Luˇkaꞈ 12

Awꞈ-aꞈ tahˬ kʼoˬ-ahˇ duˇ-eu jeˬ-ahˇ yahˇ-awˬ

(Maꞈtehˬ 10.26,27)

1Tsawˇ haˬ aˇ heˇ aˇ muiˇ gʼaˬ uiˬ laˇ-awˇ, tiˬ gʼaˬ tiˇ gʼaˬ nawˬ tehˬ nawˬ tehˬ-ehˇ shaˬ luꞈ ngeh, Yeˬsuˇ aˬ yawꞈ-euˬ zaˬ lahˇ deuˬ-ahˇ heu loꞈ-ehˇ ehˇ nehˬ-euˬ meh. “Paˬliˬsehˇ deuˬ-euˬ dehˬ tseˬ-ahˇ yahˇ-awˬ. Kʼoeˇ-aˬ, awꞈ-aꞈ tahˬ kʼoˬ#12.1 ‘Awꞈ-aꞈ tahˬ kʼoˬ-ahˇ duˇ-eu’ lehˇ ehˇ-eu dawˬ tsuiꞈ, Maꞈtehˬ 6.2-ahˇ haw-awˬ. -ahˇ duˇ-eu meh. 2Nymˬ-mˇ kʼaˇ dehˬ kaˬ taˬ-euˬ yawˬ jeˬ na luꞈ pah dzeh-awˇ, kʼaˇ zaꞈ taˬ-euˬ yawˬ jeˬ na luꞈ siˬ duˬ laˇ tehꞈ-a. 3Naw maꞈ neh yaw zahˇ laꞈ kʼoeˇ kʼaˇ ehˇ-euˬ yawˬ jeˬ na luꞈ, nah gʼahˇ paw bya cehˆ ni gʼeh ngeh aˬ cawˬ-ahˇ gaˬ leˇ-awˇ, naw maꞈ neh kuˆ lawˆ laꞈ kʼoeˇ kʼaˇ kʼoeˬ saˆ-euˬ yawˬ jeˬ na luꞈ, nymˇ mˬ-ahˇ daˆ leˇ-awˇ guˇ gaˬ tehꞈ-a.

Aˬ suˇ gʼaˬ-ahˇ guˆ-eu tsaˬ ta

(Maꞈtehˬ 10.28-31)

4“Ngaˬ-euˬ cawˬ deuˬ-oˇ, ngaˇ ehˇ nehˬ nyaˇ. Gʼawˇ mawˇ-ahˇ sehꞈ nya kʼawꞈ, kʼoeˇ uˬ taꞈ-ehˇ tiˬ jeˬ-iˬ maˬ jahˇ laˇ nya-eu deuˬ-ahˇ taˬ guˆ. 5Aˬ suˇ gʼaˬ-ahˇ guˆ-eu tsaˬ ta lehˇ, naw maꞈ-ahˇ ngaˇ mehˬ nehˬ nyaˇ. Gʼawˇ mawˇ-ahˇ sehꞈ-eu uˬ taꞈ, shiˬ buiˇ lah ma-ahˇ biˬ ahˇ nya-eu baoˬ jaˆ-eu Miˬyehˇ-ahˇ guˆ-awˬ. Ngaˇ ehˇ gaˇ jah-awˬ. Naw maꞈ aˬ yawꞈ-ahˇ ya guˆ meh.

6“Jaˇ tseuˆ ngaˬ mawˇ-euˬ pehˆ saˬ nyiˬ pehˆ tehꞈ-ehˇ ahˬ-eu maˬ ngeuˇ-a loˇ. Ehˇ kʼawꞈ, jaˇ tseuˆ tiˬ mawˇ-ahˇ keuˆ ni Miˬyehˇ maˬ ngehˇ-a. 7Naw maꞈ-euˬ uˬ duˬ tsehˇ kahˇ-ahˇ keuˆ ni aˬ yawꞈ gui duˬ taˬ jiˇ-euˬ meh. Kʼoeˇ miˇ neh naw maꞈ taˬ guˆ. Myaˬ dui dui-eu jaˇ tseuˆ baˬ maꞈ naˆ maˬ tseˇ, Miˬyehˇ mehˬ shi naw maꞈ poeˬ dzehˬ-eu meh.

