Luˇkaꞈ 14

Yeˬsuˇ tsawˇ haˬ tiˬ gʼaˬ-ahˇ laˆ taˬ nehˬ-euˬ

1Jawˇ nah ngeh nah, Paˬliˬsehˇ deuˬ kʼoeˇ taˆ aˬ yuiꞈ aˬ tsu geuꞈ luꞈ-eu tiˬ gʼaˬ-euˬ nymˇ-ahˇ Yeˬsuˇ hawˬ dzaˬ leˇ-euˬ meh. Kʼoeˇ ngeh, aˬ cawˬ aˬ yawꞈ-ahˇ kʼoeˬ sho haw luꞈ-eu meh. 2Aˬ kuiˇ aˬ laꞈ puˬ laˇ-euˬ tsawˇ haˬ tiˬ gʼaˬ aˬ yawꞈ jawˇ gaˇ laˇ-euˬ meh. 3Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu Paˬliˬsehˇ deuˬ-ahˇ Yeˬsuˇ naˇ haˬ-eu, “Jawˇ nah ngeh nah naˇ-eu tsawˇ haˬ-ahˇ laˆ taˬ nehˬ-eu zahˇ dawˬ kʼoꞈ dawˬ-ahˇ bahˬ ta loˇ.”

4Ehˇ kʼawꞈ, aˬ yawꞈ maꞈ dawˬ maˬ tmˇ-ehˇ ciˬ cuˇ ni jawˇ-eu meh. Kʼoeˇ ngeh, naˇ-eu tsawˇ haˬ kʼoeˇ gʼaˬ-ahˇ Yeˬsuˇ kuˇ-awˇ, laˆ taˬ nehˬ-awˇ bi gʼoꞈ-iˇ-euˬ meh. 5Yeˬsuˇ aˬ yawꞈ maꞈ-ahˇ ehˇ nehˬ-eu, “Naw maꞈ laꞈ kʼoeˇ, yawˬ ha-euˬ aˬ li maˬ kaˬ, yawˬ ha-euˬ mawˇ neˇ maˬ kaˬ, Jawˇ nah ngeh nah lah duˬ-ahˇ ga ahˇ naˇ, yaw kawˇ-ehˇ maˬ gʼeu doˆ nehˬ-eu aˬ suˇ gʼaˬ jawˇ te.”

6Aˬ yawꞈ maꞈ dawˬ tiˬ dawˬ-iˬ maˬ ngehˬ kʼoꞈ nya-a.

Daˬ yah geuꞈ-eu hawˇ-eu daˬ yah ha-eu

7Daˬ yah deuˬ aˬ cawˬ taˬ huiˬ-eu nuiˇ duˬ-ahˇ tseˇ tseˇ-ehˇ nuiˇ gaˇ Yeˬsuˇ ya mawˇ ngeh, yaw jeˬ ma jeˬ heu hmˬ ja mehˬ nehˬ-euˬ meh. 8“Aˬ cawˬ nawˬ-ahˇ oeˇ mˇ baˇ-eu bawˬ-iˬ gʼeh gaˇ kuˇ ngeh, aˬ cawˬ taˬ huiˬ-eu nuiˇ duˬ-ahˇ taˬ nuiˇ. Nawˇ naˆ maˬ tseˇ huiˬ dzehˬ mahˇ dzehˬ-eu tsawˇ haˬ-ahˇ kʼawꞈ kuˇ taˬ-euˬ maˬ siˬ. 9Kʼoeˇ loꞈ-ehˇ kuˇ taˬ-euˬ gaˇ zaˬ leˇ ngeh jawˇ, naw nyaꞈ nyiˬ gʼaˬ luꞈ-ahˇ kuˇ-euˬ nymˇ sahˇ gʼaˬ nawˬ-ahˇ, ‘Heu gʼaˬ-ahˇ nawˬ-euˬ nuiˇ duˬ tiˬ poˆ pawˇ nehˬ-iˬ sheˇ’ lehˇ ehˇ le tehꞈ-a. Kʼoeˇ ngeh jawˇ, nawˇ ya shaꞈ dawˇ-awˇ, aˬ cawˬ taꞈ-ehˇ awˆ dzehˬ-eu nuiˇ duˬ-ahˇ ya nuiˇ paˇ-iˇ tehꞈ-a. 10Ehˇ kʼawꞈ, nawˬ-ahˇ aˬ cawˬ kuˇ laˇ ngeh, aˬ cawˬ taꞈ-ehˇ awˆ dzehˬ-eu nuiˇ duˬ-ahˇ nuiˇ-iˇ-awˬ. Nymˇ sahˇ gʼaˬ oe-awˇ, ‘Cawˬ-oˇ, yaw goˇ-ahˇ tiˬ poˆ nuiˇ daˆ leˇ sheˇ’ lehˇ nawˬ-ahˇ ehˇ le tehꞈ-a. Kʼoeˇ ngeh jawˇ, nawˬ nehˬ-ehˇ hawˬ jawˬ jawˬ luꞈ-eu deuˬ dawˬ tawˆ luꞈ-euˬ mehˬ shi, nawˇ myaˆ pyawˬ naˇ mehˇ jaˆ dzehˬ tehꞈ-a. 11Aˬ jeˬ miˇ neh ehˇ naˇ, yawˬ haˇ yawˬ ha taˬ huiˬ-eu tsawˇ haˬ yawˬ gʼaˬ na luꞈ, aˬ cawˬ taˬ nyiˇ nehˬ gaˇ ya daˬ-awˇ, yawˬ haˇ yawˬ ha taˬ nyiˇ-eu tsawˇ haˬ yawˬ gʼaˬ na luꞈ, taˬ huiˬ nehˬ-eu jeˬ-ahˇ za tehꞈ-a.”

