Pah meuˬ-eu 9

1Kʼoeˇ naˇ, mˬ taˆ gʼaˬ kʼehˇ ngaˬ gʼaˬ tiˬ gʼaˬ daˇ heh baw ngeh, aˬ guiˇ tiˬ siˬ miˇ tsaˬ kʼoeˇ taˆ ga ka le gaˇ ngaˇ ya mawˇ-euˬ ma. Aˬ guiˇ kʼoeˇ siˬ-ahˇ maˬ li-iˇ nya-eu duˬ kʼahˬ#9.1 “Maˬ li-iˇ nya-eu duˬ kʼahˬ” lehˇ ehˇ-eu-aˬ, miˇ tsaˬ dawˬ dah naꞈ dui dui gaˇ jaˆ-awˇ, nehꞈ deuˬ-ahˇ aˇ saˬ saˬ-eu poˆ maˬ kʼehˬ maˬ kʼaˆ nehˬ kʼoeˇ keuˆ ni nyehꞈ ahˇ-awˇ bi jawˇ-euˬ jawˇ duˬ pyeuꞈ-eu meh. -ahˇ pah-eu mahˬ tawꞈ kahˬ biꞈ taˬ-euˬ meh. 2Aˬ guiˇ kʼoeˇ siˬ maˬ li-iˇ nya-eu duˬ kʼahˬ-ahˇ pah dzeh-euˬ meh. Kʼoeˇ ngeh, miˬ dzaˬ tsawˬ bu bu ma-ahˇ uˬ kʼoeˬ doˆ laˇ-eu loꞈ-ehˇ, duˬ kʼahˬ kʼoeˇ kʼahˬ uˬ kʼoeˬ du doˆ luꞈ-eu meh. Maˬ li-iˇ nya-eu duˬ kʼahˬ-euˬ uˬ kʼoeˬ kʼoeˇ, nahˇ ma yaw shehꞈ hawˇ-eu jaˬ lehˇ-ahˇ zahˇ tsui ni bi pyeuꞈ-iˇ-euˬ meh. 3Uˬ kʼoeˬ kʼoeˇ-euˬ laꞈ kʼoeˇ nyehˇ bahˇ doˆ le-awˇ, miˇ tsaˬ kʼoeˇ taˆ ga taˬ le-euˬ meh. Nyehˇ bahˇ kʼoeˇ deuˬ-ahˇ, boeˬ kaˬ laˬ ma loꞈ-ehˇ kʼaˆ-eu doꞈ biꞈ taˬ-euˬ meh. 4Sahˬ lahˬ aˇ bawˇ deuˬ-ahˇ maˬ laˆ cawˆ-eu gʼaˇ duˬ, aˬ yawꞈ maꞈ-ahˇ ehˇ nehˬ taˬ-euˬ meh. Naˇ kʼawˇ-ahˇ Miˬyehˇ-euˬ jmˬ maˬ diˬ taˬ-euˬ tsawˇ haˬ deuˬ-ahˇ tehꞈ-ehˇ bi laˆ cawˆ-eu gʼaˇ duˬ pyeuꞈ-eu meh. 5Nyehˇ bahˇ kʼoeˇ deuˬ-aˬ, tsawˇ haˬ kʼoeˇ deuˬ-ahˇ kawꞈ sehꞈ-eu gʼaˇ duˬ maˬ ngeuˇ-ehˇ, ba la ngaˬ siˬ byah ni kʼehˬ-eu kʼaˆ-eu gʼaˇ duˬ pyeuꞈ-eu meh. Nyehˇ bahˇ kʼoeˇ deuˬ neh bi kʼehˬ-euˬ kʼoeˇ-aˬ, boeˬ kaˬ laˬ ma neh bi kawꞈ-euˬ loꞈ-ehˇ gawˇ-eu meh. 6Ba la kʼoeˇ ngaˬ siˬ laꞈ kʼoeˇ, tsawˇ haˬ kʼoeˇ deuˬ shiˇ-eu jeˬ-ahˇ poˆ tehꞈ-a. Ehˇ kʼawꞈ, maˬ poˆ mawˇ nya ni ya shaˬ tehꞈ-a. Aˬ yawꞈ maꞈ shiˇ mawꞈ dui dui tehꞈ-a. Ehˇ kʼawꞈ, shiˇ-eu jeˬ aˬ yawꞈ maꞈ-ahˇ cehˆ dzeuˇ tehꞈ-a.

