Chivkeeb 23

Xalas Tuag hab Anplahaas Yuav Aav Log

1Xalas ua neej nyob tau ib puas neeg nkaum xyaa xyoo. 2Nwg tuag rua ntawm Kiliyas Anpas (lossis yog Henploos), kws nyob huv tebchaws Kana-aas, Anplahaas quaj ntsuag vim Xalas tuag lawm.

3Anplahaas tso Xalas lub cev rua ntawm qhov chaw kws nwg tuag ntawd. Anplahaas txhaj moog cuag cov tuabneeg Hitis hab has rua puab tas, 4“Kuv yog tuabneeg txawv tebchaws lug nrug mej nyob huv nuav xwb, thov mej muag ib thaaj aav rua kuv log kuv tug quaspuj.”#Hen 11.9,13; Ten 7.16

5Puab teb has tas, 6“Koj noog peb has tsaiv. Koj yog ib tug thawjcoj kws muaj koob meej nyob nto moo lug rua huv peb nuav, ca le coj koj tug quaspuj moog log rua huv lub qhov tsua zoo tshaaj plawg kws peb muaj. Peb txhua tug puavleej txaus sab muab ib lub qhov tsua rua koj, koj txhaj tau chaw log koj tug quaspuj.”

7Ces Anplahaas txawm txhus caug ndlua ntawm puab xubndlag 8hab has tas, “Yog mej txaus sab yuav ca kuv log kuv tug quaspuj rua ntawm nuav, thov mej paab has Xauhas tug tub Efaloos, 9kuas nwg muag lub Qhov Tsua Makepelas kws nyob ze rua ntawm nwg thaaj teb rua kuv. Thov kuas nwg ca le muab muag tug nqe puv ntoob rua kuv taabmeeg rua mej suavdlawg ntawm nuav, kuv txhaj tau qhov chaw log tuag ntawd lug ua kuv tug.”

10Efaloos kuj nrug cov Hitis nyob ua ke ntawm qhov chaw saablaaj kws nyob ntawm roojvaag nroog hab, nwg txhaj teb taabmeeg rua cov tuabneeg kws tuaj nyob ntawd nrug nov has tas, 11“Koj noog kuv has, kuv yuav muab taagnrho kuv thaaj teb hab lub qhov tsua kws nyob rua huv pub huv tuabsi rua koj. Tim ntsej tim muag ntawm kuv tsaav tuabneeg, kuv yuav muab pub rua koj, koj txhaj tau chaw log koj tug quaspuj.”

12Anplahaas txawm nyo hau ntshis hawm cov Hitis 13hab has rua Efaloos tas, “Thov koj noog kuv has hab kuas txhua tug nrug nov, kuv yuav taagnrho koj thaaj teb. Thov koj txais cov nyaj kws kuv them nuav moog, hab kuv yuav coj kuv tug quaspuj tuaj log rua huv.” 14Efaloos teb has tas,

15“Thaaj aav nuav, tug nqe yog plaub puas dlaim nyaj, ntawm koj hab kuv tsi muaj dlaabtsi lawm. Ca le coj koj tug quaspuj moog log rua huv.” 16Anplahaas zoo sab hlo hab muab nyaj lug luj kuas txwm lawv le Efaloos tau has rua suavdlawg nrug nov lawm, yog plaub puas dlaim nyaj kws ntaus nqe ib yaam le tug nqe kws tej tub laag tub luam siv tom tej kab ntaag.

17Tub yog vim le ntawd, Efaloos thaaj teb huv Makepelas kws nyob rua ntawm Maales saab nubtuaj kws yog xaam taagnrho thaaj teb, lub qhov tsua hab taagnrho tej ntoo kws nyob rua huv thaaj teb thoob plawg rua tej kws nyob lawv ntug teb, txhaj yog Anplahaas tug lawm. 18Yog le ntawd, txhaj muab thaaj aav ntawd ua Anplahaas tug tim ntsej tim muag cov tuabneeg Hitis kws tuaj koom saablaaj ntawd.

19Ces Anplahaas txhaj coj Xalas kws yog nwg tug quaspuj moog log rua huv lub qhov tsua ntawd, lub qhov tsua ntawd nyob huv tebchaws Kana-aas. 20Yog le ntawd, cov tuabneeg Hitis txhaj muab thaaj teb hab lub qhov tsua kws nyob rua huv muag rua Anplahaas ua chaw log tuag.

Currently Selected:

Chivkeeb 23: HNJ2000

Highlight

Copy