Chivkeeb 35

Vaajtswv Foom Koob Moov rua Yakhauj

1Vaajtswv has rua Yakhauj has tas, “Koj ca le moog nyob peg Npethees. Hab koj ca le teeb ib lub thaaj rua kuv, kuv yog Vaajtswv tug kws tshwm rua koj pum thaus koj tsiv koj tug tijlaug Exaus moog ntaag.”#Chk 28.11-17

2Yog le ntawd, Yakhauj txhaj has rua nwg tsev tuabneeg hab taagnrho cov tuabneeg kws nrug nwg nyob ntawd has tas, “Mej ca le muab cov tuabneeg txawv tebchaws tej vaajtswv kws mej muaj coj moog povtseg, ua kevcai ntxuav mej kuas huv hab naav tej rig tsho kws ntxhua huv si lawm. 3Peb yuav sawv kev ntawm nuav moog rua peg lub nroog Npethees, qhov chaw kws kuv yuav teeb ib lub thaaj rua Vaajtswv tug kws tau paab kuv thaus kuv raug kev txomnyem nyuaj sab, hab yog tug kws nrug nraim kuv txhua qhov kws kuv moog.” 4Yog le ntawd, puab txhaj muab taagnrho cov tuabneeg txawv tebchaws tej vaajtswv kws puab muaj hab puab tej qhws ntsej kws puab coj ntawm qhovntsej huv tuabsi rua Yakhauj. Yakhauj txhaj coj moog faus rua ntawm qaab tsob ntoo qheb kws nyob ze lub nroog Sekhees.

5Thaus Yakhauj hab nwg cov tub taabtom sawv kev moog, Vaajtswv txawm ua ib yaam txaus ntshai heev lug rua cov tuabneeg huv tej nroog kws nyob puagncig puab. Cov tuabneeg huv tej nroog ntawd txhaj tsi kaam moog caum Yakhauj puab qaab. 6Yakhauj hab nwg cov tuabneeg lug txug huv lub zog Luxes kws nwgnuav yog lub nroog Npethees, huv tebchaws Kana-aas. 7Nyob qhov ntawd, Yakhauj teeb tau ib lub thaaj hab nwg tis npe rua thaaj chaw ntawd hu ua Ees Npethees,#35.7 Ees npethees: Tug Vaajtswv ntawm Npethees. rua qhov Vaajtswv tau lug tshwm rua Yakhauj pum thaus Yakhauj tsiv nwg tug tijlaug moog txug ntawm qhov chaw ntawd. 8Lenpekas tug ntxhais qhev Denpaulas tuag hab puab muab log rua huv qaab ib tsob ntoo qheb kws nyob ntawm lub nroog Npethees saab nraag. Yog le ntawd, txhaj muab tsob ntoo qheb ntawd tis npe hu ua, “Tsob Ntoo Qheb Quaj Ntsuag.”

9Thaus Yakhauj rov huv tebchaws Mexuputamias lug, Vaajtswv rov lug tshwm rua Yakhauj pum dlua ib zag ntxiv, hab foom koob moov rua nwg. 10Vaajtswv has rua nwg has tas, “Koj lub npe hu ua Yakhauj, tabsis txij nuav moog koj lub npe yuav hu ua Yixalayees.” Yog le ntawd, Vaajtswv txhaj tis Yakhauj lub npe hu ua Yixalayees.#Chk 32.28 11Hab Vaajtswv rov has rua Yakhauj has tas, “Kuv yog Vaajtswv tug kws muaj fwjchim luj kawg nkaus. Koj ca le muaj tubki kuas fuamvaam coob. Koj cov xeebntxwv yuav dlhau moog ua ntau tsaav tuabneeg, hab koj yuav yog ntau leej vaajntxwv tug yawmkoob. 12Kuv yuav muab lub tebchaws kws kuv muab rua Anplahaas hab Ixaj lawm pub rua koj, hab kuv tseem yuav muab rua koj cov xeebntxwv kws nyob ntau tam tom qaab koj.”#Chk 17.4-8 13Ces Vaajtswv txawm ncaim nwg moog lawm. 14Yakhauj txhus tau ib tug ncej zeb ua cim ncu txug rua ntawm qhov chaw kws Vaajtswv lug nrug nwg thaam, nwg muab cawv txiv maab hab roj txiv ntoo laub rua sau tug ncej zeb ntawd fij rua Vaajtswv. 15Nwg txhaj tis npe rua thaaj chaw ntawd hu ua Npethees.#Chk 28.18,19