7Nyehˇ bahˇ kʼoeˇ deuˬ-euˬ mawˇ kawˇ aˇ gʼehˇ-aˬ, guiˇ deuˆ-eu keu ka tiˬ kuꞈ lehˬ hmˬ dah taˬ-euˬ mahˬ deuˬ-ahˇ duˇ-eu meh. Aˬ yawꞈ maꞈ-euˬ uˬ duˬ-aˬ, shuiˇ neh jahˇ taˬ-euˬ uˬ kʼoˆ kʼoˆ luꞈ gaˇ duˇ-awˇ, myaˆ pyawˬ hmˬ-aˬ, tsawˇ haˬ zaˬ-euˬ myaˆ pyawˬ-ahˇ duˇ-eu meh. 8Aˬ yawꞈ maꞈ-euˬ uˬ duˬ tsehˇ kahˇ-aˬ, zaˬ miˬ zaˬ-euˬ tsehˇ kahˇ-ahˇ duˇ-awˇ, seuˬ-aˬ, aˇ laˬ jaˬ shiˇ-euˬ seuˬ-ahˇ duˇ-eu meh. 9Aˬ yawꞈ maꞈ-euˬ kʼahˬ-aˬ, shmˇ byaˆ dm kaˬ taˬ-euˬ gaˇ duˇ-awˇ, aˬ yawꞈ maꞈ dahˇ diˬ diˬ-eu teˇ saˇ-aˬ, mahˬ gʼawˬ mya mawˇ bi gʼeu-euˬ mahˬ laˆ lawˬ tiˬ deuˬ guiˇ deuˆ-eu lehˇ coeˬ gʼeh leꞈ-eu teˇ saˇ-ahˇ duˇ-eu meh. 10Aˬ yawꞈ maꞈ-euˬ dawˬ miˬ-aˬ, boeˬ kaˬ laˬ ma-euˬ dawˬ miˬ-ahˇ duˇ-awˇ, byaˬ iˬ tsoꞈ-eu meh. Dawˬ miˬ kʼoeˇ baˬ da neh, tsawˇ haˬ zaˬ-ahˇ ba la ngaˬ siˬ byah ni kʼehˬ nya-eu baoˬ ahˇ-eu meh. 11Aˬ yawꞈ maꞈ-ahˇ uˆ lahˇ-eu sahˬ paˬ tiˬ gʼaˬ jawˇ-eu meh. Aˬ yawꞈ-aˬ, yaw li ma baw-eu duˬ kʼahˬ-ahˇ haw-eu pyaˆ-eu mˬ taˆ gʼaˬ kʼehˇ kʼoeˇ gʼaˬ pyeuꞈ-eu meh. Aˬ yawꞈ-euˬ tsawˇ myahˇ-aˬ, Heˬbyehˇ dawˬ Aˬbaˬdoˬ lehˇ kuˇ-awˇ, Heˬlaˬsaˇ dawˬ Aˬpawˇliˇoˬ lehˇ kuˇ-eu meh. (Dawˬ tsuiꞈ-aˬ, laˆ luˬ laꞈ seˇ-eu gʼaˬ lehˇ ehˇ mawꞈ-eu meh.)

12Guˆ dui dui laˇ paˬ-ehˇ gʼeh-eu yaw beh jeˬ dzeuˇ-iˇ-euˬ meh. Kʼoeˇ jiˇ naˇ, guˆ dui dui laˇ paˬ-ehˇ gʼeh-eu nyiˬ jeˬ keuˆ le-eu jaˆ-a siˬ.

