Yauhaas 8
8
1tabsis Yexus nce moog rua peg Roob txiv Ntoo Roj lawm. 2Nub tom qaab thaus kaaj ntug txoog Yexus rov qaab lug rua huv lub Tuamtsev. Muaj tuabneeg coob coob tuaj cuag nwg, ces nwg nyob quastsawg hab qha puab. 3Cov xwbfwb kws qha Vaajtswv txuj Kevcai hab cov Falixais txawm coj ib tug quaspuj kws puab nteg tau thaus nwg taabtom ntxag hluas nraug tuaj cuag Yexus, puab coj tug quaspuj ntawd tuaj sawv taabmeeg suavdlawg. 4Puab has rua Yexus has tas, “Xwbfwb, muaj tuabneeg nteg tau tug quaspuj nuav thaus nwg taabtom ntxag hluas nraug. 5Mauxes txuj Kevcai qha rua peb has tas, peb yuavtsum muab pobzeb ntaus tug tuabneeg kws ua txhum le tug quaspuj nuav kuas tuag. Yog le ntawd, saib koj yuav has le caag?”#Lek 20.10; 2 Kev 22.22-24 6Puab has le nuav yog puab nrhav lug xaub Yexus, kuas puab txhaj lam txim tau rua Yexus. Tabsis Yexus txawm nyo hab xuas ntivteg sau huv aav. 7Thaus kws puab tseem sawv qhov ntawd hab nug Yexus, Yexus txawm tsaa hau hlo hab has rua puab tas, “Mej cov kws nyob ntawm nuav, yog leejtwg yeej tsi tau ua txhum le, tug ntawd ca le xub muab pobzeb ntaus tug quaspuj nuav.” 8Ces Yexus rov nyo hab xuas ntivteg sau huv aav dlua. 9Thaus puab nov Yexus has le ntawd, puab txhua tug nyag txawm tsiv nyag moog lawm, cov laug xub tsiv ua ntej. Tsuas tshuav Yexus hab tug quaspuj kws tseem sawv ntawm Yexus hauv ntej xwb. 10Yexus tsaa qhovmuag saib hab has rua tug quaspuj ntawd has tas, “Puab dlua twg taag lawm? tsi muaj leejtwg rau txim rua koj los?”
11Tug quaspuj ntawd teb has tas, “Tug Tswv, tsi muaj leejtwg rau txim rua kuv le.”
Yexus has tas, “Kuv yuav tsi rau txim rua koj hab. Koj ca le moog tsev, hab tsi xob ua txhum ntxiv lawm.”]#8.11 Ntau phoo qub hab ntau phoo kws xub txhais lawm, tsi muaj cov lug kws nyob huv (7.53–8.11) nuav; lwm phoo mas muaj nyob tom qaab Yhs 21.24; lwm phoo mas muaj nyob tom qaab Luk 21.28; ib phoo qub nyob tom qaab Yhs 7.36.
Yexus Yog Qhov Kaaj rua Tuabneeg Nplajteb
12Yexus rov has rua cov Falixais has tas, “Kuv yog qhov kaaj rua tuabneeg nplajteb. Tug kws lawv kuv qaab yuav tsi taug txujkev kws tsaus ntuj nti, tabsis nwg yuav tau lub neej tshaav ntuj nrig.”#Mat 5.14; Yhs 9.5
13Cov Falixais has rua Yexus has tas, “Tej lug kws koj has ko, yog koj rov ua koj tug timkhawv xwb; koj tej lug ko yeej tsi tseemceeb dlaabtsi.”#Yhs 5.31
14Yexus teb has tas, “Tsi yog le mej has, txawm yog kuv rov ua kuv tug timkhawv los tej lug kws kuv has yeej tseeb, rua qhov kuv paub has tas kuv lug qhov twg lug hab kuv yuav moog qhov twg. Tabsis mej tsi paub sov kuv lug qhov twg lug hab kuv yuav moog qhov twg. 15Mej txav txim lawv le tuabneeg lub sab xaav, tabsis kuv tsi txav txim rua leejtwg. 16Tabsis yog kuv txav txim, kuv yeej txav txim ncaaj nceeg, rua qhov tsi yog kuv tuab leeg xwb; leej Txiv tug kws khaiv kuv lug, nwg yeej nrug kuv txav txim hab. 17Tub muaj lug sau ca rua huv mej txuj Kevcai lawm has tas, yog muaj ob leeg ua timkhawv lawm, qhov kws obtug has ntawd yeej muaj tseeb tag.#2 Kev 19.15 18Kuv yeej ua tau kuv tug timkhawv, hab leej Txiv tug kws khaiv kuv lug, nwg yeej ua kuv tug timkhawv hab.”
19Puab nug Yexus has tas, “Koj txiv nyob qhov twg?”
