Maꞈtehˬ 18

Aˬ geu gʼaˬ aˬ cawˬ naˆ maˬ tseˇ huiˬ ta

(Maˬkuˆ 9.33-37; Luˇkaꞈ 9.46-48)

1Kʼoeˇ ngeh, zaˬ lahˇ deuˬ Yeˬsuˇ jawˇ gaˇ laˇ-awˇ ehˇ-eu, “Mˬtaˆ Miˇkʼahˬ laꞈ kʼoeˇ dawˬ tawˆ luꞈ naˆ maˬ tseˇ huiˬ dzehˬ-eu aˬ suˇ gʼaˬ-a.”

2Zaˬ yaw nyiˇ tiˬ gʼaˬ-ahˇ Yeˬsuˇ kuˇ-awˇ, aˬ yawꞈ maꞈ-euˬ gʼahˇ ceh bi yawꞈ-euˬ meh. 3Kʼoeˇ naˇ, aˬ yawꞈ maꞈ-ahˇ heu loꞈ-ehˇ ehˇ nehˬ-euˬ meh. “Ngaˇ naw maꞈ-ahˇ maˇ jawˆ ni ehˇ nehˬ nyaˇ. Naw maꞈ nui ma paˇ-awˇ, zaˬ yaw nyiˇ tiˬ gʼaˬ loꞈ-ehˇ maˬ pyeuꞈ laˇ kʼoeˇ keuˆ ni, Mˬtaˆ Miˇkʼahˬ laꞈ kʼoeˇ naw maꞈ maˬ ya uˇ leˇ-a. 4Yawˬ haˇ yawˬ ha nui ma nahˬ yu ni taˬ-awˇ, zaˬ yaw nyiˇ heu gʼaˬ loꞈ-ehˇ pyeuꞈ laˇ-euˬ tsawˇ haˬ-aˬ, Mˬtaˆ Miˇkʼahˬ laꞈ kʼoeˇ dawˬ tawˆ luꞈ naˆ maˬ tseˇ huiˬ dzehˬ-eu gʼaˬ meh. 5Ngaˬ-euˬ tsawˇ myahˇ uˬ moˆ heu loꞈ-ehˇ gʼeh-eu zaˬ yaw nyiˇ tiˬ gʼaˬ-ahˇ ha-eu tsawˇ haˬ-aˬ, ngaˬ-ahˇ ha gaˇ duˇ-eu meh.

Aˬ cawˬ iˬ baˇ mˇ ni muˇ juˇ juˇ-eu

(Maˬkuˆ 9.42-48; Luˇkaꞈ 17.1,2)

6“Tsawˇ haˬ tiˬ gʼaˬ na, heu loꞈ-ehˇ gʼeh-eu tsawˇ haˬ yaw nyiˇ tiˬ gʼaˬ ngaˬ-ahˇ jah-eu nui ma byoˆ-iˇ ni jahˇ nehˬ naˇ, tsawˇ haˬ kʼoeˇ gʼaˬ-euˬ kawˬ lahˇ-ahˇ lo lehˬ lehˬ ma paꞈ tawꞈ-awˇ, iˬ ma laˆ shaˆ yaw naꞈ tsahˇ-ahˇ bi baꞈ puꞈ sehꞈ-eu zaˬ dzehˬ meh. 7Tsawˇ haˬ zaˬ-euˬ jah-eu nui ma byoˆ-iˇ ni jahˇ-eu gʼawˬ mya jeˬ jaˆ-eu baˬ da neh, miˇ tsaˬ tahˬ kʼawˇ heu aˇ naˆ ni guˆ laˇ paˬ-ehˇ gʼeh-eu nga. Kʼoeˇ loꞈ-ehˇ gʼeh-eu jeˬ aˬ myah luꞈ jaˆ luꞈ meh. Ehˇ kʼawꞈ, kʼoeˇ loꞈ-ehˇ gʼeh-eu jeˬ bi doˆ laˇ ni mˇ-eu tsawˇ haˬ deuˬ ya noeˬ shaˬ dui dui tehꞈ-a.