Yeˬsuˇ-ahˇ taꞈ-eu hawˇ-eu maˬ taꞈ-eu

(Maꞈtehˬ 10.32,33; 12.32; 10.19,20)

8“Tsawˇ haˬ tiˬ gʼaˬ na ngaˬ-aˇ taꞈ ma lehˇ aˬ cawˬ mehˬ shi ehˇ naˇ, ‘Tsawˇ haˬ kʼoeˇ gʼaˬ ngaˬ-ahˇ taꞈ meh’ lehˇ, Miˬyehˇ-euˬ mˬ taˆ gʼaˬ kʼehˇ deuˬ mehˬ shi Tsawˇhaˬ-euˬ Zaˬmaˇ ehˇ tehꞈ-a. 9Ehˇ kʼawꞈ, tsawˇ haˬ tiˬ gʼaˬ na ngaˬ-ahˇ maˬ taꞈ lehˇ aˬ cawˬ mehˬ shi ehˇ naˇ, ‘Tsawˇ haˬ kʼoeˇ gʼaˬ ngaˬ-ahˇ maˬ taꞈ-a’ lehˇ, Miˬyehˇ-euˬ mˬ taˆ gʼaˬ kʼehˇ deuˬ mehˬ shi Tsawˇhaˬ-euˬ Zaˬmaˇ ehˇ tehꞈ-a.

10“Tsawˇhaˬ-euˬ Zaˬmaˇ-ahˇ ngehˬ bahˬ tmˇ bahˬ-euˬ tsawˇ haˬ-ahˇ, Miˬ yehˇ iˬ baˇ pyehˬ nehˬ nya tehꞈ-a. Ehˇ kʼawꞈ, Muiˬ-eu shawˇ-eu Yaw sahˇ Miˬyehˇ-ahˇ yehˬ bawˬ sehˇ lu-ehˇ ehˇ-eu tsawˇ haˬ-ahˇ, iˬ baˇ maˬ pyehˬ nehˬ nya-a.

11“Naw maꞈ-ahˇ yaˇ kʼaˬ bi daˇ-eu lehˇ, uˬ duˬ tahˬ nymˇ-ahˇ maˬ ehˇ, miˇ kʼahˬ sahˬ paˬ sahˬ ma jawˇ gaˇ maˬ ehˇ, a cawˬ naw maꞈ-ahˇ sheuˬ gʼeh ngeh, aˬ joˆ-ehˇ ya ehˇ kʼoꞈ nehˬ-awˇ, aˬ joˆ-ehˇ ya ngehˬ ya tmˇ-eu gaˇ kawˆ kʼahˬ taˬ lahˇ. 12Aˬ jeˬ miˇ neh ehˇ naˇ, aˇ yamˬ tsaˬ laˇ ngeh, naw maꞈ ya ngehˬ ya tmˇ-eu dawˬ deuˬ, Muiˬ-eu shawˇ-eu Yaw sahˇ Miˬyehˇ naw maꞈ-ahˇ mehˬ nehˬ tsoˆ nehˬ laꞈ tehꞈ-a.”

Smˇ muiˬ muiˬ-eu aˬ dzawˬ aˇ gah

13Tsawˇ haˬ aˇ maꞈ laꞈ kʼoeˇ, tsawˇ haˬ tiˬ gʼaˬ Yeˬsuˇ-ahˇ ehˇ-eu, “Saˬlaˬ-oˇ, ngaˬ da neh bi jaˆ yaꞈ-euˬ jeˬ biˇ ngaˬ-ahˇ paˆ nehˬ-awˬ lehˇ, ngaˬ-euˬ aˇ doˆ-ahˇ tiˬ poˆ ehˇ-iˬ sheˇ.”

