Lukas 11

Yexus Qha Txug Kev Thov Vaajtswv

(Mathais 6.9-13; 7.7-11)

1Muaj ib zag Yexus moog thov Vaajtswv ntawm ib qhov chaw. Thaus nwg thov Vaajtswv taag lawm, nwg ib tug thwjtim lug has rua nwg tas, “Tug Tswv, thov koj qha kuas peb paub thov Vaajtswv ib yaam le Yauhaas qha nwg cov thwjtim lawm.”

2Yexus has rua nwg cov thwjtim has tas, “Thaus mej thov Vaajtswv, mej has le nuav:

Leej Txiv:

‘Thov kuas suavdlawg fwm

koj lub npe;

thov koj lug kaav tuabneeg

lub sab.

3Thov koj naj nub pub mov

rua peb noj.#11.3 naj nub pub mov rua peb noj; lossis pub mov rua nub tom ntej.

4Thov koj zaam txim rua peb,

rua qhov

peb tub zaam txim rua txhua tug

kws ua txhum

rua peb lawm.

Thov tsi xob ca tej kev sim sab

ntxag tau peb.’ ”

5Hab Yexus has rua nwg cov thwjtim has tas, “Thaus ib taag mo, yog mej cov muaj ib tug moog rua tom nwg tug phoojywg tsev hab thov has tas, ‘Phoojywg, thov txais koj peb lub ncuav rua kuv. 6Rua qhov kuv tug phoojywg dlua kev tuaj su huv kuv tsev, kuv tsi muaj mov rua nwg noj!’ 7Yog tug phoojywg kws nyob huv tsev teb has tas, ‘Tsi xob tuaj txob kuv! Kuv tub laag qhovrooj, kuv hab kuv cov mivnyuas tub pw taag lawm. Kuv yuav tsi sawv moog muab mov rua koj.’ 8Yog le ntawd, kuv qha rua mej has tas, txawm yog obtug yog phoojywg zoo npaum le caag los nwg yuav tsi sawv moog muab mov rua nwg tug phoojywg, tabsis vim qhov kws nwg tug phoojywg pheej thov tsi paub txaajmuag le. Nwg yuav tau moog muab tej kws nwg tug phoojywg xaav tau rua tug phoojywg. 9Yog le ntawd, kuv qha rua mej has tas: Mej thov, mej txhaj yuav tau; mej nrhav, mej txhaj yuav ntsib; hab mej khob, luas txhaj yuav qheb qhovrooj rua mej. 10Rua qhov txhua tug kws thov, yeej yuav tau, txhua tug kws nrhav yeej yuav ntsib, hab txhua tug kws khob, luas yeej yuav qheb qhovrooj rua nwg. 11Mej cov kws yog leej txiv, yog mej tej mivnyuas thov ntseg, mej yuav muab naab rua los? 12Lossis mej tej mivnyuas thov qai, mej yuav muab raubris teb rua los? 13Txawm yog mej yog tuabneeg txhum los mej tseem paub muab yaam zoo rua mej tej mivnyuas. Yog le ntawd, mej leej Txiv tug kws nyob sau ntuj ceebtsheej, nwg yimfuab yuav muab Vaaj Ntsujplig tug Dlawbhuv rua txhua tug kws thov nwg!”

Yexus hab Npexenpus

(Mathais 12.22-30; Malakaus 3.20-27)

14Yexus ntab tug dlaab kws ua rua ib tug txivneej has tsi tau lug tawm lawm; tug txivneej ntawd txawm rov has tau lug. Cov tuabneeg coob coob kws nyob ntawd xaav tsi thoob le. 15Tabsis muaj qee leej xaav has tas, “Yog Npexenpus kws yog dlaab tug thawj pub fwjchim rua nwg, nwg txhaj ntab tau dlaab.”#Mat 9.34; 10.25

16Muaj qee leej xaav sim Yexus, puab txawm kuas Yexus ua ib yaam txujci tseemceeb rua suavdlawg saib has tas, nwg yog tug kws Vaajtswv khaiv lug.#Mat 12.38; 16.1; Mak 8.11 17Yexus tub paub tej kws puab xaav, hab nwg has rua puab tas, “Yog ib lub tebchaws twg tawg ua ob peb paab, hab cov tuabneeg ntawd sis ntaus sis tua, ces lub tebchaws ntawd yuav puamtsuaj moog; hab tsev tuabneeg twg kws tsi sis hum, ces tsev tuabneeg ntawd yeej yuav tawg taag moog. 18Yog cov tuabneeg kws dlaab Ntxwgnyoog kaav sis ntau sis tua, puab yuav nyob taug ua ke ntev le caag? Mej has tas yog Npexenpus pub fwjchim rua kuv, kuv txhaj ntab tau dlaab. 19Yog le ntawd, leejtwg pub fwjchim rua mej cov tuabneeg kws ntab tau dlaab, ntab dlaab? Mej cov tuabneeg kws ntab tau dlaab, yog cov kws yuav txav txim rua mej! 20Tsi yog le kws mej has, tabsis yog kuv muaj Vaajtswv lub fwjchim, kuv txhaj ntab tau dlaab, qhov ntawd qha rua mej paub has tas, Vaajtswv lub Tebchaws tub lug txug mej lawm.

