tej nyaj ntawd rua mej hab. 12Hab yog mej ua tsi ncaaj rua tej kws yog lwm tug tug, leejtwg yuav muab tej kws yog mej tug rua mej?

13“Yeej tsi muaj ib tug tubkhai yuav ua num tau rua ob tug tswv. Yog nwg ua le ntawd, Nwg yuav ntxub ib tug hab nyam ib tug; nwg yuav fwm ib tug hab saib tsi taug ib tug. Yog mej yuav muab Vaajtswv hab nyaj txag saib hlub ib yaam nkaus yeej tsi tau le.”#Mat 6.24

Yexus Ntuag Cov Falixais

(Mathais 11.12-13; 5.31-32; Malakaus 10.11-12)

14Thaus cov Falixais nov Yexus qha tej ntawd, puab txawm thuam Yexus, rua qhov puab yog cov kws ntshaw nyaj. 15Yexus has rua puab tas, “Mej yog cov tuabneeg kws ua txuj ua kuas suavdlawg xaav has tas, mej yog tuabneeg zoo, tabsis Vaajtswv tub paub mej lub sab taag lawm. Rua qhov tej kws tuabneeg xaav has tas muaj nqes, tej ntawd Vaajtswv pum has tas tsi muaj nqes.

16“Suavdlawg coj Mauxes txuj Kevcai hab tej lug qha kws cov cev Vaajtswv lug sau tseg lug txug lub sijhawm kws Yauhaas tug kws muab tuabneeg ua kevcai raus dlej lug qha, txij thaus ntawd lug muaj tuabneeg moog qha Txujmoo Zoo kws has txug Vaajtswv lub tebchaws, ces suavdlawg sis txeeb moog rua huv lub tebchaws ntawd.#Mat 11.12-13 17Yog ua kuas lub nplajteb hab lub ntuj puamtsuaj moog, yoojyim dlua le rhuav Mauxes txuj Kevcai ib tug tsaj ntawv povtseg.#Mat 5.18

18“Yog leejtwg muab nwg tug quaspuj nrauj lawm hab moog yuav dlua quaspuj, kuj yog nwg ua txhum kev nkauj kev nraug; hab yog leejtwg moog yuav ib tug puj nrauj, kuj yog nwg ua txhum kev nkauj kev nraug ib yaam nkaus.#Mat 5.32; 1 Klt 7.10-11

Tug Npluanuj hab Laxalus

19“Muaj ib tug npluanuj, nwg naav tej tsoog tsho zoo zoo kws kim kim, hab naj nub muaj noj seem noj sos. 20Muaj ib tug txivneej pluag pluag hu ua Laxalus, nwg ib ce mob ua paug quas mag, luas pheej coj nwg tuaj tso rua ntawm tug npluanuj ib saab qhovrooj. 21Nwg xaav has tas nyaj nwg yuav tau noj tej mov kws poob sau tug npluanuj lub rooj lug, txawm yog nwg txomnyem npaum le ntawd los dlev tseem lug yaim nwg tej qhov txhaab hab. 22Thaus tug txomnyem ntawd tuag, cov timtswv ceebtsheej lug coj nwg moog nyob ntawm Anplahaas ib saab. Thaus tug npluanuj tuag, luas coj nwg moog log, 23hab nwg raug txomnyem nyob huv tubtuag teb.#16.23 Tubtuag teb: Yog qhov chaw kws cov tuabneeg tuag moog nyob. Nwg tsaa qhovmuag saib sau, nwg pum Anplahaas nyob dleb dleb, hab pum Laxalus nyob ntawm Anplahaas ib saab. 24Tug npluanuj hu has tas, ‘Txiv Anplahaas! Thov koj hlub kuv, hab khaiv Laxalus muab nwg tug ntivteg moog tub dlej tuaj rua kuv tug nplaig kuas laaj mivntsiv, rua qhov kuv nyob huv cov nplaim tawg nuav, kuv txomnyem kawg le!’ 25Tabsis Anplahaas teb has tas, ‘Mivtub, koj puas ncu thaus koj tseem ua neej nyob, koj muaj noj muaj naav, Laxalus txomnyem tsi muaj dlaabtsi le. Nwgnuav nwg tau zoo, koj tsua moog nyob huv qhov txomnyem. 26Tsi taag le ntawd xwb, tseem muaj ib tug kwj tub tub quas peb hab mej lawm, cov saab tim peb nuav yuav tuaj rua saab tim mej los yeej tsi tau, hab cov saab tim mej yuav hlaa tuaj rua saab tim peb nuav los yeej tsi tau.’ 27Tug npluanuj has tas, ‘Txiv Anplahaas, thov koj khaiv Laxalus rov moog kuas txug kuv txiv tsev, 28kuv tshuav tsib tug kwvtij, kuas Laxalus moog qha rua puab, nyob tsaam puab yuav tau lug nyob huv qhov txomnyem nuav hab.’ 29Anplahaas teb has tas, ‘Koj cov kwvtij tub muaj Mauxes txuj kevcai hab tej lug kws cov cev Vaajtswv lug sau tseg lawm, ca puab coj lawv le tej lug ntawd.’ 30Tug npluanuj teb has tas, ‘Txiv Anplahaas, tsi yog le ntawd, yog ib tug kws tuag lawm, sawv rov moog qha rua puab, puab txhaj le yuav tso puab tej kev txhum tseg.’ 31Tabsis Anplahaas has tas, ‘Yog puab tsi noog Mauxes hab cov kws cev Vaajtswv lug tej lug qha, ces txawm yog ib tug kws tuag lawm sawv rov qaab moog qha rua puab los puab yeej yuav tsi ntseeg le.’ ”

Currently Selected:

Lukas 16: HNJ2000

Highlight

Copy