14Yeˬsuˇ aˬ yawꞈ-ahˇ ehˇ nehˬ-eu, “Cawˬ-oˇ, naw nyaꞈ nmˇ-ahˇ yaˇ kʼaˬ daˇ-eu gʼaˇ duˬ maˬ ehˇ, jeˬ biˇ paˆ nehˬ-eu gʼaˇ duˬ maˬ ehˇ, aˬ suˇ gʼaˬ neh ngaˬ-ahˇ aˇ yaˬ biꞈ taˬ ta.” 15Kʼoeˇ naˇ, aˬ yawꞈ maꞈ dawˬ tawˆ luꞈ-ahˇ Yeˬsuˇ heu loꞈ-ehˇ paˇ ehˇ nehˬ-euˬ meh. “Pyuˇ shuiˇ myawˬ gahˬ-ahˇ mehˇ juiˇ maˬ ya juiˇ ni yahˇ-awˬ. Aˬ jeˬ miˇ neh ehˇ naˇ, tsawˇ haˬ tiˬ gʼaˬ smˇ muiˬ aˇ naˆ ni muiˬ kʼawꞈ, aˬ yawꞈ-euˬ pyuˇ shuiˇ myawˬ gahˬ baˬ da neh yaw dehꞈ ya dehꞈ-eu maˬ ngeuˇ-a.”

16Kʼoeˇ naˇ, Yeˬsuˇ aˬ yawꞈ maꞈ-ahˇ yaw jeˬ ma jeˬ heu hmˬ ja mehˬ nehˬ-euˬ meh. “Tiˬ poˆ-aˬ, cehˇ za dui dui le-eu deh yaˇ tiˬ kawˬ jaˆ-eu smˇ muiˬ aˬ da tiˬ gʼaˬ jawˇ-eu meh. 17‘Ngaˬ-euˬ cehˇ pi ahˇ kʼaˇ maˬ za-ehˇ pyeuꞈ laˇ taˬ-euˬ miˇ neh, aˬ joˆ-ehˇ jahˇ paˬ maˬ siˬ miˇ-a’ lehˇ, aˬ yawˇ yawꞈ shaˇ noeˬ luꞈ-eu meh. 18Kʼoeˇ naˇ, aˬ yawꞈ ehˇ-eu, ‘Ngaˇ heu loꞈ-ehˇ jahˇ ma. Ngaˬ-euˬ cehˇ jiˇ dawˬ tawˆ luꞈ pyaˆ dzeh jiˇ-awˇ paˇ tsoˆ huiˬ ma. Ngaˬ-euˬ cehˇ dawˬ tawˆ luꞈ hawˇ-eu myawˬ gahˬ dawˬ tawˆ luꞈ, kʼoeˇ gaˇ dawˆ ahˇ-awˇ jeˬ hmˬ taˬ ma. 19Kʼoeˇ naˇ, ngaˇ yawˬ haˇ yawˬ ha heu loꞈ-ehˇ ehˇ ma. Guiˬ lahˬ huiˬ-eu gʼaˬ-oˇ, nawˇ-aˬ, gʼawˬ mya kʼoꞈ gʼawˬ mya la gʼaˇ duˬ pyuˇ shuiˇ myawˬ gahˬ poˆ uiˬ taˬ-euˬ meh. Saˇ lehˆ ni dehꞈ-awˬ. Dzaˬ-awˇ dawˇ-awˇ byawˬ gʼa-awˬ lehˇ ehˇ ma.’ 20Ehˇ kʼawꞈ, aˬ yawꞈ-ahˇ Miˬyehˇ ehˇ nehˬ-eu, ‘Aˬ dzawˬ aˇ gah-oˇ, nymˇ ciꞈ neh nawˬ-euˬ saꞈ laˇ ngaˇ yuˇ kʼoꞈ ma. Nymˬ-mˇ poˆ jawˇ-aˬ, nawˬ neh poˆ uiˬ taˬ-euˬ myawˬ gahˬ deuˬ aˬ suˇ gʼaˬ-euˬ pyeuꞈ-iˇ nmˇ.’

21“Yawˬ ha gʼaˇ duˬ pyuˇ shuiˇ duˬ gahˬ poˆ gahˬ taˬ-euˬ kʼawꞈ, Miˬyehˇ mehˬ shi smˇ muiˬ maˬ muiˬ-eu tsawˇ haˬ deuˬ-aˬ, kʼoeˇ loˆ ni tehꞈ meh.”

