Teg Num 9

Xaulus Hloov Dlua Sab Tshab

(Teg Num 22.6-16; 26.12-18)

1Thaus ntawd Xaulus tseem ua nruj ua tsiv yuav tua cov kws ntseeg tug Tswv povtseg. Xaulus moog cuag tug Povthawj Hlub, 2hab thov ntawv nteg tuabneeg coj moog rua cov Yudas tej thawj kws saib cov tsev saablaaj peg lub nroog Damaxes has tas, nwg muaj cai nteg cov kws coj tug Tswv txuj kevcai, tsi has quaspuj lossis txivneej coj moog kaw rua nraag lub nroog Yeluxalees.

3Thaus Xaulus taabtom moog yuav txug lub nroog Damaxes, txawm muaj dluab ci nplaag sau ntuj tuaj rua nwg. 4Nwg txawm qaug ntawg rua huv aav, nwg nov ib lub suab has rua nwg has tas, “Xaulus, Xaulus! Ua le caag koj tsimtxom kuv?”

5Xaulus nug has tas, “Tug Tswv, koj yog leejtwg?”

Lub suab ntawd teb has tas, “Kuv yog Yexus tug kws koj tsimtxom ntaag. 6Koj ca le sawv moog rua huv lub nroog, yuav muaj tuabneeg qha rua koj paub has tas, koj yuavtsum ua dlaabtsi.”

7Cov txivneej kws nrug Xaulus moog ntawd, puab txhua tug yoob taag huv tuabsi; puab nov lub suab ntawd, tabsis puab saib tsi pum leejtwg le. 8Xaulus txawm sawv tseeg hab rua muag hlo, tabsis nwg ob lub qhovmuag tsi pum kev lawm. Puab txhaj tuav nwg teg moog rua huv lub nroog Damaxes. 9Nwg tsi pum kev tau peb nub, peb nub ntawd nwg tsi noj lossis tsi haus ib yaam dlaabtsi le.

10Nyob huv lub nroog Damaxes muaj ib tug thwjtim hu ua Ananias. Ananias ua ywgtoog pum tug Tswv lug has rua nwg has tas, “Ananias!”

Ananias teb has tas, “Tug Tswv, kuv nyob ntawm nuav.”

11Tug Tswv has rua Ananias has tas, “Koj ca le sawv tseeg moog rua tom txujkev kws suavdlawg hu has tas Txujkev Ncaaj, koj moog nrhav tug txivneej kws hu ua Xaulus kws yog tuabneeg Talaxus huv Yudas tsev. Nwgnuav Xaulus taabtom thov Vaajtswv, 12hab Xaulus ua ywgtoog pum ib tug txivneej hu ua Ananias lug huv tsev, hab tsaa teg rua Xaulus, kuas nwg rov pum kev.”

13Ananias teb has tas, “Tug Tswv, muaj ntau leej qha rua kuv has tas, tug txivneej ntawd ua phem heev rua cov ntseeg kws nyob huv lub nroog Yeluxalees. 14Qhov kws nwg tuaj huv lub nroog Damaxes nuav, tub yog nwg tau ntawv ntawm tug thawj ntawm cov povthawj, tuaj nteg cov kws pehawm koj.”

15Tabsis tug Tswv has rua Ananias has tas, “Koj ca le moog, rua qhov kuv tub xaiv nwg lug ua kuv teg num lawm. Nwg yuav moog qha kuv zaaj rua lwm Tsaav Tuabneeg, rua cov vaajntxwv hab rua cov Yixalayees. 16Kuv yuav qha rua nwg paub has tas, thaus nwg moog ua kuv teg num, nwg yuav raug kev txomnyem vim nwg ntseeg kuv.”

17Ananias txawm moog rua tom Yudas tsev hab tsaa teg rua Xaulus. Nwg has rua Xaulus has tas, “Nyuas kwv Xaulus, tug Tswv Yexus kws koj pum tom kev khaiv kuv tuaj paab koj kuas koj rov pum kev hab puv npo Vaaj Ntsujplig Tug Dlawbhuv.” 18Taamsim ntawd txawm muaj ib yaam zoo le khum ntseg poob nthaav ntawm Xaulus ob lub qhovmuag lug, ces nwg txawm rov pum kev le qub lawm. Nwg sawv tseeg lug hab Ananias muab nwg ua kevcai raus dlej; 19thaus nwg noj mov taag, nwg rov muaj zug.

Xaulus Qha huv Lub Nroog Damaxes

Xaulus nrug cov ntseeg huv lub nroog Damaxes nyob tau ob peb nub, 20nwg moog tom tej tsev saablaaj hab qha has tas Yexus yog Vaajtswv tug Tub.

21Txhua tug kws nov nwg qha puab xaav tsi thoob le. Puab sis nug has has, “Tug txivneej nuav tsi yog tug kws tsimtxom cov ntseeg nraag lub nroog Yeluxalees los? Nwg tuaj ntawm nuav tub yog nwg tuaj nteg cov ntseeg coj rov qaab moog rua cov thawj ntawm cov povthawj ntaag los sav.”

22Tabsis tej lug kws Xaulus qha nrov nchaa zuj zug. Hab tej kws nwg qha ua timkhawv rua suavdlawg paub tseeb has tas Yexus yog tug Mexiyas, ces cov Yudais kws nyob huv lub nroog Damaxes txawm tsi muaj lug has lawm.

