Maꞈtehˬ 2

Zaˬ siˬ tsawˇ gahˇ ahˇ-eu deuˬ laˇ-euˬ

1Sahˬ paˬ Heˬloˆ uˆ lahˇ luꞈ-eu aˇ yamˬ laꞈ kʼoeˇ, Yuˇdaˆ miˇ kʼahˬ Behˬlehˬhehˬ meuˬ-ahˇ Yeˬsuˇ dehꞈ le-euˬ meh. Kʼoeˇ ngeh, aˬ guiˇ gaˇ kawˆ siˬ nya-eu zaˬ siˬ tsawˇ gahˇ ahˇ-eu deuˬ, nahˇ ma doˆ kʼehˬ paw neh Yeˬluˇsaˬlehˬ meuˬ-ahˇ laˇ-euˬ meh. 2Aˬ yawꞈ maꞈ ehˇ-eu, “Dehꞈ le-euˬ Yuˇdaˆ tsawˇ haˬ-euˬ sahˬ paˬ kʼoeˇ gʼaˬ aˬ gaˇ jawˇ ta. Nahˇ ma doˆ kʼehˬ paw dzeˇ neh aˬ yawꞈ-euˬ aˬ guiˇ doˆ laˇ gaˇ nga maꞈ ya mawˇ-awˇ, aˬ yawꞈ-ahˇ uˬ duˬ tahˬ laˇ-euˬ ma.”

3Gaˇ kawˆ kʼoeˇ sahˬ paˬ Heˬloˆ ya gaˬ ngeh, nui ma tiˬ pawꞈ-iˬ maˬ saˇ-a. Kʼoeˇ loꞈ-ehˇ duˇ ni, Yeˬluˇsaˬlehˬ meuˬ meuˬ lah-ehˇ nui ma maˬ saˇ-a. 4Piˇ ma aˬ yuiꞈ deuˬ hawˇ-eu Zahˇ dawˬ kʼoꞈ dawˬ mehˬ-eu saˬ laˬ dawˬ tawˆ luꞈ-ahˇ aˬ yawꞈ kuˇ uiˬ-awˇ, “Ka li aˬ gaˇ dehꞈ le ta” lehˇ naˇ haˬ-euˬ meh. 5Aˬ yawꞈ maꞈ ehˇ-eu, “Yuˇdaˆ miˇ kʼehˬ Behˬlehˬhehˬ meuˬ-ahˇ dehꞈ le meh. Aˬ jeˬ miˇ neh ehˇ naˇ, Miˬyehˇ gʼaˇ duˬ ngehˬ dah-eu tsawˇ haˬ neh boꞈ taˬ-euˬ heu loꞈ-ehˇ jaˆ-eu meh.

6‘Behˬlehˬhehˬ-oˇ,

Yuˇdaˆ meuˬ deuˬ laꞈ kʼoeˇ,

nawˇ maˬ nyiˇ teˬ dzehˬ-a.

Aˬ jeˬ miˇ neh ehˇ naˇ,

ngaˬ-euˬ tsawˇ jeuˬ pyeuꞈ-eu,

Iˇsaˬleˬlaˆ kʼoeˇ taˆ,

sheuˬ gʼeh uˆ lahˇ-eu gʼaˬ,

nawˬ-euˬ laꞈ kʼoeˇ doˆ laˇ tehꞈ-a.”’

7Kʼoeˇ ngeh, nahˇ ma doˆ kʼehˬ paw neh laˇ-euˬ zaˬ siˬ tsawˇ gahˇ ahˇ-eu tsawˇ haˬ kʼoeˇ deuˬ-ahˇ Heˬloˆ kuˇ-awˇ, aˬ cawˬ maˬ bi siˬ ni mawˇ dzoeˇ-eu laꞈ kʼoeˇ, aˬ guiˇ kʼoeˇ siˬ doˆ laˇ-euˬ aˇ yamˬ naˇ haˬ duˬ-euˬ meh. 8“Naw maꞈ zaˬ kʼoeˇ gʼaˬ-ahˇ yaw duˬ duˬ-ehˇ poˆ-awˇ, ya mawˇ naˇ, tiˬ poˆ tehꞈ-ehˇ ngaˬ-ahˇ bi gaˬ kʼoꞈ laꞈ-awˬ. Ngaˇ gʼeh aˬ yawꞈ-ahˇ uˬ duˬ tahˬ-iˇ ma” lehˇ ehˇ nehˬ-awˇ, Behˬlehˬhehˬ meuˬ-ahˇ bi iˇ-euˬ meh.