Miˬyehˇ-ahˇ gʼoe-awˬ

(Maꞈtehˬ 6.25-34)

22Kʼoeˇ naˇ, zaˬ lahˇ deuˬ-ahˇ Yeˬsuˇ ehˇ nehˬ-eu, “Kʼoeˇ miˇ neh, ngaˇ naw maꞈ-ahˇ heu loꞈ-ehˇ ehˇ-eu ma. Naw maꞈ yaw dehꞈ dehꞈ nya ni ya dzaˬ ya dawˇ-eu gʼaˇ duˬ hawˇ-eu, naw maꞈ-euˬ gʼawˇ mawˇ ya dm ya gʼaˬ-eu gʼaˇ duˬ kʼahˬ taˬ lahˇ. 23Aˬ jeˬ miˇ neh ehˇ naˇ, yaw dehꞈ dehꞈ-eu jeˬ-aˬ, dzaˬ dzaˬ dawˇ dawˇ naˆ maˬ tseˇ poeˬ-awˇ, gʼawˇ mawˇ kʼawꞈ, dm gʼaˬ dm lmˇ naˆ maˬ tseˇ poeˬ-eu meh. 24Awꞈ-aꞈ gaˇ kawˆ shaˇ noeˬ haw sheˇ. Aˬ yawꞈ maꞈ cehˇ maˬ ka-a. Cehˇ maˬ yehˬ-a. Cehˇ jiˇ maˬ baw-a. Kʼaˬ dahˇ maˬ jaˆ-a. Ehˇ kʼawꞈ, aˬ yawꞈ maˬ-ahˇ Miˬyehˇ bi dzaˬ bi dawˇ-eu meh. Naw maꞈ aˇ jiˇ kʼoeˇ deuˬ naˆ maˬ tseˇ poeˬ dzehˬ-eu meh. 25Kʼahˬ lahˇ-eu baˬ da neh yawˬ ha-euˬ dehꞈ ziˇ tiˬ caˆ mahˇ dzehˬ laˇ ni jahˇ nya-eu aˬ suˇ gʼaˬ jawˇ te. 26Kʼoeˇ loꞈ-ehˇ gʼeh-eu nyiˇ dui dui-eu gaˇ-ahˇ kʼawꞈ, naw maꞈ maˬ mˇ nya gaˇ, aˬ jeˬ miˇ neh nui jeˬ gʼaˇ duˬ kʼahˬ lahˇ lahˇ-ehˇ shaˬ te. 27Bawˇ tsahˬ-ahˇ dehꞈ-eu aˇ yehˆ gaˇ kawˆ shaˇ noeˬ haw sheˇ. Aˇ yehˆ kʼoeˇ deuˬ saˬ laˬ maˬ gʼawˇ, saˬ nmˇ maˬ zaꞈ-a. Ehˇ kawꞈ, ngaˇ naw maꞈ-ahˇ ehˇ nehˬ nyaˇ. Yaw shehꞈ kʼahˬ sehˇ huiˬ dui dui-eu sahˬ paˬ Sawˇlaˬmoˬ neh dm-euˬ poeˬ dui dui-eu dm gʼaˬ dm lmˇ-aˬ, aˇ yehˆ kʼoeˇ tiˬ yehˆ naˆ ni kʼawꞈ maˬ haw muiˬ-a. 28Iˬ nah dehꞈ luꞈ kʼawꞈ, ni shawˬ nah miˬ dzaˬ-ahˇ bi jehˆ puiˆ jiˇ-eu jaˆ guˬ jaˆ gaˆ-ahˇ Miˬyehˇ kʼoeˇ naˆ ni bi dm bi gʼaˬ-eu ngeuˇ naˇ, naw maꞈ-ahˇ aˇ naˆ ni paˇ bi dm paˇ bi gʼaˬ nmˇ. Naw maꞈ aˬ jeˬ miˇ neh jah-eu gʼaˬ byehˆ byehˆ te.