12Aˬ yawꞈ-ahˇ kuˇ-awˇ hawˬ byawˇ lawˇ-euˬ nymˇ sahˇ gʼaˬ-ahˇ kʼawꞈ, Yeˬsuˇ heu loꞈ-ehˇ ehˇ nehˬ-euˬ meh. “Nawˇ hawˬ byawˇ lawˇ ngeh, nawˬ-euˬ cawˬ deuˬ, nawˬ-euˬ mehˇ nmˇ deuˬ, nawˬ-euˬ aˬ yuiꞈ aˬ nyiˇ deuˬ hawˇ-eu, nawˬ-euˬ dawˬ peh jawˇ-eu smˇ muiˬ smˇ baw deuˬ-ahˇ taˬ kuˇ. Aˬ yawꞈ maꞈ-ahˇ kuˇ naˇ, aˬ yawꞈ maꞈ kʼawꞈ nawˬ-ahˇ paˇ kuˇ poˆ-awˇ, nawˬ neh jahˇ nehˬ-euˬ loꞈ-ehˇ , nawˬ-ahˇ guiˬ lahˬ paˇ jahˇ kʼoꞈ nehˬ laꞈ tehꞈ-a. 13Ehˇ kʼawꞈ, nawˇ hawˬ byawˇ lawˇ ngeh, shaˬ-euˬ zahˬ-eu tsawˇ haˬ deuˬ, kuiˇ kuˆ laꞈ kuˆ kuˆ-eu tsawˇ haˬ deuˬ, kuiˇ shiˇ laꞈ shiˇ shiˇ-eu tsawˇ haˬ deuˬ hawˇ-eu, myaˆ behꞈ behꞈ-eu tsawˇ haˬ deuˬ-ahˇ kuˇ-awˬ. 14Aˬ yawꞈ maꞈ-ahˇ kuˇ naˇ, aˬ yawꞈ maꞈ nawˬ-ahˇ guiˬ lahˬ maˬ jahˇ kʼoꞈ nehˬ nya-eu baˬ da neh, nawˇ guiˬ lahˬ za tehꞈ-a. Yaw tsaˬ yaw dawˇ tsawˇ ha deuˬ gʼoꞈ dehꞈ laˇ-eu aˇ nah keuˆ laˇ ngeh, Miˬyehˇ nawˬ-ahˇ guiˬ lahˬ jahˇ kʼoꞈ nehˬ laꞈ tehꞈ-a.”

Huiˬ-eu hawˬ byawˇ lawˇ gaˇ kuˇ-euˬ deuˬ

(Maꞈtehˬ 22.1-10)

15Yeˬsuˇ kʼoeˇ loꞈ-ehˇ ehˇ gaˇ ya gaˬ ngeh, aˬ yawꞈ nehˬ-ehˇ hawˬ jawˬ jawˬ luꞈ-eu tsawˇ haˬ tiˬ gʼaˬ aˬ yawꞈ-ahˇ ehˇ-eu, “Miˬyehˇ Miˇkʼahˬ laꞈ kʼoeˇ hawˬ jawˬ ya jawˬ-eu tsawˇ haˬ deuˬ guiˬ lahˬ aˇ naˆ ni huiˬ-eu nga.”

