Luˇkaꞈ 5
5
Zaˬ lahˇ bi geuꞈ-eu gʼaˇ duˬ kuˇ beh beh-euˬ deuˬ
(Maꞈtehˬ 4.18-22; Maˬkuˆ 1.16-20)
1Tiˬ nah-aˬ, Geˬneˬsaˬlehˇ lah lah dzeˇ Yeˬsuˇ yawꞈ luꞈ ngeh, Miˬyehˇ-euˬ dawˬ kawˬ naˇ haˬ-eu gʼaˇ duˬ, tsawˇ haˬ aˇ maꞈ maꞈ ma aˬ yawꞈ jawˇ gaˇ tah uˇ le luꞈ-eu meh. 2Kʼoeˇ ngeh, lawˬ nyiˬ laˇ lah lah dzeˇ gʼeu doˆ taˬ-euˬ gaˇ aˬ yawꞈ ya mawˇ-euˬ meh. Ngaˬ shaˬ poˆ-eu tsawˇ haˬ deuˬ lawˬ laꞈ nyiˇ iˇ doˆ-awˇ, za laˆ bu luꞈ-eu meh. 3Lawˬ kʼoeˇ tiˬ laˇ-aˬ, Siˇmoˬ-euˬ lawˬ pyeuꞈ-eu meh. Siˇmoˬ-euˬ lawˬ-ahˇ Yeˬsuˇ uˇ-iˇ-awˇ, lawˬ kʼoeˇ laˇ-ahˇ lah laꞈ kʼoeˇ paw ui cuiˆ dehˬ uˇ gʼeh-eu gʼaˇ duˬ, Siˇmoˬ-ahˇ aˬ yawꞈ kʼehˇ-euˬ meh. Yeˬsuˇ lawˬ laꞈ kʼoeˇ nuiˇ-awˇ, tsawˇ haˬ aˇ maꞈ-ahˇ mehˬ nehˬ tsoˆ nehˬ-euˬ meh.
4Aˬ yawꞈ mehˬ nehˬ tsoˆ nehˬ gʼaˬ ngeh, Siˇmoˬ-ahˇ ehˇ nehˬ-eu, “Iˇ cuꞈ yaw naꞈ paw lawˬ heu gʼeh-awˇ, za dzeh ahˇ gʼeh-awˬ.”
5Siˇmoˬ ehˇ-eu, “Saˬ laˬ-oˇ, nga maꞈ uˬ ciꞈ miˇ lah-ehˇ dzeh dzeh-ehˇ shaˬ-euˬ kʼawꞈ, tiˬ mawˇ-iˬ maˬ dzeh mi-aˬ. Ehˇ kʼawꞈ, nawˇ kʼehˇ-eu miˇ neh ngaˇ dzeh haw ma.” 6Aˬ yawꞈ maꞈ za dzeh ahˇ gʼeh ngeh, ngaˬ shaˬ dzeh uˇ dui dui-euˬ miˇ neh, za pyaˬ-iˇ paˬ-ehˇ pyeuꞈ laˇ-euˬ meh. 7Kʼoeˇ miˇ neh, aˬ yawꞈ maꞈ-ahˇ bi caw ba le-eu gʼaˇ duˬ, lawˬ yawˬ laˇ yawˬ-ahˇ laꞈ dzawˇ dzawˇ-awˇ kuˇ-euˬ meh. Lawˬ kʼoeˇ laˇ oe keuˆ-awˇ, nyiˬ laˇ luꞈ ngaˬ shaˬ nyehꞈ byah-euˬ miˇ neh, ga nuiꞈ-iˇ paˬ-ehˇ pyeuꞈ laˇ-euˬ meh. 8Kʼoeˇ loꞈ-ehˇ pyeuꞈ laˇ-euˬ gaˇ Siˇmoˬ Beˬtuˆluˆ ya mawˇ ngeh, Yeˬsuˇ-euˬ mehˬ shi aˬ yawꞈ pawˬ tsuiꞈ pawˬ dmˬ dmˬ-awˇ ehˇ-eu, “Sahˬpaˬ-oˇ, ngaˇ jawˇ gaˇ neh doˆ-iˇ-awˬ. Ngaˇ-aˬ, iˬ baˇ huiˬ dui dui-eu tsawˇ haˬ tiˬ gʼaˬ ma.”
