Loˇmaˆ sahˬ boꞈ 4

Aˬbyaˬhaˬ-euˬ jah-eu nui ma

1Aˬ dui tsawˇ jeuˬ-euˬ aˬ da yaw dzahˇ gʼaˬ pyeuꞈ-eu Aˬbyaˬhaˬ gaˇ kawˆ aˬ joˆ-ehˇ ehˇ nmˇ. 2Aˬ yawꞈ neh mˇ-euˬ shaˇ-euˬ jeˬ baˬ da neh aˬ yawꞈ Miˬyehˇ-ahˇ tsaˬ leˇ tsahˇ leˇ nya-euˬ ngeuˇ law nmˇ-aˬ, aˬ yawꞈ nui ma huiˬ kʼaˇ za tehꞈ-a. Ehˇ kʼawꞈ, Miˬyehˇ kʼoeˇ loꞈ-ehˇ maˬ sawˇ-a. 3Jaˇliꞈ laꞈ kʼoeˇ boꞈ taˬ-euˬ, “Aˬbyaˬhaˬ Miˬyehˇ-ahˇ jah-awˇ, jah-eu kʼoeˇ hmˬ baˬ da neh aˬ yawꞈ-ahˇ yaw tsaˬ yaw dawˇ tsawˇ haˬ meh lehˇ Miˬyehˇ ha geuꞈ nehˬ-euˬ meh.” 4Gaˇ mˇ-eu tsawˇ haˬ-aˬ, gʼaˬ gaˇ poeˬ za-eu meh. Kʼoeˇ-aˬ, laꞈ sawˬ za-euˬ lehˇ maˬ sawˇ nya-a. Aˬ yawꞈ neh mˇ za-euˬ jeˬ pyeuꞈ-eu meh. 5Ehˇ kʼawꞈ, mˇ-eu shaˇ-eu jeˬ-ahˇ maˬ gʼoe-ehˇ, jah-eu jeˬ-ahˇ gʼoe-eu laꞈ kʼoeˇ, iˬ baˇ ahˇ-eu tsawˇ haˬ-ahˇ iˬ baˇ maˬ ahˇ-a lehˇ daˇ tsehˆ nya-eu gʼaˬ pyeuꞈ-eu Miˬyehˇ-ahˇ jah-eu tsawˇ haˬ-ahˇ, jah-eu jeˬ baˬ da neh Miˬyehˇ-ahˇ tsaˬ leˇ tsahˇ leˇ-euˬ tsawˇ haˬ lehˇ Miˬyehˇ sawˇ-eu meh. 6Yawˬ ha neh mˇ-euˬ yaw muiˬ yaw doeˇ-ahˇ Miˬyehˇ maˬ haw ni, yaw tsaˬ yaw dawˇ tsawˇ haˬ lehˇ bi ha geuꞈ-euˬ gʼaˬ-aˬ, guiˬ lahˬ huiˬ dui dui-eu meh lehˇ Daˬbiˇ neh ehˇ-euˬ dawˬ kʼoeˇ dawˬ, heu gaˇ ehˇ mawꞈ-eu meh. Daˬbiˇ ehˇ-eu,

7“Yaw lehˬ yaw ca ngehˇ jiˇ nehˬ-awˇ,

iˬ baˇ pyehˬ nehˬ-euˬ tsawˇ haˬ deuˬ,

aˇ naˆ ni guiˬ lahˬ huiˬ-eu nga.

8Yawˬ ha-euˬ iˬ baˇ dawˬ tawˆ luꞈ,

Sahˬpaˬ Miˬyehˇ pyehˬ nehˬ-euˬ gʼaˬ,

aˇ naˆ ni guiˬ lahˬ huiˬ-eu nga.”