8“Nawˇ jah-eu nui ma byoˆ-iˇ ni, nawˬ-euˬ aˬ laꞈ neh maˬ ehˇ, aˬ kuiˇ neh maˬ ehˇ, jahˇ-euˬ ngeuˇ naˇ, deuˆ tsehˆ-awˇ biˬ dzeh-awˬ. Aˬ kuiˇ aˬ laꞈ aˇ sehˇ byah-awˇ mˬ maˬ maˬ byaˆ zaˇ ziˇ doꞈ luꞈ-eu miˬ dzaˬ laꞈ kʼoeˇ bi baꞈ puiˆ-eu naˆ maˬ tseˇ, aˬ kuiˇ aˬ laꞈ aˇ sehˇ dahˬ-iˇ-awˇ dehꞈ-eu jeˬ za-eu-aˬ muiˬ dzehˬ tehꞈ-a. 9Nawˬ-euˬ myaˆ nuiˆ baˬ da neh nawˬ-euˬ jah-eu nui ma byoˆ-iˇ-euˬ ngeuˇ naˇ, kʼeuꞈ doˆ-awˇ biˬ dzeh-awˬ. Myaˆ nuiˆ nyiˬ nuiˆ luꞈ tsoꞈ-awˇ shiˬ buiˇ lah ma-ahˇ bi biˬ ahˇ-eu naˆ maˬ tseˇ, myaˆ nuiˆ tiˬ nuiˆ tehꞈ-ehˇ tsoꞈ-awˇ, dehꞈ-eu jeˬ za-eu-aˬ muiˬ dzehˬ tehꞈ-a.

Byoˆ-iˇ-euˬ yawˇ gaˇ kawˆ yaw jeˬ ma jeˬ

(Luˇkaꞈ 15.3-7)

10-11“Tsawˇ haˬ yaw nyiˇ heu loꞈ-ehˇ gʼeh-eu tiˬ gʼaˬ na-ahˇ naw maꞈ yehˬ bawˬ sehˇ lu-ehˇ maˬ ya gʼeh ni yahˇ-awˬ. Mˬ kʼoeˇ taˆ ngaˬ Da-euˬ mehˬ shi, aˬ yawꞈ maꞈ-euˬ mˬ taˆ gʼaˬ kʼehˇ deuˬ aˬ myah luꞈ jawˇ-eu meh lehˇ, naw maꞈ-ahˇ ngaˇ ehˇ-eu ma.#18.10 -11 Jaˇliꞈ tiˬ paˆ na deuˬ laꞈ kʼoeˇ, gaˬ naˇ yaw zaˬ 11 heu loꞈ-ehˇ ahˇ-eu meh. 18.11: Aˬ jeˬ miˇ neh ehˇ naˇ, byoˆ-iˇ-euˬ tsawˇ haˬ deuˬ-ahˇ ka kʼoꞈ-eu gʼaˇ duˬ, Tsawˇhaˬ-euˬ Zaˬmaˇ oe-euˬ meh(Luˇkaꞈ 19.10)*

12“Yawˇ tiˬ yaˇ mawˇ jawˇ-eu tsawˇ haˬ tiˬ gʼaˬ, yawˇ tiˬ mawˇ byoˆ naˇ, aˬ joˆ-ehˇ jahˇ nmˇ lehˇ naw maꞈ noeˬ-eu nya. Gʼoeˬ tseˇ gʼoeˬ mawˇ-ahˇ gawˬ jawˬ-ahˇ bi gaˆ tawˬ yaꞈ-awˇ, byoˆ-iˇ-euˬ yawˇ kʼoeˇ mawˇ-ahˇ poˆ-iˇ tehꞈ-a. 13Aˬ yawꞈ yawˇ kʼoeˇ mawˇ poˆ mawˇ ngeh, maˬ byoˆ-euˬ yawˇ gʼoeˬ tseˇ gʼoeˬ mawˇ-ahˇ naˆ maˬ tseˇ, poˆ mawˇ kʼoꞈ-euˬ yawˇ kʼoeˆ mawˇ-ahˇ laˬ kʼaˬ cehˇ dzehˬ tehꞈ-a lehˇ ngaˇ ehˇ-eu ma. 14Kʼoeˇ loꞈ-ehˇ duˇ ni, mˬ kʼoeˇ taˆ jawˇ-eu naw maꞈ-euˬ Aˬda-aˬ, tsawˇ haˬ yaw nyiˇ heu deuˬ tiˬ gʼaˬ-iˬ maˬ bi byoˆ-iˇ mawꞈ-a.

