Chivkeeb 20

Anplahaas hab Anpimelej

1Anplahaas tsiv tawm ntawm thaaj chaw Maales moog rua nraag yaav qaabteb Kana-aas hab moog nyob rua ntawm ntu nruab nraab lub nroog Kades hab Sus lawm. Thaus ntawd nwg lug nyob rua huv lub nroog Nkelas tau ib ntus, 2hab nwg has tas, Xalas kws yog nwg tug quaspuj yog nwg tug muam xwb. Yog le ntawd, Vaajntxwv Anpimelej kws kaav lub nroog Nkelas txawm has kuas coj Xalas moog rua nwg.#Chk 12.13; 26.7 3Muaj ib mos Vaajtswv tau lug tshwm rua Vaajntxwv Anpimelej pum huv nruab npau suav hab has tas, “Koj yuav raug tua tuag, rua qhov koj tau coj tug quaspuj nuav lug, nwg tub muaj quasyawg lawm.”

4Tabsis Anpimelej yeej tsi tau txaav moog ti Xalas le, nwg txhaj has tas, “Tug TSWV, kuv tub tsi tau ua txhum! Koj txawm yuav tua kuv hab kuv cov pejxeem povtseg ntaag los? 5Anplahaas los yeej has tas Xalas yog nwg tug muam, hab Xalas los yeej has ib yaam nkaus le ntawd. Kuv tau ua tej nuav vim kuv tsi paub, hab kuv yeej tsi tau ua txhum le.”

6Vaajtswv teb has tas, “Yog tag, kuv yeej paub koj ua tej nuav vim qhov kws koj tsi paub hab koj tsi tau ua txhum dlaabtsi, yog le ntawd, kuv txhaj tsi pub koj moog kov Xalas hab ua txhum tawmtsaam kuv. 7Ca le xaa tug quaspuj ko rov qaab moog rua nwg tug quasyawg taamsim nuav. Nwg yog ib tug cevlug, nwg yuav thov Vaajtswv rua koj, koj txhaj yuav tsi tuag. Tabsis yog koj tsi xaa nwg rov qaab, kuv qha tseeb rua koj has tas, koj yeej yuav tuag moog, koj hab koj tsoom pejxeem yuav tuag taag huv tuabsi.”

8Taagkig sawv ntxuv Anpimelej hu taagnrho nwg cov numtswv tuaj hab nwg qha tej kws tau tshwmsim ntawd rua puab noog, mas ua rua puab ntshai kawg le. 9Ces Anpimelej txhaj hu Anplahaas tuaj hab nug has tas, “Vim le caag koj ua tej nuav rua peb? Kuv tau ua txhum dlaabtsi rua koj, koj txhaj coj tej kev puamtsuaj nuav lug rua kuv hab kuv lub tebchaws? Tej kws koj ua rua kuv nuav yeej tsi tsimnyog ua kag le. 10Vim le caag koj txhaj ua le nuav?”

11Anplahaas teb has tas, “Kuv xaav has tas tsi muaj ib tug tuabneeg kws fwm Vaajtswv nyob huv lub nroog nuav, nyob tsaam puab yuav tua kuv povtseg hab yuav kuv tug quaspuj. 12Nwg yeej yog kuv tug muam tag le. Nwg hab kuv yeej koom ib leeg txiv, tabsis wb nyag muaj nyag nam, hab kuv yuav nwg ua kuv tug quaspuj. 13Yog le ntawd, thaus Vaajtswv has kuas kuv tso kuv txiv tej vaaj tse tseg tawm moog nyob rua lwm lub tebchaws, kuv txhaj has rua nwg tas, ‘Koj yuavtsum ua ncaaj nceeg rua kuv hab qha txhua leej txhua tug paub has tas kuv yeej yog koj tug nug.’ ”

14Ces Anpimelej txhaj tso Xalas rov qaab lug rua Anplahaas, hab nwg tseem muab yaaj, muab tshis, muab nyuj, muab tubqhe hab ntxhais qhev pub rua Anplahaas. 15Anpimelej has rua Anplahaas has tas, “Taagnrho tej cheebtsaam aav nuav puavleej yog kuv le, koj yuav nyob qhov twg los tau taag lawv le koj sab nyam.” 16Nwg tsua has rua Xalas has tas, “Kuv muab ib txheeb dlaim nyaj rua koj tug nug, ua povthawj rua txhua tug kws nrug koj nyob ua ke pum has tas, koj tsi tau ua txhum. Kuas txhua tug paub has tas koj yeej tsi tau ua txhum tag.”

17-18Vim tej nuav tau tshwmsim lug rua Xalas kws yog Anplahaas tug quaspuj, tug TSWV txhaj ua rua txhua tug quaspuj kws nyob huv Anpimelej lub loog xeeb tsi taug tub le. Yog le ntawd, Anplahaas txhaj thov Vaajtswv rua Anpimelej, Vaajtswv paab khu Anpimelej zoo hab tseem khu Anpimelej tug quaspuj hab nwg tej ntxhais qhev zoo huv tuabsi, puab txhaj rov muaj taug mivnyuas.

Currently Selected:

Chivkeeb 20: HNJ2000

Highlight

Copy