21“Yog muaj ib tug txivneej kws muaj zug heev, nwg npaaj ntaaj hab rag khov kho zuv nwg lub tsev, yeej tsi muaj leejtwg yuav moog nyag tau nwg tej qhov txhua chaw. 22Tabsis yog muaj ib tug kws muaj zug heev dlua nwg, ntaus yeej nwg, hab txeeb tau nwg tej ntaaj tej rag kws nwg ca sab rua, nqaa moog taag huv tuabsi, hab tej kws nwg fuab tau, nwg yuav coj moog sis faib.

23“Tug kws tsi tuaj kuv tog, tug ntawd yeej tawmtsaam kuv; tug kws tsi koom nrug kuv, tug ntawd ua kuas tawg paab tawg pawg xwb.#Mak 9.40

Dlaab Rov Qaab Lug Nyob huv Lub Qub Tse

(Mathais 12.43-45)

24“Thaus dlaab tawm huv ib tug tuabneeg lub cev moog lawm, tug dlaab ntawd txawm moog rua tom roob mojsaab qhua, hab yog nwg nrhav tsi tau chaw su, nwg yuav has tas, ‘Kuv yuav rov qaab moog rua tom kuv lub qub tse kws kuv tawm tuaj.’ 25Thaus nwg rov qaab lug txug nwg lub qub tse, ua cav tub tu dlu lug ca lawm. 26Tug dlaab ntawd txawm moog coj dlua xyaa tug dlaab kws nyaum dlua nwg lug nrug nwg nyob huv lub tsev ntawd. Thaus kawg tug tuabneeg ntawd hajyam txomnyem dlua thaus chivthawj.”

Tug Kws Tau Koob Moov

27Thaus Yexus has le ntawd taag, muaj ib tug quaspuj has nrov nrov huv paab tuabneeg coob coob ntawd tuaj has tas, “Tug quaspuj kws yug koj hab pub mig rua koj noj, yog tug kws tau koob moov!”

28Tabsis Yexus teb has tas, “Tsi yog le ntawd, cov tuabneeg kws nov Vaajtswv txujlug hab ua lawv le txujlug ntawd, txhaj yog cov kws tau koob moov!”

Cov Tuabneeg Sab Phem Xaav Pum Txujci Tseemceeb

(Mathais 12.38-42)

29Thaus cov tuabneeg coob coob tuaj sawv puagncig Yexus, Yexus has rua puab tas, “Cov tuabneeg tam nuav ua phem ua qas kawg le! Puab thov kuas kuv ua ib yaam txujci tseemceeb, tabsis kuv yuav tsi ua rua puab pum. Zaaj txujci tseemceeb kws puab yuav pum tsuas yog Yaunas zaaj xwb.#Mat 16.4; Mak 8.12 30Yaunas zaaj ua ib lub cim rua cov tuabneeg kws nyob huv lub nroog Nineves pum le caag, Tuabneeg Leej Tub yuav ua lub cim rua cov tuabneeg tam nuav ib yaam le ntawd.#Yan 3.3-4 31Nub kws Vaajtswv Txav Txim, tug puj Vaajntxwv kws kaav tebchaws Senpas yuav sawv qha cov tuabneeg tam nuav tej kev txhum rua puab. Rua qhov nwg taug kev nraag nwg lub tebchaws tuaj noog Vaajntxwv Xalumoos pav nwg tej kev txawj ntse. Kuv qha rua mej has tas, muaj ib tug nyob ntawm nuav tseem muaj fwjchim luj dlua Xalumoos hab.#1 Vnt 10.1-10; 2 Xvn 9.1-12 32Nub kws Vaajtswv Txav Txim, cov tuabneeg kws nyob huv lub nroog Nineves yuav sawv qha mej tej kev txhum rua mej, rua qhov thaus puab nov Yaunas qha, puab tso puab tej kev txhum tseg. Kuv qha rua mej has tas, muaj ib tug nyob ntawm nuav, nwg tseem muaj fwjchim luj dlua Yaunas hab! #Yan 3.5

Lub Teeb Kws Ci rua Lub Cev

(Mathais 5.15; 6.22-23)

33“Tsi muaj leejtwg taws teeb hab muab phab khwb rua;#11.33 Tej phoo qub tsi muaj cov lug has tas, muab lub phab khwb rua. tsuas muaj yuav muab txawb rua qhov chaw sab xwb, kuas cov tuabneeg kws tuaj huv tsev txhaj pum kev.#Mat 5.15; Mak 4.21; Luk 8.16 34Koj lub qhovmuag yog lub teeb kws ci rua koj lub cev pum kev. Yog koj lub qhovmuag pum kev tseeb, koj lub cev yeej yuav kaaj nrig. Tabsis yog koj lub qhovmuag pum kev tsi tseeb, taagnrho koj lub cev yeej yuav tsaus ntuj nti. 35Koj yuavtsum ceevfaaj zoo, tsi xob pub qhov pum kev kws koj muaj tsaus. 36Yog koj lub cev kaaj nrig txhua qhov, tsi muaj ib qho tsaus, koj yuav ci ntsaa ab thoob plawg, ib yaam le muaj dluab teeb ci tuaj rua koj.”