9Ngaˬ shaˬ kʼoeˇ myaˆ myaˆ-ehˇ mi-euˬ miˇ neh, Siˇmoˬ hawˇ-eu aˬ yawꞈ-euˬ tsawˇ haˬ deuˬ zahˬ dui dui leˇ-euˬ meh. 10Siˇmoˬ nehˬ-ehˇ ngaˬ shaˬ poˆ-eu cawˬ deuˬ pyeuꞈ-eu Zeˬbeˬdehˇ-euˬ aˬ li Yaˬkoˆ hawˇ-eu Yoˇhaˬ aˬ nyaꞈ nmˇ kʼawꞈ, zahˬ dui dui leˇ-euˬ meh. Siˇmoˬ-ahˇ Yeˬsuˇ ehˇ nehˬ-eu, “Taˬ guˆ. Aˬ kaˇ naˇ, nawˬ-ahˇ ngaˬ shaˬ poˆ-eu tsawˇ haˬ maˬ paˇ bi geuꞈ-ehˇ, tsawˇ haˬ poˆ-eu tsawˇ haˬ bi geuꞈ ma.”
11Aˬ yawꞈ maꞈ lawˬ kʼoeˇ nyiˬ laˇ-ahˇ lah lah dzeˇ gʼeu daˆ yaꞈ-awˇ, yawˬ jeˬ na luꞈ byehˇ dzeh yaꞈ jiˇ-awˇ, Yeˬsuˇ mehˬ nah caw teh gʼeh-euˬ meh.
Coiˬ doi tiˬ gʼaˬ-ahˇ bi shawˇ laˇ-euˬ
(Maꞈtehˬ 8.1-4; Maˬkuˆ 1.40-45)
12Yeˬsuˇ meuˬ tiˬ meuˬ-ahˇ jawˇ luꞈ ngeh, gʼawˇ mawˇ mawˇ lah-ehˇ coiˬ doi naˇ byah taˬ-euˬ tsawˇ haˬ tiˬ gʼaˬ aˬ yawꞈ jawˇ gaˇ laˇ-awˇ, aˬ yawꞈ-ahˇ mawˇ ngeh, miˇ tsa awˆ byaˆ-awˇ ehˇ-eu, “Sahˬpaˬ-oˇ, nawˇ jahˇ nehˬ laꞈ mawꞈ naˇ, ngaˇ muiˬ laˇ shawˇ laˇ#5.12 ‘Muiˬ laˇ shawˇ laˇ-eu’ lehˇ ehˇ-eu dawˬ tsuiꞈ, Maꞈtehˬ 8.2-ahˇ haw-awˬ. ni jahˇ nya meh.”
13Yeˬsuˇ aˬ laꞈ cawˬ ja-awˇ, aˬ yawꞈ-ahˇ toeˬ ciˆ-awˇ ehˇ-eu, “Ngaˇ jahˇ nehˬ mawꞈ ma. Muiˬ laˇ shawˇ laˇ-awˬ.” Kʼoeˇ ngeh, coiˬ coi naˇ gawˇ kʼoeˇ tiˬ poˆ tehꞈ-ehˇ byoˆ tsehˆ-euˬ meh. 14Yeˬsuˇ aˬ yawꞈ-ahˇ dawˬ biꞈ-awˇ ehˇ nehˬ-eu, “Tsawˇ haˬ tiˬ gʼaˬ-ahˇ-iˬ maˬ ehˇ nehˬ ni, tiˬ poˆ tehꞈ-ehˇ piˇ ma jawˇ gaˇ le-awˇ, nawˬ-euˬ gʼawˇ mawˇ bi pyehˆ tseˇ haw leˇ-awˬ. Kʼoeˇ naˇ, nawˇ naˇ gawˇ taˬ leˇ-euˬ gaˇ kawˆ tsawˇ haˬ yawˬ gʼaˬ na luꞈ bi siˬ duˬ-eu gʼaˇ duˬ, Moˇseˬ neh dawˬ biꞈ taˬ-euˬ lawˇ-eu shehˇ-eu jeˬ lawˇ-iˇ-awˬ.”