16Ehˇ kʼawꞈ, Yeˬsuˇ aˬ yawꞈ-ahˇ ehˇ kʼoꞈ nehˬ-eu, “Tiˬ poˆ-aˬ, tsawˇ haˬ tiˬ gʼaˬ huiˬ dui dui-eu hawˬ byawˇ tiˬ byawˇ lawˇ-eu lehˇ gʼeh-awˇ, tsawˇ haˬ gʼawˬ mya ni kuˇ taˬ-euˬ meh. 17Hawˬ byawˇ lawˇ-eu aˇ yamˬ keuˆ laˇ ngeh, kuˇ taˬ-euˬ tsawˇ haˬ deuˬ jawˇ gaˇ aˬ yawꞈ-euˬ zaˬ kʼaˆ deuˬ kʼehˇ gʼeh-awˇ,‘Lehˬ hmˬ dah gʼaˬ-euˬ ma. Laˇ-awˬ’ lehˇ bi ehˇ gaˬ-iˇ-euˬ meh. 18Ehˇ kʼawꞈ, aˬ yawꞈ maꞈ yawˬ gʼaˬ na luꞈ tiˬ gʼaˬ tiˬ jeˬ myahˇ myahˇ-ehˇ, maˬ laˇ nya-eu gaˇ kawˆ ehˇ-eu meh. Yaw beh gʼaˬ ehˇ-eu, ‘Ngaˇ deh yaˇ tiˬ kawˬ zeuˇ-euˬ gaˇ ya haw-iˇ nga. Ngaˬ-ahˇ iˬ baˇ taˬ taˬ nehˬ laꞈ lehˇ shaˇ-eu ma.’ 19Yawˬ gʼaˬ yawˬ ehˇ-eu, ‘Ngaˇ mawˇ neˇ ngaˬ gu zeuˇ taˬ-euˬ, deh yaˇ ya tsehˬ haw-iˇ-eu miˇ neh, laˇ-eu maˬ dah nga. Ngaˬ-ahˇ iˬ baˇ taˬ taˬ nehˬ laꞈ lehˇ shaˇ-eu ma.’ 20Tiˬ gʼaˬ paˇ ehˇ-eu, ‘Ngaˇ miˬ zaˬ sheuˬ gʼaˬ-euˬ tiˬ dehˬ pyeuꞈ-eu miˇ neh maˬ laˇ nya nga.’

21“Zaˬ kʼaˆ kʼoeˇ gʼaˬ gʼoꞈ laˇ-awˇ, nymˇ sahˇ gʼaˬ-ahˇ gaˇ kawˆ kʼoeˇ deuˬ dzawˇ nehˬ laˇ-euˬ meh. Kʼoeˇ ngeh, nymˇ sahˇ gʼaˬ nui ma pehˇ laˇ-awˇ, aˬ yawꞈ-euˬ zaˬ kʼaˆ-ahˇ ehˇ nehˬ-eu, ‘Meuˬ laꞈ kʼoeˇ kʼaˇ jaˆ-eu gaˇ ma huiˬ huiˬ nyiˇ nyiˇ doe ni yaw kawˇ-ehˇ iˇ-awˇ, shaˬ zaˬ zahˬ zaˬ deuˬ, kuiˇ kuˆ laꞈ kuˆ deuˬ, kuiˇ shiˇ laꞈ shiˇ deuˬ hawˇ-eu, myaˆ behꞈ deuˬ kuˇ uiˬ laˬ-iˇ-awˬ.’ 22Tiˬ kʼehˬ keuˆ laˇ ngeh, zaˬ kʼaˆ kʼoeˇ gʼaˬ ehˇ-eu, ‘Baw leˬ-oˇ, nawˬ neh ehˇ-euˬ loꞈ-ehˇ kuˇ uiˬ taˬ-euˬ ma. Ehˇ kʼawꞈ, jawˇ duˬ gʼawˬ mya ni ngehꞈ nga siˬ.’ 23Kʼoeˇ ngeh, baw leˬ gʼaˬ zaˬ kʼaˆ kʼoeˇ gʼaˬ-ahˇ ehˇ-eu, ‘Meuˬ-euˬ laꞈ nyiˇ gaˇ jawˬ hawˇ-eu gaˇ ma doe ni tsawˇ haˬ kuˇ laˬ-iˇ-awˇ, ngaˬ-euˬ nymˇ maˬ byah kʼoeˇ byah ni kuˇ byah-awˬ. 24Ngaˬ neh yaw beh kuˇ taˬ-euˬ tsawˇ haˬ kʼoeˇ deuˬ, ngaˬ neh lawˇ-euˬ hawˬ byawˇ heu byawˇ-ahˇ tiˬ gʼaˬ-iˬ maˬ ya myeuꞈ haw-aˇ.”’