29“Kʼoeˇ miˇ neh, dzaˬ dzaˬ dawˇ dawˇ gaˇ kawˆ tehꞈ-ehˇ shaˇ noeˬ shaˇ noeˬ-ehˇ nui maˬ shaˬ zahˬ taˬ mˇ. 30Aˬ jeˬ miˇ neh ehˇ naˇ, lawˇ ciꞈ zaˬ dawˬ tawˆ luꞈ kʼoeˇ jeˬ-ahˇ poˆ luꞈ meh. Naw maꞈ kʼoeˇ jeˬ loˬ meh lehˇ, naw maꞈ-euˬ Aˬda siˬ nya meh. 31Kʼoeˇ jeˬ-ahˇ maˬ poˆ ni, Miˬyehˇ-euˬ miˇ kʼahˬ-ahˇ poˆ-awˬ. Miˬyehˇ naw maꞈ-ahˇ kʼoeˇ jeˬ kʼawꞈ biꞈ nehˬ laꞈ tehꞈ-a.

Mˬ kʼoeˇ taˆ pyuˇ shuiˇ myawˬ gahˬ poˆ uiˬ taˬ-awˬ

(Maꞈtehˬ 6.19-21)

32“Nyiˇ dui dui-eu yawˇ yawˇ maꞈ-oˇ, taˬ guˆ. Aˬ jeˬ miˇ neh ehˇ naˇ, naw maꞈ-ahˇ Miˇkʼahˬ biꞈ-eu gʼaˇ duˬ naw maꞈ-euˬ Aˬda nui ma tsaˬ-eu meh. 33Naw maꞈ-euˬ myawˬ gahˬ ahˬ-awˇ, aˬ cawˬ-ahˇ gamꞈ nehˬ-awˬ. Yawˬ ha gʼaˇ duˬ tiˬ jawˇ-iˬ maˬ peuˬ maˬ oeˇ-iˇ nya-eu pyuˇ pawˬ behˆ guꞈ-awˇ, smˇ kʼoeˬ maˬ kʼoeˬ leˇ nya, boeˬ coeˇ maˬ coeˇ leˇ nya-eu mˬ kʼoeˇ taˆ, pyuˇ shuiˇ myawˬ gahˬ jeˬ hmˬ taˬ-awˬ. 34Aˬ jeˬ miˇ neh ehˇ naˇ, naw maꞈ neh pyuˇ shuiˇ myawˬ gahˬ kʼaˇ poˆ uiˬ taˬ-euˬ tsahˇ-ahˇ, naw maꞈ-euˬ nui ma jaˆ tehꞈ-a.

Yaw muiˬ-ehˇ loꞈ luꞈ-eu zaˬ kʼaˆ deuˬ

35Naw maꞈ joꞈ paꞈ deuˇ geuˆ ni paꞈ-awˇ, tsiˇ kʼmˬ doꞈ taˬ-awˬ. 36Yawˬ ha-euˬ baw leˬ oeˇ mˇ baˇ-eu bawˬ-iˬ gʼeh gaˇ iˇ-euˬ gʼoꞈ laˇ-awˇ, laˇ gʼoˆ-ahˇ kʼoˆ laˇ ngeh, laˇ gʼoˆ ja tawˆ ni pah nehˬ-eu lehˇ loꞈ luꞈ-eu tsawˇ haˬ deuˬ loꞈ-ehˇ, lehˬ hmˬ deuˇ taˬ-awˬ. 37Baw leˬ gʼaˬ gʼoꞈ laˇ ngeh, maˬ yuꞈ kʼaˆ ni loꞈ luꞈ-eu zaˬ kʼaˆ deuˬ guiˬ lahˬ huiˬ tehꞈ-a. Ngaˇ naw maꞈ-ahˇ maˇ jawˆ ni ehˇ nehˬ nyaˇ. Baw leˬ gʼaˬ joꞈ paꞈ paꞈ-awˇ, aˬ yawꞈ-euˬ gʼawˇ mawˇ hawˬ byawˇ laˆ dawˆ nehˬ-awˇ, aˬ yawꞈ maꞈ-ahˇ hawˬ jeh-ahˇ nuiˇ-awˇ bi dzaˬ tehꞈ-a. 38Baw leˬ kʼoeˇ gʼaˬ uˬ ciꞈ sehˇ gʼahˇ maˬ ngeuˇ naˇ ya poeˇ doeˇ taw paw gʼoꞈ laˇ-euˬ kawꞈ, aˬ yawꞈ maꞈ maˬ yuꞈ kʼaˆ ni loꞈ luꞈ gaˇ ya mawˇ naˇ, zaˬ kʼaˆ kʼoeˇ deuˬ guiˬ lahˬ huiˬ dui dui tehꞈ-a. 39Ehˇ kʼawꞈ, heu loꞈ-ehˇ siˬ nya-awˬ. Nymˇ sahˇ gʼaˬ smˇ kʼoeˬ laˇ-eu aˇ yamˬ siˬ nya law nmˇ-aˬ, smˇ kʼoeˬ-ahˇ iˇ kahˇ laꞈ kʼoeˇ maˬ bi daˆ uˇ keuˆ laˇ-aˇ. 40Naw maꞈ yaw muiˬ-ehˇ lehˬ hmˬ taˬ-awˬ. Aˬ jeˬ miˇ neh ehˇ naˇ, naw maꞈ maˬ noeˬ maˬ duˇ-ehˇ jawˇ ngeh, Tsawˇ haˬ-euˬ Zaˬmaˇ oe tehꞈ-a.”