15Ehˇ kʼawꞈ, Yeˬsuˇ-euˬgaˇ kawˆ yaw beh naˆ maˬ tseˇ paˇ gaˬ doeˇ-iˇ-awˇ, aˬ yawꞈ dawˬ mehˬ mehˬ gaˇ naˇ haˬ-eu gʼaˇ duˬ hawˇ-eu, naˇ gawˇ bi laˆ taˬ-eu gʼaˇ duˬ, tsawˇ haˬ aˇ maꞈ deuˬ aˬ yawꞈ jawˇ gaˇ laˇ-euˬ meh. 16Ehˇ kʼawꞈ, ciˬ cuˇ ni gʼeh-eu bawˇ tsahˬ bawˇ dahˇ-ahˇ Yeˬsuˇ iˇ-awˇ, guiˬ lahˬ shaˇ-iˇ-euˬ meh.
Kuiˇ shiˇ laꞈ shiˇ shiˇ gaˇ laˆ taˬ nehˬ-euˬ
(Maꞈtehˬ 9.1-8; Maˬkuˆ 2.1-12)
17Tiˬ nah-aˬ, Yeˬsuˇ mehˬ nehˬ tsoˆ nehˬ luꞈ ngeh, Paˬliˬsehˇ tiˬ paˆ na deuˬ hawˇ-eu, Zahˇ dawˬ kʼoꞈ dawˬ mehˬ-eu saˬ laˬ tiˬ paˆ na deuˬ kʼawꞈ, nuiˇ luꞈ-eu meh. Aˬ yawꞈ maꞈ-aˬ, Gaˬliˬlehˇ miˇ kʼahˬ hawˇ-eu Yuˇdaˆ miˇ kʼahˬ-ahˇ jaˆ-eu meuˬ yawˬ meuˬ na luꞈ hawˇ-eu, Yeˬluˇsaˬlehˬ meuˬ-ahˇ jawˇ-eu oe-euˬ meh. Naˇ-eu gawˇ-eu tsawˇ haˬ deuˬ-ahˇ Yeˬsuˇ laˆ taˬ nehˬ nya ni, Sahˬpaˬ Miˬyehˇ-euˬ baoˬ aˬ yawꞈ nehˬ-ehˇ jawˇ luꞈ-eu meh. 18Tsawˇ haˬ tiˬ maꞈ-aˬ, kuiˇ shiˇ laꞈ shiˇ shiˇ-euˬ tsawˇ ha tiˬ gʼaˬ-ahˇ, yuꞈ zaˇ kʼoeˇ taˆ bi yuꞈ-awˇ baꞈ laꞈ-euˬ meh. Tsawˇ haˬ kʼoeˇ gʼaˬ-ahˇ nymˇ laꞈ kʼoeˇ baꞈ ahˇ gʼeh-awˇ, Yeˬsuˇ-euˬ mehˬ shi baꞈ taˬ leˇ-eu lehˇ aˬ yawꞈ maꞈ leh jeh luꞈ-eu meh. 19Ehˇ kʼawꞈ, tsawˇ haˬ tiˬ teuˇ jawˇ luꞈ-eu miˇ neh, nymˇ laꞈ kʼoeˇ maˬ baꞈ ahˇ gʼeh nya-ehˇ, nymˇ mˬ kʼoeˇ taˆ baꞈ daˆ gʼeh-awˇ, nymˇ mˬ laˆ pehꞈ-awˇ, tsawˇ haˬ kʼoeˇ gʼaˬ-ahˇ yuꞈ zaˇ kʼoeˇ taˆ bi yuꞈ-awˇ, tsawˇ haˬ aˇ maꞈ-euˬ gʼahˇ ceh Yeˬsuˇ-euˬ mehˬ shi aˬ za za-ehˇ pyehˬ ka nehˬ-euˬ meh. 20Aˬ yawꞈ maꞈ kʼoeˇ naˆ naˆ-ehˇ jah gaˇ Yeˬsuˇ ya mawˇ ngeh, naˇ-eu tsawˇ haˬ kʼoeˇ gʼaˬ-ahˇ ehˇ nehˬ-eu, “Cawˬ-oˇ, nawˬ-euˬ iˬ baˇ pyehˬ nehˬ gʼaˬ-euˬ ma.”