9Daˬbiˇ ehˇ-eu guiˬ lahˬ huiˬ-eu gaˇ kawˆ heu, baˆ kʼoˆ mehˬ dzaˬ yehˬ-euˬ deuˬ-ahˇ tehꞈ-ehˇ taꞈ ta loˇ. Maˬ ngeuˇ-a. Baˆ kʼoˆ mehˬ dzaˬ maˬ yehˬ-euˬ deuˬ-ahˇ kʼawꞈ taꞈ-eu meh. “Aˬbyaˬhaˬ Miˬyehˇ-ahˇ jah-awˇ, aˬ yawꞈ-euˬ jah-eu jeˬ baˬ da neh aˬ yawꞈ-ahˇ yaw tsaˬ yaw dawˇ tsawˇ haˬ lehˇ Miˬyehˇ ha geuꞈ nehˬ-euˬ meh” lehˇ ehˇ taˬ-euˬ Jaˇliꞈ dawˬ kʼoeˇ dawˬ aˬ dui ehˇ dzeuˇ gʼaˬ-euˬ ma. 10Kʼoeˇ loꞈ-ehˇ pyeuꞈ laˇ-euˬ kʼoeˇ aˬ geu ngeh yamˬ-ahˇ-a. Baˆ kʼoˆ mehˬ dzaˬ maˬ yehˬ mi naˆ-ehˇ pyeuꞈ laˇ taˬ loˇ. Yehˬ gʼaˬ miˇ tsa pyeuꞈ laˇ taˬ loˇ. Kʼoeˇ-aˬ, Aˬbyaˬhaˬ aˬ yawꞈ baˆ kʼoˆ mehˬ dzaˬ maˬ yehˬ mi naˆ-ehˇ pyeuꞈ laˇ-euˬ gaˇ kawˆ meh. Yehˬ gʼaˬ miˇ tsa pyeuꞈ laˇ-euˬ gaˇ kawˆ maˬ ngeuˇ-a. 11Aˇ nah ba hawˇ-eu aˬ yawꞈ baˆ kʼoˆ mehˬ dzaˬ yehˬ-euˬ meh. Aˬ yawꞈ baˆ kʼoˆ mehˬ dzaˬ maˬ yehˬ mi naˆ-ehˇ Miˬyehˇ neh aˬ yawꞈ-ahˇ yaw tsaˬ yaw dawˇ tsawˇ haˬ lehˇ ha geuꞈ nehˬ laꞈ gʼaˬ-euˬ gaˇ kawˆ bi siˬ bi mawˇ-eu gʼaˇ duˬ, baˆ kʼoˆ mehˬ dzaˬ yehˬ-eu zahˇ jahˇ-euˬ jeˬ pyeuꞈ-eu meh. Kʼoeˇ miˇ neh, baˆ kʼoˆ mehˬ dzaˬ maˬ yehˬ-euˬ kʼawꞈ, Miˬyehˇ-ahˇ jah-awˇ Miˬyehˇ neh yaw tsaˬ yaw dawˇ tsawˇ haˬ meh lehˇ kʼaˇ sawˇ taˬ-euˬ tsawˇ haˬ dawˬ tawˆ luꞈ-euˬ guiˬ lahˬ saꞈ laˇ paw aˬ da yaw dzahˇ gʼaˬ-aˬ, Aˬbyaˬhaˬ meh. 12Baˆ kʼoˆ mehˬ dzaˬ yehˬ-euˬ uˬ taꞈ, aˇ hu Aˬbyaˬhaˬ aˬ yawꞈ baˆ kʼoˆ mehˬ dzaˬ maˬ yehˬ mi naˆ-ehˇ kʼaˇ dehꞈ yaꞈ-euˬ loꞈ-ehˇ jah jah-ehˇ dehꞈ-eu deuˬ-euˬ aˬ da yaw dzahˇ gʼaˬ kʼawꞈ, Aˬbyaˬhaˬ aˬ yawꞈ meh.