9Aˬ yawꞈ maꞈ-ahˇ sahˬ paˬ kʼoeˇ loꞈ-ehˇ ehˇ nehˬ gʼaˬ ngeh, aˬ yawꞈ maꞈ mehˬ hu paw paˇ iˇ-euˬ meh. Nahˇ ma doˆ kʼehˬ paw aˬ yawꞈ maꞈ neh ya mawˇ-euˬ aˬ guiˇ kʼoeˇ siˬ aˬ yawꞈ maꞈ-euˬ mehˬ hu iˇ luꞈ-awˇ, zaˬ nahˬ dehꞈ le taˬ-euˬ jawˇ duˬ kʼoeˇ taˆ iˇ keuˆ ngeh, naˬ leˇ-euˬ meh. 10Aˬ guiˇ kʼoeˇ siˬ-ahˇ aˬ yawꞈ maꞈ ya mawˇ ngeh, laˬ kʼaˬ cehˇ dui dui-euˬ meh. 11Aˬ yawꞈ maꞈ nymˇ laꞈ kʼoeˇ uˇ leˇ ngeh, zaˬ nahˬ hawˇ-eu aˬ ma Maˬliˇ-ahˇ ya mawˇ-awˇ, pawˬ tsuiꞈ pawˬ dmˬ dmˬ-awˇ uˬ duˬ tahˬ-euˬ meh. Aˬ yawꞈ maꞈ neh yuˇ laꞈ-euˬ laꞈ sawˬ deuˬ pyeuꞈ-eu shuiˇ, lawˇ baoˬ, muˇ laˬ, heu deuˬ yuˇ doˆ-awˇ, aˬ yawꞈ-ahˇ damˬ nehˬ-euˬ meh.

12Aˬ yawꞈ maꞈ sahˬ paˬ Heˬloˆ jawˇ gaˇ maˬ ya gʼoꞈ-iˇ ni, yuꞈ maˆ maˆ-eu laꞈ kʼoeˇ Miˬyehˇ neh aˬ yawꞈ maꞈ-ahˇ ehˇ nehˬ-euˬ miˇ neh, yawˬ paw yawˬ gaˇ jaw jaw-awˇ aˬ yawꞈ maꞈ-euˬ miˇ kʼahˬ-ahˇ gʼoꞈ-iˇ-euˬ meh.

Iˇjiˇtuˆ miˇ kʼahˬ-ahˇ cehˆ-euˬ

13Aˬ yawꞈ maꞈ gʼoꞈ-iˇ dzeuˇ ngeh, Yoˇsehˆ yuꞈ maˆ maˆ-eu laꞈ kʼoeˇ Sahˬpaˬ Miˬyehˇ-euˬ mˬ taˆ gʼaˬ kʼehˇ tiˬ gʼaˬ doˆ le-awˇ, heu loꞈ-ehˇ ehˇ-eu meh. “Aˬ li zaˬ nahˬ heu gʼaˬ-ahˇ sehꞈ-eu lehˇ Heˬloˆ poˆ tehꞈ-a. Kʼoeˇ miˇ neh tuˇ-awˇ, aˬ nyaꞈ ma zaˬ-ahˇ sheuˬ-awˇ, Iˇjiˇtuˆ miˇ kʼahˬ-ahˇ cehˆ-awˬ. Ngaˇ nawˬ-ahˇ maˬ ngehˬ cawˬ le kʼoeˇ keuˆ ni, kʼoeˇ gaˇ jawˇ-awˬ.”

14Kʼoeˇ naˇ, Yoˇsehˆ tuˇ-awˇ, aˬ nyaꞈ ma zaˬ-ahˇ sheuˬ-awˇ, uˬ ciꞈ sehˇ gʼahˇ Iˇjiˇtuˆ miˇ kʼahˬ-ahˇ cehˆ-euˬ meh. 15Heˬloˆ shiˇ ngeh keuˆ ni, aˬ yawꞈ pehˬ kʼoeˇ gaˇ jawˇ-euˬ meh. SahˬpaˬMiˬyehˇ neh aˬ yawꞈ gʼaˇ duˬ ngehˬ dah-eu tsawˇ haˬ-ahˇ gʼoe-awˇ ehˇ taˬ-euˬ dawˬ pyeuꞈ-eu, “Ngaˬ li-ahˇ Iˇjiˇtuˆ miˇ kʼahˬ laꞈ kʼoeˇ neh kuˇ doˆ-euˬ ma” lehˇ ehˇ-eu dawˬ kʼoeˇ dawˬ byah laˇ-eu gʼaˇ duˬ, kʼoeˇ loꞈ-ehˇ pyeuꞈ laˇ-euˬ meh.