Mehˇ nmˇ yaw kaˬ mˇ lehˬ-eu gaˇ kawˆ

15Nawˬ-euˬ mehˇ nmˇ#18.15 ‘Mehˇ nmˇ’ lehˇ ehˇ-eu-aˬ, jah-eu tsawˇ haˬ yaw kaˬ ehˇ mawꞈ-eu meh. nawˬ-ahˇ mˇ lehˬ laꞈ naˇ, aˬ yawꞈ jawˇ gaˇ iˇ-awˇ, aˬ yawꞈ-euˬ yaw lehˬ toeˬ mehˬ nehˬ-awˬ. Kʼoeˇ loꞈ-ehˇ jahˇ ngeh, yawˬ ha mehˇ nmˇ yaw kaˬ tehꞈ-ehˇ ciˬ cuˇ ni jahˇ-awˬ. Nawˬ-euˬ ehˇ dawˬ-ahˇ aˬ yawꞈ naˇ haˬ nehˬ laꞈ naˇ, nawˬ-euˬ mehˇ nmˇ-ahˇ nawˇ paˇ za kʼoꞈ-euˬ gaˇ duˇ-eu meh. 16Ehˇ kʼawꞈ, nawˬ neh ehˇ-euˬ gaˇ aˬ yawꞈ maˬ geuꞈ nehˬ laꞈ naˇ, Jaˇ liꞈ laꞈ kʼoeˇ ehˇ taˬ-euˬ loꞈ-ehˇ, kʼaˇ ngehˬ-euˬ yawˬ dawˬ na luꞈ-ahˇ gaˬ-eu tsawˇ kaˬ nyiˬ gʼaˬ smˇ gʼaˬ byah ni bi jawˇ-eu gʼaˇ duˬ, nawˬ nehˬ-ehˇ tsawˇ kaˬ tiˬ gʼaˬ nyiˬ gʼaˬ sheuˬ caw gʼeh-awˬ. 17Aˬ yawꞈ maꞈ-euˬ ehˇ dawˬ-ahˇ kʼawꞈ aˬ yawꞈ maˬ naˇ haˬ naˇ, gaˇ kawˆ kʼoeˇ dawˬ tawˆ luꞈ Ka li zaˬ aˇ muˇ-ahˇ dzawˇ nehˬ-awˬ. Yaw li uˬ duˬ, Ka li zaˬ aˇ muˇ neh mehˬ nehˬ-euˬ gaˇ kʼawꞈ aˬ yawꞈ maˬ geuꞈ naˇ, lawˇ ciꞈ zaˬ deuˬ hawˇ-eu kawˬ taꞈ-eu tsawˇ haˬ deuˬ-ahˇ sawˇ dzeh-eu loꞈ-ehˇ, aˬ yawꞈ-ahˇ kʼawꞈ sawˇ dzeh nehˬ-awˬ.

Laˆ tsoeˬ-eu jeˬ hawˇ-eu bi mˇ-eu jeˬ

18“Naw maꞈ dawˬ tawˆ luꞈ-ahˇ ngaˇ heu loꞈ-ehˇ ehˇ-eu ma. Miˇ tsaˬ kʼoeˇ taˆ naw maꞈ neh kʼaˇ laˆ tsoeˬ-euˬ jeˬ, mˬ kʼoeˇ taˆ kʼawꞈ laˆ tsoeˬ-awˇ, miˇ tsaˬ kʼoeˇ taˆ naw maꞈ neh kʼaˇ bi mˇ-euˬ jeˬ, mˬ kʼoeˇ taˆ kʼawꞈ bi mˇ tehꞈ-a.

19“Kʼoeˇ uˬ taꞈ, naw maꞈ-ahˇ ngaˇ heu loꞈ-ehˇ paˇ ehˇ-eu ma. Naw maꞈ laꞈ kʼoeˇ tsawˇ haˬ nyiˬ gʼaˬ nui ma gm-awˇ, miˇ tsaˬ kʼoeˇ taˆ guiˬ lahˬ shaˇ naˇ, naw maꞈ neh kʼaˇ shaˇ-euˬ jeˬ, mˬ kʼoeˇ taˆ jawˇ-eu ngaˬ Da jahˇ nehˬ laꞈ tehꞈ-a. 20Aˬ jeˬ miˇ neh ehˇ naˇ, ngaˬ-euˬ tsawˇ myahˇ uˬ moˆ tsawˇ haˬ nyiˬ gʼaˬ smˇ gʼaˬ kʼaˇ uiˬ leˇ ngeh, aˬ yawꞈ maꞈ-euˬ gʼahˇ ceh ngaˇ jawˇ ma.”

