Loˇmaˆ sahˬ boꞈ 9
9
Miˬyehˇ neh tseˇ doˆ-euˬ tsawˇ haˬ deuˬ
1Ngaˇ dawˇ coe ni ehˇ-eu ma. Ka li-euˬ tsawˇ haˬ pyeuꞈ-eu miˇ neh jaˬ myawꞈ maˬ myawꞈ. Muiˬ-eu Shawˇ-eu Yaw sahˇ Miˬyehˇ uˆ lahˇ-eu ngaˬ-euˬ siˬ nya-eu nui ma kʼawꞈ, ngaˇ jaˬ myawꞈ maˬ myawꞈ-a lehˇ ngaˬ-ahˇ maˇ jawˆ ni ehˇ nehˬ laꞈ-eu meh. 2Ngaˇ aˇ naˆ ni noeˬ shaˬ luꞈ-eu nga. Ngaˬ-euˬ shiˬ shaˬ pyeuꞈ-eu ngaˬ-euˬ tsawˇ haˬ deuˬ gʼaˇ duˬ, ngaˬ-euˬ nui ma laꞈ kʼoeˇ maˬ tsehˆ leˇ ni shaˬ zahˬ aˇ naˆ ni ya mˇ luꞈ-eu nga. 3Aˬ yawꞈ maꞈ-euˬ gʼaˇ duˬ Miˬyehˇ yaˬ kʼehˇ yaˬ nehˬ laꞈ-eu jeˬ-ahˇ ngaˇ daˬ-awˇ, Ka li-ahˇ gʼawˬ tsehˆ ya tsehˆ kʼawꞈ nui kʼahˇ shiˇ ma. 4Aˬ yawꞈ maꞈ Miˬyehˇ-euˬ tsawˇ haˬ meh. Aˬ yawꞈ maꞈ-ahˇ aˬ yawꞈ-euˬ zaˬ bi geuꞈ-awˇ, aˬ yawꞈ-euˬ yaw shehꞈ kʼahˬ sehˇ pah mehˬ nehˬ-euˬ meh. Aˬ yawꞈ maꞈ nehˬ-ehˇ aˬ yawꞈ dawˬ ma saˇ jaˇ dzaˬ-awˇ, Zahˇ dawˬ kʼoꞈ dawˬ biꞈ nehˬ-euˬ meh. Aˬ yawꞈ maꞈ Miˬyehˇ-ahˇ dawˇ coe ni uˬ duˬ tahˬ-eu gaˇ kawˆ siˬ nya meh. Miˬyehˇ-euˬ saˇ jaˇ za-euˬ tsawˇ haˬ pyeuꞈ-eu meh. 5Aˬ yawꞈ maꞈ-aˬ, tsawˇ myahˇ doˆ dui dui-eu Heˬbyehˇ tsawˇ haˬ aˬ poeˬ aˬ bawˇ kʼoeˇ deuˬ o neh jeuˬ le o le-euˬ tsawˇ haˬ deuˬ meh. Yeˬsuˇ Ka li kʼawꞈ, tsuiꞈ taꞈ gaˇ neh sawˇ leꞈ naˇ, aˬ yawꞈ maꞈ-euˬ tsawˇ jeuˬ pyeuꞈ-eu meh. Dawˬ tawˆ kʼoeˇ taˆ uˆ lahˇ-eu Miˬyehˇ-ahˇ mˬ maˬ maˬ byaˆ zaˇ ziˇ ja ceuˬ luꞈ-uˇ. Aˬ miˬ.