Saˇ jaˇ ziꞈ-eu zaˬ kʼaˆ hawˇ-eu saˇ jaˇ maˬ ziꞈ-eu zaˬ kʼaˆ

(Maꞈtehˬ 24.45-51)

41Beˬtuˆluˆ ehˇ-eu, “Sahˬpaˬ-oˇ, yaw jeˬ ma jeˬ heu hmˬ nga maꞈ-ahˇ tehꞈ-ehˇ ehˇ nehˬ laꞈ te loˇ. Maˬ ngeuˇ naˇ, dawˬ tawˆ luꞈ-ahˇ ehˇ nehˬ te loˇ.”

42Sahˬpaˬ Yeˬsuˇ ehˇ-eu, “Saˇ jaˇ ziꞈ-awˇ zaˬ siˬ tsawˇ gahˇ ahˇ-eu zaˬ kʼaˆ aˬ geu gʼaˬ-a. Aˬ yawꞈ-aˬ, nymˇ jiˇ-ahˇ haw-eu pyaˆ-eu gʼaˇ duˬ hawˇ-eu, zaˬ kʼaˆ nui deuˬ-ahˇ aˇ yamˬ tsaˬ tsaˬ ni bi dzaˬ bi dawˇ-eu gʼaˇ duˬ, baw leˬ neh kʼehˇ taˬ-euˬ zaˬ kʼaˆ kʼoeˇ gʼaˬ meh. 43Baw leˬ gʼaˬ gʼoꞈ laˇ ngeh, zaˬ kʼaˆ kʼoeˇ gʼaˬ kʼoeˇ loꞈ-ehˇ mˇ mˇ-ehˇ jawˇ gaˇ ya mawˇ naˇ, zaˬ kʼaˆ kʼoeˇ gʼaˬ aˇ naˆ ni guiˬ lahˬ huiˬ nmˇ. 44Baw leˬ gʼaˬ zaˬ kʼaˆ gʼaˬ-ahˇ, aˬ yawꞈ-euˬ pyuˇ shuiˇ myawˬ gahˬ dawˬ tawˆ luꞈ kʼoeˇ taˆ haw-eu pyaˆ-eu gʼaˬ bi geuꞈ tehꞈ-a lehˇ, naw maꞈ-ahˇ ngaˇ ehˇ-eu ma. 45Ehˇ kʼawꞈ, zaˬ kaˆ kʼoeˇ gʼaˬ ‘Ngaˬ-eu baw leˬ yaw awˬ awˬ-ehˇ maˬ gʼoꞈ laˇ-aˇ’ lehˇ yawˬ haˇ yawˬ ha ehˇ-awˇ, kʼaˬ dzeˇ zaˬ zaˬ kʼaˆ deuˬ hawˇ-eu zaˬ miˬ zaˬ zaˬ kaˆ deuˬ-ahˇ diˬ diˬ-ehˇ, dzaˬ yehꞈ dawˇ yehꞈ-awˇ jawˇ naˇ, 46tiˬ nah keuˆ laˇ ngeh, zaˬ kʼaˆ kʼoeˇ gʼaˬ maˬ noeˬ maˬ duˇ-ehˇ jawˇ gaˇ, baw leˬ gʼaˬ gʼoꞈ keuˆ le tehꞈ-a. Kʼoeˇ ngeh, baw leˬ gʼaˬ zaˬ kʼaˆ kʼoeˇ gʼaˬ-ahˇ shiˇ taw tehˬ ni diˬ-awˇ, saˇ jaˇ maˬ ziꞈ-eu zaˬ kʼaˆ deuˬ nehˬ-ehˇ tiˬ kawˆ loꞈ-ehˇ bi jawˇ tehꞈ-a.