21Kʼoeˇ ngeh, Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu Paˬliˬsehˇ deuˬ tiˬ gʼaˬ tiˇ gʼaˬ ehˇ-eu, “Miˬyehˇ-ahˇ yehˬ bawˬ sehˇ lu-ehˇ ehˇ-eu tsawˇ haˬ teu gʼaˬ aˬ suˇ gʼaˬ nga. Miˬyehˇ maˬ ngeuˇ naˇ aˬ suˇ gʼaˬ iˬ baˇ pyehˬ nehˬ nya ta.”
22Aˬ yawꞈ maꞈ kʼoeˇ loꞈ-ehˇ ehˇ luꞈ-eu Yeˬsuˇ siˬ nya-awˇ, heu loꞈ-ehˇ ehˇ nehˬ-euˬ meh. “Naw maꞈ aˬ jeˬ miˇ neh teu loꞈ-ehˇ shaˇ noeˬ luꞈ te. 23‘Nawˬ-euˬ iˬ baˇ pyehˬ nehˬ gʼaˬ-euˬ ma’ lehˇ ehˇ nehˬ-eu awˬ dzehˬ ta loˇ. ‘Tuˇ-awˇ cah-awˬ’ lehˇ ehˇ nehˬ-eu awˬ dzehˬ ta loˇ. 24Tsawˇhaˬ-euˬ Zaˬmaˇ-aˬ, miˇ tsaˬ heu kʼoeˇ taˆ iˬ baˇ pyehˬ nehˬ nya-eu baoˬ jaˆ-eu gaˇ kawˆ, ngaˇ naw maꞈ-ahˇ bi siˬ bi mawˇ ma.” Kʼoeˇ naˇ, kuiˇ shiˇ laꞈ shiˇ shiˇ-euˬ tsawˇ haˬ kʼoeˇ gʼaˬ-ahˇ Yeˬsuˇ ehˇ nehˬ-eu, “Tuˇ-awˇ, nawˬ-euˬ yuꞈ zaˇ baꞈ-awˇ gʼoꞈ-iˇ-awˬ lehˇ, ngaˇ nawˬ-ahˇ ehˇ-eu ma.”
25Aˬ yawꞈ maꞈ-euˬ mehˬ shi tsawˇ haˬ kʼoeˇ gʼaˬ tiˬ poˆ tehꞈ-ehˇ tuˇ laˇ-awˇ, aˬ yawꞈ-euˬ yuꞈ zaˇ baꞈ-awˇ, Miˬyehˇ-ahˇ ja ceuˬ ja ceuˬ-ehˇ iˇ kahˇ-ahˇ gʼoꞈ-iˇ-euˬ meh. 26Aˬ yawꞈ maꞈ dawˬ tawˆ luꞈ zahˬ dui dui leˇ-awˇ, guˆ dui dui-eu laꞈ kʼoeˇ, Miˬyehˇ-ahˇ ja ceuˬ-awˇ ehˇ-eu, “Iˬ nah zahˬ dui dui leˇ paˬ-ehˇ gʼeh-eu jeˬ-ahˇ aˬ dui ya mawˇ-euˬ ma.”