6Miˬyehˇ neh saˇ jaˇ dzaˬ taˬ-euˬ loꞈ-ehˇ maˬ pyeuꞈ laˇ-aˬ lehˇ ngaˇ ehˇ-eu maˬ ngeuˇ. Miˬyehˇ neh saˇ jaˇ dzaˬ taˬ-euˬ loꞈ-ehˇ aˬ diˇ pyeuꞈ laˇ taˬ-euˬ meh. Aˬ jeˬ miˇ neh ehˇ naˇ, Miˬyehˇ neh tseˇ doˆ-euˬ tsawˇ haˬ deuˬ laꞈ kʼoeˇ, Iˇsaˬleˬlaˆ tsawˇ haˬ deuˬ tehꞈ-ehˇ maˬ ngeuˇ ni, aˬ cawˬ tsawˇ jeuˬ kʼawꞈ ahˇ-eu meh. 7Aˬbyaˬhaˬ o neh kʼaˇ jeuˬ kʼaˇ o le-euˬ dawˬ tawˆ luꞈ, Miˬyehˇ-euˬ zaˬ maˇ maˇ ni maˬ ngeuˇ-a. “Iˇtsaˆ o neh jeuˬ le o le-euˬ zaˬ deuˬ-ahˇ tehꞈ-ehˇ nawˬ-euˬ zaˬ lehˇ sawˇ nehˬ ma” lehˇ, Aˬbyaˬhaˬ-ahˇ Miˬyehˇ ehˇ nehˬ-euˬ meh. 8Ehˇ mawꞈ-eu dawˬ tsuiꞈ-aˬ, kʼaˇ dehꞈ doˆ le-euˬ zaˬ deuˬ Miˬyehˇ-euˬ zaˬ maˇ maˇ ni maˬ ngeuˇ-a. Ehˇ kʼawꞈ, Miˬyehˇ neh saˇ jaˇ dzaˬ-awˇ bi dehꞈ doˆ le-euˬ Aˬbyaˬhaˬ-euˬ zaˬ deuˬ uˆ deuˬ-aˬ, maˇ maˇ ni gʼeh-eu Miˬyehˇ-euˬ zaˬ deuˬ uˆ deuˬ meh. 9A jeˬ miˇ neh ehˇ naˇ, Miˬyehˇ saˇ jaˇ dzaˬ ngeh, “Aˇ yamˬ tsaˬ laˇ ngeh ngaˇ tiˬ poˆ paˇ oe ma. Kʼoeˇ ngeh, Saˬlaˇ aˬ li tiˬ li ciˬ tehꞈ-a” lehˇ ehˇ-awˇ dzaˬ-euˬ meh.
10Kʼoeˇ uˬ taꞈ, Leˬbehˇkaꞈ-euˬ aˬ li nyiˬ li luꞈ, aˬ da Iˇtsaˆ tiˬ gʼaˬ-euˬ zaˬ tehꞈ meh. 11-12Miˬyehˇ neh noeˬ taˬ-euˬ jeˬ maˬ ya bi tsehˆ-iˇ ni, aˬ li kʼoeˇ nyiˬ li laꞈ kʼoeˇ tiˬ li-ahˇ tseˇ doˆ-eu gʼaˇ duˬ Miˬyehˇ lehˬ hmˬ taˬ-euˬ miˇ neh, “Aˬ yuiꞈ gʼaˬ-aˬ, aˬ nyiˇ gʼaˬ-euˬ zaˬ kʼaˆ ya geuꞈ tehꞈ-a” lehˇ, Leˬbehˇkaꞈ-ahˇ ehˇ nehˬ-euˬ meh. Aˬ yawꞈ nyaꞈ nmˇ maˬ dehꞈ le mi naˆ-ehˇ, kʼoeˇ loꞈ-ehˇ ehˇ taˬ-euˬ meh. Aˬ nyaꞈ nmˇ yaw muiˬ yaw doeˇ tiˬ jeˬ-iˬ maˬ mˇ nya laˇ mi naˆ-ehˇ ehˇ taˬ-euˬ dawˬ pyeuꞈ-eu meh. Kʼoeˇ miˇ neh, Miˬyehˇ neh tseˇ doˆ-euˬ lehˇ ehˇ-eu-aˬ, aˬ yawꞈ kuˇ mawꞈ-eu gʼaˬ-ahˇ kuˇ gaˇ ehˇ-eu meh. Aˬ nyaꞈ nmˇ neh mˇ-euˬ yaw muiˬ yaw doeˇ-ahˇ tiˬ jeˬ-iˬ maˬ taꞈ-a. 13“Yaˬkoˆ-ahˇ ngaˇ noeˬ dzoeˇ-awˇ, Iˇsawˇ-ahˇ maˬ noeˬ dzoeˇ nya” lehˇ, Jaˇliꞈ laꞈ kʼoeˇ ehˇ taˬ-euˬ meh.