47“Baw leˬ-euˬ nui kʼahˇ siˬ nya siˬ nya-ehˇ, baw leˬ-euˬ nui kʼahˇ maˬ mˇ-eu zaˬ kʼaˆ-aˬ, yaw kʼaˆ-ehˇ diˬ gaˇ ya daˬ tehꞈ-a. 48Ehˇ kʼawꞈ, baw leˬ-euˬ nui kʼahˇ maˬ siˬ nya-eu miˇ neh bi diˬ paˬ-ehˇ gʼeh-eu jeˬ mˇ bahˬ-euˬ zaˬ kʼaˆ-aˬ, yaw kʼaˆ kʼaˆ-ehˇ diˬ gaˇ maˬ ya daˬ-aˇ. Gʼawˬ mya ni za-euˬ tsawˇ haˬ yawˬ gʼaˬ na luꞈ, gʼawˬ mya ni ya biꞈ tehꞈ-a. Kʼoeˇ myaˆ maˬ tseˇ biꞈ taˬ-euˬ tsawˇ haˬ-ahˇ, kʼoeˇ myaˆ maˬ tseˇ paˇ shaˇ kʼoꞈ tehꞈ-a.

Yeˬsuˇ baˬ da neh gʼawˬ-iˇ gʼehˇ-iˇ-eu

(Maꞈtehˬ 10.34-36)

49“Miˇ tsaˬ-ahˇ miˬ dzaˬ keuˬ doꞈ-eu lehˇ ngaˇ oe-euˬ ma. Nymˬ-mˇ mi naˆ-ehˇ kʼawꞈ, miˬ dzaˬ bi puiˆ mawꞈ miˇ-a. 50Ngaˬ-ahˇ iˇ cuꞈ-ahˇ bi dehˬ uˇ-awˇ, iˇ cuꞈ ya bi shawˇ-a siˬ. Iˇ cuꞈ maˬ shawˇ gʼaˬ kʼoeˇ keuˆ ni, ngaˬ-euˬ nui ma-ahˇ shaˬ zahˬ ciˬ tehˬ taˬ-euˬ gaˇ duˇ nya. 51Miˇ tsaˬ kʼoeˇ taˆ nui saˇ oꞈ-eu jeˬ biꞈ le-eu gʼaˇ duˬ ngaˇ oe-euˬ meh lehˇ naw maꞈ noeˬ te loˇ. Maˬ ngeuˇ. Gʼawˬ-iˇ gʼehˇ-iˇ-eu jeˬ biꞈ le-eu lehˇ oe-euˬ ma. 52Aˬ kaˇ naˇ, tsawˇ haˬ ngaˬ gʼaˬ jawˇ-eu nymˇ jiˇ gʼawˬ-iˇ gʼehˇ-iˇ-awˇ, nyiˬ gʼaˬ tiˬ muˇ, smˇ gʼaˬ tiˬ muˇ muˇ-awˇ, maˬ tsaˬ maˬ dzoeˇ leˇ ni ceh tehꞈ-a. 53Aˬ da hawˇ-eu aˬ li gʼawˬ-iˇ tehꞈ-a. Aˬ ma hawˇ-eu aˬ buˇ gʼawˬ-iˇ tehꞈ-a. Boeˇ miˬ aˬ ma hawˇ-eu kuiˬ ma gʼawˬ-iˇ tehꞈ-a.”