Aˬ li zaˬ nahˬ deuˬ-ahˇ sehꞈ-euˬ

16Nahˇ ma doˆ kʼehˬ paw neh laˇ-euˬ zaˬ siˬ tsawˇ gahˇ ahˇ-eu tsawˇ haˬ kʼoeˇ deuˬ, aˬ yawꞈ-ahˇ tsawˇ gahˇ gahˇ-awˇ gʼoꞈ dzeuˇ-euˬ gaˇ kawˆ Heˬloˆ ya siˬ duˬ ngeh, nui ma pehˇ dui dui-euˬ meh. Kʼoeˇ ngeh, Behˬlehˬhehˬ meuˬ hawˇ-eu kʼoeˇ-euˬ tahˬ gʼoꞈ tahˬ jawˇ kʼaˇ jawˇ-eu, nyiˬ kʼoꞈ-ahˇ neh laꞈ oˆ paw-euˬ aˬ li zaˬ nahˬ dawˬ tawˆ luꞈ-ahˇ sehꞈ jiˇ-eu gʼaˇ duˬ aˬ yawꞈ dawˬ biꞈ-euˬ meh. Zaˬ siˬ tsawˇ gahˇ ahˇ-eu tsawˇ haˬ kʼoeˇ deuˬ neh aˬ yawꞈ-ahˇ ehˇ nehˬ taˬ-euˬ aˬ guiˇ kʼoeˇ siˬ doˆ laˇ-euˬ aˇ yamˬ shaˇ sawˇ duˬ-awˇ, aˬ li zaˬ nahˬ deuˬ-ahˇ bi sehꞈ-eu gʼaˇ duˬ kʼoeˇ loꞈ-ehˇ dawˬ biꞈ-euˬ meh.

17Kʼoeˇ loꞈ-ehˇ jahˇ-eu laꞈ kʼoeˇ, Miˬyehˇ gʼaˇ duˬ ngehˬ dah-eu Yeˬlaˬmiˇ neh heu loꞈ-ehˇ ehˇ taˬ-euˬ dawˬ byah laˇ-euˬ meh.

18“Tsawˇ ngoeˇ ngoeˇ dui dui-eu teˇ saˇ,

Laˬmahˇ meuˬ-ahˇ gaˬ doˆ laˇ nya.

Laˬkeˬlaˇ ngoeˇ dui dui luꞈ meh.

Zaˬ bi shiˇ byoˆ jiˇ-euˬ miˇ neh,

maˬ muˇ taˬ nya ni ngoeˇ luꞈ meh.”

Iˇjiˇtuˆ miˇ kʼahˬ-ahˇ neh gʼoꞈ doˆ laˇ-euˬ

19Heˬloˆ shiˇ dzeuˇ ngeh jawˇ, Iˇjiˇtuˆ miˇ kʼahˬ-ahˇ Yoˇsehˆ yuꞈ maˆ maˆ-eu laꞈ kʼoeˇ, SahˬpaˬMiˬyehˇ-euˬ mˬ taˆ gʼaˬ kʼehˇ tiˬ gʼaˬ aˬ yawꞈ jawˇ gaˇ doˆ le-awˇ ehˇ-eu, 20“Tuˇ-awˬ. Aˬ nyaꞈ ma zaˬ seuˬ-awˇ Iˇsaˬleˬlaˆ miˇ kʼahˬ-ahˇ gʼoꞈ leˇ-awˬ. Aˬ li-ahˇ sehꞈ-eu lehˇ leh jeh-eu tsawˇ haˬ deuˬ shiˇ jiˇ-euˬ meh.” 21Kʼoeˇ ngeh, Yoˇsehˆ tuˇ-awˇ, aˬ nyaꞈ ma zaˬ-ahˇ sheuˬ-awˇ Iˇsaˬleˬlaˆ miˇ kʼahˬ-ahˇ gʼoꞈ leˇ-euˬ meh.

22Ehˇ kʼawꞈ, Heˬloˆ-euˬ dah zaˇ aˬ yawꞈ-euˬ aˬ li Aˬgeˬlaˇ gʼaˬ Yuˇdaˆ miˇ kʼahˬ-euˬ sahˬ paˬ geuꞈ luꞈ-eu Yoˇsehˆ ya gaˬ ngeh, kʼoeˇ gaˇ maˬ gʼoꞈ leˇ peuˬ-a. Yuꞈ maˆ maˆ-eu laꞈ kʼoeˇ aˬ yawꞈ-ahˇ tiˬ poˆ paˇ mehˬ gahˇ nehˬ-euˬ loꞈ-ehˇ, Gaˬliˬlehˇ miˇ kʼahˬ-ahˇ le-euˬ meh. 23Kʼoeˇ naˇ, Naˬzaˬlehˇ meuˬ-ahˇ aˬ yawꞈ jawˇ-euˬ meh. Miˬyehˇ gʼaˇ duˬ ngehˬ dah-eu tsawˇ haˬ deuˬ neh, Yeˬsuˇ-euˬ gaˇ kawˆ-ahˇ taꞈ leˇ-awˇ, “Aˬ yawꞈ-ahˇ Naˬzaˬlehˇ tsawˇ haˬ lehˇ kuˇ tehꞈ-a” lehˇ ehˇ taˬ-euˬ dawˬ kʼoeˇ dawˬ, kʼoeˇ loꞈ-ehˇ byah laˇ-euˬ meh.

Currently Selected:

Maꞈtehˬ 2: AHK

Highlight

Copy