Laxees Tuag

16Yakhauj hab nwg tsev tuabneeg txawm tawm huv Npethees moog lawm, hab thaus tseem tshuav dleb maam le moog txug rua huv Efalates, Laxees txawm mob plaab txug caij dlaws cev, hab zag nuav nwg yug mivnyuas nyuaj heev. 17Thaus Laxees mob plaab yuav yug tug mivnyuas ntawd, tug quaspuj kws paab tu mivnyuas txhaj has rua Laxees has tas, “Laxees, koj tsi xob ntshai, koj yuav tau ib tug tub ntxiv xwb.” 18Tabsis thaus Laxees yuav tuag, hab nwg fuas paa yuav tu sav nwg tis tug mivtub ntawd npe hu ua Npee-aunis,#35.18 Npee-aunis: Lub npe nuav, lug Henplais txhais has tas “tug tub kws kuv quaj ntsuag.” tabsis nwg txiv tis nwg lub npe hu ua Npeenyamees.#35.18 Npeenyamees: Lub npe nuav, lug Henplais txhais has tas, “tug tub kws coj koob moov lug.”

19Thaus Laxees tuag, puab txhaj muab nwg moog log rua ntawm ib saab ntug kev kws moog rua huv lub zog Efalates kws nwgnuav hu ua lub nroog Npelehees. 20Hab Yakhauj txhus ib tug ncej zeb rua sau Laxees lub ntxaa ua cim ncu txug Laxees lub ntxaa lug txug naj nub nua. 21Yakhauj sawv kev moog ntxiv hab lug tsuam yeej nyob rua ntawm tug pemthuam Edeles ib saab.

Yakhauj Cov Tub

(1 Xwmtxheej Vaajntxwv 2.1-2)

22Thaus Yakhauj tawm huv lub tebchaws ntawd moog lawm, Lunpees txawm moog nrug Npilehas kws yog nwg txiv tug nam yau pw. Thaus Yakhauj nov txug zaaj nuav mas nwg chim heev.#35.22 Tej phoo qub txhais has tas, mas nwg chim heev; phoo Henplais tsi muaj cov lug nuav.#Chk 49.4

Yakhauj muaj kaum ob leeg tub. 23Le-as cov tub yog Lunpees (Yakhauj tug tub hlub), Xime-oos, Levis, Yudas, Ixakhas hab Xenpuloos. 24Laxees cov tub yog Yauxej hab Npeenyamees. 25Laxees tug ntxhais qhev Npilehas ob tug tub yog: Daas hab Nathalis. 26Le-as tug ntxhais qhev Xilepas cov tub yog, Khas hab Aseles. Cov tub nuav puavleej yug peg tebchaws Mexuputamias.

Ixaj Tuag

27Yakhauj moog saib nwg txiv Ixaj huv lub nroog Maales kws nyob ze lub nroog Henploos, yog qhov chaw kws Anplahaas hab Ixaj obtug nyob.#Chk 13.18 28Ixaj ua neej nyob tau ib puas yim caum xyoo, 29hab tuag thaus nwg muaj noobnyoog laug heev lawm, nwg ob tug tub Exaus hab Yakhauj txhaj coj nwg lub cev moog log.

Currently Selected:

Chivkeeb 35: HNJ2000

Highlight

Copy