14Toˆ-ehˇ ngeuˇ naˇ, Miˬyehˇ maˬ tsaˬ maˬ dawˇ nga lehˇ aˬ dui ehˇ nmˇ loˇ. Maˬ ngeuˇ-a. 15Aˬ jeˬ miˇ neh ehˇ naˇ, “Ngaˇ gʼawˬ shaˬ gaˬ mawꞈ-eu tsawˇ haˬ-ahˇ gʼawˬ shaˬ gaˬ-awˇ, ngaˇ ngehˬ gʼeh nehˬ mawꞈ-eu tsawˇ haˬ-ahˇ ngehˬ gʼeh-eu ma” lehˇ, Moˇseˬ-ahˇ aˬ yawꞈ ehˇ nehˬ-euˬ meh. 16Kʼoeˇ miˇ neh, yawˬ jeˬ na luꞈ tsawˇ haˬ zaˬ-euˬ nui kʼahˇ hawˇ-eu tsawˇ haˬ zaˬ neh mˇ-euˬ shaˇ-euˬ kʼoeˇ taˆ pyeuꞈ laˇ-eu maˬ ngeuˇ-a. Miˬyehˇ gʼawˬ shaˬ gaˬ-eu uˬ moˆ pyeuꞈ laˇ-eu tehꞈ meh. 17Jaˇliꞈ laꞈ kʼoeˇ Iˇjiˇtuˆ sahˬ paˬ-ahˇ heu loꞈ-ehˇ ehˇ nehˬ taˬ-euˬ jaˆ-eu meh. “Miˇ tsaˬ heu dawˬ tawˆ luꞈ kʼoeˇ taˆ ngaˬ-euˬ baoˬ bi mawˇ-awˇ, ngaˬ-euˬ tsawˇ myahˇ bi huiˬ byah-iˇ-eu gʼaˇ duˬ nawˬ-ahˇ zmˬ-eu lehˇ sahˬ paˬ ka nehˬ taˬ-euˬ ma.” 18Kʼoeˇ miˇ neh, Miˬyehˇ-aˬ, aˬ yawꞈ gʼawˬ shaˬ gaˬ mawꞈ-eu tsawˇ haˬ-ahˇ gʼaw shaˬ gaˬ-awˇ, aˬ yawꞈ nui ma bi gʼahˇ mawꞈ-eu tsawˇ haˬ-ahˇ nui ma bi gʼahˇ-eu meh.
Miˬyehˇ nui ma pehˇ-eu jeˬ hawˇ-eu gʼawˬ shaˬ gaˬ-eu jeˬ
19Toˆ-ehˇ ngeuˇ naˇ, Miˬyehˇ-euˬ nui noeˬ-ahˇ tiˬ gʼaˬ-iˬ maˬ laˆ tsoeˬ nya-eu-aˬ, tsawˇ haˬ zaˬ-ahˇ Miˬyehˇ aˬ jeˬ iˬ baˇ taˬ kʼaˇ paˇ za ta” lehˇ naw maꞈ tiˬ gʼaˬ na ngaˬ-ahˇ naˇ haˬ mawꞈ tehꞈ-a. 20Ehˇ kʼawꞈ, cawˬ-oˇ, Miˬyehˇ-ahˇ dawˬ poˆ poˆ leˇ paˬ-ehˇ nawˇ aˬ suˇ gʼaˬ te. “Nawˇ ngaˬ-ahˇ aˬ jeˬ miˇ neh heu loꞈ-ehˇ tehˆ nehˬ laꞈ te” lehˇ, oeˬ lahˬ tehˆ-eu tsawˇ haˬ-ahˇ miˇ tsaˬ oeˬ lahˬ dawˬ poˆ poˆ leˇ nya ta loˇ. 21Oeˬ lahˬ tehˆ-eu tsawˇ haˬ miˇ tsaˬ shaˬ jehˆ yuˇ-awˇ, yawˬ ha kʼaˇ tehˆ mawꞈ-eu loꞈ-ehˇ maˬ tehˆ nya ta loˇ. Shaˬ jehˆ aˬ yawꞈ tiˬ kʼoˇ-ahˇ tehꞈ-ehˇ miˇ tsaˬ nyiˬ tsuˆ tsuˆ doˆ-awˇ, aˬ yawꞈ neh kʼaˇ noeˬ-euˬ loꞈ-ehˇ, bawˬ-iˬ gʼeh ngeh zmˬ-eu gʼaˇ duˬ muiˬ-eu oeˬ lahˬ hawˇ-eu, nui gaˇ zmˬ-eu gʼaˇ duˬ yaw kʼaˆ-ehˇ maˬ muiˬ-eu oeˬ lahˬ maˬ tehˆ beu nya ta loˇ.