Leˬbiˇ-ahˇ Yeˬsuˇ kuˇ-euˬ
(Maꞈtehˬ 9.9-13; Maˬkuˆ 2.13-17)
27Kʼoeˇ naˇ, Yeˬsuˇ doˆ-iˇ-awˇ, Leˬbiˇ lehˇ myahˇ-euˬ kawˬ taꞈ-eu tsawˇ haˬ tiˬ gʼaˬ kawˬ taꞈ-eu saˇ naˇ-ahˇ nuiˇ luꞈ gaˇ ya mawˇ-euˬ meh. Yeˬsuˇ aˬ yawꞈ-ahˇ ehˇ nehˬ-eu, “Ngaˬ-euˬ mehˬ nah caw teh laˇ-awˬ.” 28Leˬbiˇ tsawˬ tuˇ laˇ-awˇ, yawˬ jeˬ na luꞈ byehˇ dzeh yaꞈ jiˇ-awˇ, Yeˬsuˇ-euˬ mehˬ nah caw teh gʼeh-euˬ meh.
29Kʼoeˇ naˇ, Leˬbiˇ-aˬ, aˬ yawꞈ-euˬ nymˇ laꞈ kʼoeˇ Yeˬsuˇ-ahˇ huiˬ-eu hawˬ byawˇ tiˬ byawˇ lawˇ-euˬ meh. Kawˬ taꞈ-eu tsawˇ haˬ gʼawˬ mya ni hawˇ-eu tsawˇ haˬ nui deuˬ kʼawꞈ, aˬ yawꞈ maꞈ nehˬ-ehˇ hawˬ jeh-ahˇ hawˬ jawˬ jawˬ luꞈ-eu meh. 30Paˬliˬsehˇ deuˬ hawˇ-eu aˬ yawꞈ maꞈ-euˬ aˇ muˇ-ahˇ taꞈ-eu Zahˇ dawˬ kʼoꞈ dawˬ mehˬ-eu saˬ laˬ deuˬ, Yeˬsuˇ-euˬ zaˬ lahˇ deuˬ-ahˇ ehˇ nehˬ-eu, “Aˬ jeˬ miˇ neh kawˬ taꞈ-eu tsawˇ haˬ deuˬ hawˇ-eu iˬ baˇ zaˬ deuˬ nehˬ-ehˇ naw maꞈ dzaˬ taꞈ dawˇ taꞈ te.”
31Aˬ yawꞈ maꞈ-ahˇ Yeˬsuˇ ehˇ nehˬ-eu, “Jawˇ saˇ doˆ luꞈ-eu deuˬ naˇ gawˇ laˆ saˆ-eu gʼaˬ-ahˇ maˬ loˬ-a. Jawˇ saˇ maˬ doˆ-eu deuˬ tehꞈ-ehˇ naˇ gawˇ laˆ saˆ-eu gʼaˬ-ahˇ loˬ-eu meh. 32Aˬ cawˬ yaw zeu baw-eu tsawˇ haˬ deuˬ-ahˇ kuˇ-eu lehˇ ngaˇ oe-euˬ maˬ ngeuˇ. Iˬ baˇ zaˬ deuˬ iˬ baˇ bi noeˬ poˆ ni kuˇ-eu lehˇ oe-euˬ ma.”
Maˬ dzaˬ-eu zahˇ jahˇ-eu gaˇ kawˆ naˇ haˬ-euˬ
(Maꞈtehˬ 9.14-17; Maˬkuˆ 2.18-22)
33Tsawˇ haˬ tiˬ paˆ na deuˬ Yeˬsuˇ-ahˇ heu loꞈ-ehˇ ehˇ-eu meh. “Yoˇhaˬ-euˬ zaˬ lahˇ deuˬ tiˬ kʼehˬ maˬ taˬ ni maˬ dzaˬ-eu zahˇ jahˇ jahˇ-ehˇ guiˬ lahˬ shaˇ-eu meh. Paˬliˬsehˇ deuˬ-euˬ zaˬ lahˇ deuˬ kʼawꞈ, kʼoeˇ loꞈ-ehˇ jahˇ-eu meh. Ehˇ kʼawꞈ, nawˬ-euˬ zaˬ lahˇ deuˬ-aˬ, kʼoeˇ loꞈ-ehˇ maˬ jahˇ ni dzaˬ luꞈ dawˇ luꞈ-eu ngaˬ tawˇ.”