Yexus Qha Kuas tsi Xob Ua Le Cov Falixais hab Cov Xwbfwb Kws Qha Kevcai

(Mathais 23.1-36; Malakaus 12.38-40)

37Thaus Yexus qha taag, muaj ib tug Falixais hu Yexus moog nrug nwg noj mov; Yexus txawm moog huv nwg tsev, hab nyob quastsawg ntawm rooj mov. 38Thaus tug Falixais pum has tas, Yexus tsi ntxuav teg lawv le kevcai tsaiv maam le noj, nwg xaav tsi thoob le. 39Tug Tswv has rua nwg tas, “Mej cov Falixais ibtxwm ntxuav khob ntxuav phaaj saab nrau xwb, tabsis huv mej lub sab muaj kev phem kev qas puv nkaus. 40Ua le caag mej yuav ruag ua luaj le! Mej tsi paub has tas Vaajtswv tug kws tsim saab nrau, nwg yog tug kws tsim saab huv hab? 41Mej ca le muab tej kws nyob huv mej tej khob hab tej phaaj pub rua cov tuabneeg pluag, txhua yaam kws mej muaj txhaj yuav huv lawv le kevcai.

42“Cov Falixais, mej yuav raug kev puamtsuaj! Mej muab pumhum, luamlaws hab txhua yaam txumlom ib feem kaum coj tuaj fij rua Vaajtswv, tabsis mej tsua tsi ua tuabneeg ncaaj nceeg hab tsi hlub Vaajtswv. Mej yuavtsum ua tej nuav hab lwm yaam los mej yuav tau ua.#Lek 27.30

43“Cov Falixais, Mej yuav raug kev puamtsuaj! Mej nyam xaiv tej chaw zoo huv tej tsev saablaaj nyob, thaus mej moog tom tej kab, mej nyam kuas suavdlawg fwm mej. 44Mej yuav raug kev puamtsuaj! Mej zoo ib yaam le tej ntxaa kws tsi muaj dlaabtsi cim rua sau, tuabneeg tsuj moog tsuj lug, puab tsi paub has tas yog ntxaa.”

45Muaj ib tug xwbfwb kws qha Vaajtswv txuj Kevcai has rua Yexus has tas, “Xwbfwb, koj has le ntawd, kuj yog koj thuam peb!”

46Yexus teb has tas, “Cov xwbfwb kws qha Vaajtswv txuj Kevcai, mej yuav raug kev puamtsuaj hab! Mej muab lub nraa nyaav kws tsi yoojyim ris rua puab ris, tabsis mej tub tsi cev mej tug nyuas ntivteg moog paab thab tej nraa ntawd le.” 47Mej yuav raug puamtsuaj! Mej txhim tej ntxaa kws log cov cev Vaajtswv lug kuas zoo nkauj. Cov cev Vaajtswv lug tub yog cov kws mej cov yawmkoob muab tua povtseg lawm. 48Mej ua tej ntawd rua suavdlawg paub has tas, mej pum zoo tej kws mej cov yawmkoob ua lug lawm. Rua qhov mej cov yawmkoob yog cov kws tua cov cev Vaajtswv lug, hab mej yog cov kws txhim tej ntxaa ntawd. 49Vim le nuav, Vaajtswv tug kws muaj tswvyim txhaj le has tas, “Kuv yuav khaiv cov kws cev Vaajtswv lug hab kuv cov timthawj moog qha puab, tabsis puab yuav muab cov cev Vaajtswv lug hab cov timthawj qee leej tua, hab yuav muab qee leej tsimtxom.” 50Cov tuabneeg tam nuav yuav tau ris lub txim kws cov tuabneeg tam thaus u tua cov cev Vaajtswv lug, txij thaus tsim lub nplajteb lug txug naj nub nua, 51suav txij thaus Anpees raug tua lug txug thaus Xakhaliyas raug tua ntawm lub thaaj fij khoom rua Vaajtswv hab qhov chaw Dlawbhuv kis nruab nraab. Kuv qha rua mej has tas, cov tuabneeg tam nuav yuav tau ris cov tuabneeg kws tua cov cev Vaajtswv lug ntawd lub txim! #Chk 4.8; 2 Xvn 24.20-21

52“Cov xwbfwb kws qha Vaajtswv txuj Kevcai, mej yuav raug kev puamtsuaj! Mej muab tug yumsij kws qheb kev txawj ntse zais ca lawm; txawm yog mej los mej tsi xaav moog rua huv, hab yog lwm tug yuav moog huv, mej tseem txwv tsi pub puab moog hab!”

53Thaus Yexus tawm huv tug Falixais tsev moog, cov xwbfwb kws qha Vaajtswv txuj Kevcai hab cov Falixais txawm thuam Yexus heev hab nug Yexus ntau zaaj saib nwg puas has txhum, 54puab txhaj yuav nrhav tau txim rua nwg.

Currently Selected:

Lukas 11: HNJ2000

Highlight

Copy