23Tom qaab ntawd tsi ntev, cov Yudais txawm saablaaj has tas, puab yuav muab Xaulus tua povtseg.#2 Klt 11.32-33 24Tabsis tub muaj tuabneeg qha rua Xaulus paub lawm. Cov Yudais naj nub naj mo zuv lub nroog ntawd tej roojvaag tog nteg Xaulus coj moog tua povtseg. 25Tabsis muaj ib mos Xaulus cov thwjtim muab ib lub tawb rua Xaulus nyob huv, hab puab muab hlua khi lub tawb tso dlauv rua saab ntsaa yeej nrau.

Xaulus Moog Nraag Lub Nroog Yeluxalees

26Thaus Xaulus tsiv moog txug nraag lub nroog Yeluxalees, nwg txawm moog cuag cov thwjtim. Nwg xaav nrug puab koom ua ib paab, tabsis puab ntshai nwg, puab tsi ntseeg has tas nwg yog ib tug thwjtim tag. 27Tabsis Npananpas coj Xaulus moog cuag cov timthawj. Npananpas qha tej kws Xaulus pum hab tau ua lawm rua puab noog. Npananpas qha has tas, thaus Xaulus taabtom taug kev moog peg lub nroog Damaxes, Xaulus tub pum tug Tswv Yexus, hab tug Tswv tub nrug Xaulus thaam lawm. Hab Npananpas qha rua puab has tas, thaus Xaulus nyob peg lub nroog Damaxes, Xaulus muaj sab tawv qha Yexus zaaj, nwg tsi ntshai leejtwg le. 28Xaulus nrug cov timthawj nyob, nwg moog thoob plawg lub nroog Yeluxalees, nwg muaj sab tawv qha Yexus zaaj rua nuav rua u. 29Xaulus pheej nrug cov Yudais kws has lug Kilis sis thaam hab sis caam, tabsis puab cov ntawd tuavhuv yuav muab Xaulus tua povtseg. 30Thaus cov ntseeg nov le ntawd, puab txawm coj Xaulus moog rua peg lub nroog Xixaleyas hab xaa nwg moog rua peg lub nroog Talaxus.

31Thaus ntawd cov ntseeg kws nyob thoob plawg huv xeev Yudas, xeev Kalilais hab xeev Xamalis tsi muaj kev ntxhuv sab tau ib ntus. Vaaj Ntsujplig tug Dlawbhuv txhawb cov ntseeg tug zug, ua rua cov ntseeg muab sab rau ntseeg, muaj tuabneeg lug ntseeg coob zuj zug ntxiv hab puab ua lub neej fwm Vaajtswv.

Petus Khu Ane-as

32Petus moog txhua nrho txhua qhov chaw. Muaj ib zag nwg moog saib cov ntseeg kws nyob peg lub nroog Lidas. 33Thaus nwg nyob huv lub nroog ntawd, nwg pum ib tug txivneej hu ua Ane-as. Ane-as tuag teg tuag taw, nwg sawv tsi taug moog qhov twg, nwg pw sau txaaj tau yim xyoo lug lawm. 34Petus has rua Ane-as has tas, “Yexus tub khu koj zoo lawm. Koj ca le sawv tu koj lub chaw pw.” Taamsim ntawd Ane-as txawm sawv tseeg. 35Taagnrho cov tuabneeg kws nyob huv lub nroog Lidas hab huv lub nroog Saloos pum Ane-as zoo lawm, puab txawm ntseeg tug Tswv Yexus.

Daulakas Caj Sa Rov Lug

36Muaj ib tug quaspuj hu ua Tanpithas nyob huv lub nroog Yaupas, nwg yog ib tug ntseeg Yexus. (Nwg lub npe Kilis hu ua Daulakas, lub npe ntawd txhais has tas, “muaslwj.”) Nwg naj nub ua zoo hab paab cov tuabneeg txomnyem. 37Thaus Petus tseem nyob nraag lub nroog Lidas, Daulakas mob heev, nwg txawm tuag lawm. Thaus puab muab nwg lub cev ntxuav taag, puab nqaa nwg moog tso rua ib chaav tsev txheej sau. 38Lub nroog Yaupas nyob ze lub nroog Lidas. Thaus cov ntseeg nov has tas, Petus nyob nraag lub nroog Lidas, puab txawm khaiv ob tug txivneej moog has rua Petus has tas, “Koj ca le nrug wb moog taamsim nuav.” 39Petus txawm sawv tseeg nrug obtug moog. Thaus nwg moog txug, obtug coj nwg moog rua chaav tsev txheej sau. Cov puj ntsuag lug sawv vij Petus. Puab quaj zum zawg hab puab kuas Petus saib tej tsho luj tsho miv kws thaus Daulakas tseem ua neej nyob, Daulakas xaws rua puab naav. 40Petus kuas suavdlawg tawm moog saab nrau, thaus puab tawm taag lawm, Petus txawm txhus caug thov Vaajtswv; thaus nwg thov taag, nwg tig lug has rua tug tuag has tas, “Tanpithas, koj ca le sawv.” Tanpithas txawm rua hlo qhovmuag, thaus nwg pum Petus, nwg sawv tseeg nyob quastsawg. 41Petus cev teg moog nqug nwg sawv. Petus txawm hu cov ntseeg hab cov puj ntsuag lug saib hab muab Daulakas cob rua puab 42Zaaj nuav nrov nchaa moog thoob plawg huv lub nroog Yaupas, ces txawm muaj tuabneeg coob coob lug ntseeg tug Tswv Yexus. 43Petus nyob huv lub nroog Yaupas tau ntau nub, nwg su huv Ximoos tug kws luam tawv tsaj lub tsev.

Currently Selected:

Teg Num 9: HNJ2000

Highlight

Copy