Yeˬsuˇ-euˬ zaˬ lahˇ geuꞈ-eu maˬ awˬ-a

(Maꞈtehˬ 10.37,38)

25Tsawˇ haˬ aˇ maꞈ maꞈ ma Yeˬsuˇ nehˬ-ehˇ le luꞈ-eu meh. Aˬ yawꞈ ciˬ pyawˇ-awˇ, aˬ yawꞈ maꞈ-ahˇ heu loꞈ-ehˇ ehˇ nehˬ-euˬ meh. 26“Ngaˬ-euˬ mehˬ nah caw teh laˇ-eu tsawˇ haˬ aˬ geu gʼaˬ maˬ kaˬ, yawˬ ha-euˬ aˬ da aˬ ma, yawˬ ha-euˬ miˬ sawˇ zaˬ, yawˬ ha-euˬ mehˇ nmˇ dmˇ ma deuˬ-ahˇ byehˇ dzeh coeˇ-eu uˬ taꞈ, yawˬ haˇ yawˬ ha maˬ byehˇ dzeh coeˇ naˇ, ngaˬ-euˬ zaˬ lahˇ maˬ geuꞈ nya-a. 27Tsawˇ haˬ aˬ geu gʼaˬ maˬ kaˬ, yawˬ ha-euˬ laꞈ yaꞈ baꞈ-awˇ, ngaˬ-euˬ mehˬ nah maˬ caw teh laˇ naˇ, ngaˬ-euˬ zaˬ lahˇ maˬ geuꞈ nya-a.

28“Naw maꞈ laꞈ kʼoeˇ, huiˬ-eu nymˇ nymˇ goˇ tiˬ nymˇ tsoˆ-eu lehˇ gʼeh ngeh, pyuˇ aˇ myaˆ ni jiˇ leˇ-eu hawˇ-eu, tsoˆ gʼaˬ nya ni pyuˇ loꞈ leˇ maˬ loꞈ leˇ-eu gaˇ kawˆ, jeˬ huˬ nuiˇ-awˇ maˬ sawˇ duˬ ni tsoˆ-eu tsawˇ haˬ aˬ suˇ gʼaˬ jawˇ ta. 29Kʼoeˇ loꞈ-ehˇ maˬ sawˇ duˬ ni dawˬ pehˬ beh-awˇ tsoˆ naˇ, aˇ saˬ maˬ tsoˆ saˬ nya ngeh, aˬ cawˬ ja bu gaˇ ya daˬ tehꞈ-a. 30“Tsawˇ haˬ teu gʼaˬ nymˇ tsoˆ-eu aˇ dahˬ beh nya gaˇ neh, aˇ saˬ maˬ tsoˆ saˬ nya lawˇ hawˇ ngaˬ tawˇ’ lehˇ aˬ cawˬ ehˇ tehꞈ-a.

31“Sahˬ paˬ tiˬ gʼaˬ sahˬ paˬ yawˬ gʼaˬ yawˬ-ahˇ guiˇ deuˆ-eu lehˇ gʼeh ngeh, yawˬ ha-euˬ yehˇ tiˬ muiˇ gʼaˬ tehꞈ-ehˇ, aˬ cawˬ-euˬ yehˇ nyiˬ muiˇ gʼaˬ laˇ luꞈ gaˇ ciˬ daˬ-awˇ deuˆ gʼaˬ nya nga loˇ, maˬ deuˆ gʼaˬ nya nga loˇ lehˇ, jeuˬ huˬ nuiˇ-awˇ maˬ shaˇ sawˇ-aˇ loˇ. 32Maˬ deuˆ gʼaˬ nya paˬ-ehˇ gʼeh naˇ, a cawˬ gaˇ mahˇ kaˬ gaˇ laˇ luꞈ ngeh neh, aˬ yawꞈ-euˬ dah zaˇ tsawˇ haˬ pyehˬ gʼeh-awˇ ja tsaˬ geuꞈ tehꞈ-a. 33Kʼoeˇ loꞈ-ehˇ duˇ ni, naw maꞈ aˬ geu gʼaˬ maˬ kaˬ, yawˬ ha kʼaˇ jaˆ-eu jeˬ dawˬ tawˆ luꞈ-ahˇ maˬ byehˇ dzeh coeˇ naˇ, ngaˬ-euˬ zaˬ lahˇ maˬ geuꞈ nya-aˇ.

Gaˇ dahˇ maˬ tsoeˬ-eu saˬ deuꞈ

(Maꞈtehˬ 5.13; Maˬkuˆ 9.50)

34“Saˬ deuꞈ-aˬ, yaw muiˬ meh. Ehˇ kʼawꞈ, saˬ ca taˆ-eu byoˆ-iˇ naˇ, saˬ ca taˆ laˇ ni maˬ paˇ jahˇ nya meh. 35Kʼoeˇ ngeh jawˇ, miˇ tsaˬ-ahˇ dawˆ kʼawꞈ, miˇ muiˬ maˬ pyeuꞈ-eu uˬ taꞈ, jeˬ yehˆ-ahˇ keuˬ kʼawꞈ, gaˇ dahˇ maˬ tsoeˬ-eu miˇ neh, ya shehˆ dzeh gaˇ keuˆ-eu meh. Naˬ bawˇ kʼaˇ tsoꞈ-eu deuˬ naˇ haˬ-awˬ.”

Currently Selected:

Luˇkaꞈ 14: AHK

Highlight

Copy