13Kʼoeˇ naˇ, mˬ taˆ gʼaˬ kʼehˇ koꞈ gʼaˬ tiˬ gʼaˬ daˇ heh baw ngeh, Miˬyehˇ mehˬ shi jaˆ-eu shuiˇ neh jahˇ taˬ-euˬ lawˇ duˬ-euˬ laꞈ coeˇ oeˬ coeˇ-ahˇ neh mahˇ doˆ laˇ-eu teˇ saˇ-ahˇ ngaˇ ya gaˬ-euˬ ma. 14“Uˇpaˬlaˇ lawˇ baˬ baˬ ma-ahˇ bi paꞈ taˬ-euˬ mˬ taˆ gʼaˬ kʼehˇ oeˬ gʼaˬ-ahˇ pyehˬ nehˬ-awˬ” lehˇ, teˇ saˇ kʼoeˇ saˇ mˬ taˆ gʼaˬ kʼehˇ koꞈ gʼaˬ tiˬ gʼaˬ-ahˇ ehˇ nehˬ-euˬ meh. 15Kʼoeˇ ngeh, mˬ taˆ gʼaˬ kʼehˇ kʼoeˇ oeˬ gʼaˬ-ahˇ pyehˬ nehˬ-euˬ meh. Aˇ kʼoꞈ kʼoeˇ kʼoꞈ, ba la kʼoeˇ siˬ, aˇ nah kʼoeˇ nah, aˇ yamˬ kʼoeˇ yamˬ-ahˇ, miˇ tsaˬ tsawˇ haˬ zaˬ smˬ bymˇ tiˬ bymˇ-ahˇ bi sehꞈ-eu gʼaˇ duˬ, mˬ taˆ gʼaˬ kʼehˇ kʼoeˇ oeˬ gʼaˬ-ahˇ bi lehˬ hmˬ dah taˬ-euˬ jeˬ pyeuꞈ-eu meh. 16Mahˬ dziˬ-eu yehˇ aˇ myaˆ gʼaˬ byah-eu gaˇ kawˆ ngaˬ-ahˇ ehˇ nehˬ laꞈ-euˬ meh. Nyiˬ yaˇ lam gʼaˬ byah-eu meh. 17Yaw sahˇ laꞈ kʼoeˇ ya mawˇ-euˬ jeˬ laꞈ kʼoeˇ, mahˬ kʼoeˇ deuˬ hawˇ-eu mahˬ dziˬ-eu yehˇ kʼoeˇ deuˬ-ahˇ ngaˇ ya mawˇ-euˬ ma. Aˬ yawꞈ maꞈ-aˬ, miˬ dzaˬ loꞈ-ehˇ neˇ-eu, nyoeˇ leuˬ leuˬ-eu kʼaˬ lo sehˇ loꞈ-ehˇ nyoeˇ-eu, miˬ dzaˇ dzaˇ shuiˇ loꞈ-ehˇ shuiˇ-eu kʼahˬ-ahˇ dehˬ daˬ duˬ deuˬ-ahˇ dm luꞈ-eu meh. Mahˬ kʼoeˇ deuˬ-euˬ uˬ duˬ-aˬ, aˇ laˬ jaˬ shiˇ-euˬ uˬ duˬ-ahˇ duˇ-awˇ, kʼaˬ meh-ahˇ miˬ dzaˬ maˬ ehˇ, uˬ kʼoeˬ maˬ ehˇ, miˬ dzaˇ dzaˇ shuiˇ maˬ ehˇ, doˆ luꞈ-eu meh. 18Mahˬ kʼoeˇ deuˬ-euˬ kʼaˬ meh-ahˇ doˆ luꞈ-eu miˬ dzaˬ hawˇ-eu, uˬ kʼoeˬ hawˇ-eu miˬ dzaˇ dzaˇ shuiˇ kʼoeˇ smˇ jeˬ kʼehˬ-eu baˬ da neh miˇ tsaˬ tsawˇ haˬ zaˬ smˬ bymˇ tiˬ bymˇ shiˇ-euˬ meh. 19Aˬ jeˬ miˇ neh ehˇ naˇ, mahˬ kʼoeˇ deuˬ-euˬ baoˬ-aˬ, kʼaˬ meh hawˇ-eu dawˬ miˬ-ahˇ ahˇ-eu meh. Aˬ yawꞈ maꞈ-euˬ dawˬ miˬ-aˬ, uˬ duˬ tsoꞈ-awˇ, aˇ lawˇ-ahˇ duˇ-eu meh. Dawˬ miˬ kʼoeˇ neh tsawˇ haˬ zaˬ-ahˇ laˆ tahˬ laˆ naˇ nehˬ-eu meh.

20Kʼoeˇ smˇ jeˬ neh maˬ bi sehꞈ jiˇ-ehˇ dzeˇ-eu miˇ tsaˬ tsawˇ haˬ zaˬ deuˬ-aˬ, aˬ yawꞈ maꞈ neh mˇ dzeuˇ shaˇ dzeuˇ yaꞈ-euˬ jeˬ-ahˇ maˬ byehˇ dzeh-a. Nehꞈ deuˬ-ahˇ uˬ duˬ tahˬ-eu jeˬ-ahˇ maˬ ehˇ, shuiˇ, pyuˇ, guiˬ shuiˇ, kʼaˬ lo, daˇ kawˬ, heu deuˬ neh jahˇ taˬ-euˬ, maˬ mawˇ nya, maˬ gaˬ nya, maˬ cah nya-eu tahˬ pahˬ aˬ ma mawˇ kawˇ deuˬ-ahˇ uˬ duˬ tahˬ-eu jeˬ-ahˇ maˬ ehˇ, aˬ yawꞈ maꞈ maˬ byehˇ dzeh-a. 21Tsawˇ haˬ-ahˇ sehꞈ-eu, maw loˬ ja maw zmˬ-eu, kʼaˬ miˬ sheu-eu, kʼoeˬ-eu gʼehꞈ-eu heu deuˬ-ahˇ kʼawꞈ, aˬ yawꞈ maꞈ maˬ byehˇ dzeh-a.

Currently Selected:

Pah meuˬ-eu 9: AHK

Highlight

Copy