Aˬ yamˬ aˇ law toꞈ-eu

(Maꞈtehˬ 16.2,3)

54Tsawˇ haˬ aˇ maꞈ-ahˇ kʼawꞈ, Yeˬsuˇ heu loꞈ-ehˇ ehˇ nehˬ-euˬ meh. “Nahˇ ma ga kʼehˬ paw mˬ dmˇ daˇ laˇ luꞈ gaˇ ya mawˇ ngeh, ‘Uˬyehˇ yehˇ le-eu ngaˇ’ lehˇ naw maꞈ tiˬ poˆ tehꞈ-ehˇ ehˇ-eu meh. Ehˇ-euˬ loꞈ-ehˇ aˬ diˇ yehˇ le-eu meh. 55Laꞈ oˆ paw pyawˬ-ahˇ-euˬ jaˬ lehˇ baw daˆ laꞈ gaˇ ya mawˇ ngeh, ‘Lahˇ dui dui-eu aˇ yamˬ keuˆ le-eu ngaˇ’ lehˇ naw maꞈ ehˇ-eu meh. Ehˇ-eu loꞈ-ehˇ aˬ diˇ keuˆ le-eu meh. 56Awꞈ-aꞈ tahˬ kʼoˬ-ahˇ duˇ-eu tsawˇ haˬ#12.56 ‘Aw-aꞈ tahˬ kʼoˬ-ahˇ duˇ-eu tsawˇ haˬ’ lehˇ ehˇ-eu dawˬ tsuiꞈ, Maꞈtehˬ 6.2-ahˇ haw-awˬ. deuˬ-oˇ, mˬ hawˇ-eu miˇ-ahˇ naw maꞈ haw-awˇ, uˬ yehˇ uˬ tsaˇ toꞈ nya-eu meh. Toˆ-ehˇ ngeuˇ naˇ, nymˬ-mˇ-euˬ aˇ yamˬ aˇ law-ahˇ aˬ jeˬ miˇ neh naw maꞈ maˬ tseˇ paˆ geuꞈ te.

Nawˬ-ahˇ yaˇ kʼaˬ ja-eu tsawˇ haˬ nehˬ-ehˇ jahˇ tsaˬ geuꞈ-awˬ

(Maꞈtehˬ 5.25,26)

57“Naw maꞈ aˬ jeˬ miˇ neh yaw tsaˬ jeˬ-ahˇ yawˬ haˇ yawˬ ha maˬ shaˇ sawˇ geuꞈ te. 58Nawˬ-ahˇ yaˇ kʼaˬ ja luꞈ-eu tsawˇ haˬ nehˬ-ehˇ yaˇ kʼaˬ daˇ-eu gʼaˬ jawˇ gaˇ le luꞈ ngeh, gaˇ pehˇ-ahˇ naw nyaꞈ yaw kaˬ leh jeh-awˇ jahˇ tsaˬ geuꞈ-awˬ. Maˬ ngeuˇ naˇ, aˬ yawꞈ nawˬ-ahˇ yaˇ kʼaˬ daˇ-eu gʼaˬ jawˇ gaˇ gʼeu gʼeh-awˇ, yaˇ kʼaˬ daˇ-eu gʼaˬ neh aˬ yawꞈ-euˬ laꞈ oˆ gaˇ mˇ-eu deuˬ-ahˇ a nehˬ-awˇ, nawˬ-ahˇ paꞈ kuˆ-ahˇ bi nyehꞈ ahˇ tehꞈ-a. 59Ngaˇ nawˬ-ahˇ ehˇ nehˬ nyaˇ. Pehˆ saˬ tiˬ pehˆ maˬ doˆ jiˇ-ehˇ kʼaˇ dzeˇ kʼoeˇ keuˆ ni, nawˇ paꞈ kuˆ-ahˇ neh maˬ paˇ ya gʼoꞈ doˆ-iˇ-aˇ.”

Currently Selected:

Luˇkaꞈ 12: AHK

Highlight

Copy