Yexus teb has tas, “Mej tub tsi paub kuv, mej yuav ua le caag paub kuv Txiv. Yog mej paub kuv, mej yeej yuav paub kuv Txiv hab.”
20Yexus has tej lug nuav thaus nwg qha huv lub Tuamtsev, huv chaav kws tso tej phijxaab rau nyaj, tsi muaj leejtwg nteg Yexus, rua qhov tseem tsi tau txug nwg lub sijhawm.
Mej Moog tsi Tau Qhov Kuv Yuav Moog
21Yexus rov has ntxiv rua puab tas, “Kuv yuav moog; mej yuav nrhav kuv, tabsis mej yuav tuag vim mej tej kev txhum. Qhov kws kuv yuav moog, mej moog tsi tau.”
22Yog le ntawd, cov Yudais tej numtswv has tas, “Nwg has tas qhov kws nwg yuav moog ntawd peb moog tsi tau. Tsi yog nwg yuav muab nwg tua povtseg los?”
23Yexus teb has tas, “Mej yog tuabneeg nplajteb, tabsis kuv lug sau ntuj lug. Mej nyob huv lub nplajteb nuav, tabsis kuv tsi nyob huv lub nplajteb nuav. 24Tub yog vim le ntawd, kuv txhaj qha rua mej has tas, mej yuav tuag vim mej tej kev txhum. Yog mej tsi ntseeg has tas, ‘Kuv Yog tug kws Kuv Yog,’ mej yuav tuag vim mej tej kev txhum.”
25Puab nug Yexus has tas, “Koj yog leejtwg?”
Yexus teb puab has tas, “Kuv yog tug kws kuv tub qha rua#8.25 Kuv yog tug kws kuv tub qha rua; lossis Vim le caag kuv txhaj yuav qha txhua yaam nuav rua mej? mej thaus u lug lawm. 26Kuv muaj ntau zaaj kws has txug mej hab txav txim rua mej. Tug kws khaiv kuv lug, nwg yog tug ncaaj nceeg, tej kws kuv qha rua tuabneeg nplajteb, kuv tsuas qha lawv le tej kws nwg kuas kuv qha xwb.”
27Puab tsi totaub has tas Yexus qha puab has txug leej Txiv le. 28Yog le ntawd, Yexus has rua puab tas, “Thaus twg mej muab Tuabneeg Leej Tub dlai lawm, mej txhaj yuav paub has tas, ‘Kuv Yog tug kws Kuv Yog’; hab mej yuav paub has tas kuv tsi ua ib yaam dlaabtsi lawv le kuv lub sab, tabsis kuv tsuas has tej kws leej Txiv kuas kuv has xwb. 29Hab tug kws khaiv kuv lug yeej nrug kuv nyob; nwg tsi tso kuv tseg ib zag le, rua qhov kuv ua txhua yaam lawv le nwg lub sab nyam xwb.”
30Cov tuabneeg kws nov Yexus tej lug muaj coob leej lug ntseeg Yexus.
Qhov Tseeb Yuav Tso Mej Dlim
31Yog le ntawd, Yexus has rua cov Yudais kws ntseeg nwg has tas, “Yog mej ua lawv le tej lug kws kuv qha, mej txhaj yog kuv cov thwjtim tag. 32Mej yuav paub qhov tseeb, hab qhov tseeb ntawd yuav tso mej dlim.”
33Puab teb has tas, “Peb suavdlawg puavleej yog Anplahaas cov xeebntxwv, hab peb yeej tsi tau ua leejtwg qhev le. Lu lug kws koj has tas, ‘Mej yuav dlim’, yog koj has le caag?”#Mat 3.9; Luk 3.8
34Yexus has rua puab tas, “Kuv qha tseeb rua mej has tas, txhua tug kws ua txhum puavleej ua txujkev txhum qhev. 35Tug kws ua luas qhev yeej tsi nrug ib tsev tuabneeg nyob moog taag simneej, tsuas yog tug tub txhaj yuav nyob xwb. 36Yog leej Tub tso mej dlim, ces mej yeej yuav dlim tag tag le. 37Kuv paub has tas mej yog Anplahaas cov xeebntxwv. Tabsis mej pheej nrhav kuv tua povtseg, rua qhov mej tsi ntseeg tej lug kws kuv qha. 38Kuv has lawv le tej lug kws kuv Txiv qha rua kuv, tabsis mej ua lawv le tej lug kws mej txiv qha rua mej.”
39Puab teb Yexus has tas, “Peb txiv yog Anplahaas.”
Yexus has rua puab tas, “Yog mej yog Anplahaas cov mivnyuas tag, mej yeej yuav ua#8.39 Yog mej yog… mej yeej yuav ua; tej phoo qub has tas Yog mej… ua. mej lub neej ib yaam le Anplahaas lub. 40Kuv tsuas qha rua mej lawv le qhov tseeb kws Vaajtswv kuas kuv qha xwb, tabsis mej pheej nrhav kuv tua povtseg. Anplahaas tsi ua le mej ua. 41Mej ua ib yaam le mej txiv tau ua lawm.”