Jah-eu tsawˇ haˬ nehˬ-ehˇ Miˬyehˇ saˇ jaˇ dzaˬ-eu

13Miˇ tsaˬ heu dawˬ tawˆ luꞈ Aˬbyaˬhaˬ hawˇ-eu aˬ yawꞈ-euˬ zaˬ deuˬ uˆ deuˬ-ahˇ biꞈ ma lehˇ Miˬyehˇ saˇ jaˇ dzaˬ ngeh, Aˬbyaˬhaˬ Zahˇ dawˬ kʼoꞈ dawˬ mehˬ nah caw teh-eu miˇ neh dzaˬ-euˬ maˬ ngeuˇ-a. Ehˇ kʼawꞈ, aˬ yawꞈ jah-awˇ, Miˬyehˇ neh yaw tsaˬ yaw dawˇ tsawˇ haˬ lehˇ bi ha geuꞈ-euˬ miˇ neh meh. 14Miˬyehˇ neh saˇ jaˇ dzaˬ taˬ-euˬ jeˬ-aˬ, Zahˇ dawˬ kʼoꞈ dawˬ mehˬ nah caw teh-eu tsawˇ haˬ deuˬ-ahˇ biꞈ-eu gʼaˇ duˬ ngeuˇ naˇ, tsawˇ haˬ zaˬ-euˬ jah-eu jeˬ gaˇ dahˇ maˬ tsoeˬ-eu uˬ taꞈ, Miˬyehˇ-euˬ saˇ jaˇ kʼawꞈ yawꞈ ngehꞈ meh. 15Zahˇ dawˬ kʼoꞈ dawˬ-aˬ, Miˬyehˇ nui ma pehˇ-eu jeˬ bi keuˆ le-eu meh. Ehˇ kʼawꞈ, zahˇ dawˬ kʼoꞈ dawˬ maˬ jaˆ gaˇ-aˬ, zahˇ dawˬ kʼoꞈ dawˬ-ahˇ mˇ bahˬ-eu jeˬ kʼawꞈ maˬ jaˆ-aˇ.