Dziˇ dzoˆ maˬ byehˇ-eu zaˬ kʼaˆ

21Kʼoeˇ naˇ, Yeˬsuˇ jawˇ gaˇ Beˬtuˆluˆ laˇ-awˇ ehˇ-eu, “Sahˬ paˬ-oˇ, ngaˬ-euˬ mehˇ nmˇ#18.21 ʼMehˇ nmˇʼ lehˇ ehˇ-eu dawˬ tsuiꞈ 18.15-ahˇ haw-awˬ tiˬ gʼaˬ ngaˬ-ahˇ tiˬ poˆ saˇ-iˬ tiˬ poˆ mˇ lehˬ laꞈ naˇ, aˇ myaˆ poˆ keuˆ ni ngaˇ iˬ baˇ ya pyehˬ nehˬ ta. Shiꞈ poˆ keuˆ ni loˇ.”

22Yeˬsuˇ ehˇ-eu, “Shiꞈ poˆ keuˆ ni tehꞈ-ehˇ maˬ ngeuˇ-a. Shiꞈ tseˇ poˆ shiꞈ dmˇ keuˆ ni meh. 23Aˬ jeˬ miˇ neh ehˇ naˇ, mˬ taˆ miˇ kʼahˬ-aˬ, heu loꞈ-ehˇ meh. Tiˬ poˆ-aˬ, sahˬ paˬ tiˬ gʼaˬ aˬ yawꞈ-euˬ zaˬ kʼaˆ deuˬ nehˬ-ehˇ dziˇ dzoˆ sawˇ tsaˬ-eu lehˇ noeˬ tsehˆ-euˬ meh. 24Aˬ yawꞈ dziˇ dzoˆ sawˇ dahˬ beh ngeh, aˬ yawꞈ-ahˇ pyuˇ aˇ lam daˆ-eu zaˬ kʼaˆ tiˬ gʼaˬ-ahˇ, aˬ yawꞈ jawˇ gaˇ sheuˬ uˇ laꞈ-euˬ meh. 25Zaˬ kʼaˆ kʼoeˇ gʼaˬ dziˇ dzoˆ maˬ tsoeˬ tsehˆ nya-a. Kʼoeˇ miˇ neh, aˬ yawꞈ-euˬ gʼawˇ mawˇ hawˇ-eu aˬ yawꞈ-euˬ miˬ sawˇ zaˬ dawˬ tawˆ luꞈ maˬ ehˇ, a yawꞈ kʼaˇ jaˆ-eu jeˬ dawˬ tawˆ luꞈ maˬ ehˇ, ahˬ dzeh jiˇ-awˇ, dziˇ dzoˆ bi tsoeˬ tsehˆ-eu gʼaˇ duˬ sahˬ paˬ neh dawˬ biꞈ-euˬ meh. 26Kʼoeˇ ngeh, zaˬ kʼaˆ kʼoeˇ gʼaˬ sahˬ paˬ-euˬ mehˬ shi pawˬ tsuiꞈ pawˬ dmˬ dmˬ-awˇ, ‘Sahˬ paˬ-oˇ, ngaˬ-ahˇ gʼawˬ shaˬ gaˬ-awˇ tiˬ kʼehˬ oˇ nehˬ laꞈ siˬ. Ngaˇ dziˇ dzoˆ dawˬ tawˆ luꞈ tsoeˬ tsehˆ jiˇ ma’ lehˇ shaˇ-eu meh. 27Kʼoeˇ ngeh, sahˬ paˬ gʼawˬ shaˬ haw gaˬ-awˇ, dziˇ dzoˆ byehˇ nehˬ-awˇ bi gʼoꞈ-iˇ-euˬ meh.