Puab teb has tas, “Peb tsi yog mivnyuas tsaub, peb muaj tuab leeg txiv xwb, peb txiv yog Vaajtswv.”
42Yexus has rua puab tas, “Yog Vaajtswv yog mej txiv tag, mej yeej yuav hlub kuv, rua qhov Vaajtswv yog tug kws khaiv kuv lug hab nwgnuav kuv tub nrug mej nyob ntawm nuav. Tsi yog kuv lug kuv xwb, tabsis yog Vaajtswv khaiv kuv lug. 43Ua le caag mej tsi totaub tej lug kws kuv has nuav? Mej tsi totaub rua qhov mej tsi xaav noog tej lug kws kuv qha. 44Dlaab Ntxwgnyoog yog mej txiv, hab mej yeej nyam ua lawv le mej txiv lub sab. Txij thaus chivkeeb lug dlaab Ntxwgnyoog yeej yog tug tua tuabneeg hab nwg tsi ua lawv le qhov tseeb, rua qhov nwg tsi nyam qhov tseeb. Tej lug kws nwg has, nwg has dlaag xwb, rua qhov nwg yeej yog tug nam dlaag hab nwg yog txhua tug kws dlaag leej txiv. 45Tub yog vim kuv qha qhov tseeb, mej txhaj tsi ntseeg kuv tej lug. 46Mej cov leejtwg pum has tas kuv ua txhum? Tej lug kws kuv has, kuv yeej has tseeb xwb, ua le caag mej tsi ntseeg kuv? 47Tug kws lug ntawm Vaajtswv lug yeej noog Vaajtswv lug. Mej tsi yog lug ntawm Vaajtswv lug, mej txhaj tsi noog Vaajtswv lug.”
Yexus hab Anplahaas
48Cov Yudais nug Yexus has tas, “Lu lug kws peb has tas koj yog tuabneeg Xamalis hab raug dlaab ntawd, peb has tsi yog los?”
49Yexus teb puab has tas “Kuv tsi raug dlaab. Kuv yeej fwm kuv Txiv, tabsis mej tsi fwm kuv. 50Kuv tsi tau kuas leejtwg fwm kuv. Tabsis muaj ib tug kuas tuabneeg fwm kuv, hab tug ntawd yog tug kws yuav txav txim. 51Kuv qha tseeb rua mej has tas, tug kws ua lawv le kuv tej lug qha, tug ntawd yuav tsi tuag le.”
52Cov Yudais has rua Yexus has tas, “Nwgnuav peb paub has tas koj raug dlaab lawm, Anplahaas los tub tuag, hab cov cev Vaajtswv lug los tub tuag taag huv tuabsi lawm, tabsis koj tsua has tas tug kws coj lawv le koj tej lug qha tug ntawd yuav tsi tuag le. 53Koj has tas koj muaj fwjchim luj dlua peb txiv Anplahaas kws tub tuag lawm hab los? Cov cev Vaajtswv lug puab tub tuag taag huv tuabsi lawm. Koj tseem khaav has tas koj yog leejtwg?”
54Yexus teb has tas “Yog kuv rov qhuas kuv xwb, kuv tej lug yeej tsi muaj qaabhau dlaabtsi le. Kuv Txiv yog tug kws qhuas kuv, nwg yog tug kws mej hu has tas yog mej tug Vaajtswv. 55Mej yeej tsi paub nwg, tabsis kuv paub nwg. Yog kuv has tas kuv tsi paub nwg, kuv yog tug kws has dlaag ib yaam le mej. Tabsis kuv yeej paub nwg, hab kuv ua lawv le nwg tej lug. 56Mej txiv Anplahaas zoo sab has tas nwg yuav pum nub kws kuv lug; nwgnuav nwg tub pum lawm, nwg zoo sab kawg le.”
57Puab has rua Yexus has tas, “Koj noobnyoog tub tsi tau muaj tsib caug xyoo, ua le caag koj has tas, koj pum Anplahaas?”#8.57 ua le caag koj has tas, koj pum Anplahaas?; tej phoo qub has tas Anplahaas tub pum koj hab los?
58Yexus teb puab has tas, “Kuv qha tseeb rua mej has tas, ‘Kuv tub xub nyob ua ntej yug Anplahaas lawm.’ ”
59Puab txawm khaws pobzeb yuav ntaus Yexus, tabsis Yexus tsiv nkaum hab tawm huv lub Tuamtsev moog lawm.
Currently Selected:
Yauhaas 8: HNJ2000
Highlight
Share
Copy
Want to have your highlights saved across all your devices? Sign up or sign in
© 2000 United Bible Societies. All rights reserved.