16Kʼoeˇ miˇ neh, Miˬyehˇ-euˬ saˇ jaˇ kʼoeˇ hmˬ Zahˇ daˬ kʼoꞈ dawˬ mehˬ nah caw teh-eu deuˬ-ahˇ tehꞈ-ehˇ maˬ taꞈ-ehˇ, Aˬbyaˬhaˬ loꞈ-ehˇ jah-eu tsawˇ haˬ deuˬ-ahˇ kʼawꞈ taꞈ leˇ ni, Aˬbyaˬhaˬ-euˬ zaˬ deuˬ uˆ deuˬ dawˬ tawˆ luꞈ-ahˇ yawꞈ ngehꞈ-ehˇ biꞈ nehˬ-euˬ jeˬ pyeuꞈ-eu gʼaˇ duˬ, jah-eu jeˬ-ahˇ taꞈ-eu saˇ jaˇ bi pyeuꞈ-euˬ meh. Aˬ jeˬ miˇ neh ehˇ naˇ, Aˬbyaˬhaˬ-aˬ, guiˬ lahˬ saꞈ laˇ paw aˬ dui dawˬ tawˆ luꞈ-euˬ aˬ da yaw dzahˇ gʼaˬ pyeuꞈ-eu meh. 17“Ngaˇ nawˬ-ahˇ tsawˇ jeuˬ gʼawˬ mya jeuˬ-euˬ aˬ da yaw dzahˇ gʼaˬ bi pyeuꞈ laˇ ma” lehˇ, Jaˇliꞈ laꞈ kʼoeˇ aˬ yawꞈ-ahˇ ehˇ taˬ-euˬ meh. Dawˬ ma saˇ jaˇ kʼoeˇ-aˬ, Aˬyaˬhaˬ jah-eu Miˬyehˇ-euˬ mehˬ shi yaw muiˬ meh. Shiˇ-euˬ tsawˇ haˬ-ahˇ bi gʼoꞈ dehꞈ laˇ nya-awˇ, maˬ jaˆ haw maˬ mawˇ haw-euˬ jeˬ-ahˇ dawˬ biꞈ-awˇ bi jaˆ laˇ nya-eu Miˬyehˇ-ahˇ Aˬbyaˬhaˬ jah-euˬ meh. 18Aˬbyaˬhaˬ-aˬ, noeˬ tmˬ kʼaˇ maˬ paˇ za-euˬ kʼawꞈ, jah-awˇ noeˬ tmˬ-euˬ meh. Kʼoeˇ miˇ neh, “tsawˇ jeuˬ gʼawˬ mya jeuˬ-euˬ aˬ da” pyeuꞈ laˇ-euˬ meh. “Nawˬ-euˬ zaˬ nawˬ-euˬ uˆ deuˬ mˬ taˆ aˬ guiˇ loꞈ-ehˇ jeuˬ le o le tehꞈ-a” lehˇ, Jaˇliꞈ laꞈ kʼoeˇ aˬ yawꞈ-ahˇ ehˇ taˬ-euˬ meh. 19Aˬ yawꞈ-ahˇ kʼoeˇ loꞈ-ehˇ ehˇ nehˬ ngeh, aˬ yawꞈ-euˬ aˇ kʼoꞈ tiˬ yaˇ dawˬ peh tah tehˬ leˇ taˬ-euˬ meh. Aˬ yawꞈ-euˬ aˬ lmˬ gʼawˇ mawˇ gaˇ kawˆ shaˇ noeˬ ngeh, shiˇ gʼaˬ-euˬ loꞈ-ehˇ duˇ-awˇ, aˬ yawꞈ-euˬ nymˇ dahˬ Saˬlaˇ zaˬ ciˬ zaˬ cu maˬ paˇ mˇ nya-euˬ kʼawꞈ, aˬ yawꞈ jah-eu kʼoeˇ hmˬ gʼaˬ tiˬ pawꞈ-iˬ maˬ baˬ-iˇ-a. 20Aˬ yawꞈ jah-eu gʼaˬ maˬ baˬ-iˇ-ehˇ, Miˬyehˇ-euˬ saˇ jaˇ-ahˇ poˆ poˆ laˆ laˆ-ehˇ maˬ noeˬ-a. Jah-eu baˬ da neh nui ma gʼaˬ kʼaˆ laˇ-awˇ, Miˬyehˇ-ahˇ ja ceuˬ-euˬ meh. 21Miˬyehˇ-aˬ, saˇ jaˇ kʼaˇ dzaˬ taˬ-euˬ loꞈ-ehˇ mˇ byah nya meh lehˇ aˬ yawꞈ ziˬ dah ni jah-euˬ meh. 22Kʼoeˇ miˇ neh, Aˬbyaˬhaˬ-aˬ, jah-eu jeˬ baˬ da neh “Miˬyehˇ neh yaw tsaˬ yaw dawˇ tsawˇ haˬ lehˇ bi ha geuꞈ-euˬ meh.” 23“Aˬ yawꞈ-ahˇ yaw tsaˬ yaw dawˇ tsawˇ haˬ lehˇ ha geuꞈ-euˬ meh” lehˇ ehˇ-eu dawˬ heu dawˬ-aˬ, aˬ yawꞈ gʼaˇ duˬ tehꞈ-ehˇ boꞈ taˬ-euˬ maˬ ngeuˇ-a. 24Sahˬpaˬ Yeˬsuˇ-ahˇ shiˇ-euˬ gaˇ paˇ bi gʼoꞈ dehꞈ laˇ-euˬ Miˬyehˇ-ahˇ jah-awˇ, yaw tsaˬ yaw dawˇ tsawˇ haˬ lehˇ bi sawˇ-eu lehˇ gʼeh-eu aˬ dui-euˬ gʼaˇ duˬ kʼawꞈ boꞈ taˬ-euˬ jeˬ pyeuꞈ-eu meh. 25Aˬ dui-euˬ iˬ baˇ baˬ da neh aˬ yawꞈ-ahˇ sehꞈ-eu gʼaˇ duˬ bi a nehˬ-awˇ, aˬ dui Miˬyehˇ-ahˇ tsaˬ leˇ tsahˇ leˇ nya ni aˬ yawꞈ-ahˇ bi gʼoꞈ dehꞈ laˇ-euˬ meh.

Currently Selected:

Loˇmaˆ sahˬ boꞈ 4: AHK

Highlight

Copy