34Yeˬsuˇ aˬ yawꞈ maꞈ-ahˇ ehˇ nehˬ-eu, “Miˬ zaˬ sheuˬ-eu gʼaˬ kʼaˇ jawˇ kʼoeˇ keuˆ ni, oeˇ mˇ baˇ gaˇ laˇ-euˬ daˬ yah deuˬ-ahˇ maˬ dzaˬ-eu zahˇ bi jahˇ nya te loˇ. Maˬ bi jahˇ nya-a. 35Ehˇ kʼawꞈ, miˬ zaˬ sheuˬ-eu gʼaˬ-ahˇ aˬ yawꞈ maꞈ nehˬ-ehˇ maˬ bi jawˇ ni bi sheuˬ byoˆ gʼeh-eu tiˬ nah keuˆ le tehꞈ-a. Kʼoeˇ ngeh jawˇ, aˬ yawꞈ maꞈ maˬ dzaˬ-eu zahˇ jahˇ tehꞈ-a.”
36Yaw jeˬ ma jeˬ heu hmˬ kʼawꞈ, aˬ yawꞈ maꞈ-ahˇ Yeˬsuˇ paˇ ja mehˬnehˬ-euˬ meh. “Tsawˇ haˬ tiˬ gʼaˬ-iˬ mehˬ tsoeˬ yaw shuiꞈ cehˬ pyaˬ-awˇ, mehˬ tsoeˬ yaw cehˇ-ahˇ pehˇ tsahˇ maˬ doꞈ-aˇ. Kʼoeˇ loꞈ-ehˇ jahˇ naˇ, mehˬ tsoeˬ yaw shuiꞈ laˆ pyaˬ gaˇ duˇ-eu uˬ taꞈ, pehˇ tsahˇ yaw shuiꞈ kʼoeˇ mehˬ tsoeˬ yaw cehˇ-ahˇ maˬ dzawˆ leˇ-aˇ. 37Kʼoeˇ gaˇ duˇ ni, tsawˇ haˬ tiˬ gʼaˬ-iˬ aˬ gaꞈ dzaˇ uiˇ shehˆ ahˇ-eu shaˬ kʼoˆ iˇ puˬ yaw oeˇ laꞈ kʼoeˇ, aˬ gaꞈ dzaˇ uiˇ yaw shuiꞈ maˬ shehˆ ahˇ-aˇ. Kʼoeˇ loꞈ-ehˇ jahˇ naˇ, aˬ gaꞈ dzaˇ uiˇ yaw shuiꞈ kʼoeˇ shaˬ kʼoˆ iˇ puˬ yaw oeˇ-ahˇ dzaˬ pehꞈ-eu miˇ neh, aˬ gaꞈ dzaˇ uiˇ kʼaˇ-iˇ jiˇ-eu uˬ taꞈ, shaˬ kʼoˆ iˇ puˬ cawˆ-iˇtehꞈ-a. 38Ehˇ kʼawꞈ, aˬ gaꞈ dzaˇ uiˇ yaw shuiꞈ-ahˇ, shaˬ koˆ iˇ puˬ yaw shuiꞈ laꞈ kʼoeˇ ya shehˆ ahˇ-eu meh. 39Tsawˇ haˬ tiˬ gʼaˬ-iˬ, aˬ gaꞈ dzaˇ uiˇ yaw oeˇ dawˇ gʼaˬ naˇ, yaw shuiꞈ maˬ paˇ dawˇ mawꞈ-aˇ. ‘Yaw oeˇ kuiˇ dzehˬ nya’ lehˇ ehˇ tehꞈ-a.”
Currently Selected:
Luˇkaꞈ 5: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