28“Kʼoeˇ naˇ, zaˬ kʼaˆ kʼoeˇ gʼaˬ gʼoꞈ-iˇ-awˇ, aˬ yawꞈ-ahˇ pyuˇ tiˬ yaˇ byaˆ tehꞈ-ehˇ daˆ-eu aˬ yawꞈ-euˬ cawˬ zaˬ kʼaˆ tiˬ gʼaˬ-ahˇ tahˬ puˬ-euˬ meh. Aˬ yawꞈ-euˬ cawˬ kʼoeˇ gʼaˬ-euˬ kuˬ byahˬ-ahˇ aˬ yawꞈ tsuˆ-awˇ, ‘Ngaˬ-euˬ dziˇ dzoˆ tsoeˬ nehˬ laꞈ’ lehˇ kʼaˬ nehˬ-euˬ meh. 29Aˬ yawꞈ-euˬ cawˬ zaˬ kʼaˆ kʼoeˇ gʼaˬ pawˬ tsuiꞈ pawˬ dmˬ dmˬ-awˇ, ‘Ngaˬ-ahˇ gʼawˬ shaˬ gaˬ-awˇ tiˬ kʼehˬ dawˬ neh laꞈ siˬ. Ngaˇ nawˬ-ahˇ dziˇ dzoˆ tsoeˬ tsehˆ nehˬ ma’ lehˇ shaˇ-eu meh. 30Ehˇ kʼawꞈ, kʼoeˇ loꞈ-ehˇ shaˇ gaˇ maˬ naˇ haˬ nehˬ-ehˇ, dziˇ dzoˆ maˬ tsoeˬ tsehˆ kʼoeˇ keuˆ ni, tawˬ-ahˇ nyehꞈ uˇ-awˇ bi jawˇ-euˬ meh. 31Kʼoeˇ loꞈ-ehˇ jahˇ-euˬ gaˇ zaˬ kʼaˆ nui deuˬ ya mawˇ ngeh, nui ma tiˬ pawꞈ-iˬ maˬ saˇ-ehˇ, sahˬ paˬ jawˇ gaˇ le-awˇ, gaˇ kawˆ dawˬ tawˆ luꞈ dzawˇ nehˬ leˇ-euˬ meh. 32Kʼoeˇ ngeh jawˇ, zaˬ kʼaˆ kʼoeˇ gʼaˬ-ahˇ sahˬ paˬ kuˇ-awˇ, heu loꞈ-ehˇ ehˇ nehˬ-euˬ meh. ‘Doeˇ dui dui-eu zaˬ kʼaˆ-oˇ, gʼawˬ shaˬ gaˬ nehˬ laꞈ lehˇ nawˇ shaˇ-eu miˇ neh, nawˇ ngaˬ-ahˇ kʼoeˇ myaˆ myaˆ-ehˇ daˆ-eu dziˇ dzoˆ kʼoeˇ deuˬ dawˬ tawˆ luꞈ, ngaˇ byehˇ nehˬ jiˇ-euˬ maˬ ngeuˇ-a loˇ. 33Ngaˬ neh nawˬ-ahˇ gʼawˬ shaˬ gaˬ nehˬ-euˬ loꞈ-ehˇ, nawˬ-euˬ cawˬ zaˬ kʼaˆ kʼoeˇ gʼaˬ-ahˇ nawˇ gʼawˬ shaˬ gaˬ nehˬ-eu maˬ tsaˬ-a loˇ.’ 34Sahˬ paˬ kʼoeˇ gʼaˬ aˬ yawꞈ-ahˇ nui ma pehˇ dui dui laˇ-awˇ, dziˇ dzoˆ maˬ tsoeˬ tsehˆ jiˇ kʼoeˇ keuˆ ni bi kʼehˬ bi kʼaˆ-eu gʼaˇ duˬ, tawˬ-ahˇ bi nyehꞈ uˇ-euˬ meh.

35Kʼoeˇ gaˇ duˇ ni, naw maꞈ yawˬ ha-euˬ mehˇ nmˇ-ahˇ nui ma laꞈ kʼoeˇ keuˆ ni iˬ baˇ maˬ pyehˬ nehˬ naˇ, mˬ kʼoeˇ taˆ jawˇ-eu ngaˬ Da naw maꞈ-ahˇ kʼoeˇ loꞈ-ehˇ jahˇ nehˬ laꞈ tehꞈ-a.”

Currently Selected:

Maꞈtehˬ 18: AHK

Highlight

Copy