22Miˬyehˇ neh mˇ-euˬ jeˬ kʼawꞈ, kʼoeˇ loꞈ-ehˇ duˇ-eu meh. Aˬ yawꞈ-euˬ nui ma pehˇ-eu jeˬ bi mawˇ mawꞈ-awˇ, aˬ yawꞈ-euˬ baoˬ bi siˬ nya mawꞈ-eu meh. Ehˇ kʼawꞈ, aˬ yawꞈ nui ma pehˇ-awˇ laˆ cawˆ nehˬ-eu lehˇ gʼeh-eu miˇ tsaˬ oeˬ lahˬ deuˬ-ahˇ aˬ yawꞈ oˇ dui dui-eu meh. 23Aˬ yawꞈ-euˬ yaw shehꞈ kʼahˬ sehˇ biꞈ nehˬ laꞈ-eu lehˇ lehˬ hmˬ taˬ-euˬ aˬ yawꞈ gʼawˬ shaˬ gaˬ-eu aˬ dui maꞈ kʼoeˇ taˆ shehˆ daˆ nehˬ laꞈ-euˬ yaw shehꞈ kʼahˬ sehˇ kʼoeˇ kʼawꞈ, aˬ yawꞈ bi mawˇ mawꞈ-eu meh. 24Aˬ dui-aˬ, aˬ yawꞈ neh kuˇ doˆ taˬ-euˬ tsawˇ haˬ deuˬ pyeuꞈ-eu ma. Yuˇdaˆ tsawˇ haˬ deuˬ laꞈ kʼoeˇ tehꞈ-ehˇ kuˇ doˆ nehˬ laꞈ-euˬ maˬ ngeuˇ-a. Yuˇdaˆ tsawˇ haˬ maˬ ngeuˇ-eu deuˬ-ahˇ kʼawꞈ kuˇ doˆ nehˬ laꞈ-euˬ meh. 25Hawˇseˬ sahˬ boꞈ laꞈ kʼoeˇ aˬ yawꞈ heu loꞈ-ehˇ ehˇ taˬ-euˬ meh.
“Ngaˬ-euˬ tsawˇ haˬ maˬ ngeuˇ-eu kʼawꞈ,
‘Ngaˬ-euˬ tsawˇ haˬ’ lehˇ ngaˇ kuˇ ma.
Ngaˬ neh maˬ gaˬ-euˬ tsawˇ jeuˬ-ahˇ,
‘Ngaˇ gaˬ-eu deuˬ’ lehˇ ngaˇ kuˇ ma.
26‘Naw maꞈ nga-euˬ tsawˇ maˬ ngeuˇ’ lehˇ,
ngaˇ ehˇ-euˬ jawˇ duˬ nyiˬ paˆ-ehˇ,
‘Dehˬ luꞈ-eu Miˬyehˇ-euˬ zaˬ’ lehˇ,
aˬ yawꞈ maꞈ-ahˇ bi kuˇ paˇ ma.”
27Iˇsaˬ leˬ laˇ tsawˇ jeuˬ gaˇ kawˆ Iˇsaˬyaˇ neh heu loꞈ-ehˇ ehˇ taˬ-euˬ meh. “Iˇsaˬleˬlaˆ tsawˇ haˬ deuˬ iˬ ma laˆ shaˆ lawˇ deh-ahˇ jaˆ-eu kʼaˇ shuiꞈ loꞈ-ehˇ myaꞈ kʼawꞈ, ka kʼoꞈ-eu jeˬ za-eu tsawˇ haˬ cuiˆ dui dui tehꞈ-a. 28Aˬ jeˬ miˇ neh ehˇ naˇ, miˇ tsaˬ dawˬ tawˆ luꞈ-ahˇ Miˬyehˇ yaw kawˇ-ehˇ tiˬ saˬ tiˬ li yaˇ kʼaˬ daˇ nehˬ tehꞈ-a.” 29Naꞈ ngeh neh Iˇsaˬyaˇ neh ehˇ taˬ-euˬ heu loꞈ-ehˇ jaˆ-eu meh.
“Baoˬ huiˬ-eu Sahˬpaˬ Miˬyehˇ neh,
tsuiꞈ maˬ bi dahˬ-iˇ-eu gʼaˇ duˬ,
zaˬ maˬ bi dzeuˇ-iˇ law nmˇ-aˬ,
Sawˇdoˬ, Gawˇmawˇlaˆ meuˬ loꞈ-ehˇ,
aˬ dui byoˆ-iˇ jiˇ-euˬ tehꞈ-a.”
Laˬ kʼaˬ cehˇ-eu Guiˬ lahˬ dawˬ-aˬ, Iˇsaˬleˬlaˆ tsawˇ haˬ deuˬ gʼaˇ duˬ kʼawꞈ pyeuꞈ-eu meh
30Aˬ dui heu loꞈ-ehˇ ehˇ nya meh. Miˬyehˇ-ahˇ tsaˬ lehˇ tsahˇ leˇ nya ni maˬ leh jeh-euˬ Yuˇdaˆ tsawˇ haˬ maˬ ngeuˇ-eu kʼoeˇ deuˬ kʼawꞈ, jah-eu baˬ da neh Miˬyehˇ-ahˇ tsaˬ lehˇ tsahˇ leˇ-eu tsawˇ haˬ pyeuꞈ laˇ-euˬ meh. 31Ehˇ kʼawꞈ, Iˇsaˬleˬlaˆ tsawˇ haˬ deuˬ-aˬ, yawˬ ha Miˬyehˇ-ahˇ tsaˬ leˇ tsahˇ leˇ nya ni jahˇ nehˬ laꞈ nya-eu zahˇ dawˬ kʼoꞈ dawˬ-ahˇ poˆ luꞈ kʼawꞈ, maˬ poˆ mawˇ nya-ehˇ shaˬ luꞈ meh. 32Aˬ jeˬ miˇ neh maˬ poˆ mawˇ nya ta lehˇ ehˇ ngeh, jah-eu jeˬ-ahˇ aˬ yawꞈ maꞈ maˬ gʼoe-ehˇ, yawˬ ha neh mˇ-euˬ shaˇ-euˬ jeˬ-ahˇ tehꞈ-ehˇ gʼoe-eu miˇ neh meh. Kʼoeˇ miˇ neh, “tsawˇ haˬ zaˬ sahˬ tiꞈ tiꞈ-eu kʼaˬ lo”-ahˇ aˬ yawꞈ maꞈ sahˬ tiꞈ tiꞈ-euˬ meh. 33Jaˇliꞈ laꞈ kʼoeˇ ehˇ taˬ-euˬ,
“Haw yawˬ, tsawˇ haˬ bi coˬ-iˇ-eu,
tsawˇ haˬ sahˬ tiꞈ tiꞈ duˬ kʼaˬ lo,
Ziˇoˬ meuˬ-ahˇ ngaˇ bi jaˆ ma.
Ehˇ kʼawꞈ, aˬ yawꞈ-ahˇ jah-eu deuˬ
daˬ ga-awˇ maˬ ya shaꞈ dawˇ-aˇ.”
Currently Selected:
Loˇmaˆ sahˬ boꞈ 9: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
